Mukuhwelelenu Yehova Chineli Kukuma Hikukuswila Kwakwihi

“Mukuhwelelenu Yehova haya nyaka.”—ISA. 26:4.

1. Chaambwinyi chidi hakachi kawambuña aNzambi nawantu amwituña?

 TUNAKUSHAKAMA mwituña mudi antu amavulu abula kwiluka muntu hela chuma chatela kukuhwelelawu, hadaha muloña ayineñesheli hela kuyitiyisha nsonyi kakavulu. Ilaña hadi chaambu cheneni nawambuña aYehova. Hamuloña wakuyilombola namaana aNzambi, eluka chikupu muntu atela kukuhwelelawu chatela kukuhwelela adinu ituña hela “ayilolu.” (Mas. 146:3) Ilaña, ashaña wumi wawu nichihandilu chawu chakumbidi mumakasa aYehova, muloña eluka nawu wayikeña nawa mpinji yejima welaña mwahosha Izu dindi.—Rom. 3:4; 8:38, 39.

2. Mazwinyi ahosheliyi Yoshuwa anakumwekesha nawu Nzambi welaña mwahoshañayi?

² Yoshuwa wakushankulu wahosheli nindi Nzambi welaña mwahoshañayi. Chikwashalili mpinji yantesha nakufwa, wayilejeli akwawu  aIsarela nindi: “Enu muneluki nanyichima yenu yejima, nawumi wenu wejima, nenu hikunakañanyi chuma chachiwahi nichimu chayiteneniyi Yehova Nzambi yenuku, yejima munayimoni.”—Yosh. 23:14.

3. Ijina daNzambi damwekesha nawu himuntu wamuchidinyi?

³ Yehova wakoñaña mwakanañayi, bayi neyi hamuloña wakukeña ambuñindi hohuku, ilaña sweje-e hamuloña wejina dindi. (Kwid. 3:14; 1 Sam. 12:22) Kutalisha hejina daNzambi, mazu akutachikilahu amu The Emphasized Bible, yasonekawu kudi J. B. Rotherham, yashimuna nawu: “Ichi hichikaninu chasweja kulema; Nzambi nateli kwikala mwomunakeñiyi kwesekeja nayuma chiyidi, kwesekeja nakukala kudi kwejima, yuma yejima yikumwekana . . . Hichikaninu, . . . hichimwekeshu, hichanukishu, hikudishilamu. Nzambi wukatwalekahu kwikala washinshika kwijina dindi; hamba Katiya nsonyi nejina dinduku.”

4. (a) Mukanda waIsaya 26:4 wunakutukolesha nawu twili chumanyi? (b) Yumanyi yitukuhanjekahu muchinu chibaaba?

⁴ Dihulenu nenu: ‘Komana namwiluka Yehova chiwahi chikunleñela nimukuhweleli chikupu? Komana nakuhwelela nami yuma yamba kawaha kumbidi chineli Nzambi wabadika?’ Mukanda waIsaya 26:4 wahosha nawu: “Mukuhwelelenu Yehova haya nyaka, muloña mudi Ya, Yehova, dimu mwilola dahaya nyaka.” Hela chochu, Nzambi hakiñaña antu muchihayamisha neyi chayikiñileñayi kunyimaku. Chineli diyi ‘Ilola dahaya nyaka,’ twatela kumukuhwelela “haya nyaka.” Indi Nzambi yetu itwakuhwelela wakwashaña ñahi akwakudifukula indi ashinshika makonu? Tutalenu njila jisatu mwayikwashilañayi: Watwinkaña ñovu yakukañesha kweseka neyi tumulomba, watukwashaña neyi antu anakutudiwula nikutukañesha nawa watukoleshaña neyi kudi yuma yayivulu yitunakwakama. Chitukutalaña hayumiyi, toñojokenu chimwatela kusweja kumukuhwelela Yehova.

