Komana Mwatiyaña Kuwaha Kutaña niKudiza Izu daNzambi?

LORRAINE wahosheli nindi: “Chinatachikili kutaña Bayibolu mpinji yejima, natiyileña wuudi hinayikeñeluku. Nakañenyeña kutiyisha, kakavulu hinadiña nakushaku maanaku.”

Antu amakwawu niwena ashimunaña nawu hampinji yatachikili kutañawu Bayibolu hiyadiluñishileñaku. Hela chochu, atwalekeluhu muloña elukili nawu kutaña Nyikanda Yajila dichuma chachiwahi. Marc wahosheli nindi: “Chaswayi kwiteja yuma yikwawu yiluwañeshi ntanjikilu yakutaña Bayibolu nikudiza kwahalwenu. Nalombeleña chikupu nikuzata nañovu hakwila nawu nitañeña Bayibolu ifuku niifuku.”

Chumanyi chimwatela kwila kulonda mulemeshi chikupu Izu daNzambi dasonekawu, Bayibolu? Munateli kwila ñahi kulonda mudiluñisheña kutaña Bayibolu? Shinshikenu hanjila jinashimunuwu.

Ikalenu Nayikonkwanyi niKwiluka Mwakutañila

Henohu kanda mutachiki kutaña Bayibolu lombenu nawa shenuku muchima. Lombenu kudi Yehova yayikwashi mwikali nampwila yakutaña Izu dindi. Mulombenu yayinki maana nimuchima wakwiluka chikupu maanindi. (Mas. 119:34) Chakadi kulondela iyi njila, kudiza Bayibolu hikwalumbulukañaku, nawa mpwila yakutwalekahu yinateli kumana. Lynn wahosheli nindi: “Mpinji yikwawu natañaña lufuchi nawa yikuma yikwawu hinayitiyañaku. Kakavulu hinatiyishaña yikuma yayenuku. Hela chochu, nalombaña kashinshi nawa chankwashaña kusha maana kuyuma yinakudiza.”

Lemeshenu yuma yimwadizaña. Anukenu nenu kutiyisha nikuzatisha nsañu yalala yamuBayibolu diwumi wenu. Dichi, zatenu nañovu kulonda muwaneña yikuma yayiwahi nawa muyizatisheña. Chris wahosheli nindi: “Nakeñaña yuma yatela kunkwasha kulonda niluki yililu yatama niyitoñojoka yami. Chanzañaleshaña hakwiluka Bayibolu ninyikanda yetu yikwawu yayivulu mwekala nsañu yankwashaña, hela chakwila antu ayisonekaña hiyañilukaku.”

Imikenu yikonkwanyi yimwatela kushikija. Esekenu kudiza yuma yayiha yawantu asonekawu muBayibolu. Munateli kuwana nsañu yakuhayamisha yawantu amavulu kuhitila musandujola muInsight on the Scriptures or the Watch Tower Publications Index. Chimukwiluka amayala niambanda asonekawu muBayibolu nenu hiyantu alala adiña nayililu niyitoñojoka, yuma yimukudiza yikuyikwasha nankashi.

Wanenu njila jajiha jakuhanjekelamu haNyikanda. (Yil. 17:2, 3) Ichi dichelañayi Sophia neyi nakudiza. “Nafwilaña kudiza nikuwana njila jajiha jakuhanjekelamu jakuzatisha mumudimu wakushimwina nimpinji yikwawu, kulonda nishimuneña chachiwahi nsañu yalala yamuBayibolu.” Watwalekeluhu nindi: “Kaposhi Kakutalila hichitwa chachiwahi chimwatela kuzatisha mumudimu wakushimwina.”—2 Tim. 2:15.

Fwikijenu nsañu yamuBayibolu. Nsona yaAheberu 4:12 yahosha nawu: “Mazu aNzambi amomi.” Chimukutañaña Nyikanda, nsañu yaNzambi yatela yitentami muyitoñojoka yenu kuhitila mukufwikija yuma yamweneñawu antu ashimunawu muBayibolu. Esekenu kutiya yuma yatiyileñawu nikutoñojoka yuma yatoñojokeleñawu. Esekejenu yuma yamwenuwu  nayuma yimunakumona muchihandilu chenu. Mwatela kudizila kudi wena nikwiluka chamanishileñawu kukala. Ichi chikuyileñela kutiyisha chikupu nikuhemba nsañu yamuBayibolu.

Zatishenu mpinji yeneni hakutiyisha nyikanda yakola nihakwiluka muyatalisha kulonda muyilukishi. Ikalenu nampinji yeneni yakudiza chibalu chidi chejima. Munateli cheñi kuwana malwihu amawahi imwatela kusandujola kulonda muyitiyishi. Keñenu mwatalisha mazu imunabuli kwiluka, tumazu twaheshina, ninsona jikwawu jinadifwanuku jamuBayibolu. Neyi mutiyisha chikupu nsañu yimunakutaña, mukusweja kukeña Izu daNzambi dasonekawu. Munateli kuhosha neyi chahosheli ñimbi yamasamu nindi: “Wunsahu weyi [Yehova] washimunaña nawidyi neyi wuswana wahaya nyaka; muloña natiyañamu kuwaha mumuchima wami.”—Mas. 119:111.

