Diloñeshenu!
Diloñeshenu!
‘Dichi ninenu nawa diloñeshenu, muloña mpinji yimukubula kutoñojoka diyi yakenzayi Mwana kamuntu.’—MAT. 24:44.
1, 2. (a) Yumanyi yamwekeni yashimwinuwu dehi muwuprofwetu wamuBayibolu yitukwesekeja nakulukuka kwatiger? (b) Indi kulukuka kunakwinza kukuyileñela kwiladi?
HADI yaaka yayivulu, nhemi waya mpuhu wazañalesheleña antu kuhitila mukuhema chiwahi nawatunyama adizishiliyi atenañawu nawu Bengal tigers. Wahosheli nindi: “Neyi kanyama yakukuhwelela, wukutoñojoka neyi anakwinki chawaana chasweja kuwaha mukaayi.” Ilaña hefuku daOctober 3, 2003, wubwambu wamanini. Hamuloña wutunabuli kwiluka, tiger windi wumu wutooka, wadiña namakeji 172, wamulotokeleli. Iwu kanyama wamulotokeleli hampinji yakadi kwiluka, nawa mukwakudizisha hadiloñesheluku.
2 Twatela kwiluka netu Bayibolu yashimwineñahu dehi kulotoka ‘kwakanyama,’ dichi twatela kudiloñesha. (Tañenu Chimwekeshu 17:15-18.) Anyi alotokelañayi iwu kanyama? Neyi mukulabula kwadisu, kaayi kaDiyabolu kanakudambola. Iwu kanyama wuchinana nakwimenaku mutayi waUnited Nations, nawa “nseñu ikumi” jinakwimenaku matuña ejima asweja ñovu. Awa matuña akamubalumukila chivumbi Babiloni Muneni, wanta wansakililu yakutwamba yamukaayi, nawa iwu chivumbi akamujilumuna. Mpinjinyi yakamujilumunawu? Hituneluki ifuku hela mpinjiku. (Mat. 24:36) Tuneluki netu akamujilumuna hampinji yitunabuli kwiluka nawa mpinji yinashaluku hakwila amujilumuni yinakehi dehi. (Mat. 24:44; 1 Kor. 7:29) Dichi, twatela kwikala asoñama kuspiritu kulonda hampinji yakamulukukawu nawa chakenzayi Kristu Mukwakujilumuna, wakekala Mukwakutwamwina! (Luka 21:28) Hakwila nawu twikali asoñama, twatela kudizila kudi ambuña aNzambi ashinshika adiloñesheli nawa amweni namesu kapu chashikijeweli yikaninu yaNzambi. Komana tukwanukaña chikupu iyi yuma yamwekeni?
Diloñeshenu Neyi Chadiloñesheliyi Nowa
3. Yumanyi yamukañesheleña Nowa kumukalakela Nzambi nakashinshi?
3 Hela chakwila kwadiña yuma yatama yaswejeli kutanda heseki hiyana mpinji, Nowa wadiloñesheli kumona kushikijewa kwachikaninu chaNzambi. Toñojokenu hakukala kwamweniyi Nowa hampinji yadibalumwinuwu añelu munyijimba yawuntu nakutachika kwila wuvumbi nawambanda alubanji! Chelili awa añelu asumbuli antu, avweli anyana ataluka, “asweja,” hamuloña wakusweja ñovu ayandishileña antu. (Kutach. 6:4) Toñojokenu handombu yavulumwineña awa amayala asweja kutaluka kwejima kwayileñawu. Chafuminumu, nshidi yaswejeli kutanda nawa yitoñojoka niyililu yawantu yatamini nankashi. Yehova watoñweli mpinji yakujilumuna awa antu atama.—Tañenu Kutachika 6:3, 5, 11, 12. *
4, 5. Munjilanyi munesekeni yuma yinakumwekana munanu mafuku nayamwekeneña mumafuku aNowa?
4 Yesu waprofweteli nindi yuma yinakumwekana makonu yinesekani nayuma yamwekeneña mumafuku aNowa. (Mat. 24:37) Chakutalilahu, anetu nawa anakutuzuñisha kudi aspiritu atama. (Chim. 12:7-9, 12) Awa añelu ekala andemoni avwalili nyijimba yawuntu mumafuku aNowa. Hela chakwila ayilekesha kuvwala nyijimba yawuntu, afwilaña kuluwañesha atwansi niakulumpi. Chakadi antu kwiluka, awa ayivumbi atiyaña kuwaha nayuma yatama niyililu yaheña yakoñañawu antu aluwañeshañawu hamaseki.—Efwes. 6:11, 12.