Mukuhwelelenu Nzambi Neyi Muholokela Mukweseka Kwakwila Yuma Yatama

5. Kutalisha hansañu yakumukuhwelela Nzambi, munjilanyi mutunateli kuholokela mukweseka kweneni?

⁵ Twamukuhwelelaña Yehova neyi tutoñojoka hachikaninu chindi chaParadisa hela chakusañuka, iyi diyi yuma yitwafwilaña. Ilaña chinateli kutukalila hakwila nawu tumukuhweleli neyi hitukufuukulahu hansañu yakulondela nshimbi jaloña, nikukuhwelela chikupu netu neyi tulondela njila jindi ninshimbi jindi jaloña kukutuletela muzañalu waweni. Mwanta Solomoni wasonekeli awa mazu nindi: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.” (Yish. 3:5, 6) Talenu izu dinashimunuwu munsona nawu “njila” jetu. Eñañi, twatela kumukuhwelela Nzambi muchihandilu chetu chejima bayi hohu hamuloña wakuchiñeja kutwachiñejaña etu akwaKristuku. Tunateli kumwekesha ñahi netu twamukuhwelela neyi tuholokela mukweseka?

6. Tunateli kwikala ñahi namuchima wakutondolwela yitoñojoka yaheña?

⁶ Kuleka yuma yatama kwatachikilaña muyitoñojoka. (Tañenu Aroma 8:5; Aefwesesa 2:3.) Hanu dinu munateli kwikala ñahi namuchima  wakutondolwela yitoñojoka yaheña? Talenu haniji njila jitanu: 1. Lombenu kudi Nzambi kulonda yayikwashi. (Mat. 6:9, 13) 2. Toñojokenu chikupu hayakutalilahu yamuBayibolu yawantu akañenyi kumutiyilila Yehova niyawantu amutiyililili. Talenu yuma yafuminumu. * (1 Kor. 10:8-11) 3. Toñojokenu chimunateli kuneña nikuneñesha antaña jenu hamuloña wakukoña nshidi. 4. Toñojokenu cheñi chaneñañayi Nzambi neyi kambuñindi wumu yakoña nshidi yahamesu bwi-i. (Tañenu Masamu 78:40, 41.) 5. Toñojokenu hamuzañalu watiyañayi Yehova neyi yamona kambuñindi washinshika yakaana kwila yuma yatama nakwila yuma yayiwahi, chili kumbadi chili hamesu awantu. (Mas. 15:1, 2; Yish. 27:11) Anenu nawa munateli kumukuhwelela Yehova.

Mukuhwelelenu Nzambi Neyi Antu Anakuyidiwula niKuyikañesha

7. Yeremiya waholokeleli mukweseka kwamuchidinyi nawa mpinji yikwawu watiyileña ñahi?

⁷ Amana kwetu amavulu azatilaña mumaluña akala nankashi. Kaprofwetu Yeremiya niyena wazatilileña mwiluña damuchidiwu, muwanta waYuda hampinji yiwadiña mumafuku akukuminina. Chikuhwelelu chindi achesekeleña hefuku hefuku muloña wakwovwahila lushimbi lwakushimuna mazu aNzambi awunsompeshi. Mpinji yimu, Baruki, nsoneki yindi washinshika, niyena wadineñeli. (Yere. 45:2, 3) Komana Yeremiya wazeyeli hamuloña wachineñi? Mpinji jikwawu, waneñeleña. Wabidikili nindi: “Ifuku dinavwalikili diikali dashiñewa.” Wahosheli cheñi nindi: “Indi ami nedikililidi mwivumu nimonaña kukabakana nayihuñu, mwaka mafuku ami amanaña nansonyi?”—Yere. 20:14, 15, 18.

8, 9. Kwesekeja naYeremiya 17:7, 8 niMasamu 1:1-3, chumanyi chitwatela kwila kulonda tusoñeña nyikabu yayiwahi?

⁸ Ilaña, Yeremiya hazeyeluku. Watwalekeluhu kumukuhwelela Yehova. Chafuminumu, iwu kaprofwetu washinshika wamweni kushikijewa kwamazu aYehova asonekawu haYeremiya 17:7, 8: “Muntu wakuhwelela Yehova, wakwila chikuhwelela chindi yowu Yehova hohu, wakooleka. Muloña yena wakekala neyi mutondu wakutumba kumeji, watanjika nyiji yindi kukaloña; chikukwinza nkanza hakatiya womaku, mafu indi saña atuutilawu zo-o. Hamwaka wayaaña hakaakamaku, hakaleka kusoña nyikabuku.”

