Yisaka Yawakwakristu, “Babalenu”

“Babalenu, muloña mpinji yimukubula kutoñojoka, diyi yakenzayi Mwana kamuntu.”—LUKA 12:40.

1, 2. Muloñadi chitwatela kusha maana kukusoñamisha kwaYesu kwakwila nawu “babalenu”?

 “CHAKENZAYI Mwana kamuntu nalubanji lwakulema kwindi” nakwambula ‘muntu wumu namukwawu,’ chumanyi chakayimwekena enu nichisaka chenu? (Mat. 25:31, 32) Chineli chikamwekana hampinji yitunabuli kwiluka, chikuwaha neyi tukutiyilila kusoñamisha kwaYesu kwakwila nawu “babalenu”!—Luka 12:40.

² Chibaaba chinafumuhu chalumbulula muntu wejima wamuchisaka chatela kukwashayi chisaka chejima kulonda ekali atona kuspiritu kuhitila mukusha maana kumudimu wukwetuwu. Tushinshikenu hanjila jikwawu jitwatela kulondela hakwila nawu chisaka chetu chikali chakola kuspiritu.

Ikalenu Nadisu ‘Datala Mumu’

3, 4. (a) Yisaka yawakwaKristu atela kudikiña kuyumanyi? (b) Indi kwikala ‘nadisu datala mumu’ kwatalisha mudihi?

³ Hakwila nawu adiloñeshi kulonda akamoni kwinza kwaKristu, yisaka yatela kwikala yasoñama kulonda abuli kuheñuka kukudifukula kwalala. Atela kudihemba kuyuma yinateli kuyiheñula. Chineli kusweja kukeña maheta himuhetu wunadimbwishi yisaka yayivulu, talenu chahosheliyi Yesu kutalisha hakwikala ‘nadisu datala mumu.’ (Tañenu Matewu 6: 22, 23.) Neyi chochatoñekaña inoñu munjila nikutuleñela kwenda chachiwahi, yuma yitwamonaña ‘namesu amunyichima’ yachifwikija yinateli kutukolesha nikutukwasha kutondolwela yuma yinateli kutudimbwisha.—Efwes. 1:18.

⁴ Hakwila nawu mesu etu amoni chachiwahi, chiña ekala akola nawa amonaña chuma chiwunakutala. Chochimu nimesu amumuchima. Kwikala nadisu dachifwikija datala mumu chatalisha mukusha maana hachuma chimu hohu. Chatela chihandilu chetu chikaleña chakufwila maheta nikusweja kusha maana hakukeñela chisaka chetu yuma yakumujimba, twatela kusha maana kuyuma yakuspiritu. (Mat. 6:33) Ichi chinatalishi mukwila nawu twatela kuzañalala nayuma yatwinkañayi Nzambi nikutwamijaku mudimu windi muchihandilu chetu.—Heb. 13:5.

5. Indi kansi wamumbanda wamwekesheli ñahi nindi watalishili “disu” dindi hakumuzatila Nzambi?

⁵ Neyi mudizisha anyanenu kulonda ekali nadisu datala mumu anateli kuhetelamu nankashi. Talenu chakutalilahu chakansi wamumbanda wakwituña daEthiopia. Wazatili chiwahi nankashi kushikola nawa chamanishiliyi shikola yeneni amwinkeli mali amavulu akuya nakutaña shikola yahewulu. Dichi hamuloña wakukeña kumuzatila Yehova, wakaanini mali amwinkeluwu. Kuhiñahu, akeñeleña kumwiñija mudimu wakutambulaña mali akushika ku $4,200 mali akwituña dakuAmerica hakakweji, mali wenawa abadikili mali atambulañawu antu mwituña mwashakamañayi. Ilaña “disu” daniwu kansi wamumbanda dashinshikili hamudimu wawupayiniya. Hasambilili kwihula anvwali jindi hakwila nawu yakaani iwu mudimuku. Indi anvwali jindi ahosheli nawudi chelukiluwu nawu mwanawu nakaani mudimu? Atiyili kuwaha nankashi nawa amulejeli nawu wafuukwili mwamuwahi.

6, 7. Yumanyi yafwana ‘yitwatela kubabala nayu’?

⁶ Twatela kukuhwelela chikupu mazu ahosheliyi Yesu asonekawu haMatewu 6:22, 23 atusoñamishaña halwisu. Yesu hesekejeli izu dakwila nawu ‘datala mumu’ nezu dacheñiku ilaña wazatishili izu dakwila nawu ‘kutama.’ ‘Disu datama’ denzala ‘nalwisu,’ nawa datalisha mukwikala nechima. (Mat 6:23) Yehova wamonaña ñahi lwisu hela ichima? Bayibolu yahosha nawu: “Hakwila wuvumbi, nawuzondu wamumuchima wejima, hela lwisu, bayi muyitenaña mukachi kenuku.”—Efwes. 5:3.