5 Izu daNzambi damutenaña Diyabolu nawu “mbanji” nawa dahoshaña nawu wukweti ‘ñovu yakuleta kufwa.’ (Yow. 8:44; Heb. 2:14) Ilaña hakweti ñovu yakujaha muntuku. Hela chochu, iwu spiritu wazuwa wadimbaña antu nikuyikokola. Wakojejaña antu kwikala nanyichima niyitoñojoka yakujahañana. Chakutalilahu, hakachi kawanyana 142 avwalikaña muUnited States, wumu wakekala mbanji. Hamuloña wamadombu anasweji kuvula, komana munakutoñojoka nenu Yehova hanakuyimona neyi chayimweniyi mumafuku aNowaku? Komana hakajilumuna ituñaku?
6, 7. Nowa nichisaka chindi amwekesheli ñahi nawu adiña nachikuhwelelu nawa amutiyileña Nzambi woma?
6 Mukuhita kwampinji, Nowa amulejeli kufuukula kwaNzambi kwakuleta dibaji hamaseki, nakukisañana antu ejima. (Kutach. 6:13, 17) Yehova wamulejeli Nowa kutuña watu wamwekeneña neyi chikasha cheneni. Nowa nichisaka chidi atachikili kutuña watu. Chumanyi chayikwashili kwikala namuchima wakwovwahila nikudiloñesha chashikili wunsompeshi waNzambi?
7 Chikuhwelelu chakola nikumutiya Nzambi woma dikwamuleñeleli Nowa nichisaka chindi kwila mwayilejeluwu kudi Nzambi. (Kutach. 6:22; Heb. 11:7) Hakwikala mutu wachisaka, Nowa wadiña wasoñama kuspiritu nawa hadiñijili mukwila yuma yatama yakoñeleñawu antuku. (Kutach. 6:9) Welukili nindi chisaka chindi chateleleli kutondolwela yililu yatama nikubula kwikala nawinyi neyi chadiñawu antu hayina mpinji. Dichi, hiyateleleli kwiñija nyitu yawu muyuma yakoñeleñawu antu mpinji yejimaku. Nzambi wayinkeli mudimu, nawa chisaka chejima chateleleli kuzata iwu mudimu.—Tañenu Kutachika 6:14, 18.
Nowa niChisaka Chindi Adiloñesheli
8. Chumanyi chinakumwekesha nawu chisaka chaNowa chamutiyileña Nzambi woma?
8 Nsañu yamuBayibolu yahoshaña nankashi hadi mutu wachisaka Nowa, iñoda Nowa nianyanindi awamayala niañodi jawu nawu adiña akwakudifukula aYehova. Kaprofwetu Ezekeli niyena wahosheli haniyi nsañu. Wahosheli nindi neyi Nowa wadiñaku mumafuku aEzekeli, anyanindi hiyadi kupulukila kushindamena hakuloña kwatata yawuku. Adiña akulumpi atela kudifuukwila aweni kwovwahila hela kubula kwovwahila. Dichi, amwekesheli nawu amukeñeli Nzambi ninjila jindi. (Ezek. 14:19, 20) Chisaka chaNowa chetejeli mwayilejeliyi tata yawu, nikukuhwelelamu, nawa hiyetejeli antu kuyifumisha kumudimu wayinkeluwu kudi Nzambuku.
9. Anyi makonu anakwimbujola chikuhwelelu chaNowa?
9 Twatiyaña kuwaha hakumona nyitu yayisaka, amana kwetu mukaayi kejima anakudikita nakumwimbujola Nowa. Eluka nawu hiyatela hohu kukeñela yisaka yawu yakudya, yakuvwala, hakukama, nikuyitañisha mashikolaku. Atela kuyakamena cheñi kuspiritu. Chumichi, chinakumwekesha nawu anadiloñeshi kumona yuma yikukeña kwilayi Yehova.
10, 11. (a) Hampinji yadiñawu muwatu, Nowa nichisaka chindi atiyili ñahi? (b) Lwihwinyi lutwatela kudihula?
10 Nowa niñodindi nianyanindi niañodi jawu atela atuñili iwu watu hadi yaaka 50. Hampinji yatuñileñawu watu, atela eñililumu mapampa kakavulu. Awulamikili, ashilumu yakudya yayivulu nawa eñijilumu atunyama. Fwikijenu yuma chiyadiña. Ifuku dakwiñila dinashiki. Eñilili muwatu hefuku da 17 dakakweji kamuchiyedi muchaaka cha 2370 B.C.E. Yehova wenzeli kuchisu, nvula yitachika nikunooka. Hiyadiña nvula yanyanyaku. Makela amwiwulu enzulukili, nakushikena hawatu. (Kutach. 7:11, 16) Antu adi hanji yawatu anakunwina ilaña adi mukachi adi mwoma. Indi chisaka chaNowa chatiyili ñahi? Amushimekeli Nzambi nankashi. Chakadi nikujina, atela atoñojokeli nawu, ‘Twelili chiwahi hakwenda naNzambi walala nikudiloñesha!’ (Kutach. 6:9) Komana munateli kudifwikija munahanuki haAmagedoni nakwiñila mwituña dadiha, munakutumboka nakusakilila?
