Tambulenu Spiritu yaNzambi, Bayi Yampata Yamunu Mwishinaku

‘Etu hitunatambuli spiritu yamunu mwishinaku, tunatambuli spiritu yakudi Nzambi, kulonda twiluki yuma yanatwinkuwu kudi Nzambi chamukunkulu.’—1 KOR. 2:12.

1, 2. (a) Munjila mutukuhoshela netu akwaKristu anakwasa njita? (b) Malwihwinyi itukuhanjekahu?

 AKWAKRISTU alala anakwasa njita! Chilumbu chetu wukweti ñovu, wababala nawa weluka kwasa njita. Wukweti chitwa chañovu chikupu chinahuñumuni antu amavulu. Ilaña bayi tufwa mutentu hela kuyeñashana netu hitukutwesha kumwimika mushinduku. (Isa. 41:10) Tukweti nkebu yakola chikupu yakwimika nachu mushindu ayilumbu ejima.

² Njita yetu hiyakumujimbaku; yakuspiritu. Chilumbu chetu diyi Satana Diyabolu, nawa chitwa cheneni chazatishañayi ‘hispiritu yampata yamunu mwishina.’ (1 Kor. 2:12) Spiritu yaNzambi diyi yatukwashaña nankashi kushinda kulukuka kwaSatana. Hakwila tupuluki muniyi njita nakutwalekahu kwikala akola kuspiritu, twatela kulomba spiritu yaNzambi nikumwekesha mukabu waspiritu muchihandilu chetu. (Ŋal. 5:22, 23) Indi spiritu yampata yamunu mwishina hichumanyi nawa yatachikili ñahi kuluwañesha antu? Tukwiluka ñahi netu spiritu yampata yamunu mwishina yinakutuluwañesha? Nawa tukudizilaku chumanyi kudi Yesu hansañu yakutambwila spiritu yaNzambi nikushinda spiritu yampata yamunu mwishina?

Muloñadi Spiritu Yampata Yamunu Mwishina Chiyinasweji Kutanda?

3. Spiritu yampata yamunu mwishina hichumanyi?

³ Spiritu yampata yamunu mwishina yafumaña kudi Satana, “mwanta wayulaña mpata yamunu mwishina,” nawa yazuñishaña spiritu yaNzambi yajila. (Yow. 12:31; 14:30; 1 Yow. 5:19) Diyinasweji kutanda mudi antu mukaayi, nawa diyasañumunaña antu kwila yuma yatama. Iyi spiritu diyi yaleñelaña antu kuzuñisha kufuukula kwaNzambi ninkeñelu yindi.

4, 5. Indi spiritu yatandishañayi Satana yatachikili kutanda ñahi?

⁴ Indi spiritu yatandishañayi Satana yatachikili ñahi kutanda? Hakusambila, Satana wamudimbili Evu mwitempa daEdeni. Wamudimbili nindi neyi yamufutalela Nzambi wadi kushakama chachiwahi. (Kutach. 3:13) Satana wadimwekesheli chikupu nindi hisakutwamba. (Yow. 8:44) Wamudimbili mumbanda kulonda Adama yakañanyi  kumwovwahila Yehova. Hamuloña wachuma cheliliyi Adama, antu ejima ayiñijili muwuduñu wanshidi, dichaleñelaña antu ekaleña nachaaku chakwimbujola spiritu yaSatana yakujikwa.—Tañenu Aefwesesa 2:1-3.

⁵ Satana cheñi wahuñumwini añelu amakwawu, ekalili andemoni. (Chim. 12:3, 4) Awa añelu amufutukili Nzambi henohu Dibaji daNowa kanda dinzi. Awa añelu akuhweleleli nawu akashakama chiwahi neyi ashiya yifulu yayinkeluwu mwiwulu nakudiñija mukufwila kwalwisu kwachisemwa chaheseki. (Yuda 6) Hamuloña wakumukwashaku kudi awa andemoni, abula nyijimba yawuntu, Satana ‘nakudimba antu ampata yamunu mwishina ejima.’ (Chim. 12:9) Chawushona, antu amavulu hiyamputa mesu muloña hiyaneluki chaluwañeshañawu andemoniku.—2 Kor. 4:4.