Bayi mutañamu lufuchi lufuchuku. Ikalenu nampinji yashikila yakudiza halwenu. Yesekejenu nampinji yimwazatishaña hakuloñesha kupompa kwachipompelu. Raquel wahosheli nindi, “Kakavulu nazeyaña chikupu nawa nakañanyana kushaku maana. Dichi kudiza hadi mpinji yantesha kwankwashaña nankashi. Nahetelañamu chikupu mukudiza kwamuchidiwu.” Chris wahosheli nindi: “Neyi nihitamu lufuchi lufuchi, chinleji chami chakabishaña muloña nelukaña hohu yuma yantesha. Kakavulu iyi nsañu hiyanshikaña hamuchimaku.” Dichi mwatela kwikala nampinji yeneni yakudiza.

Ikalenu nampwila chikupu yakudiza izu daNzambi. Kapostolu Petulu wahosheli nindi: “Fwilenu mayeli awuspiritu akadi makasu, neyi anyikeki anavwaliki katataka, kulonda mukuli nachu mushiki kuwamwinu.” (1 Pet. 2:2) Ankemba hiyakeñekaña kwikala nampwila yakwamwaku. Mpwila yawu yakusemuka nayu. Ilaña Nyikanda yashimuna nawu twatela kwikala nampwila yakukeña izu daNzambi. Neyi mutañaña ifu dimu damuBayibolu hefuku hefuku, mukwikala nampwila chikupu. Mumpinji yantesha mukutachika kudiluñisha nachuma chamwekeneña kukala hakusambila.

Toñojokenu chikupu hansañu yidi muNyikanda. Kutoñojoka hansañu yimunatañi kwaheteshaña nankashi. Ichi chikuyikwashaku kwesekeja nsañu yakuspiritu yimunasandujoli. Mumpinji yantesha mukwikala neheta dakuspiritu damaana, iheta dadiwahi nankashi.—Mas. 19:14; Yish. 3:3.

 Mpinji Yitwazatishaña Chachiwahi

Chakeñekaña kuzata nañovu hakwila nawu mutwalekuhu kudiza chachiwahi, ilaña mwafumaña nkisu jajivulu. Mukukulilaku kuspiritu. (Heb 5:12-14) Kashinshi nimaana imukuheta muNyikanda yonenawu, akuyileñela kwikala amuzañalu, amawahi nawa awunda. Maana ekala Mwizu daNzambi donenawu, ‘himutondu wawumi’ sweje-e kudi antu ayihetaña nikuyizatisha.—Yish. 3:13-18.

Kudiza chikupu Izu daNzambi kukuyileñela mwikali namuchima wakwiluka. (Yish. 15:14) Ichi chikuyikwasha kufumba muntu namuchima wumu kushindamena haBayibolu. Neyi mukuzatishaña yuma yimwatañaña muBayibolu nimunyikanda yasonekawu kudi ‘nduñu wamaana nikashinshi’ hakufuukula yuma yimunakwila, mukwikala namuzañalu nikuwunda kwafumaña Mwizu daYehova donenawu. (Mat. 24:45) Mukwikala akasunuka chikupu, akola, nawa yitoñojoka yenu, yililu ninhoshelu, yikushindamenaña Hezu daYehova. Kubombelahu, yuma yejima yimwelaña yinakundami kuwubwambu wenu naNzambi yikwendaña chachiwahi.—Mas. 1:2, 3.

Kumukeña Nzambi chikupu kukuyileñela kulejaku amakwawu yuma yimwakuhwelela. Ichi chaletaña nkisu yayivulu. Sophia nakuzata nañovu kulonda yanukeña nikuzatisha nsona jamboka-mboka hakwila nawu yakokoleña enimatala nawa yazateña chachiwahi mudimu windi wawakwaKristu nawa wusoñeña nyikabu. Wahosheli nindi, “Nazañalalaña chikupu hakumona antu anakwiteja nsañu yamuBayibolu.”

Kwikala nawubwambu wawuwahi naYehova dichuma chabadika chafumaña mukutaña nikudiza Izu daNzambi. Kudiza Bayibolu kukuyileñela mwiluki nshimbi jindi nikuhameka kukeña kwindi, chisambu, niwuñanji. Kwosi chuma chikwawu chabadika kulema hela chinateli kutuletela nkisu jajivulu. Dizenu chikupu Izu daNzambi. Mpinji yitwazatishaña hakutaña nikudiza diyi mpinji yitwazatishaña chachiwahi.—Mas. 19:7-11.

[Chikasha/Nyevulu yidi hefu 5]

KUTAÑA IZU DANZAMBI: YIKONKWANYI NINJILA JAKULONDELA

▪ Hakutachika kutaña Bayibolu lombenu nawa shenuku muchima.

▪ Lemeshenu yuma yimunakudiza.

▪ Imikenu yikonkwanyi yimwatela kushikija.

▪ Wanenu njila jajiha jakuhanjekelamu haNsona.

▪ Fwikijenu nsañu yamuBayibolu.

▪ Ikalenu nampinji yeneni yakusandujola hansona jakola nikwiluka mujatalisha kulonda mujiluki chikupu.

▪ Bayi mutañamu lufuchi lufuchuku.

▪ Ikalenu nampwila chikupu yakudiza izu daNzambi.

▪ Toñojokenu chikupu haNsona yimunatañi.

[Mwevulu wudi hefu 4]

Hakutaña nsañu yamuBayibolu, difwikijenu ninenu mudi mukukala kwokumu