Komana Mwetejaña Spiritu Yanzambi Kuyilombola?
Komana Mwetejaña Spiritu Yanzambi Kuyilombola?
‘Spiritu yeyi yayiwahi, yinlomboli mwituña dalumbuluka.’—MAS. 143:10.
1, 2. (a) Shimunenu mpinji jazatishiliyi Yehova spiritu yajila hakukwasha ambuñindi. (b)Komana spiritu yajila yazatikaña hohu hampinji yadimena? Lumbululenu.
CHUMANYI chimwanukaña neyi mutoñojoka chazatikaña spiritu yajila? Mwatoñojokaña hanyidimu yañovu yakoñeliyi Gideyona niSamisoni? (Ansomp. 6:33 34; 15:14,15) Hadaha mwatoñojokaña hakuumika kwawakwaKristu akusambila hela kuwunda kwamwekesheliyi Setefwanu hampinji yamuleteluwu muchota chaSanihedilini. (Yil. 4:31; 6:15) Komana makonu mwatoñojokaña hamuzañalu wekalaña nawamana kwetu hakupompa kwamatuña amavulu? Tahindi mwatoñojokaña hakashinshi kekalaña nawamana kwetu akasawu mukaleya hamuloña wakubula kudiñija munsañu yamatuña, indi kwiji hakuvulilaku kwekomwesha mumudimu wakushimwina? Iyi yakutalilahu yejima hiwunsahu wamwekeshaña nawu spiritu yajila yinakuzatika.
2 Komana spiritu yajila yazatikaña hampinji yadimena hohu? Inehi. Izu daNzambi dahosha hadi akwaKristu nawu ‘endaña chakuyendesha kudi spiritu,’ ‘ayilombolaña kudi spiritu,’ nawa ‘ayihandishaña chakuyihandisha kudi spiritu.’ (Ŋal. 5:16, 18,25) Iyi nhoshelu yamwekeshaña nawu spiritu yajila yatukwashaña mpinji yejima. Twatela kumulembelela Yehova mafuku ejima kulonda yatulomboleña naspiritu yindi muyuma yitwatoñojokaña, yitwahoshaña, niyuma yitwelaña. (Tañenu Masamu 143:10.) Chitweteja spiritu kutulombola muchihandilu chetu, yikutuleñela kusoña mukabu wukuzañaleshaña amakwawu nikumulemesha Nzambi.
3. (a) Muloñadi wutwatelela kulombolewa naspiritu yajila? (b)Tukuhanjeka malwihwinyi?
3 Indi kutulombola naspiritu yajila kwalemenadi? Muloña ñovu yikwawu yafwilaña kutuyuula, ñovu yakañeshaña spiritu yajila kuzatika. Iyi ñovu yikwawu diyi yatenawu muNsona nawu “chisemwa chaheseki,” yatalisha kuyitoñojoka yatama yawuntu, hela netu kubula kuwanina kutwaswana hakwikala anyana kaAdama. (Tañenu Aŋalija. 5:17.) Hanu dinu, chumanyi chakeñekaña hakwiteja spiritu yaNzambi kutulombola? Kwekalahu jinjila jajiwahi jitwatela kulondela hakwila nawu tushindi ikakeja dachisemwa chetu chanshidi? Tuhanjekenu awa malwihu hampinji yitukudiza hayililu yitanu nakamu ‘yamukabu waspiritu,’ ‘kudiwunjika, luwi, kuwaha, chikuhwelelu, kwovwaha, nikudihemba.’—Ŋal. 5:22,23.
Kwovwaha niKudiwunjika Kwaletaña Kuwunda muChipompelu
4. Indi kwovwaha nikudiwunjika kwaletaña ñahi kuwunda muchipompelu?
4 Tañenu Akolosi 3:12,13. Muchipompelu, kwovwaha nikudiwunjika kwendelaña hamu kulonda mwikali kuwunda. Iyi yililu yejima yamukabu waspiritu yatukwashaña kuzata nawakwetu munjila yayiwahi, nikudiwunjika neyi anatuvulumuni nikubula kufuntisha katama nakatama neyi amakwawu atuhosha chatama. Neyi tunadivulumuni namukwetu mukwaKristu, kudiwunjika kukutuleñela tubuli kumuhembela mana kwetu hela muhela nkunyi, ilaña tukuzata nañovu kulonda tumanishi kukala. Komana kwovwaha nikudiwunjika kwakeñekaña chikupu muChipompelu? Eña, muloña wonsu wetu twawanina wanyi.
