Kumukuhwelela Yehova Namuchima Wejima Kwatukiñaña Nankashi

“Yehova wukutiya chinukutambika.”—MAS. 4:3.

1, 2. (a) Yihuñu yamuchidinyi yamweniyi Davidi? (b) Tukuhanjeka hamasamwinyi?

 MWANTA DAVIDI wayulili muza waIsarela hadi mpinji yayilehi, ilaña watachikili kumona yihuñu. Mwanindi Abisalomi wakwatili kafuta nakuditena yomweni nindi himwanta, nawa Davidi watemukili muYerusalema. Amufutukili cheñi kudi ibwambu dindi wahamuchima, nawa haniyi mpinji washalili nawantu antesha ashinshika, wayili Kumpidi yaOliveta iku nakudila ikumbu nawa wendeli nyendu hanji. Kubombelahu, Shimeyi, wachisaka chamutaña waMwanta Sawulu, wadiña nakumwasa Davidi malola nikumukuwa lunkuñu iku nakumushiña.—2 Sam. 15:30, 31; 16:5-14.

² Komana idi ihuñu damweniyi Davidi damuleñeleli yasweji kuneña nikutiya nsonyi chikupu? Inehi, muloña wamukuhweleleli Yehova. Iyi diyi nsañu yitwatañaña Mwisamu damuchisatu, dasonekeliyi Davidi kutalisha hampinji yamutemukileñayi Abisalomi. Wasonekeli cheñi Isamu damuchiwana. Munawa masamu ejima asonekeliyi wamwekesheli chikupu nindi Nzambi watiyaña nawa wakulaña kulomba. (Mas. 3:4; 4:3) Awa masamu atulejaña nawu Yehova wakamenaña ambuñindi ashinshika mwaana niwufuku, wayikiswilaña kuhitila mukuyikwasha nikuyinka kuwunda nikuyikiña. (Mas. 3:5; 4:8) Dichi, tushinshikenu hanawa masamu kulonda twiluki chiyatela kutukolesha nikutuleñela tumukuhweleli Nzambi.

Neyi ‘Atunyamukila Kudi Antu Amavulu’

3. Kukalanyi kwamweniyi Davidi kwashimunawu haMasamu 3:1, 2?

³ Kañanda wumu wahosheli nindi: “Nyichima yawaIsarela amayala yinayi dehi kudi Abisalomi.” (2 Sam. 15:13) Hakukeña kwiluka chaleñeleli antu ejima ayi kudi Abisalomi, Davidi wenhwili nindi: “Eyi Yehova akwankunyi nami o kuvula! Amavulu hiyakunnyamukila. Amavulu enda antena nawu hiyakamwamwina kudi Nzambuku.” (Mas. 3:1, 2) A Isarela amavulu atoñojokeleña nawu Yehova hakumuhandisha Davidi kuyihuñu yamumwesheleñawu kudi Abisalomi niantu jinduku.

4, 5. (a) Chumanyi chakuhweleleliyi Davidi? (b) Indi mazu akwila nawu “yeyi mukwakufumbula mutu wami,” atalisha mudihi?

⁴ Davidi wadiña nachikuhwelelu muloña welukili nindi Nzambi wukumukwasha. Wembeli nindi: “Hakwila eyi Yehova, yeyi nkebu yami yannyeñumuka kwi-ndo; yeyi kulema kwami, yeyi mukwakufumbula mutu wami.” (Mas. 3:3) Davidi welukili chikupu nindi Yehova wukumukiña neyi chochadikiñaña mushidika nankebu. Eñañi, iwu mwanta wadiña washinakaja dehi watemukili, wajikili mutu windi nawa wanoñamini muloña amutiyishili nsonyi. Ilaña Mukwakubadika wahimpili yihuñu yaDavidi nakumuletela kulema. Yehova wamukwashili kwimana ngu-u, kufumbula mutu windi nakwenda cheñi choloka. Davidi wakuhweleleli nindi Nzambi wukutiya kulomba kwindi. Komana ninenu mwamwekeshaña nenu mwamukuhwelela Yehova?

