Yisaka Yawakwakristu, ‘Ikalenu Atona’

“Tutonenu nakubabala.”—1 TESA. 5:6.

1, 2. Chumanyi chatela kwila chisaka kulonda atwalekuhu kwikala atona kuspiritu?

 KUTALISHA “hefuku daYehova deneni, dakutiya niwoma,” kapostolu Pawulu wasonekeleleli akwaKristu muTesalonika nindi: “Enu ana kwetu, himwekala mumwidima, mwaka ifuku odu dakayishintakeshi neyi ikombuku. Muloña wejima wenu mudi akwachejeji, mudi akwakwenda namwaana; hitudi akwawufuku hela akwamwidimaku.” Pawulu wasonekeli cheñi nindi: “Dichi dinu, bayi tukamaña tulu neyi chelañawu antu acheñuku, chiña tutonenu nakubabala.”—Yoweli 2:31; 1 Tesa. 5:4-6.

² Mazu aPawulu afumbiliyi Atesalonika akwashaña akwaKristu anakushakama ‘mumpinji yakukuminina.’ (Dan. 12:4) Chineli kukuma kwakanu kaayi katama kudi mukamwihi, Satana nakufwila kuhuñumuna akwakudifukula alala amavulu aleki kumukalakela Nzambi. Dichi twatela kulondela kufumba kwaPawulu kwakwikala atona kuspiritu. Hakwila nawu chisaka chawakwaKristu chikali chatona, muntu wejima wamuchisaka watela kuzata mudimu wamwinkawu kudi Yehova neyi chalumbululawu muBayibolu. Mudimwinyi wukwetuwu amayala, ambanda, niatwansi hakukwasha yisaka yawu kulonda ‘yikali yatona’?

Amayala, Imbujolenu “Kabiña Walala”

3. Kwesekeja na 1 Timotewu 5:8, nyidimwinyi yikwawu yikwetiyi iyala chineli diyi mutu wachisaka?

³ Bayibolu yahosha nawu: “Mutu wamumbanda diyi iyala.” (1 Kor. 11:3) Yumanyi yatela kwilayi iyala chineli diyi mutu wetala? Nsona yahosha hamudimu wukwetiyi mutu wetala nawu: “Muntu wukubula kukwasha ayindi, kusweja akwetala dindi, naleki mwaya kwitiya kwakukuhwelela, nabadiki wabula kwitiya kutama.” (1 Tim. 5:8) Eñañi, iyala watela kuloñeshela chisaka chindi yuma yakumujimba. Neyi nakukeña nindi chisaka chidi chikali chatona kuspiritu, watela kuzata nañovu kubadika hakukeña hohu mali akukwasha chisaka chindi. Watela kukolesha chisaka chindi kuspiritu, nikukwasha ejima adi muchisaka kulonda ekali nawubwambu wakola naNzambi. (Yish. 24:3, 4) Nateli kuyikwasha ñahi?

4. Chumanyi chinateli kumukwasha iyala kulonda yakoleshi chisaka chindi kuspiritu?

⁴ Chineli “iyala diyi mutu wamumbanda, chochadiyi Kristu mutu wachipompelu,” iyala wasumbula watela kushinshika nikwimbujola Yesu chalombolañayi chipompelu chineli diyi mutu. (Efwes. 5:23) Talenu Yesu chalumbulwiliyi wubwambu windi nawatumbanji twindi. (Tañenu Yowanu 10:14, 15.) Chumanyi chinateli kumukwasha iyala wunakukeña kukolesha chisaka chindi kuspiritu? Iyi diyi yuma yatela kumukwasha: Dizenu yuma yahosheliyi Yesu niyakoñeliyi chineli diyi “kabiña walala,” ‘nikwenda mumahaji indi.’—1 Pet. 2:21.