⁷ Chekala chaswayi kumona antu acheñi nenu ekala nalwisu, ilaña chakala kudiluka enu aweni nenu mwekala nalwisu. Dichi, chikuwaha neyi tukulondela kufumba kwaYesu kwakwila nawu: “Babalenu, dihembenu muleki lwisu lwejima.” (Luka 12:15) Hakwila nawu twili mwenimu, twatela kudishinshika kulonda twiluki hitwasha muchima wetu. Yisaka yawakwaKristu yatela kutoñojoka chikupu hampinji nimali amanishilañawu kuyisela, kukuhema, nihakulanda yuma yakumujimba.

8. Tunateli kwikala ñahi ‘ababala,’ hakulanda yuma?

⁸ Henohu kanda mulandi chuma, mwatela kutoñojokahu chikupu kulonda mwiluki neyi mudi namali akulanda nachu hela nehi. Shinshikenu hayuma yidi neyi iyi: ‘Komana chuma chinakulanda nakachizatishaña nikuchihemba chiwahi? Komana hakuhita mpinji chikupu hakwila niluki chakuchizatisha?’ Enu atwansi, bayi mwiteja yuma yejima yamukaayi yakuselujola hayuma yakuzatisha yalandañawu antu, yiyileñeleña mukañanyi kufuukulahu chiwahi nawa mukeñeña kulanda yakuvwala yasweja wuseya hela yuma yikwawuku. Ilukenu mwakukumina. Toñojokenu cheñi neyi chuma chimunakukeña kulanda chikukwasha chisaka chenu kwikala chasoñama nakutalila kwinza kwaMwana kamuntu. Kuhwelelenu chikaninu chaYehova chakwila nawu: “Hinamba kakulekaku, hela kukushiya hinakakushiyaku.”—Heb. 13:5.

Fwilenu Yikonkwanyi Yakuspiritu

9. Indi kufwila yikonkwanyi yakuspiritu kunateli kukwasha ñahi chisaka?

⁹ Njila yikwawu yatela kukoleshelamu chisaka  chikuhwelelu chawu nikuleñela chisaka chejima chikali chakola kuspiritu, yidi yakwimika yikonkwanyi yakuspiritu nikuzata nañovu hakushikija yikonkwanyi yawu. Kwila mwenimu kukukwasha yisaka yiluki chinakuzatawu mumudimu waYehova nikwiluka nyidimu yatela kulemeshawu chikupu muchihandilu chawu.—Tañenu Afwilipi 1:10.

10, 11. Hamu neyi chisaka, yikonkwanyi yamuchidinyi yakuspiritu yimwemika, nawa yikonkwanyi yamuchidinyi yakumbidi yimunakukeña kwimika?

¹⁰ Hela tuhu neyi mwimika yikonkwanyi yayiwahi yanyanya yinateli kushikija muntu wejima muchisaka munateli kufuma nkisu jajivulu. Chakutalilahu, toñojokenu hachikonkwanyi chakuhanjekaña hansona yefuku nifuku. Muntu wejima muchisaka neyi yakulañahu chikukwasha mutu wachisaka kwiluka chiyamukeña Yehova nichakeñawu chalala. Chikonkwanyi chakutañila hamu Bayibolu mpinji yejima nachisaka chakwashaña anyana kwilukisha kutaña nikutiyisha nsañu yamuBayibolu. (Mas. 1:1, 2) Komana kwila twimika chikonkwanyi chakulombaña munjila yayiwahi nehi? Twatela cheñi kwimika chikonkwanyi chachiwahi chakwikala nayililu yamukabu waspiritu. (Ŋal. 5:22, 23) Komana kwila twimika chikonkwanyi chakutiyila antu itwawanaña mumudimu wakushimwina wushona nehi? Neyi tufwilaña kwila mwenimu tunateli kukwasha anyana ekali nawushona, nawa anateli kwikala nampwila yakuzata wupayiniya wampinji yejima hela mudimu wawumishonali.

¹¹ Komana kwila mutoñojoka hayikonkwanyi yimwatela kwimika nachisaka chenu nehi? Chisaka chenu kwila chimika chikonkwanyi chakuzataña maora amavulu mumudimu wakushimwina nehi? Komana kwila muzatila hakumanisha woma hampinji yimunakushimwina hanshiña, mumukwakwa, hela kumaluña  akulanda nakulandulula nehi? Komana kwila muya nakuzatila kwiluña kudi kukankila kwawakwakushimwina aWanta nehi? Muntu wamuchisaka kwila yadiza idimi dacheñi kulonda yashimwineña nsañu yayiwahi kudi antu ahoshaña idimi dacheñi nehi?

