Chakutwalekahu Kwikala Ashinshika Mwituña Mwavula Wupwapoki

WUPWAPOKI wunatandi kwejima neyi mpepela yitonaña. Antu atwambaña, adilaña akwawu hamutu, eyaña, hiyafwetaña nyikuduku, nawa adinkaña wanta neyi mudimu wawu wakuselujola wunakuya hambidi. Chineli twashakamaña mukaayi kamuchidiwu, kakavulu twamonaña yuma yinateli kuleñela kashinshi ketu kwikala mukweseka. Tunateli kutwalekahu ñahi kutondolwela chaaku chakwikala ayipwapoki? Tushinshikenu yikuma yisatu yinateli kutukwasha kubula kwikala ayipwapoki. Yikuma yeniyi, hikumwakama Yehova, chinleji chitooka, nikuzañalala nayuma yitukweti.

Kumwakama Yehova

Kaprofwetu Isaya wasonekeli nindi: ‘Yehova diyi Nsompeshi yetu, Yehova diyi mukwakutwinka nshimbi, Yehova diyi Mwanta wetu.’ (Isa. 33:22) Kwiluka ñovu yikwetiyi Yehova kukutuleñela kumwakama, chumichi chikutukwasha kubula kwikala ayipwapoki. HaYishimu 16:6 hahosha nawu: “Kumwakama Yehova chochuma chafumañawu nachu antu kuyuma yatama.” Kwakama kwamuchidiwu, bayi neyi hikufwa mutentu netu Nzambi wukutubabeshaku, ilaña twachinaña kumuhilisha Tata yetu wamwiwulu, watwakamenaña chikupu muchihandilu chetu.—1 Pet. 3:12.

Chuma chamwekeni muchihandilu chawantu amakwawu chamwekeshaña chikupu yuma yayiwahi yafumaña mukumwakama Yehova. Ricardo nañodindi Fernanda ayili kunyabawulu nakutambula mali akushika ku 700 dola mali akuUnited States. * Fernanda washili mali ejima muchikwama chindi chakubula kuchindamu. Chashikiluwu kwitala hanyima yakufwetela yuma yikwawu, ahayamini hakumona neyi muchikwama chaFernanda mwadiña mali akushika kwakwihi namali atambwiluwu. Ahosheli nawu “Mukwakuhana mali kunyabawulu watwinka amavulu.” Hakusambila akeñeleña kuhemba mali chineli achidiña nayuma yayivulu yakufwetela. Ricardo walumbulwili nindi: “Twalombeli kudi Yehova netu yatwikwashi kulonda tufuntishi mali. Muloña twafwilaña kumuzañalesha Yehova kwesekeja nakufumba kwindi kwekala hamukanda waYishimu 27:11, chumichi chatwileñeleli kufuntisha mali.”

Chinleji Chadizishewa naBayibolu

Tunateli kudizisha chinleji chetu kuhitila mukudiza Bayibolu nikuzata nañovu kulonda tuzatisheña yuma yitwadizaña. Dichi ‘Izu daNzambi dadumi, nawa dikweti ñovu,’ dikutukwasha muyitoñojoka ninyichima yetu. Chumichi chikutuleñela ‘kwikala ashinshika muyuma yejima.’—Heb. 4:12; 13:18.

Talenu chuma chamumwekeneni João. Wadiña namukudi weneni wakushika kumadola 5,000. Wayili nakushakama kumbaka yikwawu chakubula kufweta iwu mukudi. Chimwahitili yaaka yitanu nayisatu, João wadizili chalala, nawa chinleji chindi chadizishewa naBayibolu chamusañumwini kumukeña muntu wamusondamishili mali kulonda yamufweti. Hamuloña wakwila João wadiña hohu namali antesha akukwasha nachu ñodindi nianyana awana, ona muntu wetejeli kumufwetaña mali antesha hakakweji hakakweji.