5. Indi Kabiña Walala weluka ñahi chipompelu?

⁵ Wubwambu wekalaña hadi kabiña nawanyikoku jindi washindamenaña hamaana nihakumukuhwelela. Kabiña weluka chekala anyikoku indi, anyikoku niwena amwiluka nawa amukuhwelelaña. Amwiluka nawa ovwahilaña izu dindi. Yesu wahosheli nindi: ‘Neluka anyikoku amami aweni, niwena añiluka.’ Weluka chikupu chekala chipompelu chindi. Izu dachiGriki dinazatishuwu nawu ‘weluka’ datalisha “kukumwiluka chikupu.” Eñañi, Kabiña Walala wayiluka anyikoku indi. Weluka yuma yakeñañawu, kuzeyazeya kwawu,  nihakumina ñovu jawu. Yesu, Chakutalilahu chetu weluka anyikoku indi chikupu. Anyikoku eluka kabiña kawu nawa akuhwelela chikupu wunlomboli windi.

6. Amayala anateli kwimbujola ñahi Kabiña Walala?

⁶ Hakwila nawu yazatishi wumutu windi chiwahi hakumwimbujola Kristu, iyala watela kutoñojoka nindi yena diyi kabiña nawa chisaka chindi diwu anyikoku. Watela kufwila chikupu kwiluka chisaka chindi. Komana iyala watela kwiluka chisaka chindi? Eñañi, neyi atiyañanaña chiwahi nawantu ejima amuchisaka, kwiluka yuma yakamenawu, kulombola munyidimu yamuchisaka, nawa wafuukulañahu chachiwahi muyuma yidi neyi kudifukula kwachisaka, kuya nakupompa, kuzata mumudimu wamwiha, kuwanaku mpinji yakunooka, niyisela. Neyi iyala mukwaKristu yeluka chikupu chahosha Izu daNzambi nawa yeluka nankashi chekala antu amuchisaka chindi, nikuyimikila chakutalilahu chachiwahi nikufuukulahu chachiwahi, chikuleñela chisaka chindi kukuhwelela wulomboli windi nawa wukuzañalalaña hakumona chisaka chindi chinakutwalekahu chanuñañana mukudifukula kwalala.

7, 8. Indi iyala nateli kumwimbujola ñahi Kabiña Walala hakumwekesha kukeña kudi antu amuchisaka chindi?

⁷ Kabiña wamuwahi wakeña nyikoku yindi. Neyi tutaña Nsañu Yayiwahi yahoshaña hachihandilu chaYesu nimudimu windi wakushimwina, twazañalalaña hakumona Yesu chakeñeliyi atumbanji twindi. Waheni ‘wumi windi kukoola anyikoku indi.’ Amayala atela kwimbujola Yesu hakumwekesha kukeña kudi antu amuchisaka chawu. Chatela yamuchinisheña iñodindi, iyala wunakukeña kwikala nawuselewa waNzambi watela kutwalekahu kukeña iñodindi “neyi chakeñeliyi Kristu chipompelu.” (Efwes. 5:25) Watela kuhoshaña nindi munjila yaluwi nikumwakamena, muloña watelela kumulemesha.—1 Pet. 3:7.

⁸ Mutu wachisaka watela kulondela chikupu nshimbi jaNzambi hakufumba anyana. Hela chochu, watela kukeña anyanindi. Watela kuyibabesha munjila yakukeña. Anyana amakwawu hiyadizaña swayiku, ilaña amakwawu adizaña swayi yuma yimunakuyidizisha. Dichi tata yawantu watela kuwunda chikupu. Neyi amayala atwalekañahu kwimbujolaña chakutalilahu chaYesu, muchisaka mukwikala kuwunda nikukiñewa. Yisaka yawu yikwikala yakiñewa kuspiritu neyi chembiliyi ñimbi yamasamu.—Tañenu Masamu 23:1-6.

