“Nkoñi Wamuwahi Nawa Ibwambu”

JOHN (JACK) BARR, wakalakeleña Mwizaza Dalombolaña dawaYinsahu jaYehova, wamanishili chihandilu chindi chahamaseki haMposu nantetemena, haDecember 4, 2010. Wadiña nayaaka 97. Amushimuna nawu “hinkoñi wamuwahi nawa ibwambu.”

Mana kwetu Jack Barr wavwalikilili mumusumba waAberdeen, mwituña daScotland, mwivumu dawu adiña asatu yena diwadiña kansi. Anvwali jindi ejima adiña awayishewa. Mana kwetu Barr wavulileña kuhosha chachiwahi chikupu chatachikili chihandilu chindi; wahamekeleña nankashi chakutalilahu chachiwahi chamwimikililuwu atata yindi niamama yindi.

Chashikiliyi muyaaka yawukampululu, Jack chamukalilileña chikupu kuhosha nawantu abulili kwilukayi. Hela chochu, wazatili nañovu hakwila nawu yamanishi kukala kwamweneñayi, nawa ifuku dimu Hamulungu namwaana mu 1927, hadiñayi nayaaka 14, washimwini kudi atata yindi nindi wakeñeleña yayeña nawu mumudimu wakushimwina kwitala nikwitala. Dihatachikili mudimu windi wakumukalakela Yehova. Kufuma tuhu haniyi mpinji kushika nikukufwa kwindi, Mana kwetu Barr watwalekeluhu nakudikita mumudimu wakushimwina nsañu yayiwahi.

Wubanji wamwekeni wakeñeli kujaha amama yindi waleñeleli Jack hadiñayi kansi kutoñojoka chikupu hamuloña watwinkelawu wumi, nawa mu 1929 wadihanini kudi Yehova, wamwekesheli kudihana kwindi kuhitila mukupapatishewa mu 1934. Dichi kushika mu 1939, wekalili membala wamuchisaka chaBeteli muLondon, mwituña daEngland. Dihatachikili mudimu windi wampinji yejima wunakalakaliyi hadi yaaka 71.

Hefuku daOctober 29, 1960, Mana kwetu Barr weñilili muwubwambu wateneniyi nindi “wubwambu walema chikupu” hampinji yasumbwiliyi Mildred Willett, payiniya wadikita wakalakeli hadi yaaka yayivulu nawa kamishonali. Mana kwetu niMuhela Barr emikili chakutalilahu chachiwahi, eyala namumbanda adihana chikupu, nawa atwalekeluhu kwikala adihana chikupu kushika nimpinji yamanishili muhela Mildred chihandilu chindi chahamaseki muOctober 2004. Mana kwetu niMuhela Barr atañilileña hamu chikunku chamuBayibolu ifuku niifuku muchihandilu chawu.

Antu amwilukili, ijina daJack Barr dayanukishaña iyala wafumbileña chachiwahi, mpinji yejima welukileña mwakukumina, wadiña naluwi, nawa washili maana haNsona. Wadikitileña chikupu nawa wadiña wakamena akwawu, wadiña nkoñi wamuwahi nawa ibwambu washinshika. Mazu ahosheleñayi, mpanji jahanineñayi, nikulomba kwindi kwamwekesheleña nawu wakeñeli chalala nawa wadiña nawubwambu wawuwahi naYehova.

Hela chakwila tukumwanukaña Mana kwetu Barr, tunazañalali hamu nindi hakutambula chawana chawumi wakubula kufwa, kukooleka kwatalileñayi nawa wadiña nakuhoshahu chikupu. Dichuma chakeñeleñayi.—1 Kor. 15:53, 54. *

[Tumazu twaheshina]