12. Chumanyi chatela kwila nyitu yachisaka hakwila akwashi yisaka yawu yikuliluku kuspiritu?

¹² Hamu neyi mutu wachisaka, ilukenu hatela kuzatila chisaka chenu kulonda ayiluku hambidi kuspiritu. Kuhiñahu imikenu yikonkwanyi yikukwasha chisaka chenu chipaminuku kuspiritu. Yikonkwanyi yimukwimika muchisaka yatela kwikala yashikila nawa yimwatela kushikija kwesekeja nañovu yenu. (Yish. 13:12) Hela chochu, hahitaña mpinji hakwila nawu mushikiji chikonkwanyi chalema. Dichi mpinji yimwamanishilaña nakutala chisanji chanyivwimbimbi mwatela kuyizatisha kuyuma yakuspiritu. (Efwes. 5:15, 16) Mwatela kuzata nañovu kulonda mushikiji yikonkwanyi yimwemikila chisaka chenu. (Ŋal. 6:9) Chisaka chafwilaña yikonkwanyi yakuspiritu ‘chamwekeshaña kudi antu ejima’ nawu anakuyilaku hambidi.—1 Tim. 4:15.

Twalekenuhu Kwikala Nakudifukula Kwachisaka Kwamelela

13. Yumanyi yahimpiluwu mundandanda yakupompa kwachipompelu kwamulungu nimulungu, nawa malwihwinyi itwatela kudihula?

¹³ Chuma chachiwahi chinateli kukwasha yisaka yikali ‘yababala’ kulonda kutalila kwinza kwaMwana kamuntu hichuma chalema chahimpiluwu handandanda yakupompa kwamulungu nimulungu kwatachikili haJanuary 1, 2009. Ichi hitwapompaña hefuku dacheñi mukachi kamulungu hakupompa kutwateneneña netu Kupompa kwaKudiza Mukanda haChipompeluku. Iku kupompa akubomba naShikola yaMudimu waTeokalatiki niKupompa kwaMudimu. Ahimpili kulonda yisaka yawakwaKristu yikaleña nampinji yakukolesha wuspiritu wawu kuhitila mukutonda mpinji yakudifukula kwachisaka kwamelela mulungu nimulungu. Chineli hanahiti mpinji kufuma hahimpiluwu, twatela kudihula netu: ‘Komana nazatishaña iyi mpinji kulonda nikaleña naKudifukula kwaChisaka kwamelela hela kudiza nkawami? Komana nalondelaña chachiwahi iyi ntanjikilu?’

14. (a) Muloñadi waweni wakwikalaña naKudifukula kwaChisaka kwamelela? (b) Muloñadi kwikala nampinji yakudiza namelela chikwalemena?

¹⁴ Chikonkwanyi chacheni chakutwalekahu kwikala naKudifukula kwaChisaka kwamelela hela kudiza kwahalwetu chakukundama kwakwihi naNzambi. (Yak. 4:8) Neyi twikalaña nampinji yakudiza Bayibolu mpinji yejima nikusweja kumwiluka Nleñi, wubwambu wetu naNzambi wukukola. Neyi tusweja kukundama kwakwihi naYehova, tukusweja kumukeña ‘namuchima wetu wejima, nawumi wetu wejima, namaanetu ejima, nañovu jetu jejima.’ (Maku 12:30) Eñañi, tunakufwila kumwovwahila Nzambi nikumwimbujola. (Efwes. 5:1) Kutwalekahu kwikala naKudifukula kwaChisaka kwalema hakukwasha antu ejima muchisaka ekali ‘ababala’ kuspiritu chitunakutalila “lukadi lwasweja” lwashimwineñawu dehi. (Mat. 24:21) Twatela kuzata nañovu kulonda tukapuluki.

15. Kudifukula kwaChisaka kwamelela kunateli kukwasha ñahi antu amuchisaka?

¹⁵ Kudifukula kwaChisaka kwamelela cheñi kwakwashaña antu amuchisaka kudikunda wumu namukwawu. Kwikala nampinji yakuhanjeka hayuma yakuspiritu mulungu nimulungu kwaleñelaña antu amuchisaka kwikala akeñañana. Adisumbula niwena ekalaña anuñañana nankashi neyi adizilaña hamu nsañu yamuBayibolu. (Tañenu Mukwakutaŋisha 4:12.) Anvwali nianyana adifukwilaña hamu ekalaña anuñañana mukukeña, “mpanda yasweja kunuña antu hamu.”—Kol. 3:14.

