Mukweti Yuma Yatela Kuyitiyisha Kuwaha

KUFUMA tuhu kutumasewuzi twanyanya nankashi tukweti wumi nakushika kunyilalanji yamaneni nankashi yidi mumazanvu anyanya niamaneni nankashi, yileñaleña yamwekeshaña nawu Yehova watanjika yuma chachiwahi. Chumichi hichatuhayamishañaku muloña Nleñi “hiNzambi wakuluwañeshaku.” (1 Kor. 14:33) Nawa cheñi, njila yayiloñeshelayi Yehova antu jindi yakudifukwilamu yayiwahi nankashi. Talenu yuma yinakoñiyi Yehova. Naleti yileñaleña yikweti maana yayivulu nankashi mukuloñesha kwindi kwejima, antu ahamaseki niañelu, akweti wuswa wakudifuukwila, kwikala anuñañana mukudifukula kwalala. Iyi ntanjikilu yayiwahi nankashi.

MuIsarela wakushankulu, Yerusalema yemeneneñaku kuloñesha kwaNzambi kwaheseki, mwatuñiluwu tembeli yaYehova nawa dimwashakamineña mwanta wawayishewa. KaIsarela wumu watwaliluwu muwunkoli muBabiloni wahosheli haniwu musumba wajila nindi: “Neyi nukubula kukwanuka, neyi nukubula kukukeña eyi Yerusalema, chakubadika chinakeña yuma yinatiyaña kuwaha nankashi, idimi dami dumi mukanwa kami.”—Mas. 137:6.

Komana ninenu mwakeña kuloñesha kwaNzambi kwamakonu? Komana kwayizañaleshaña kubadika chuma chidi chejima? Komana anyanenu eluka chatachikili kuloñesha kwaNzambi kwahamaseki nichikwazatikaña? Komana eluka nawa alemeshaña nawu adi hamukanka wawamana kwetu amukaayi kejima wawaYinsahu jaYehova? (1 Pet. 2:17) Komana kwila muzatisha njila jidi heshina hampinji yaKudifukula kwaChisaka kwamelela kulonda chisaka chenu chiluki chikupu chekala kuloñesha kwaYehova nehi?

Shimunenu ‘Mafuku Akunyaka’

Hachaaka hachaaka, yisaka yawaIsarela yapompeleña nakwanakana Paseka. Chatachikiluwu chawija, Mosi walejeli antu nindi: “Chakela hamwaka wakenza chamba kakwihulayi mwaneyi, nindi, Ichi hichumanyi? eyi wakamwili neyi, Yehova watufumishili muEjipitu, mwitala dawuduñu, nañovu yakuchikasa chindi.” (Kwid. 13:14) Twatela kwanukaña nsañu yakunyaka yamwekeshaña aIsarela chayakameneneñawu kudi Yehova. Chakadi nikujina, atata jawantu amuIsarela amavulu alondeleleña lushimbi lwaMosi. Makiñu alondeleluhu, kaIsarela wumu walombeli nindi: “Tunatiyi namatu etu, eyi Nzambi, atata jetu anatuleji, mudimu wakoñeli eyi hamafuku adiñuwu, hamafuku akunyaka.”—Mas. 44:1.

Neyi tumuleja kansi wanyanya makonu, nsañu yakunyima yawaYinsahu jaYehova yinamwekani hadi yaaka 100 hela kubadikahu niyena nateli kuhosha nindi hinsañu ‘yakumafuku akunyaka.’ Munateli kulumbulula ñahi iyi nsañu kulonda anyanenu ayimoni nawu yalala? Hakwila nawu alumbululi chiwahi iyi nsañu, anvwali amakwawu azatishaña mukanda waJehovah’s Witnesses—Proclaimers of God’s Kingdom, niYearbook, nsañu yakuhanda kwawamana kwetu yasonekañawu mumagazini etu, ninsañu jikwawu jateokalatiki jamwekeni kunyima, kushilahu niDVD yetu yayiha yinakuhosha hadi antu jaNzambi makonu. Mavidiyo anakumwekesha chayikabishileñawu amana kwetu mwituña dateneneñawu nawu Soviet Union niNazi Germany yakwashaña yisaka kushindamena hadi Yehova hampinji yinaholokeluwu mukweseka. Mwatela kuhanjeka hansañu yamuchidiwu haKudifukula kwaChisaka kwamelela. Iyi nsañu yikukolesha chikuhwelelu chawanyanenu sweje-e neyi aholokela mukweseka.