⁹ Kufwana mutondu wamukabu wawuwahi “wakutumba kumeji” hela itempa danyikabu datukumwinañawu, Yeremiya ‘halekeli kusoña nyikabuku.’ Hetejeli akwakudimbulula atama kumuluwañeshaku. Ilaña, wakakeleli kuNsulu ‘yamenji’ awumi nawa wahembeli nshimbi jejima jamulejeluwu kudi Yehova. (Tañenu Masamu 1:1-3; Yere. 20:9) Yeremiya watwimikilili chakutalilahu chachiwahi, sweje-e kudi antu amukalakelaña Nzambi mumaluña akala kushimwina. Neyi munakumona kukala kwamuchidiwu, twalekenuhu kumukuhwelela Yehova chikupu, wukuyinka ñovu yakuumika hampinji ‘yitunakutiyakesha ijina dindi hatooka.’—Heb. 13:15.

10. Nkiswinyi yitukweti nawa twatela kudihula netudi?

¹⁰ Yehova watwinka yuma yayivulu yikutukwasha kuumika kukala kutunakumona munanu mafuku akukuminina. Hakachi kayuma yatuloñeshelayi, watwinka Izu daNzambi, dinakubalumunawu chiwahi mumadimi amavulu nankashi. Watuloñeshelaña yakudya yayivulu yakuspiritu yatwinkañawu hampinji yatelela kuhitila mwizanvu danduñu wamana nikashinshi. Nawa watwinka amabwambu jetu akakwitiya amavulu nankashi atukwashaña itwadiwanaña nawu hakupompa kwanyanya nikwamaneni. Komana mwazatishaña iyi yuma yatuloñeshelawu? Antu ejima azatishaña yumiyi, “akembaña tumina twachiseki mumuchima.” Ilaña antu abulaña kumutiyilila Nzambi ‘akadilaña nayihuñu mumuchima nawa akakaloka nakubaloka nyichima.’—Isa. 65:13, 14.

Mukuhwelelenu Nzambi Hampinji Yimunakumona Kukala

11, 12. Neyi tushinshika hakukala kudi mumpata yamunu mwishina, kudihi kutunateli kuwana maana alala?

¹¹ Neyi chashimwineñawu dehi, muchidi wawantu  wunakumona kukala kweneni hama. (Mat. 24:6-8; Chim. 12:12) Neyi kwikala dibaji, antu atemukilaña kujimpidi hela kukandama hewulu damatala indi kwiji kwazanduka. Chochimu, chineli kukala mukaayi kunakuswejelaku, antu amavulu adikiñaña kuhitila mukwiñila munyitayi yamali, yajipolitiki, hela yajinsakililu, kushilahu tuhu mujasayansi nimujakutuñatuña. Ilaña nyitayi yejimiyi hiyayikiñaña chikupuku. (Yere. 17:5, 6) Ilaña ambuña aYehova, akweti chiswamu chalala, ‘Ilola dahaya nyaka.’ (Isa. 26:4) Ñimbi yamasamu wahosheli nindi: ‘[Yehova] diyi ilola dami hohu kanka windi, diyi wamwinu wami, diyi kaposhi kami kakalehi kakutemukila.’ (Tañenu Masamu 62:6-9.) Tunateli kwilisha ñahi idi Ilola kwikala chiswamu chetu?