5. Chumanyi chamwekeni hakachi kaPawulu niBaranaba, nawa chumichi chamwekeshañadi?
5 Talenu chuma chamwekeni hakachi kaPawulu naBaranaba. Azatilileña hamu hayaaka yayivulu hakutwala nsañu yayiwahi hambidi. Wejima wawu adiñi nayililu yayiwahi. Ilaña, mpinji yimu hakachi kawu ‘havulumukili ntaadi yayeni, hiyakwambuka.’ (Yil. 15:36-39) Chumichi chamwekeshaña nawu nihakachi kawambuña Nzambi adihana hanateli kumwekana kukala mpinji yikwawu. Neyi mukwaKristu nadivulumuni namukwawu mukwakwitiya, chumanyi chatela kwilayi kulonda kukala kwenoku kubuli kuleta ntaadi yamanishaña wubwambu?
6, 7. (a) Henohu mpanji yitunakuhanjeka namana kwetu mukwakwitiya kanda yivulumuki ntaadi, twatela kwovwahila kufumbanyi kwamuNsona? (b)Nkiswinyi yafumaña ‘mukunyakala kutiya, kulaba kuhosha, nikulaba kuzuwa’?
6 Kukala kwadiña hakachi kaPawulu naBaranaba kwadiña komisha mbaña nawa kwakukasumwisha neyi chamwekeshaña nhoshelu yakwila nawu ‘kuvulumuka nintaadi yayeni.’ Neyi mukwaKristu yamona nindi mpanji yinakuhanjekawu namukwawu mukwakwitiya yinakumuhilisha, chikuwaha neyi wukwovwahila kufumba kwekala haYakoba 1:19,20 kwakwila nawu: “Antu ejima anyakali kutiya, alabi kuhosha, alabi kuzuwa. Muloña kuzuwa kwawantu hikwakoñaña kuloña kwaNzambuku.” Kwesekeja nachidi yuma nateli kuhimpa mpanji, kuhosha nsañu yacheñi hela kufumahu henohu ntaadi kanda yivulumuki.—Yish.12:16; 17:14; 29:11.
7 Nkiswinyi yafumaña mukutiyilila iku kufumba? MukwaKristu nateli kwiteja kumulombola kudi spiritu yaNzambi, kuhitila mukuwundisha muchima, kulomba kudi Nzambi, nikutoñojoka chakwakula chiwahi. (Yish.15:1,28) Spiritu yinateli kumukwasha kwikala nachililu chakudiwunjika nikwovwaha. Wukudiloñesha kuzatisha kufumba kwekala haAefwesesa 4:26,29 kwakwila nawu: “Zuwenu kuzuwa kwakadi kuvulumuna ... Kuhosha mazu atama chinjila, chiña mazu amawahi anatweshi kukolesha antu hakumonawu kukala, kulonda akwashi naluwi awa akuyitiya.” Mwalala, neyi tuvwala chililu chakwovwaha nikudiwunjika, tukuleta kuwunda nikunuñañana muchipompelu.
Zañaleshenu Chisaka Chenu naMazu aLuwi Nawa Amawahi
8, 9. Indi luwi nikuwaha hichumanyi, nawa iyi yililu yaleñelaña chisaka kwikala chamuchidinyi?
8 Tañenu Aefwesesa 4:31,32;5:8,9.Kufwana mpepela yawunda nimenji atuta hefuku dasweja nkanza, mazu aluwi nawa amawahi azañaleshaña. Aleteshaña antu amuchisaka kuzañalala. Luwi hichililu chachiwahi chaleñelaña kukeña antu chikupu, kukeña kwakweni kwamwekenaña munyidimu yakukwashana nimumazu amawahi. Luwi lwekala neyi chililu chakuwaha chamwekenaña munyidimu yakukwasha antu amakwawu. Luwi lwamwekenaña cheñi muchisambu. (Yil. 9:36,39; 16:14,15) Ilaña kwekala yuma yayivulu yakeñekaña muchililu chakuwaha.