9. Kufwana nkakulula Nowa, amayala akwaKristu akweti mudimwinyi, nawa chumanyi chikuyikwasha kuzata iwu mudimu?

⁹ Nkakulula Nowa washakamini mumafuku akukuma kwakaayi kadiñaku hayina mpinji. Ilaña Yehova “hakuhemba Nowa mukwakushimuna kuloña, nawakwawu atanu nayedi, haleteliyi dibaji mumpata yawantu asekeshelaña Nzambi.” (2 Pet. 2:5) Nowa wadiña namudimu wakukwasha chisaka chindi kulonda chakapuluki Dibaji. Nyitu yayisaka yawakwaKristu niwena atela kukwasha yisaka yawu munanu mafuku akukuminina. (Mat. 24:37) Dichi chikuwaha neyi adiza chakutalilahu ‘chakabiña walala,’ nikufwila kumwimbujola.

Enu Ambanda, ‘Tuñenu Matalenu’

10. Indi mumbanda watela kumwovwahila ñahi nfumwindi?

¹⁰ Kapostolu Pawulu wasonekeli nindi: “Enu ambanda, ovwahilenu anfumu jenwenu aweni neyi chimwovwahilaña Mwanta.” (Efwes. 5:22) Awa mazu hiyanakumwekesha nawu chifulu chikwetiyi mumbanda chamukunkulwayiku. Henohu kanda aleñi mumbanda watachi, Evu, Nzambi walala wahosheli nindi: “Hichinawahi iyala kushakama kanka winduku; nukumwilila nkwashi wamutelela.” (Kutach. 2:18) Mudimu wukwetiyi “nkwashi” nawa “wamutelela” wakukwasha nfumwindi hampinji yinakwakamenayi nyidimu yamuchisaka nawa himudimu walema nankashi.

11. Indi mumbanda wamaana ‘watuñishaña ñahi itala dindi’?

¹¹ Mumbanda walumbuluka wazataña nyidimu yayiwahi yakukwasha chisaka chindi. (Tañenu Yishimu 14:1.) Kwambukaku namumbanda  wasupa, wabulaña kulemesha ntanjikilu yawumutu, mumbanda wamaana walemeshaña nankashi iyi ntanjikilu. Chatela yamwekesheña yililu yawinyi niyakudimena yinenzali mukaayi, mumbanda wamaana wamwovwahilaña nfumwindi. (Efwes. 2:2) Mumbanda wasupa wanyakalaña kumusawula nfumwindi, ilaña mumbanda wamaana wafwilaña anyanindi niantu amakwawu amulemesheña nfumwindi. Mumbanda wamuchidiwu wazataña nañovu kulonda yabuleña kusawula wumutu wanfumwindi kuhitila mukumuhilisha hela kumutobwesha. Kudi cheñi kukala kukwawu kutalisha hakwiluka mwakuhembela mali. Mumbanda wasupa wakisañanaña mali ejima amuchisaka. Mumbanda wamaana hakoñaña muniyi njilaku. Watiyañanaña nanfumwindi kutalisha hansañu jamali. Yuma yejima wayikoñaña munjila yayiwahi nawa wahembaña mali. Hamukanjikijaña nfumwindi nindi yazati mudimu wukwawuku.

12. Chumanyi chatela kwilayi mumbanda hakwila yakwashi chisaka chindi chikali ‘chatona’?

¹² Mumbanda wamaana wakwashaña chisaka chindi chikali ‘chatona’ kuhitila mukumukwashaku nfumwindi kudizisha anyana yuma yakuspiritu. (Yish. 1:8) Wazataña nañovu hakwila ekaleña naKudifukula Kwachisaka. Kubombelahu, wamukwashaña nfumwindi neyi nakufumba nikuleja anyana. Wambuka chikupu namumbanda wasupa nawa anyana akabakanaña kuspiritu nikumujimba.