11 Kwosi chuma chatela kumukañesha Mukwakubadika kwiwulu kubula kushikija chikaninu chindi chakujilumuna dinu ituña daSatana. Mwatela kudihula nenu, ‘Komana nakuhwelela chikupu nami Nzambi wakashikija yikaninu yindi yejima chakadi kushiyahu nichimu nawa yejima yakashikijewa hampinji yatoñolayi?’ Neyi dichimwatoñojokaña, diloñeshenu nikwanuka “ifuku daYehova” didi kwakwihi nakwinza.—2 Pet. 3:12.
Mosi Watwalekeluhu Kwikala Wasoñama
12. Yumanyi yadi kumuluwañesha Mosi kuspiritu?
12 Tutalenu chakutalilahu chikwawu. Kwesekeja nayitoñojoka yawuntu, Mosi wateleleli kwikala nachifulu cheneni nankashi mwituña daEjipitu. Chelili amuhembeli kudi mwana kaFwaro wamumbanda, hadaha amulemesheleña nankashi nawa wadyileña yakudya yayiwahi nankashi, nikuvwala yakuvwala yayiwahi, nikushakama mwamuwahi chikupu. Nawa watañili nankashi. (Tañenu Yililu 7:20-22.) Hadaha wateleleli kutambula maheta amavulu.
13. Indi Mosi washili ñahi maana kuyikaninu yaNzambi?
13 Hekwawu, kufumba kwamufumbiluwu anvwali jindi kwamukwashili Mosi kwiluka nindi hateleli kudibuka kudi ankishi adifukwileñawu antu muEjipituku. (Kwid. 32:8) Mashikola amuEjipitu nimaheta akuchipañu chetala damwanta hiyamuleñeleli Mosi kuleka kudifukula kwalalaku. Watela watoñojokeleña nankashi hayikaninu yaNzambi yakaniniyi ankakulula jindi nawa wadiloñesheli kwila nkeñelu yaNzambi. Mosi walejeli anyana kaIsarela nindi: “Yehova . . . , Nzambi yaAbarahama, Nzambi yaIsaka, Nzambi yaYakoba, diyi nantemeshi kudenu.”—Tañenu Kwidika 3:15-17.
14. Muloñadi Mosi chateleleliyi kwikala nachikuhwelelu niwulobu?
14 Kwambukaku nawankishi emeneneñaku anzambi akadi wumi amuEjipitu, Yehova, Nzambi walala, wadiña naMosi. Muchihandilu chindi wahandileña neyi kwiji nakumona ‘Yena wakamonewaña.’ Mosi wakuhweleleli nindi antu jaNzambi akayifumisha muwunduñu, ilaña helukili mpinjuku. (Heb. 11:24, 25, 27) Wamwekesheli chikupu nindi wakeñeleña aHeberu ayifumishi muwunduñu hampinji yamwininiyi kaIsarela nduñu ahumpwileñawu. (Kwid. 2:11, 12) Ilaña, mpinji yaYehova yachidiña kanda yishiki, nawa Mosi wayili nakubatama kwituña dakwakulehi. Chatela chamukalilili hakushiya chihandilu chachiwahi muchipañu chamuEjipitu nakushakama mumasaña. Hela chochu, Mosi wadiloñesheli kuhitila mukuhemba nshimbi jejima jamulejeluwu kudi Yehova. Nzambi niyena wamuzatishili hakupulwisha ana kwindi hanyima yakushakama yaaka 40 kuMidiyani. Chamulejeluwu kudi Nzambi, Mosi wovwahilili nakufunta kuEjipitu. Mpinji yashikili yakwila Mosi yazati mudimu wamwinkeluwu kudi Nzambi nikuwuzata kwesekeja nachakeñeleñayi Nzambi. (Kwid. 3:2, 7, 8, 10) Chafuntiliyi muEjipitu, Mosi, ‘iyala wamwovu nankashi kubadika amayala ejima,’ wateleleli kwikala nachikuhwelelu niwulobu hakwimana kumesu aFwaro. (Kuch. 12:3) Wayileña nakwimana kumesu amwanta kakavulu hampinji yamwekeneña yipupu, nawa helukileña nindi kunashali yipupu yikwawu nimapampa atela kwimanayi kumesu aFwaroku.
