Londelenu Kristu, Nlomboli Walala

ANTU alondeleña alomboli awantu kakavulu amwenañamu jakala. Ilaña, antu ovwahilaña wulomboli waKristu ahetelañamu chikupu. Yesu wahosheli nindi: “Inzenu kudami enu ejima mudi nakukabakana, mwasenda yalema, ami nukuyinookesha. Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu.” (Mat. 11:28, 29) Wunlomboli waYesu wazañaleshaña antu chikupu. Yesu wakeña chikupu adizoza mumuchima niachikeka munyichima, wayitambikaña nindi asendi mpanda yindi yakuwunda. Chumanyi chitwatela kwila hakulondela wunlomboli waYesu?

Kapostolu Petulu wasonekeli nindi: “Kristu niyena wayimweneni yihuñu, wayishiyilili chuma chakutalilahu, kulonda mwendi mumahaji indi.” (1 Pet. 2:21) Muloñadi chichalemena kulondela mumahaji aYesu? Fwikijenu mudi hezanvu dawakwenu nawa munakukeña kuketula hamugoti hadi tupata, ilaña muntu wumu hohu hakachi kenu diwuneluki chakuhita chachiwahi nakushika kwishinadi. Hakwila nawu ninenu muhiti, komana himunateli kulondela mumahaji indi hela kudata mwadatayiku? Chochimu, hakwila tukahandi kumpinji yakumbidi, twatela kwimbujolaña chakutalilahu chaYesu muwumi wetu. Hakumwimbujola chakeñekaña kumutiyilila nikumwovwahila nikuzatila hamu nawañimenu indi.

Tiyililenu Nawa Ovwahilenu

Kukamwihi nakukumisha Mpanji yindi yahaMpidi, Yesu wahosheli nindi: “Antu ejima akutiya awa mazu amami hiyakuyila, akayifwikija neyi mukwamaana watuñilili itala dindi helola. Ninvula yachabumukili, nimabaji enjili, nimpepela jakunkili, jeteli hetalodu; hidahumukiluku, muloña adituñilili helola.”—Mat. 7:24, 25.

Dichi Yesu wamuteneni iyala watiyililaña nikwovwahila mazu indi nindi “wakashinshi.” Komana twamwekeshaña netu twalemesha nawa twahamekaña chakutalilahu chaKristu kuhitila mukwovwahila chikupu, indi kwiji twekala nachaaku chakusakula hanshimbi jaYesu japela hela jitwakeñaña kwovwahila? Yesu wahosheli nindi: “Nelaña yuma yamutiyishaña [Nzambi] kuwaha mafuku ejima.” (Yow. 8:29) Tufwilenu kwimbujola chakutalilahu chindi.

Muyaaka nkulakaji yatachi, apostolu emikili chakutalilahu chachiwahi chakwovwahila wunlomboli waKristu. Mpinji yimu, Petulu wamulejeli Yesu nindi: “Tala, etu tunashiyi yuma yejima, tunakulondi.” (Maku 10:28) Eñañi, apostolu alemesheli chikupu wunlomboli waYesu nawa ashiyili yuma yikwawu kulonda amulondeña.—Mat. 4:18-22.

Zatilenu Hamu Nawañimenu aKristu

Kukamwihi nakufwa kwindi, Yesu washimwini njila yikwawu mutwatela kulondela wunlomboli windi. Wahosheli nindi: “Yowu wukutambula muntu nukutemesha, nantambulami.” (Yow. 13:20) Yesu wateneni awayishewa añimenu indi nindi ‘amana kwindi.’ (Mat. 25:40) Chelili Yesu anamusañuli dehi hakuya mwiwulu, ‘amana kwindi’ wayinkeli mudimu wakumwimenaku neyi, ‘tuñanda twaKristu’ akwakutambika akwawu kulonda afunti kudi Yehova Nzambi. (2 Kor. 5:18-20) Kwiluka wunlomboli waKristu chabombelamu kwovwahila ‘amana kwindi.’

 Twatela kushinshika chitwatambwilaña kufumba kwamuNsona kwahampinji yatelela kwasonekañawu munyikanda yashindamena haBayibolu. Kuhitila mukudiza Nsona nikuya kukupompa kwachipompelu, atwanukishaña mazu ahosheliyi Kristu. (2 Pet. 3:1, 2) Twamwekeshaña kusakilila hayakudya yakuspiritu yatwinkañawu kuhitila mukudizaña mpinji yejima. Chumanyi chitwatela kwila neyi kufumba kwokumu anakuvula kukufuntishahu? Chakutalilahu, Izu daNzambi dafumbaña akwaKristu kusumbula “chiña dinu mudi Mwanta hohu.” (1 Kor. 7:39) Kubadika hadi yaaka nkulakaji, iyi nsañu ayisonekaña muKaposhi Kakutalila. Eñañi amana kwaKristu amwekeshaña nawu akeñaña etu twikali nawubwambu wawuwahi naYehova kuhitila mukusoneka yibaaba yahoshaña haniyi nsañu nikufumba kukwawu kwonenawu. Kutiyilila iyi nshimbi diyi njila yakumwekeshelamu nawu tunakulondela Nlomboli yetu walala, Yesu Kristu.

Mukanda waYishimu 4:18 wahosha nawu: “Njila yawantu aloña yidi neyi mwaana wahakucha, wayaña nakutooka nichikushika itañwa mwiwulu.” Eñañi, wunlomboli waYesu wayilañaku hambidi, bayi neyi wakiyaku. Njila yikwawu mutwatela kuzatila hamu ‘nawamana kwaKristu’ yidi yakwiteja kuhimpa kwatulejañawu hakutiyisha mwatalisha nsañu yalala yamuNsona yasonekaña ‘nduñu wamaana nikashinshi.’—Mat. 24:45.

Twamwekeshaña cheñi netu twovwahilaña ‘amana kwaKristu’ kuhitila mukuzatila hamu nawankoñi atondawu muchipompelu chawakwaKristu. Kapostolu Pawulu wahosheli nindi: “Ovwahilenu anlomboli jenu nakuyitiyilila, muloña ahembaña nyichima yenu.” (Heb. 13:17) Chakutalilahu, eluda nateli kutukolesha kulonda tumoneña chichalemena kwikalaña naKudifukula kwaChisaka kwamelela mpinji yejima hela nateli kutuleja njila jitwatela kuzatisha mumbadi jikwawu jamudimu wetu wakushimwina. Nkoñi wendaña nateli kutuleja kufumba kwamuNsona kwatela kutukwasha munjila jimu jachihandilu chawakwaKristu. Kulondela kufumba kwamuchidiwu namuchima wumu kwamwekeshaña nawu tunakulondela Yesu Nlomboli yetu.

Mukaayi mwosi wunlomboli walala. Ilaña chatuzañaleshaña chikupu hakulondela wunlomboli wawuwahi waKristu! Dichi, twatela kwovwahilaña Nlomboli yetu nikuzatila hamu nawantu anakuzatishawu makonu.

[Mwevulu wudi hefu 27]

Komana mwetejaña kufumba kwamuNsona kwahoshaña hakubula kudikunda nawantu abula kwitiyaku?