Dichi neyi mukwila tuhu lumbulule-e nsañu yakunyaka, hiyikuzañalesha atwansuku. Mwatela kuhanjeka nawanyanenu. Chakutalilahu, munateli kuleja anyanenu kutonda ituña dinakeñuwu, nikusandujola nsañu jakunyaka janidi  ituña, nikuleja chisaka chejima nsañu yinatañiyi. Muchipompelu chenu, hadaha mudi akwaKristu anamukalakeli Nzambi hadi yaaka yayivulu nakashinshi, munateli kuyitambika kukudifukula kwachisaka kwamelela. Hadaha mwanenu wamumbanda nateli kuyihujola kulonda alumbululi yuma yamwenuwu muchihandilu chawu. Hela munateli kumuleja mwanenu yaleñi nyevulu yanyidimu yamaneni yinazatiwu mukuloñesha, yidi neyi mudimu wakutuña mutayi, kupompa kwanyunza, hela kuzatisha yisanji hakushimwina kwitala nikwitala.

Ilukenu Chazataña ‘Chidi Chejima Mudimu Wachu’

Kapostolu Pawulu wesekejeli chipompelu chawakwaKristu ‘namujimba wejima, hiwukudikwata namanuñi akukwashañana, yidi yejima hiyikwila nyidimu yawu, iwu nawindi, iwu nawindi, kulonda mujimba wukulaña nakudituña mukukeña.’ (Efwes. 4:16) Kwiluka chazataña mujimba kwatuleñelaña kumuhameka nikumulemesha Nleñi yetu. Chochimu, neyi tushinshika chazataña chipompelu chamukaayi kejima, twahayamaña “maana aNzambi eñi, naeñi.”—Efwes. 3:10.

Yehova walumbulula chazatikaña kuloñesha kwindi, kubombelahu nikwamwiwulu. Chakutalilahu, watulejaña nindi wasambilili kumumwekeshela Yesu Kristu chimwekeshu, Yesu niyena “watemesheli kañelu kindi nakuyishimuna kudi kambuñindi Yowanu. Yowu washimwini wunsahu.” (Chim. 1:1, 2) Neyi chakwila Nzambi wamwekesheli chazatikaña kuloñesha kwindi kwabulaña kumwekana, komana hanakukeña nindi ninetu twiluki chazataña ‘chidi chejima mudimu wachu’ hanu hamasekiku?

Chakutalilahu, neyi nkoñi wañinza keña yendeli chipompelu chenu, komana kwila mushakama hamu nachisaka chenu kulonda mutali hanyidimu nikukooleka kukwetuwu ankoñi endaña nehi? Atukwashaña ñahi wejima wetu? Mwatela cheñi kuhanjeka hamalwihu akwila nawu: Muloñadi chichalemena kuhana lipoti yamudimu wamwiha? Indi mali azatishañawu mukuloñesha kwaNzambi afumaña kudihi? Indi Izaza Dalombolaña dazataña ñahi, nawa daloñeshaña ñahi yakudya yakuspiritu?

Neyi twiluka chazataña antu jaYehova, twahetelañamu munjila jisatu: Twaswejaña nankashi kuhameka antu azataña nañovu hakwila atukwashi. (1 Tesa. 5:12, 13) Chatusañumunaña kulondela mwatulejañawu amana kwetu anakuzatishawu mukuloñesha kwaYehova. (Yil. 16:4, 5) Nkumininaku, twaswejaña kukuhwelela antu anakulombola neyi tumona chashindamenañawu haNsona hayuma yafuukulañawu ninyidimu yatanjikañawu.—Heb. 13:7.

“Talenu Matalindi Awanta”

“Hitenu kuZiyona kunsa kunsa, nyeñumukenuku, muchindi tuposhi twindi. Shinshikenu chachiwahi mpwembu jindi, talenu matalindi awanta; kulonda mwakayishimwinañamu anyana amba kavwalika.” (Mas. 48:12, 13) Ñimbi yamasamu walejeli aIsarela nindi afumbuli mesu nakushinshika chikupu Yerusalema. Toñojokenu muzañalu watiyileña yisaka yawaIsarela ayileña kumusumba wajila kuyawija yahachaaka nakumona tembeli yalubanji. Atela azañaleleña ‘hakushimwina anyanawu avwalikileña.’