16. Lumbululenu ahela asatu amuchipompelu chanakuhetelawu mukwikala nampinji yamelela yakudiza Bayibolu.

¹⁶ Talenu ahela asatu amuchipompelu chahetelawu muntanjikilu yakwikalaña nampinji yamelela yakudiza Bayibolu. Hela chakwila  hosi wusoku hakachi kawu, awa antuluwa asatu ashinakaja dehi ashakamaña mumusumba wowumu nawa wubwambu wawu wunafumi halehi. Hamuloña wakufwila kudikunda chikupu nawa kudikunda kwawu kushindameni hayuma yakuspiritu bayi hayuma yakumujimbaku, afuukwiluhu kubulakanaña nampinji yamelela kulonda adizeña nsañu yamuBayibolu. Atachikili kudiza mumukanda “waBearing Thorough Witness” About God’s Kingdom. Muhela wumu wahosheli nindi: “Twadiluñishaña chikupu hakudiza nawa kakavulu twadizaña kubadika hadi ora yimu. Twesekaña kufwikija kukala kwamweneñawu amana kwetu amuyaaka nkulakaji yatachi niyuma yitwatela kwila neyi tumona kukala kokumu. Kuhiñahu twesekaña kuzatisha yuma yitunadizi mumudimu wakushimwina. Ichi tunakudiluñisha chikupu mudimu wakushimwina Wanta nikwilisha atumbanji nawa munakufuma yuma yayiwahi kubadika kunyima.” Kubombela hakuyikolesha kuspiritu, iyi ntanjikilu yinaleñeli awa amabwambu asatu kusweja kudikunda chikupu. Ahosheli nawu: “Iyi ntanjikilu twayilemesha nankashi.”

17. Yumanyi yinateli kuleñela Kudifukula kwaChisaka kwamelela kwikaleña kwakudiluñisha?

¹⁷ Indochi enu? Yumanyi yimunakuhetela mukwikala nampinji yakudifukula kwachisaka kwamelela hela kudiza kwahalwenu? Neyi mudizaña kazoku-kazoku, himukuhetela muniyi ntanjikiluku. Muntu wejima muchisaka watela kwikala wadiloñesha kudiza hampinji yimwatanjika. Bayi mwiteja yuma yabula kulema yiluwañeshi ntanjikilu yenuku. Dichi mwatela kudiza nsañu yinateli kuzatisha chisaka chenu muchihandilu chawu. Yumanyi yimwatela kwila kulonda mudiluñisheña haniyi mpinji yakudiza? Wanenu njila yayiwahi yakudizishilamu, nawa hampinji yakudiza hatela kwikala kalemesha nikuwunda.—Yak. 3:18. *

‘Tonenuña’ Nawa ‘Ikalenu Ababala’

18, 19. Chumanyi chimwatela kwila enu nichisaka chenu chimuneluki nenu Mwana kamuntu keña yenzi?

¹⁸ Yuma yamukaayi yinakutwalekahu nakutaminaku makonu yinakumwekesha nawu chakadi nikujina kufuma tuhu mu 1914, kaayi katama kaSatana kadi mumafuku akukuminina. Katataka Amagedoni yishiki. Mwana kamuntu katataka yaleti wunsompeshi waYehova hadi antu atama. (Mas. 37:10; Yish. 2:21, 22) Komana enu nichisaka chenu chimuneluki iyi nsañu himwatela kwikala asoñamaku?

¹⁹ Komana munakulondela mwatufumbiliyi Yesu nindi twikali nadisu ‘datala mumu’? Chineli antu amukaayi afwilaña maheta, kuya mpuhu, hela ñovu, komana chisaka chenu chinakufwila yikonkwanyi yakuspiritu? Komana munakulondela ntanjikilu yaKudifukula kwaChisaka kwamelela hela kwikala nampinji yakudiza kwahalwenu? Komana munakuhetelamu? Neyi chitwahanjekeli muchibaaba chinafumuhu, komana munakuzata mudimu wayinkawu muNsona hamu neyi mutu wetala, mama yawantu, hela mwana, nakukwasha chisaka chejima ‘chikali chatona’? (1 Tesa. 5:6) Neyi munakwila mwenimu, mukwikala ‘ababala’ hampinji yimunakutalila kwinza kwaMwana kamuntu.

[Tumazu twaheshina]

Yumanyi Yimunadizi?

• Lumbululenu yisaka yawakwaKristu chatela kwikalawu ‘ababala’ kuhitila . . .

mukwikala nadisu ‘datala mumu.’

mukwimika nikufwila yikonkwanyi yakuspiritu.

mukutwalekahu kwikala naKudifukula kwaChisaka kwamelela.

[Malwihu aKuzatisha haKudiza]

[Mwevulu wudi hefu 13]

Kwikala nadisu ‘datala mumu’ kukutuleñela kutondolwela yuma yamukaayi yaluwañeshaña