⁵ Chahosheliyi mazu akwila nindi “yeyi mukwakufumbula mutu wami,” Davidi welukili nindi Yehova diyi wukumukwasha. Bayibolu yaToday’s English Version yahosha nawu: “Eyi MWANTA, yeyi nkebu yami mwakubatama kuwubanji; wanleñelaña nishindi nawa wanyikaña cheñi ñovu.” Kutalisha kumazu akwila nawu “yeyi mukwakufumbula mutu wami,” mukanda wumu wahosha nawu: “Neyi Nzambi yafumbula . . . Mutu wamuntu, Nzambi wamwinkaña kuchiñeja  nichikuhwelelu.” Davidi waneñeli, muloña amutemwini hawanta wamuIsarela. Ilaña, ‘chafumbwiluwu mutu windi’ chamuleñeleli kwikala cheñi nañovu, chikuhwelelu, nikushindamena chikupu hadi Nzambi.

‘Yehova Wukwitiya’

6. Muloñadi Davidi chahosheleliyi nindi kulomba kwindi akwakwilili kumpidi yaYehova yajila?

⁶ Hamuloña wakumukuhwelela Yehova, Davidi watwalekeluhu nindi: “Nenda nimutambika Yehova nezu dami, hakwitiyila mumpidi yindi yajila.” (Mas. 3:4) Kwesekeja nanshimbi yashimwiniyi Davidi, chimbañu chachitiyañenu, chamwekesheleña nawu Nzambi wudikoku, achitwalili kuMpidi yaZiyona. (Tañenu 2 Samweli 15:23-25.) Komana, dihafumini Davidi kuhosha nindi Yehova wakwilili kulomba kwindi kuyina mpidi yajila.

7. Muloñadi Davidi chabuliliyi kutiya woma?

⁷ Davidi chelukiliyi chikupu nindi Nzambi wukwakula kulomba kwindi, hatiyili womaku. Dichi, wembeli nindi: “Ami kwami nakambamini hinukukama nitulu. Natoneni, muloña Yehova diyi wankwatishaña.” (Mas. 3:5) Hela tuhu nawufuku, mpinji yinateli kumulukukawu mukukasumwisha, Davidi hatiyili woma wakukama tuluku. Welukili nindi neyi yakama wukahinduka tuhu chiwahi, muloña yihuñu yahitulumu yamuleñeleli kukuhwelela nindi watela kushindamena muñovu yaNzambi yabadika. Anetu nawa tunateli kukuhwelela mwomumu neyi tukolela “munjila jaYehova” chakadi kumushiya.—Tañenu 2 Samweli 22:21, 22.

8. Indi nsona yaMasamu 27:1-4 yamwekeshaña ñahi nawu Davidi wamukuhweleleli Nzambi?

⁸ Davidi wamwekesheli cheñi chikuhwelelu nikushindamena hadi Nzambi mwisamu dikwawu, mwekala awa mazu onenawu akwila nawu: “Yehova diyi chejeji chami, diyi wamwinu wami; muntwinyi inukwakamami? Mudi Yehova dimu mwakolela wumi wami indi muntwinyi inukutiyami woma? . . . Hela kukunteekelela izaza danjita, muchima wami hiwukwakamaku. . . . Kudi chuma chimu chinamulombi Yehova, nafwili nami nichimoni; dichenichi nami, nishakami mwitala daYehova mafuku ejima inukwikala wamumi, nami nibanjili Yehova chawahayi, nimwihuli chachiwahi mutembeli yindi.” (Mas. 27:1-4) Neyi mwiteja awa mazu nawa neyi chinatwesheki, mpinji yejima mukuyaña kukupompa nawakwenu akwakudifukula aYehova.—Heb. 10:23-25.

9, 10. Hela chakwila wahosheli awa mazu adi haMasamu 3:6, 7, muloñadi chimukuhoshela nenu Davidi hadiña nayililu yakuhemba nkunyiku?

 ⁹ Hela chakwila Davidi amufutukilili kudi Abisalomi niantu amakwawu abula kashinshi, wembeli nindi: “Hinukutiya woma wamakombakaji awantu makumi namakumi anantandamini kwi-ndo, nawu azuñi nanamuku. Nyamukaku eyi Yehova; ñamwini, eyi Nzambi yami; muloña ayilumbu jami ejima wunayeti dehi hambaña, wunakotoli dehi maji awantu atama.”—Mas. 3:6, 7.