9 Kuwaha hikwikala nayililu yayiwahi. Kwabombelamu yuma yitwelaña, sweje-e dinu chitwekala. Fwikijenu mumbanda nakuloñeshela chisaka chindi nyikabu, hampinji yinakuketulayi chibalu nichibalu nakushinshika chachiwahi kulonda yeluki chikupu nindi yatowala nawa yaha, yatoka wanyi mukachi nihanzi. Chochimu, kuwaha kwenzaña hamuloña waspiritu yajila kwamwekanaña muchihandilu chejima chamukwaKristu.
10. Chumanyi chimunateli kwila hakwila mukwashi antu amuchisaka kwikala namukabu waspiritu?
10 Muchisaka chawakwaKristu, chumanyi chinateli kukwasha amuchisaka kudakamena naluwi nawa munjila yayiwahi? Kwiluka nsañu yalala yaMwizu daNzambi hichuma chalema nankashi. (Kol. 3:9,10) Nyitu yayisaka yikwawu yadizaña mukabu waspiritu hampinji yaKudifukula kwaChisaka kwamelela kwamulungu nimulungu. Kudiza mukabu waspiritu hichuma chaswayi kwila. Zatishenu nyikanda yimukweti mwidimi denu, tondenu nsañu yahosha hayililu yejima yamukabu waspiritu. Munateli kudiza maparakalafu antesha hohu mulungu nimulungu, nikudiza hachililu chimu hanyilungu yayivulu. Hampinji yimunakudiza nsañu, tañenu nikuhanjeka jinsona jinatenuwu. Keñakeñenu jinjila jakuzatishilamu yuma yimunakudiza, nawa lombenu kudi Yehova kulonda yayikiswili. (1Tim. 4:15; 1Yow. 5:14,15) Komana kudiza kwamuchidiwu kunateli kuleñela antu amuchisaka kwakamena akwawu chiwahi?
11, 12. Indi amayala ayedi niañodijawu akwaKristu ahetelelumu ñahi hakudiza chililu chaluwi?
11 Antu adisumbula achidi atwansi, afwilileña kwikala namaluwi amawahi afuukwiluhu kudiza chikupu mukabu waspiritu. Ahetelamu ñahi? Mumbanda wahosheli nindi: “Kudiza yuma yayivulu hakukeña kwenzala wushona kwatukwashili kwiluka chakudakamena chiwahi kushika nikulelu. Kunatudizishi kudovwahila nikudanakena. Chumichi chatukwasha kwiluka chakuhosha netu ‘nasakililuku’ hela ‘wuñanakenuku’ neyi chinatwesheki.”
12 AkwaKristu adisumbula amakwawu adiña nakukala mumaluwi awu, elukili nawu hiyaditiyilileña luwuku. Afukwiluhu kudizila hamu nsañu yahosha haluwi. Chumanyi chafuminumu? Iyala wanukaña nindi: “Kudiza ichi chililu kwatukwashili kumona yuma yayiwahi mudi wumu namukwawu chatela tuditwikeña nyiloña hayitoñojoka yaluwa, twamonaña yuma yayiwahi mudi wumu namukwawu. Twatachikili kutwamijaku yuma yitwakeñaña wejima wetu. Namulejeleña cheñi ñodami kuhosha yuma yinakutoñojokayi chakadi woma nawa yuma yahosheleñayi hiyanhilishileñaku. Hakwila nawu nili mwenimu, nateleleli kuleka kudinka wanta. Chitwatachikili kuzatisha chililu chaluwi mumaluwi etu, twalekili kudinka nyiloña chovu-chovu. Twekalili akasunuka chikupu.” Komana kudiza mukabu waspiritu kunateli kukwasha chisaka chenu?