Toñojokenu hadi mwanta wamumbanda wakuSheba, wasambilili kujinoka chatiyiliyi mpuhu yakuwaha kwachiyuulu chaSolomoni nimaanindi asweja. Chumanyi chamuleñeleli yeteji nindi yuma yatiyiliyi yadiña yalala? Wahosheli nindi, “Mwashimwinuwu hinetiyili mwokuku. Ichi chinenzi namoni dehi namesu ami.” (2 Kushi. 9:6) Eñañi, yuma yitwamonaña ‘namesu etu’ yinateli kutuzañalesha chikupu.

Munateli kukwasha ñahi anyanenu kulonda amoneña ‘namesu awu’ lubanji lwakuloñesha kwaYehova? Neyi kumwashakamina kwekala kasanji kamutayi kawaYinsahu jaYehova, mwatela kudiloñesha kulonda mwakayi nakuhempula. Chakutalilahu, kufuma kwiluña kwakulilawu aMandy niBethany hekala makilomita 1,500 nakushika kuBeteli yamwituña dawu. Hela chochu, anvwali jawu avulileña kukasa lwendu lwakuya nakuhempula haBeteli, sweje-e hampinji yachidiñawu anyanawu awambanda anyanya. Alumbulwili nawu, “Henohu kanda tuyi nakuhempula haBeteli, twatoñojokeleña netu himukala wakala nawa hekala hohu atushinakaji. Ilaña twawaninuhu atwansi amuzatilileña Yehova nañovu nawa adiña nakuzata namuzañalu! Twelukili  netu kuloñesha kwaYehova kweneni nankashi bayi neyi hikadiluña mutwashakamineña hohuku, nawa mpinji yejima yitwayileña kuBeteli twakundamineña kwakwihi naYehova nikwikala nampwila yakumuzatila chikupu.” Muloña wakumwena kuloñesha kwaNzambi mukamwihi kwayisañumwini aMandy niBethany kutachika wupayiniya, nawa ayitambikili kuya nakuzatila haBeteli hakapinji kantesha.

Kudi njila yikwawu mutwatela ‘kumwena’ kuloñesha kwaYehova, njila yabulili kwilukawu aIsarela akushankulu. Makonu, antu jaNzambi anatambwili mavidiyo nimaDVD amwekeshaña yuma yashiyashana yamukuloñesha kwaNzambi, yidi neyi: Jehovah’s Witnesses—Organized to Share the Good News, Our Whole Association of Brothers, To the Ends of the Earth, niUnited by Divine Teaching. Neyi enu nichisaka chenu mumona chadikitañawu ankoñi ahaBeteli, azataña mudimu wukukwasha antu adi muwubanji, amishonali, niamana kwetu aloñeshaña nikutala nyidimu yakupompa kweneni, mukusweja kwikala namuchima wakuhameka amana kwetu amukaayi kejima.

Chipompelu chejima chawantu jaNzambi chazataña mudimu walema wakushimwina nsañu yayiwahi nikukwasha akwaKristu ekala mwiluña dachipompelu. Hela chochu, ikalenu nampinji yakushakama hamu nachisaka nakwanuka ‘ana kwenu adi mumpata yamunu mwishina yejima.’ Ichi chikuyikwasha enu nianyanenu kwikala ‘akola mukukuhwelela kwenu mbe,’ nakwiluka nenu mukweti yuma yatela kuyitiyisha kuwaha.—1 Pet. 5:9.

 [Chikasha/Mwevulu wudi hefu 18]

Kuloñesha kwaNzambi Hinsañu Yayiwahi Yimwatela Kuhanjekañahu

Anatuloñesheli yuma yayivulu yatela kutukwasha twiluki yuma yakunyima nichazataña kuloñesha kwaYehova. Malwihu analondeluhu akutukwashaku kutachika kuhanjeka:

☞ Indi mudimu wunakuzata ankoñi endaña makonu watachikili ñahi?—Kaposhi Kakutalila kaChibemba, November 15, 1996, mafu 10-15.

☞ Chumanyi chalema chamwekeni “Hefuku Dawanyana” Hakupompa kwaTeokalatiki mu 1941?—Kaposhi Kakutalila kaChibemba, July 15, 2001, ifu 8.

☞ Indi Izaza Dalombolaña dafuukulaña ñahi?—Ukulabila Sana pa Bufumu bwa kwa Lesa, mafu 108-114.