Komana Spiritu Yampata Yamunu Mwishina Yinakuyiluwañesha?

6. Spiritu yampata yamunu mwishina yinateli kutuluwañesha ñahi?

⁶ Antu amavulu hiyeluka Satana chaluwañeshañayi antuku, ilaña akwaKristu alala eluka tufuta twaSatana. (2 Kor. 2:11) Dichi, spiritu yampata yamunu mwishina hiyinateli kutuluwañeshaku chiña neyi tuyiteja etu aweni. Ichi dinu tushinshikenu hamalwihu awana akutukwasha kwiluka neyi tunakulombolewa naspiritu yaNzambi hela naspiritu yampata yamunu mwishina.

7. Njilanyi yimu yazatishañayi Satana kulonda yatwambuli kudi Yehova?

⁷ Yisela yinakeña yamwekeshaña nawu nindi muntu wamuchidinyi? (Tañenu Yakoba 3:14-18.) Satana wafwilaña kutwambula kudi Nzambi kuhitila mukutwinka muchima wakukeña madombu. Diyabolu weluka nindi Yehova wahela antu ejima akeña madombu. (Mas. 11:5) Dichi, Satana nakuzatisha nyikanda, mafilimu, tumina, niyisela yahamakina akesi kawuneñu, niyikwawu yasañumunaña antu ayihemaña kukoña yuma yatama nikwikala nayililu yawukatu kulonda yikokoleña nyichima yetu. Satana watiyaña kuwaha neyi mumuchima wetu twakeña yuma yatama yatandishañayi, hela chakwila hampinji yoyimu twakeña yuma yaloña.—Mas. 97:10.

8, 9. Malwihwinyi itwatela kudihula kutalisha hayisela?

⁸ Ilaña, spiritu yaNzambi yasañumunaña antu ayitambwilaña kwikala atooka, awunda nikwikala namuchima waluwi. Twatela kudihula netu, ‘Komana yisela yinakeña yankwashañaku kwikala nayililu yayiwahi?’ Maana afumaña mwiwulu hiyekala ‘awufwikijuku.’ Antu alombolewaña naspiritu yaNzambi hiyalejaña antuñi nawu kwikala atooka nawa awunda henohu wena anakudizañalesha nakutala nyevulu yamadombu niyayuma yatama mumatalawuku.

⁹ Yehova wakeñaña nindi tudifukuleña kudi yena hohu. Ilaña Satana wakeñaña nindi tudifukuli kudi yena kamu hohu neyi chamwesekeliyi Yesu. (Luka 4:7, 8) Twatela kudihula netu: ‘Komana yisela yinakeña yankwashaña kudifukula kudi Nzambi hohu? Komana yisela yinakeña yankañeshaña tahindi yankwashaña kushinda spiritu yampata yamunu mwishina? Ifuku dikwawu neyi hinukutonda yisela yinakeña, komana natela kuhimpa?’

10, 11. (a) Spiritu yampata yamunu mwishina yaleñelaña antu kwikala nayitoñojoka yamuchidinyi kutalisha hamaheta? (b) Izu daNzambi donenewa naspiritu datukoleshaña nawu twikali nayitoñojoka yamuchidinyi?

¹⁰ Indi yitoñojoka yami yidi ñahi kutalisha kuyuma yakumujimba? (Tañenu Luka 18:24-30.) ‘Kufwila kwamesu,’ lwisu nikusweja kukeña maheta, hiyililu yaspiritu yampata yamunu mwishina. (1 Yow. 2:16) Yinaleñeli antu amavulu kwikala namuchima wakufwila maheta. (1 Tim. 6:9, 10) Iyi spiritu yakeñaña nawu etu tutoñojokeña netu neyi tudilumbikila maheta tukwikala akiñewa haya nyaka. (Yish. 18:11) Hela chochu, neyi tusweja kukeña mali kubadika chitwamukeña Nzambi, chikumwekesha nawu Satana natulawuli mumuhetu windi. Twatela kudihula netu, ‘Komana chihandilu chami chinashindameni hakukeña maheta niyuma yakudiluñisha nachu?’