Ikalenu Nachikuhwelelu Hampinji Yimudi Nkawenu
13. Twatela kudihemba kuwubanjinyi wakuspiritu?
13 AkwaKristu atela kwiteja spiritu yaNzambi kuyilombola hampinji yadiwu hakachi kawantu hela nkawawu. Makonu nyivwimbimbi yatama niyisela yatiyishaña nsonyi yinasweji kutanda mukaayi kaSatana. Chumichi chinateli kumanisha wulunda wetu naYehova. Chumanyi chinateli kwilayi mukwaKristu? Izu daNzambi datufumbaña nawu: “Fumishenu majilu ejima ninkunyi yakusumpoka; tambulenu mazu anatumbuwu mudenu nakwovwaha, anatweshi kwamwina wumi wenu.” (Yak. 1:21) Ichi dinu tushinshikenu chililu chikwawu chamukabu waspiritu chichinateli kutukwasha kwikala awunyonji kumesu aYehova, chikuhwelelu.
14. Indi kubula chikuhwelelu kunateli kukukojeja ñahi muntu kukoña yuma yatama?
14 Neyi tukweti chikuhwelelu chalala, tukutoñojokaña netu Yehova Nzambi wekala kwoku. Ilaña neyi tumonaña netu Nzambi wekalaku wanyi, tukukoñaña yuma yatama. Shinshikenu chuma chamwekeni kudi antu jaNzambi akushankulu. Yehova wamulejeli kaprofwetu Ezekeli kutalisha hadi antu akoñeleña yishimashima kumbadi, nindi: ‘Eyi mwana kamuntu, wunamoni chadi nakwilawu akulumpi amutaña wawaIsarela mumwidima, mutupeka twamukachi kayifwikija yafuukulañawu, muntu himuntu, tahindi? Muloña wena adi nakwila nawu, Yehova hatumonañaku; nawu, Yehova nafumi dehi mwituña.’ (Ezek. 8:12) Komana munamoni chuma chaleteli kukala? Akuhweleleli nawu Yehova wamweneña wanyi yuma yakoñeleñawu. Atoñojokeleña nawu Yehova wekalaku wanyi.
15. Indi kwikala nachikuhwelelu chakola mudi Yehova kwatukiñaña ñahi?
15 Kwambukaku, shinshikenu chakutalilahu chaYosefu. Hela chakwila Yosefu wadiña kwakulehi nachisaka chindi, wakaanini kwila wuvumbi nañoda Potifwari. Muloñadi? Wahosheli nindi: “Ndochu ami nukutwesha ñahi kukoña chumichi chasweja kutama nakumuvulumuna Nzambi?” (Kutach. 39:7-9) Chalala Yosefu welukili nindi Yehova wekala kwoku. Neyi twiluka netu Nzambi wekala kwoku, hitunateli kutala yisela yatama hela kukoña yuma yidi yejima kumbadi yinateli kumutiyisha Nzambi kutamaku. Tukufuukulahu neyi chafuukwiluhu ñimbi yamasamu wembili nindi: “Nukwendaña mwitala dami namuchima walala. Hinukusha mesu ami hachuma chatamaku.”—Mas. 101:2,3.
Hembenu Muchima Wenu Kuhitila Mukudihemba
16, 17. Kwesekeja nachinalumbululuwu mumukanda waYishimu, indi “mukwenzi wakadi muchima” wafwili ñahi mumuhetu wanshidi? (b)Neyi chinamwekeshuwu hefu26, indi chuma chadifwanaku chinateli kumwekana ñahi makonu hichidi namuloña wayaaka yikwetiyi muntuku?
16 Kudihemba, hichililu chakukumishaku chamukabu waspiritu chatukwashaña kubula kudiñija muyuma yakaanishayi Nzambi. Kunateli kutukwasha kuhemba muchima wetu. (Yish.4:23) Talenu nsañu yekala haYishimu 7:6-23, yashimuna hadi “mukwenzi wakadi muchima” wafwili mumuhetu wachivumbi. Wafwili mumuhetu cheliliyi ‘yahiti hanzi kwakwihi namaakenu adi kwashakamayi mumbandowu.’ Hadaha wahitilili kwakwihi nakwashakamayi hamuloña wakufwila kwiluka yuma. Wakañenyi kwiluka nindi anakumulombola munjila yatama ‘yakumujahilamu.’