Kuzañalala Nayuma Yitukweti

Kapostolu Pawulu wasonekeli nindi: “Kwakama Nzambi, nikutiya kuwaha, hikuheta kwakweni. . . . Neyi tukweti yakudya niyakudivwika, yumiyi yinawani.” (1 Tim. 6:6-8) Kutiyilila iku kufumba kwakuwahi kukutukwasha kubula kudiñija  mumuhetu walwisu, mumudimu wakuselujola watama hela kuzata mudimu wakuselujola wakukeña kuheta swayi-swayi munjila yatama. (Yish. 28:20) Kwovwahila kufumba kwaPawulu kukutukwasha cheñi kutwamijaku Wanta waNzambi, nakukuhwelela netu akutwinka yuma yitwakeñaña.—Mat. 6:25-34.

Hela chochu, hamuloña ‘wakudimbana kwamaheta’ hitwatela kudiwula yuma yatama yafumaña mukwikala nalwisuku. (Mat. 13:22) Anukenu chuma chamumwekeneni Akani. Wamweni namesu kapu chazambukiluwu aIsarela Kaloña Yodana muchihayamisha. Hela chochu, lwisu lwamukojejeli kwiya siliva niwuru nimahina amakwawu alema wuseya apupiluwu mumusumba waYeriku. Wafwili muloña wakwiya. (Yosh. 7:1, 20-26) Dichaletesheli Yesu hakusoñamisha henohu munahiti dehi jinkulakaji jayaaka, nindi: “Babalenu, dihembenu muleki lwisu lwejima”!—Luka 12:15.

Ikalenu Ashinshika kuMudimu

Tushinshikenu yuma yikwawu yatela kuleñela kashinshi ketu kwikala mukweseka muyuma yejima. Kwikala ashinshika kumudimu kwabombelamu kubula ‘kwila wukombi wawunyemunyemu,’ hela chakwila antu amavulu eyaña. (Tit. 2:9, 10) Jurandir wazatileña mudimu wanfulumendi, wadiña washinshika hakushimuna mali azatishileñayi halwendu. Akwawu akamudimu akeñeleña kuyinka mali amavulu kubadika hamali azatishileñawu. Eyileña muloña mukulumpi wanyidimu niyena wetejeleña akwanyidimu kwikala ayipwapoki. Kafwampi, muntu yowumu wamuzuwilili Jurandir hamuloña wakwikala wakashinshi nawa wamulekesheli kumutemesha halwendu lwahamudimu. Chimwahitili mpinji nfulumendi yachindili mali azatishiluwu hamudimu, nawa Jurandir amuhamekeli hakwikala washinshika. Nawa amwinkeli chifulu chahewulu.

André mukwakulandisha yuma, amulejeli kudi muntu wamwiñija mudimu nawu yayifwetesheña akwakulanda kapampa kayedi kumali awu akunyambawulu hachuma chimu. Mana kwetu walombeli kudi Yehova kulonda amwinki wulobu wakukakela kunshimbi jamuBayibolu. (Mas. 145:18-20) Wamulejeli cheñi muntu wamwiñija nyidimu muloña wabuliliyi kwila mwamulejeliyi, ilaña chumichi hichazatikiluku. Dichi André wafuukwiluhu kuleka iwu mudimu wamufweteleñawu mali amavulu. Hela chochu, chimwahitili chaaka chimu ona muntu wamwiñijili mudimu wamutambikili cheñi, nakumuleja chikupu nindi akwakulanda hiyayifweteshaña cheñi mali amavuluku. André wekalili mukulumpi hamudimu.

Fwetenuña Nyikudi

Kapostolu Pawulu wayikonkomweneni akwaKristu nindi: “Bayi mwikala namukudi namuntuku.” (Rom. 13:8) Hadaha tunateli  kudiyiñisha kulonda tubuli kufweta mukudi nakutoñojoka netu muntu watusondamishili wukweti mali amavulu, hanakukeña maluku. Hela chochu, Bayibolu yasoñamisha nawu: “Muntu watama wasondamaña, hafwetaña cheñuku.”—Mas. 37:21.