¹¹ Izu daNzambi donenewa naspiritu datukoleshaña nawu twikali awundisha mumesu hansañu jamali nikuzata nañovu kulonda tuwani yuma yakumujimba yakudikwasha nachu etu aweni nichisaka chetu. (1 Tim. 5:8) Spiritu yaNzambi yakwashaña antu ayitambwilaña kumwimbujola  Yehova wahanaña. Antu amuchidiwu ayiluka nawu ahanaña, bayi akwakutambwila hohuku. Ekala alemesha antu kubadika maheta nawa atiyaña kuwaha kwinkahu akwawu yuma yakwetiwu neyi chinatwesheki. (Yish. 3:27, 28) Nawa hiyetejaña kufwila maheta kubadiki kumukalakela Nzambuku.

12, 13. Kwambukaku naspiritu yampata yamunu mwishina, indi spiritu yaNzambi yinateli kutulombola ñahi chachiwahi?

¹² Yililu yami yamwekeshaña spiritu yamuchidinyi? (Tañenu Akolose 3:8-10, 13.) Spiritu yampata yamunu mwishina yatandishaña nyidimu yachisemwa. (Ŋal. 5:19-21) Tunateli kwiluka spiritu yatulombolaña neyi tudi mukukala kweneni, kudi neyi mana kwetu mukwaKristu hela muhela yatudiwula, indi kwiji yatuhilisha, hela yatuvulumuna, bayi neyi hampinji yitunashakami kumatu kwamwenaku. Kubombelahu, mumataletu tunateli kumwekesha neyi tunakwiteja kutulombola kudi spiritu yajila hela spiritu yampata yamunu mwishina. Dichi twatela kudishinshika etu aweni. Dihulenu nenu, ‘Hatukweji tutanu nakamu tunahituhu, komana inakwimbujola chikupu yililu yaKristu tahindi nadiñiji cheñi muyaaku yatama munhoshelu nimuyililu?’

¹³ Spiritu yaNzambi yinateli kutukwasha ‘kuvuula wuntu wawukulu niyililu yawu’ nakuvwala ‘wuntu wawuha.’ Dikwatela kutukwasha kwikala nayililu yakukeña niluwi. Tukwikala namuchima wakudanakena wumu namukwawu, hela chakwila kudi kukala kunamwekani. Neyi tumona netu anatuvulumuni, hitukulendumokaña nakuhilashana ‘nandulu, nindombu, nikuzuwa, nimapumba, nikutukana, ninkunyi yejimaku.’ Ilaña, tukuzata nañovu kulonda ‘twikali namuchima wawushona.’—Efwes. 4:31, 32.

14. Antu amavulu mukaayi atoñojokaña ñahi Hezu daNzambi?

¹⁴ Komana nalemesha nikukeña nshimbi jamuBayibolu jahosha hayililu yayiwahi? (Tañenu Yishimu 3:5, 6.) Spiritu yampata yamunu mwishina yaleñelaña antu kudikaña Nezu daNzambi. Antu alombolewaña naniyi spiritu akaanaña nsañu yikwawu yamuBayibolu yayifumbañawu, ilaña akeñaña kulondela tushidikilu nimaana awantu. (2 Tim. 4:3, 4) Amakwawu adiwula Izu daNzambi dejima. Antu amuchidiwu ahoshaña nawu Bayibolu yalema wanyi nawa yamukunkulwayi, adimonaña aweni kubabala. Adiwulaña nshimbi jalala jamuBayibolu jahosha hansañu yawuvumbi, wutumwa, nikudiseña. Atañishaña nawu “yatama nawu yayiwahi yayiwahi nawu yatama.” (Isa. 5:20) Komana spiritu yamuchidiwu yinakutuluwañesha? Komana twashindamenaña hamaana awantu, nihayitoñojoka yetu, neyi tudi mukukala? Tahindi twafwilaña kulondela mwatufumbaña Bayibolu?