15. Hela chakwila Mosi waneñeli, chumanyi chamukwashili kukeña njila yakumulemeshelamu Tata yindi wamwiwulu?
15 Chimwahitili yaaka yakubadika ha 40, kufuma mu 1513 B.C.E. nakushika mu 1473 B.C.E., Mosi waneñeli. Wakeñeleña njila jakumulemeshelamu Yehova nawa wakolesheleña nankashi akwawu aIsarela kumulemesha Nzambi. (Kuhit. 31:1-8) Muloñadi? Muloña wakeñeli ijina daYehova nichiyuulu chindi kubadika chakeñeliyi ijina dindi yomweni. (Kwid. 32:10-13; Kuch. 14:11-16) Hela chakwila tunakuneña, anetu nawa twatela kutwalekahu kuhakwilaku chiyuulu chaNzambi, nakukuhwelela netu mwelañayi mwamaana, mwaloña, nawa mwabadika chikupu. (Isa. 55:8-11; Yere. 10:23) Komana dichimwatoñojokaña?
Tonenuña!
16, 17. Muloñadi mazu adi haMaku 13:35-37 chiyalemena kudenu?
16 “Babalenu, tonenu, . . . muloña himuneluki mpinji oyuku.” (Maku 13:33) Yesu wahosheli awa mazu akusoñamisha hampinji yashimwiniyi chinjikijilu chakwiluka nachu kukuma kwakanu kaayi katama. Talenu mazu akukumishaku ahosheliyi Yesu muwuprofwetu weneni asonekeliyi Maku nindi: “Tonenu; muloña himuneluki hakenza nkaka yetalaku, kwiji melela, kwiji mukachi kawufuku, kwiji hedikilaña ikombu, kwiji budidi; kuchina kwila chakenzayi chakukasumwisha hakayiwana mutulu. Chinukuyilenu, nayili niantu ejima, nami, Tonenu.”—Maku 13:35-37.
17 Mazu ahosheliyi Yesu atusañumunaña chikupu. Wateneni yibalu yiwana yawufuku yitwatela kwikala atona. Chibalu chakukumishaku himpinji yakala kutona, muloña yatachikaña nampinji ya 3 koloku yabudidi kushika nihakutuntuka itañwa. Antu akuluka yitembi mukulwa njita ahoshaña nawu iyi diyi mpinji yayiwahi yakulukukilamu ayilumbu, henohu achidi “mutulu.” Chochimu nimakonu, kanu kaayi chikanakuholokela mutulu twatweni twakuspiritu, anetu chikutukalila nankashi kwikala atona. Komana tuchidi kujinoka hansañu ‘yakwikala atona’ nawa ‘ababala’ kutalisha hakukuma kwashimwineñawu dehi nikutupulwisha?
18. Hakwikala aYinsahu jaYehova, kukoolekanyi kwabadika kutukweti?
18 Mukwakudizisha atunyama itwashimuna hatachi wapulukili chamulotokeleluwu kudi Bengal tiger. Ilaña wuprofwetu wamuBayibolu washimunaña mwalala nawu nsakililu yakutwamba nikanu kaayi katama jakajilumuka hakukuma kunakwinza. (Chim. 18:4-8) Ambuña aNzambi ejima, atwansi niakulumpi, atela kuzata nañovu chikupu kulonda ekali adiloñesha kumona kwinza kwefuku daYehova neyi chadiloñesheliyi Nowa nichisaka chindi. Tunakushakama mukaayi kamusawulaña Nzambi mudi antañishi jansakililu yakutwamba, niantu amujinookaña Nzambi nawa ahoshaña nawu hikwekala Nzambuku, mutunwa twawu amusupishaña Nleñi. Etu bayi twikala nayitoñojoka yamuchidiwuku. Dichi twanukeña yakutalilahu yitunadizi nikuwana jinjila jakuhakwilamu nikumulemesha Yehova “Nzambi yawanzambi,” nawa “hiNzambi muneni, diyi mukwañovu, wakutiya woma nankashi.”—Kuhit. 10:17.
[Tumazu twaheshina]
^ Neyi munakukeña kwilukilahu nsañu yikwawu kutalisha ‘hayaaka nkulakaji namakumi ayedi’ yashimunawu haKutachika 6:3, talenu Kaposhi Kakutalila, kaDecember 15, 2010, ifu 30.
Munakwanuka?
• Muloñadi Nowa chashiliyi muchima hakukwasha chisaka chindi kuspiritu?
• Indi mpinji yitunakushakamamu yinesekani ñahi namafuku aNowa?
• Hela chakwila waneñeleña, muloñadi Mosi chashililiyi muchima kuyikaninu yaYehova?
• Wuprofwetwinyi wamuBayibolu wukuyikwashaku kwikala atona kuspiritu?
[Malwihu aKuzatisha haKudiza]
[Mwevulu wudi hefu 25]
Nowa nichisaka chindi ashili muchima hamudimu waYehova
[Mwevulu wudi hefu 26]
Yikaninu yaNzambi yamukwashili Mosi kutwalekahu kwikala wasoñama