¹² Twakakelaña kudi Yehova neyi tulondela nshimbi yaMwizu dindi, yambuka chikupu namaana awantu. (Mas. 73:23, 24) Chakutalilahu, antu ahuñumunawu namaana awantu anateli kuhosha nawu: ‘Ichi dichihandilu chiwukweti hohu, watela kuchizatisha chikupu.’ ‘Watela kwiñila mudimu wawuwahi.’ ‘Watela kwikala namali amavulu.’ ‘Landaku yuma yejima yiwunakukeña.’ ‘Watela kwenda nakumona matuña.’ Ilaña, maana aNzambi endelaña hamu nakufumba kwakwila nawu: ‘Akwataña kuyuma yamunu mwishina ekali neyi abulaña kukwataku chikupu. Muloña yuma yampata yinu chiyidichi, yahitaña.’ (1 Kor. 7:31) Cheñi nawa, Yesu watukonkomwena nindi mpinji yejima tutwamijeñaku Wanta kulonda ‘tudilumbikili maheta mwiwulu,’ mwakayihembawu chachiwahi.—Mat. 6:19, 20.

13. Kwesekeja nachahosha 1 Yowanu 2:15-17, twatela kudihula netudi?

¹³ Komana yililu yenu kutalisha ‘hampata yamunu mwishina’ ‘niyuma yampata yamunu mwishina’ yamwekeshaña nawu mwamukuhwelela Nzambi chikupu? (1 Yow. 2:15-17) Komana mwakeñesha nikulemesha nankashi maheta akuspiritu nimudimu waWanta kubadika yuma yekoku yamukaayi? (Fwi. 3:8) Komana mwafwilaña kwikala ‘nadisu datala mumu hohu’? Hela chochu, Nzambi hakeñaña nindi mwikali adumbilila hela akatalaku, sweje-e neyi mukweti chisaka. (1 Tim. 5:8) Ilaña wakeñaña nindi ambuñindi amukuhweleli yena hohu, bayi kaayi kaSatana kakukeña kukisikaku.—Heb. 13:5.

14-16. Indi antu amakwawu ahetelamu ñahi mukwikala ‘nadisu datala mumu hohu’ nikutwamijaku Wanta muchihandilu chawu?

¹⁴ Talenu chuma cheliluwu aRichard niRuth, anvwali akweti nyana yanyanya yisatu. Richard wahosheli nindi: “Muchima wami walejeleña nawu nateli kumukalakela Yehova nankashi.” Watwalekeluhu nindi, “Nadiña nachihandilu chachiwahi, ilaña natoñojokeli nami hinamuzatilileña Nzambi chikupuku. Chinalombeli kudi Nzambi haniku kukala nikuchinda mali inukutambulaña, ami niñodami Ruth twaditejeli netu nukuya nakumuleja mukulumpi wanyidimu kulonda nizateña mafuku awana mumulungu, hela chakwila mali akalili nankashi mwituña. Mukulumpi wanyidimu wetejeli nawa natachikili kuzata kwesekeja namutwafuukwili mukakweji kokamu.” Chayinu mpinji Richard nakutiya ñahi?

¹⁵ Wahosheli nindi, “Natambulaña mali antesha hohu, ilaña nikweti mafuku 50 inabulaña kuzata muchaaka akushakama hamu nachisaka chami nikudizisha anyanami. Ichi mpinji yinazataña mumudimu wamwiha yinavuliluku namapampa kayedi, niatudizi aBayibolu anavuliluku mapampa kasatu, nawa inakukalakala chikupu muchipompelu. Nawa chineli nikweti mpinji yeneni yakutala anyana, iñodami Ruth watweshaña kuzataku wupayiniya wakukwasha  mumpinji mumpinji. Inakukeña kutwalekahu naniyi ndandanda yinatanjika hadi mpinji yeneni.”

¹⁶ Roy nimwinikwindi Petina, achidi kuhemba mwanawu wamumbanda, akehesheluku mafuku akuzata kulonda ekaleña nampinji yakuzata mpinji yejima mumudimu wakushimwina. Roy wahosheli nindi, “Nazataña mafuku asatu mumulungu, iñodami Petina wazataña mafuku ayedi. Twafumini mwitala deneni nakuya mukaditala kanyanya nawa wuseya wakeheluku. Twazatileña mudimu wawupayiniya henohu kanda twikali namwana weyala niwamumbanda, nawa twatwalekeluhu kwikala nampwila yakuzata mumudimu wawupayiniya. Dichi, chelili anyanetu anakuli dehi, twatachikili cheñi mudimu wampinji yejima. Nkisu jitunatambwili hijikwesekana namali amavuluku.”