¹⁰ Davidi hadiña nayililu yakuhembela nkunyiku. Nzambi yomweni diyi wateleli ‘kweta hambaña’ jawayilumbu jindi. Mwanta Davidi yomwenindi diyi wasonekeli mukanda waNshimbi nawa welukili nindi hayina nshimbi Yehova wahosheli nindi: “Nikutenda, yami; nikufweta, yami.” (Kuhit. 17:14, 15, 18; 32:35) Cheñi nawa Nzambi yomweni diyi watela kufuukulahu ‘kukotola maji awantu atama.’ Kukotola maji awu chinatalishi mukumanisha ñovu yawu yakukatisha antu. Yehova diyi weluka antu atama muloña “watalaña kumuchima.” (1 Sam. 16:7) Twasakililaña nankashi muloña Nzambi watwinkaña chikuhwelelu niñovu yakudikaña nachilumbu muneni, Satana, nawa katataka amujikili muwina neyi mutupa wunakubuluma wabula maji watelela hohu kujilumunawu.—1 Pet. 5:8, 9; Chim. 20:1, 2, 7-10.

“Wamwinu Wambala waYehova”

11. Muloñadi chitwatela kulombelaku akwetu akakwitiya?

¹¹ Davidi welukili nindi Yehova hohu diyi wunateli kumupulwisha. Ilaña ñimbi yamasamu hadiña nakutoñojoka hohu hadi yomwenuku. Indi antu jaYehova ejima akweti wuselewa windi? Mwalala, Davidi wakunkulwili mazu indi asonekeliyi onenewa nindi: “Wamwinu wambala waYehova; nkisu yeyi yiikali hadi antu eyi.” (Mas. 3:8) Eñañi, Davidi wadiña nakukala kweneni, ilaña wadiña nakutoñojoka hadi antu jaYehova ejima nawa wakuhweleleli nindi Nzambi wukuyikiswila. Komana ninetu hitwatela kutoñojokaña hadi akwetu akakwitiyaku? Twatela kuyilombelañaku, kumulomba Yehova yayinki spiritu yindi yajila kulonda abuli woma nawa ekali nachikuhwelelu chakola chikupu chakushimwina nsañu yayiwahi.—Efwes. 6:17-20.

12, 13. Chumanyi chamumwekeneni Abisalomi, nawa Davidi welili ñahi?

¹² Chihandilu chaAbisalomi chamanini munjila yatama, chasoñamishaña antu ejima akabishaña akwawu, sweje-e antu jaNzambi awayishewa, adi neyi Davidi. (Tañenu Yishimu 3:31-35.) Kwavulumukili njita, nawa amashidika Abisalomi ayishindili. Abisalomi wadiña nakwendela hachingongavalu hampinji yakakameneni nsuki jindi jalubanji mumutayi wamutondu weneni. Wakakameneni munyitayi iku wamumi ilaña wakañenyi mwakwilila kushika nimpinji yamujahiluwu kudi Yowabi kuhitila mukuhanwisha tumayoña tusatu haluduñu lwaAbisalomi.—2 Sam. 18:6-17.

¹³ Komana Davidi wazañaleli chatiyiliyi chuma chamumwekeneni mwanindi? Inehi. Ilaña watachikili kutadañila nikudila nawa wahosheli nindi: “Eyi mwanami Abisalomi! Mwanami! Mwanami! Abisalomi! Mutenowu yami nakufwila! Eyi Abisalomi! Mwanami mwanami!” (2 Sam. 18:24-33) Mazu ahosheli Yowabi diwu amukundejeli Davidi. Abisalomi wamweni jomisha mbaña, lwisu lwindi lwamuleñeleli yatachiki kumuzuñisha tata yindi, awayishiluwu kudi Yehova, nawa wadileteleli kukala!—2 Sam. 19:1-8; Yish. 12:21; 24:21, 22.

Davidi Wamukuhweleleli Cheñi Nzambi

14. Indi Kapetulu 4 kamukanda waMasamu akisonekelelidi?

¹⁴ Neyi chochahosha Isamu damuchisatu, isamu damuchiwana dahoshaña hakulomba kwaDavidi kwamwekeshaña nawu wamukuhweleleli chikupu Yehova. (Mas. 3:4; 4:3) Hadana Davidi wasonekeli aka kamina hakumwekesha muzañalu nikuhameka kudi Nzambi chelili Abisalomi yakañanyi kumutambula wanta. Indi kwiji hakusoneka wadiña nakutoñojoka hadi aLevi akakwimba. Hichikweti muloña nachuma chaleñeleli yasoneki idi isamuku, kutoñojoka chikupu haniyi nsañu kunateli kukolesha chikuhwelelu chetu mudi Yehova.