13. Muloñadi chichawahila mumbanda kukwasha nfumwindi munyidimu yazatañayi yateokalatiki?

¹³ Indi mumbanda wamaana watiyaña ñahi neyi yamona nfumwindi nakuzata mudimu wawuwahi muchipompelu chawakwaKristu? Watiyaña kuwaha chikupu! Hela chakwila nfumwindi hinkoñi wakuzatila, eluda hela hadaha wekala Mukomiti Yatiyañanaña naYipatela, hela Wazataña Mukomiti Yakutuña, watiyaña kuwaha nanyidimu yazatañayi. Chakeñekaña kudihana chikupu hakwila nawu yamuhamekeña nfumwindi mumazu nimunzatilu. Welukaña nindi chineli nfumwindi nakudikita munyidimu yamuchipompelu niyamukuloñesha chikuleñela chisaka chejima kwikala chatona kuspiritu.

14. (a) Chumanyi chinateli kumukalila mumbanda wamaana nawa nateli kumanisha ñahi iku kukala? (b) Indi mumbanda nateli kuleñela ñahi chisaka kushakama chachiwahi?

¹⁴ Chinateli kumukalila mumbanda kwimika chakutalilahu chachiwahi chakukwasha nfumwindi neyi iyala yafuukula munabuli kukeñayi. Hela chochu, watela kumwekesha “spiritu yayovu yawunda” nikutiyañana nanfumwindi kulonda munafuukuliyi muzatiki. (1 Pet. 3:4) Mumbanda wamaana wafwilaña kulondela chakutalilahu chachiwahi chawambanda akunyaka amutiyileña Nzambi woma chidi neyi Sara, Luti, Abigayili nimama yaYesu, Mariya. (1 Pet. 3:5, 6) Cheñi wembujolaña chakutalilahu chawakulumpi awambanda ‘endaña mwendelañawu akwakujila.’ (Tit. 2:3, 4) Kuhitila  mukumukeña nfumwindi nikumulemesha, mumbanda wamaana welaña yuma yinateli kukolesha maluwi awu nichisaka chawu chejima. Mwitala dindi mwekala kuwunda nikukiñewa. Mumbanda wamaana amuhamekaña nankashi kudi iyala wapama kuspiritu.—Yish. 18:22.

Atwansi Talenuña ‘Hayuma Yabulaña Kumwekana’

15. Indi anyana anateli kuzatila ñahi hamu nawanvwali jawu kulonda chisaka chawu ‘chikali chatona’?

¹⁵ Indi enu atwansi munateli kuzatila ñahi hamu nawanvwali jenu kulonda chisaka chenu ‘chikali chatona’ kuspiritu? Toñojokenu hawuloku wunayitentekeliyi Yehova. Hadaha kufuma kuwansi wenu, anvwali jenu ayilejeleña nyevulu yamwekesheleña chakekala chihandilu Muparadisa. Chimwakulileña, hadaha azatishileña Bayibolu ninyikanda yawakwaKristu kulonda ayikwashi mufwikiji chakekala wumi wahaya nyaka mwituña dadiha. Kusha maana kumudimu waYehova nikufuukulahu chiwahi muchihandilu chenu kukuyikwasha ‘kwikala atona.’

16, 17. Chumanyi chatela kwilawu atwansi kulonda atweshi kutemuka lufuchi lwawumi?

¹⁶ Ilukenu mazu ahosheliyi kapostolu Pawulu ekala ha 1 Akorinda 9:24. (Tañenu.) Temukenu lufuchi lwawumi kulonda akayisomoni. Tondenu njila yinateli kuyileñela mwakatambwili wuloku wawumi wahaya nyaka. Antu amavulu aneteji yuma yakumujimba yiyikañeshi kusha maana haniwu wuloku. Kulondela iyi njila kwatama nankashi. Kushindamena hakuwana maheta muchihandilu hikwaletaña muzañalu wawenuku. Yuma yitunateli kulanda namali yakapinji kantesha hohu. Ilaña enu, talenuña ‘hayuma yabulaña kumwekana.’ Muloñadi? Muloña ‘yuma yabulaña kumwekana yahaya nyaka.’—2 Kor. 4:18.