15. Chatela tushindameneña hamaanetu, twatela kwiladi?

¹⁵ Spiritu yaNzambi yatukwashaña kulemesha Bayibolu. Kufwana ñimbi yamasamu, Izu daNzambi twadimonaña netu hiinoñu dakunyendu yetu nichejeji chamunjila yetu. (Mas. 119:105) Chatela tushindameneña hamaanetu, twatela kushindamena chikupu Hezu daNzambi  dasonekawu kulonda ditukwasheña kwiluka yayiwahi nayatama. Twadizaña chitwatela kulemesha Bayibolu nikukeña nshimbi jaNzambi.—Mas. 119:97.

Dizilenu Kudi Yesu

16. Yumanyi yitwatela kwila kulonda twikali ‘nayitoñojoka yaKristu’?

¹⁶ Hakwila tutambwili spiritu yaNzambi, twatela kwikala ‘nayitoñojoka yaKristu.’ (1 Kor. 2:16) Hakwila nawu twikali ‘nayitoñojoka yoyimu nayadiña naKristu Yesu’ twatela kwiluka chatoñojokeleñayi niyuma yakoñeleñayi nikumwimbujola. (Rom. 15:5; 1 Pet. 2:21) Tutalenu hajinjila mutwatela kumwimbujolila.

17, 18. (a) Yumanyi yitwadizilaña kudi Yesu kutalisha hakulomba? (b) Muloñadi chitwatela ‘kutwalekelahu nakulomba’?

¹⁷ Lombenu spiritu yaNzambi. Henohu kanda yaholokeli mukweseka, Yesu walombeli spiritu yaNzambi kulonda yimukwashi. (Luka 22:40, 41) Anetu nawa twatela kumulomba Nzambi kulonda yatwinki spiritu yindi yajila. Yehova wahanaña chikupu spiritu kudi antu ejima amulombaña nachikuhwelelu. (Luka 11:13) Yesu wahosheli nindi: “Lombenu akuyinka; keñakeñenu mukuwana; dondomwenenu akuyenzulwila. Muloña ejima akulomba akutambula; muntu wukukeñakeña wukuwana; niwukudondomwena akumwenzulwila.”—Mat. 7:7, 8.

¹⁸ Hakulomba spiritu yaYehova niwukwashu windi, bayi munyakala kuzeyaku. Twatela kulomba kakavulu nikushimbula mukulomba. Mpinji yikwawu, Yehova wayinkaña antu amulombaña mpinji yakumwekesha yuma yidi munyichima yawu nikumwekesha neyi chikuhwelelu chawu chalala henohu kanda yakuli kulomba kwawu. *

19. Yumanyi yelileñayi Yesu mpinji yejima, nawa muloñadi chitwatela kumwimbujolila?

¹⁹ Mwovwahilenu Yehova namuchima wejima. Mpinji yejima Yesu welileña yuma yamuzañalesheleña Tata yindi. Mpinji yimu, kukala kwamweniyi Yesu kwaleñeleli chimukalili kwila chuma chakeñeleñayi Tata yindi. Ilaña, Yesu wamulejeli chikupu Tata yindi nindi: “Bayi ela munakeñamuku, chiña muwunakeñeyi.” (Luka 22:42) Dihulenu nenu, ‘Komana namwovwahilaña Nzambi hela chakwila chakala kumwovwahila?’ Kumwovwahila Nzambi kwalema mukuhanda kwetu. Chineli diyi Nleñi, Nsulu yawumi wetu nawa diyi Wawuhembaña, twatela kumwovwahila chikupu. (Mas. 95:6, 7) Kwosi wacheñi wutwatela kwovwahila. Hitunateli kutambwila wuselewa waNzambi chakadi kumwovwahilaku.