15. Muloñadi chitwatelela kulombela kudi Yehova kuhitila mudi Mwanindi?

¹⁵ Davidi wamwekesheli cheñi nawu wamukuhweleleli  Nzambi chikupu nawa wamwekesheli nindi Nzambi nateli kutiya nikwakula kulomba kwindi. Wembeli nindi: “Chinukutambika itiyaku, eyi Nzambi wakuloña kwami. Chinadiñi hakala eyi wanshila heneni. Ntoñuhu, ntiyi chinukulomba.” (Mas. 4:1) Tunateli ninetu kumukuhwelela neyi twilaña yuma yaloña. Neyi twiluka netu, Yehova “Nzambi wakuloña,” wakiswilaña antu jindi, tunateli kumulomba kuhitila mudi Mwanindi nakukuhwelela mulambu wefutu daYesu. (Yow. 3:16, 36) Ichi chatuleñelaña kwikala nanyichima yakuwunda.

16. Muloñadi Davidi chaneñeleliyi?

¹⁶ Mpinji yikwawu, kudi yuma yinateli kutuneñesha yikutuleñela tukañanyi kumukuhwelela. Mpinji yimu, ichi dichamumwekeneni Davidi, wembeli nindi: “Enu anyana kawantu, mafuku akubalumunawu kulema kwami hikukwila nsonyi añahi? Mafuku añahi imukukeña chuma chakuhemesha, imukukeñakeña kutwamba?” (Mas. 4:2) Mazu akwila nawu “anyana kawantu” ahoshaña hadi antu munjila yatama. Ayilumbu jaDavidi ‘akeñeli yuma yakuhemesha.’ Bayibolu yaNew International Version yahoshaña haniwu mukuku wamazu nawu: “Mukukeña yuma yakuhemesha nikukeña anzambi akutwamba nakushika kumwakanyi?” Neyi yuma yakoñañawu akwetu yituneñesha, twatela kutwalekahu kulomba nikumukuhwelela chikupu Nzambi walala wumu hohu.

17. Lumbululenu chitwatela kulondela nsona yaMasamu 4:3.

¹⁷ “Ilukenu kwenu nenu Yehova namwambuli muntu wajila nindi hiwamami hohu; Yehova wukutiya chinukutambika,” awa mazu amwekeshaña nawu Davidi washindameneni chikupu hadi Nzambi. (Mas. 4:3) Hakwila nawu tutwalekuhu kwikala ashinshika chakeñekaña kwikala nawulobu nikumukuhwelela chikupu Yehova. Chakutalilahu, yisaka yawakwaKristu yatela kwikala naniyi yililu neyi ntaña yawu wabulaña kubalumuka mumuchima amuhaña muchipompelu. Nzambi wakiswilaña antu ashinshika nialondelaña njila jindi. Sweje-e dinu, kwikala ashinshika nikumukuhwelela chikupu Yehova kwazañaleshaña antu jindi.—Mas. 84:11, 12.

18. Kwesekeja naMasamu 4:4, chumanyi chitwatela kwila neyi muntu yatuhosha mazu atama hela yatukoña katama?

¹⁸ Chumanyi chimukwila neyi muntu yahosha mazu hela yakoña chuma chikuyihilisha? Tunateli kwikala amuzañalu neyi tulondela mazu ahosheli Davidi nindi: “Zaalenu woma, bayi muvulumunaku. Dilejenu munyichima yenwenu aweni hatudidi twenu, mudihudikenu zo-o.” (Mas. 4:4) Neyi atuhosha mazu atama hela kutwila katama, bayi tuvulumuna kuhitila mukufuntisha katamaku. (Rom. 12:17-19) Tunateli kushimuna yuma yejima yidi kumuchima mukulomba kwakankawetu hakadidi. Neyi tulombela hakukala kutunakumona, tunateli kukwimwena munjila yacheñi nawa kukeña kukutuleñela kwanakena. (1 Pet. 4:8) Kufumba kwakapostolu Pawulu kwalema nankashi haniyi nsañu, hadaha kwashindamena hamazu ekala haMasamu 4:4, wahosheli nindi: “Zuwenu kuzuwa kwakadi kuvulumuna, bayi muhumisha itañwa iku saña mwahililaku. Bayi mumushila diyabolu hakushakamaku.”—Efwes. 4:26, 27.

19. Indi Nsona yaMasamu 4:5 yinateli kutukwasha ñahi mukudifukula kwetu?

¹⁹ Hakukonkomwena hachikuma chakukuhwelela mudi Nzambi, Davidi wembili nindi: “Yimuna yimukuketula yiikali kuloña kwakweni, mukuhwelelenu Yehova.” (Mas. 4:5) Yimuna yalambwileñawu aIsarela ayitambwilileña neyi antu ayihana namuchima wumu. (Isa. 1:11-17) Hakwila nawu Nzambi yatambwileña kudifuukula  kwetu, chiña tudifukulaña namuchima wumu nikumukuhwelela chikupu.—Tañenu Yishimu 3:5, 6; Aheberu 13:15, 16.