17 Chumanyi chadi kwilayi iwu mukwenzi kulonda yabuli kwiñila mukukala kweneni? Kuhitila mukutiyilila kufumba kwakwila nawu: “Bayi mupwapukila munjila jinduku.” (Yish.7:25) Kudi chuma chitunateli kudizilaku: Neyi tunakukeña kulombolewa naspiritu yaNzambi, twatela kutondolwela yuma yinateli kutuleñela kwiñila mukweseka. Muntu nateli kupwapukila munjila yatama ‘yamukwenzi wakadi muchima’ kuhitila mukukeñakeña jiprogiramu hachisanji chanyivwimbimbi hela kusandujola haIntaneti chakadi niyuma yinakukeñayi. Chili muntu naluwukili chili nehi, nateli kuwana yuma yikumuleñela kutiya wuvumbi. Nateli kwikala nachaaku chakutalaña nyevulu yanzekesi chovu-chovu, chaaku ichi chikuluwañesha chinleji chindi niwulunda windi naNzambi. Wumi windi wunateli kwikala mukukala.—Tañenu Aroma 8:5-8.
18. Yumanyi yatela kwilayi mukwaKristu hakwila yahembi muchima windi, nawa chumichi chakeñekaña kudihemba munjilanyi?
18 Kafwampi, twatela kudihemba kuhitila mukuhimpa progiramu hela kujima kompyuta swayi-swayi neyi tunamoni mwevulu watama. Ilaña chikuwaha nankashi neyi tusambila kutondolwela iku kukala. (Yish.22:3) Twatela kudihemba hakwila nawu tutanjiki jinjila jatela kutukiña nikujilondela. Chakutalilahu, kusha kompyuta hatela kuyimonawu antu ejima chinateli kuyikiña. Chuma chayikwashaña amakwawu hikuzatisha kompyuta hela kutala chisanji chanyivwimbimbi neyi hadi antu amakwawu. Amakwawu niwena afuukulahu kubula kuzatisha Intaneti. (Tañenu Matewu 5:27-30.) Tuzatenu nañovu yejima kulonda tudikiñi etu aweni nichisaka chetu hakwila nawu tudifukuleña kudi Yehova ‘namuchima wutooka, nachinleji chamuchima chachiwahi, nikukuhwelela kwakadi kudimbana.’—1Tim. 1:5.
19. Nkiswinyi yafumañamu neyi twiteja kulombolewa naspiritu yajila?
19 Mukabu wenzaña hamuloña waspiritu yajila waletaña nkisu yayivulu. Kwovwaha nikudiwunjika kwaletaña kuwunda muchipompelu. Luwi nikuwaha hiyililu yaletaña muzañalu muchisaka. Chikuhwelelu nikudihemba kukutukwasha kutwalekahu kukundama kwakwihi naYehova nikwikala awunyonji kudi yena. Kubombelahu, mukanda waAŋalija 6:8 watukonkomwena nawu: ‘Hakwila yena wukukuwila kuspiritu, wakadya wumi wahaya nyaka kudi spiritu.’ Eñañi, kushindamena hefutu danyiloña daKristu, Yehova wakazatisha spiritu yajila kulonda yakayinki antu alombolewaña naspiritu wumi wahaya nyaka.
Mukwakula Nenudi?
• Indi kwovwaha nikudiwunjika kwaletaña ñahi kuwunda muchipompelu?
• Hakwila nawu akwaKristu ekala nachililu chaluwi nikuwaha hetala dawu, chumanyi chinateli kuyikwasha?
• Indi chikuhwelelu nikudihemba kunateli kumukwasha ñahi mukwaKristu kuhemba muchima windi?
[Malwihu aKuzatisha haKudiza]
[Mwevulu wudi hefu 24]
Munateli kukañesha ñahi mpanji yimunakuhosha kubula kuvulumuka ntaadi?
[Mwevulu wudi hefu 25]
Kudiza nsañu yahosha hamukabu waspiritu kunateli kuhetesha chisaka chenu
[Mwevulu wudi hefu 26]
Kukalanyi kutwatondolwelaña neyi twikala nachikuhwelelu nikudihemba?