20. Chihandilu chaYesu chashindameneni hakwila yumanyi, nawa tunateli kumwimbujola ñahi?

²⁰ Ilukenu Bayibolu nankashi. Hampinji yesekeluwu chikuhwelelu chindi kudi Satana, Yesu wazatishili Nsona hakushinda kuna kweseka. (Luka 4:1-13) Hakwakula akwansakililu adiña nakumudimbulula, Yesu washindameneni chikupu hakuzatisha Izu daNzambi. (Mat. 15:3-6) Chihandilu chaYesu chejima chashindameneni hakwiluka nshimbi jaNzambi nikujilondela. (Mat. 5:17) Anetu nawa twatela kutwalekahu kudiza Izu daNzambi dakoleshaña chikuhwelelu chetu. (Fwi. 4:8, 9) Etu amakwawu chatukalilaña kuwana mpinji yakudiza halwetu nikudiza nachisaka chetu. Chatela tuwaneña mpinji twatela kwikala nampinji yakudiza.—Efwes. 5:15-17.

21. Yumanyi yatuloñeshelawu yatela kutukwasha kwiluka chikupu Izu daNzambi nikudizatisha?

²¹ ‘Nduñu wamaana nikashinshi’ nakutukwasha kwikala nampinji yakudiza halwetu nikudiza nachisaka kuhitila mukutuloñeshela ntanjikilu yaKudifukula kwaChisaka kwamelela mulungu nimulungu. (Mat. 24:45) Komana munakulondela iyi ntanjikilu? Hakwila nawu chiyikwashiku kwikala nayitoñojoka yaKristu, komana kwila muwejelahu ntanjikilu yayiwahi yakudiza yuma yatañishileñayi Yesu hanyitu yansañu yimunakeñi  hampinji yimwatanjika yakudiza nehi? Munateli kuzatisha Watch Tower Publications Index hakwila muwani nsañu yayiwahi yimunakukeña kudiza. Chakutalilahu, mukaposhi kakutalila kawantu amavulu kaApril 1, 2010 kadi namutu wunakuhosha nawu “Iyala Wahimpili Kaayi” nikaJanuary 1, 2011, kadi namutu wunakuhosha nawu “Yuma Yitwadizilaña Kudi Yesu,” nimukanda ‘waInzaku Wikali Mukwakunlonda,’ yikuyikwasha kwiluka chikupu Izu daNzambi. Komana kwila mudizaña muyibaaba yamuchidiwu muprogiramu yenu yaKudifukula kwaChisaka mumpinji mumpinji nehi?

Tunateli Kwimika Mpata Yamunu Mwishina Mushindu

22, 23. Chumanyi chitwatela kwila kulonda tushindi mpata yamunu mwishina?

²² Hakwila nawu atulomboleña kudi spiritu yaNzambi, twatela kukañesha spiritu yampata yamunu mwishina. Hela chochu kukañesha spiritu yampata yamunu mwishina hichuma chakala. Hikulwa kwakweni. (Yuda 3) Ilaña tunateli kushinda! Yesu walejeli atumbanji twindi nindi: “Mukumona lukadi mumpata yamunu mwishina, ilaña tiyenu kuwaha, ami nemiki mpata yamunu mwishina mushindu.”—Yow. 16:33.

²³ Anetu tunateli kwimika mushindu neyi tushinda spiritu yampata yinu nikuzata nañovu kulonda tutambwili spiritu yaNzambi. Eñañi, “neyi Nzambi nekali wetwetu, wukwikala chilumbu chetu hinyi?” (Rom. 8:31) Neyi tutambula spiritu yaNzambi nikulondela muyinakutulombola neyi chasonekawu muBayibolu, tukuzañalala, tukwikala mukuwunda nikwikala nachikuhwelelu chakuheta wumi wahaya nyaka mwituña dadiha didi kwakwihi.

[Tumazu twaheshina]

Munakwanuka?

• Muloñadi spiritu yampata yamunu mwishina chiyinaswejeli kutanda?

• Malwihwinyi awana itwatela kudihula?

• Yumanyi yisatu yitwadizilaña kudi Yesu hakwila nawu tutambwili spiritu yaNzambi?

[Malwihu aKuzatisha haKudiza]

[Mwevulu wudi hefu 8]

Indi añelu amakwawu ekalili ñahi andemoni?

[Mwevulu wudi hefu 10]

Satana wazatishaña spiritu yampata yamunu mwishina hakuluwañesha antu, ilaña tunateli kudikaña nindi