20. Indi ‘chejeji chakumesu aYehova’ chemenañaku chumanyi?

²⁰ Davidi watwalekeluhu nindi: “Kwaduwu amavulu enda ela nawu, Wukutuleja chuma chachiwahi hinyi? Eyi Yehova tukwatili kwiwulu chejeji chakumesu eyi.” (Mas. 4:6) ‘Chejeji chakumesu aYehova’ chinakwimenaku wuselewa waNzambi. (Mas. 89:15) Dichi Davidi chalombeliyi nindi: “Tukwatili kwiwulu chejeji chakumesu eyi,” watalishili mukwila nindi ‘tuleji wuselewa.’ Hamuloña wakumukuhwelela Yehova, tukweti wuselewa windi nawa twazañalala hampinji yitunakwila mwaya kukeña kwindi.

21. Chumanyi chitwakatambwila neyi tudikitaña muniwu mudimu wunakuzatawu makonu wakumuna kuspiritu?

²¹ Hamuloña wakukeñesha kutambwila kuluña kwafumaña kudi Nzambi kwabadika kwaluñañawu hampinji yakumuna, Davidi wembili kudi Yehova nindi: “Mumuchima wami wunanshilumu kuluña kwakubadika kuluña kwaluñañawu havulaña nitidiku yawu nivinyu yawu.” (Mas. 4:7) Neyi tukuzataña chikupu mumudimu wunakuzatawu makonu wakumuna kuspiritu, tunateli kuluña chikupu. (Luka 10:2) Chineli ‘muza wunavulishiwu’ wawayishewa diwunakulombola iwu mudimu, twazañalalaña hakumona ‘akwakumuna’ anakuvulilaku. (Isa. 9:3) Komana munakudikita chikupu muniwu mudimu wawuwahi wakumuna?

Twalekenuhu Kumukuhwelela Nzambi Namuchima Wejima

22. Kwesekeja nansona yaMasamu 4:8, indi aIsarela ashakamineña ñahi hampinji yahembeleñawu Lushimbi lwaNzambi?

²² Davidi wakunkulwili idi isamu namazu akwila nindi: “Nukukambama kwami nakuwunda, niya nimutulu; muloña eyi Yehova, yeyi hohu kanka weyi wanshakamishaña chakadi kutiya woma.” (Mas. 4:8) Hampinji yahembeleñawu aIsarela Lushimbi lwaYehova, ashakamineña chachiwahi nawa adiña akiñewa. Chakutalilahu, “aYuda nawaIsarela ashakamini chakadi kwakama” muchiyuulu chaSolomoni. (1 Anya. 4:25) Antu amukuhweleleli Nzambi ashakamineña mukuwunda hela chakwila nyuza yadiña kwakwihi yadiña yatama. Kufwana Davidi, twakamaña mukuwunda muloña Nzambi watuleñelaña tubuleña kutiya woma.

23. Chumanyi chitwakatambwila neyi tumukuhwelela Nzambi chikupu?

²³ Tutwalekenuhu nakudikita chikupu mumudimu waYehova. Cheñi twatela kulomba nachikuhwelelu nawa “kuwunda kwaNzambi kwabadika maana ejima” kwakahemba nyichima yetu. (Fwi. 4:6, 7) Chumichi chatuletelaña muzañalu! Chakadi nikujina, tunateli kutalila chikupu yuma yidi kumbidi neyi tutwalekahu kumukuhwelela Yehova.

Mukwakula Nenudi?

• Kukalanyi kwamweniyi Davidi hamuloña waAbisalomi?

• Indi Masamu kapetulu 3 katuleñelaña kukuhwelela chumanyi?

• Masamu kapetulu 4 kanateli kukolesha ñahi chikuhwelelu chetu mudi Yehova?

• Chumanyi chitunateli kuhetelamu neyi tumukuhwelela Nzambi namuchima wejima?

[Malwihu aKuzatisha haKudiza]

[Mwevulu wudi hefu 29]

Davidi wamukuhweleleli Yehova nihampinji yatemukiliyi Abisalomi

[Nyevulu yidi hefu 32]

Komana mwamukuhwelela Yehova namuchima wejima?