Hanu dinu tunateli kwila chumanyi neyi ‘kululakana chayilulakenu’ kutukañeshi kubula kufweta mukudi? (Mukwa. 9:11) Francisco wasondamini mali akushika kumadola 700 kudi Alfredo kulonda yafweti mukudi watambwiliyi kukampani. Hamuloña wakwila mudimu windi wendeleña chiwahi wanyi, Francisco wakañenyi kufuntisha mali asondaminiyi hefuku dakaniniyi kufweta. Wayili nakumuleja Alfredo chakañenyiyi kufweta mali nawa Alfredo wetejeli nindi wukumufwetaña kanti kanti.

Bayi Mutwambañaku

Anukenu chakutalilahu chatama chaAnaniya niSafwira, antu adisumbula amuyaaka nkulakaji yakusambila amuchipompelu chawakwaKristu. Chalandishiluwu iha, aleteli chibalu chimu hohu chamali kudi apostolu nakuhosha nawu diwu mali ejima alandishiluwu. Afwilileña kuzañalesha amakwawu nawu ahanaña chikupu. Hela chochu, kapostolu Petulu amoneneneni naspiritu yajila yaNzambi, wafuñunwini kafuta kawu nawa Yehova wayijahili.—Yil. 5:1-11.

Kwambukaku naAnaniya niSafwira atwambili, ansoneki aBayibolu ahosheli mwalala nawa adiña ashinshika. Mosi washimwini chakubula kujinda chahililiyi nawa chumichi chamukojejeli kubula kwiñila Mwituña daChikaninu. (Kuch. 20:7-13) Chochimu, Yona washimwini kuzeyazeya kwindi kwamwekesheliyi henohu kanda yashimwini nimpinji yashimwininiyi akwaNineva. Nawa wasonekeli yumiyi.—Yona 1:1-3; 4:1-3.

Eñañi, hakwila nawu muntu yahoshi mwalala watelela kwikala nawulobu hela kwila mwenimu mukufuma yuma yatama, neyi cheliliyi kansi wayaaka 14 wejina daNathalia hashikola. Wahitulukili muyipapilu yasonekeluwu kweseka, nawa wamweni nindi ntañishi yindi neteji ñakwilu yaheña nindi yoloka. Hela chakwila welukili nindi ichi chikumuleñela yabuli kuhita, Nathalia hashintajalili kumuleja ntañishi yinduku. Wahosheli nindi: “Anvwali jami andizishaña nawu hakwila nimuzañalesheña Yehova natela kwikala washinshika. Chinleji chami chamuchima chadi kunkabisha neyi chakwila hinamulejelumu ntañishi yamuku.” Ntañishi wamuhamekeli Nathalia hamuloña wakwikala nakashinshi.

Kashinshi—Hichililu Chamulemeshaña Yehova

Giselle kansi wamumbanda wayaaka 17, waweni chikwama mwadiña yipapilu yalema nimali akwesekana namadola 35. Wayilejeli akulumpi jashikola nindi amukwashi kuwana mwini chikwama kulonda amufuntishili. Chimwahitili kakweji kamu chilonda chamukulumpi washikola wayitañilili anyana ashikola mukanda wakumuhameka Giselle hakwikala nakashinshi nawa wahamekeli chisaka chindi hakufumba nikumudizisha chiwahi nichalemeshawu nshimbi jamuchipompelu. ‘Nyidimu yindi yayiwahi’ yaleteli kalemesha kudi Yehova.—Mat. 5:14-16.

Chakeñekaña kuzata nañovu hakwila nawu muntu yatwalekuhu kwikala wakashinshi mukachi kawantu ‘akwakudikeña, akwakufwila mali, akwakudisamba, akwakudinka wanta, nawa abula kujila.’ (2 Tim. 3:2) Hela chochu, kumwakama Yehova, chinleji chadizishewa naBayibolu, nikuzañalala nayuma yitukweti, kwatukwashaña kutwalekahu kwikala ashinshika mwituña mwavula wupwapoki. Twekalaña cheñi nawulunda wawuwahi naYehova wekala ‘waloña; nawa wakeña nyidimu yaloña.’—Mas. 11:7.

[Tumazu twaheshina]

[Nyevulu yidi hefu 7]

Kumwakama Yehova kwatukoleshaña kwikala ashinshika

[Mwevulu wudi hefu 8]

Twamulemeshaña Yehova neyi twikala ashinshika