Etejenu “Kuwunda kwaNzambi” Kuhembi Muchima Wenu

17. Kwesekeja nakukala kutunakumona muchihandilu, indi Nsona jinayikundeji ñahi?

¹⁷ Kwosi weluka yuma yakamwekana kumbiduku, muloña “mpinji nakululakana” chatululakenaña tuhu wejima wetu. (Mukwa. 9:11) Hela chochu, bayi tutachika kuneña hamuloña wakwakama yuma yakamwekana kumadikiku, neyi chakamañawu antu abula wakuyikiña hamuloña wakubula kwikala nawubwambu wawuwahi naNzambi. (Mat. 6:34) Kapostolu Pawulu wasonekeli nindi: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu niyitoñojoka yenu.”—Fwi. 4:6, 7.

18, 19. Munjilanyi mwatukundejelañayi Nzambi? Lumbululenu.

¹⁸ Amana kwenu niahela amavulu adi mukweseka adi namuzañalu waweni nikuwunda kwafumaña kudi Yehova. Muhela wumu wahosheli nindi: “Ndotolu watwalekeluhu nakunchinisha nindi niteji kuñusha mashi. Mazwindi atachi afumineña mukanwa kindi adiña akwila nindi, ‘Indi awa majilu inakumona akwila nawu mashi nehi hiyumanyi?’ Haniyi mpinji nimpinji jikwawu, nalombeleña wumweneni kudi Yehova, nawa kuwunda kwindi kwawudishileña muchima wami. Chikuhwelelu chami chakoleli neyi ilola. Hela chakwila nazeyeleña muloña wakukeha mashi mumujimba, natwesheleña kuhakwilaku chikuhwelelu chami kuzatisha Nsona.”

¹⁹ Mpinji yikwawu Nzambi watukwashilaña mudi akwetu akakwitiya atukundejaña hela muyakudya yakuspiritu yatwinkañawu hampinji yatelela. Hadaha mwatiyahu dehi mana kwetu hela muhela nakuhosha nindi: “Iyi nsañu yidi munichi chibaaba diyi yinakeñaña. Yidi tuhu neyi ansonekelami!” Eñañi, hichikweti muloña nakukala kunateli kutumwekenaku, Yehova nateli kutumwekeshela kukeña kwindi neyi tumukuhwelela. Nawa tudi “anyikoku” indi, nawa watwinka ijina dindi.—Mas. 100:3; Yow. 10:16; Yil. 15:14, 17.

20. Muloñadi ambuña aYehova chakashakaminawu chanzo-o hampinji yakajilumunawu ituña daSatana?

²⁰ Chineli ‘ifuku dakuzuwa kwaYehova’ dindi kwakwihi, yuma yejima hakinkawu manuñu antu adi mwituña daSatana akayijilumuna. Wuru, siliva niyuma yejima yalema wuseya hiyakatwesha kukiña antuku. (Zef. 1:18; Yish. 11:4) Chiswamu chetu chiña hohu ‘Ilola dahaya nyaka.’ (Isa. 26:4) Dichi twatela kumukuhwelela chikupu Yehova kuhitila mukwenda chiwahi munjila jindi jaloña, kushimwina nsañu yaWanta windi hela chakwila antu anakutudiwula hela kutukañesha, nikusha yuma yejima yitunakwakama mumakasindi. Neyi twila yumiyi, ‘tukushakama chanzo-o, twakamona kumwena kwakubula kutiya woma wayuma yatama.’—Yish. 1:33.

[Tumazu twaheshina]

Munateli Kulumbulula?

Tunateli kumukuhwelela ñahi Nzambi?

• neyi tuholokela mukweseka kwakwila yuma yatama?

• neyi antu anakuyidiwula nikuyikañesha?

• hampinji yimunakumona kukala?

[Malwihu aKuzatisha haKudiza]

[Mwevulu wudi hefu 13]

Kukakela kunshimbi jaNzambi kwaletaña muzañalu

[Mwevulu wudi hefu 15]

‘Yehova diyi Ilola dahaya nyaka’