¹⁷ ‘Yuma yabulaña kumwekana,’ yinabombelumu nkisu yakaleta Wanta. Fuukulenuhu kulondela njila yayiwahi muchihandilu chenu kulonda mwakatambwila iyi nkisu. Muzañalu walala wafumaña mukuzatila Yehova muchihandilu chenu. Kumuzatila Nzambi walala kwatuleñelaña kwikala nakukooleka kwakushikija yikonkwanyi yakampinji kantesha niyampinji yayilehi. * Kwimika yikonkwanyi yayiwahi kunateli kuyikwasha kusha maana hakumukalakela Nzambi namuchima wakutambwila wuloku wawumi wahaya nyaka.—1 Yow. 2:17.

18, 19. Indi kansi nateli kwiluka ñahi nindi nakwati wubwambu naYehova?

¹⁸ Atwansi, njila yatachi yakuya kuwumi yidi yakwikala nawubwambu wawuwahi naYehova. Komana munakwati dehi wubwambu naYehova? Dihulenu nenu: ‘Komana nasha maana kuyuma yakuspiritu, indi kwiji hakuzata nyidimu yakuspiritu nashindamenaña hadi anvwali jami? Komana nikweti yililu yamuzañaleshaña Nzambi? Nazataña nañovu kulonda nitwalekuhu kukalakala nyidimu yakundama kukudifukula kwalala, chidi neyi kulombaña mpinji yejima, kudiza, kupompa, nikuya mumudimu wakushimwina? Komana inakukundama kwakwihi naNzambi kuhitila mukukolesha wubwambu wami nayena?’—Yak. 4:8.

¹⁹ Toñojokenu hachakutalilahu chaMosi. Hela chakwila washakamineña nawantu achisemwa chacheñi, wafuukwiluhu nindi antu amwiluki nawu himukwakudifukula kudi Yehova  chatela amwiluki nawu himwana kaFwaro wamumbanda. (Tañenu Aheberu 11:24-27.) Enu atwansi akwaKristu, mwatela kufwila kumukalakela Yehova nakashinshi. Kuhitila mukwila mwenimu, mukwikala namuzañalu waweni, nichihandilu chachiwahi makonu nikuchiñeja kwakukwata “kuwumi, wowu wumi walala chikupu.”—1 Tim. 6:19.

20. Mulufuchi lwawumi, anyi akatambwila wuloku?

²⁰ Muyisela yahemeneñawu kushankulu, mukwakutemuka lufuchi wumu hohu diyi watambwileña wuloku. Hadi chaambu nalufuchi lwawumi. Nzambi nakukeña “antu ejima nindi ahandi, eluki nsañu yalala chikupu.” (1 Tim. 2:3, 4) Kudi antu amavulu atwesheli kutemuka lufuchi lwakuwumi henohu eyi kanda, nawa amavulu munakutemukila nawu hamu. (Heb. 12:1, 2) Antu ejima akutemuka kushika nikunsa diwu akatambula wuloku. Dichi fwilenu kutemuka kushika nikunsa!

21. Yumanyi yitukadiza muchibaaba chinalondeluhu?

²¹ Kwosi watela kukañesha “ifuku daYehova deneni dikweti woma.” (Mal. 4:5) Idi ifuku hidatela kushikena yisaka yawakwaKristu chakadi kwilukaku. Antu ejima muchisaka atela kuzata mudimu wawu wakuspiritu. Yumanyi yikwawu yimwatela kwila kulonda mutwalekuhu kwikala atona kuspiritu nikukolesha wubwambu wenu naNzambi? Chibaaba chinalondeluhu chikalumbulula yikuma yisatu yaleñelaña chisaka chikali chakola kuspiritu.

[Tumazu twaheshina]

Yumanyi Yimunadizi?

• Muloñadi yisaka yawakwaKristu chiyatela ‘kwikala yatona’?

• Indi iyala nateli kwimbujola ñahi Kabiña Walala?

• Chumanyi chatela kwilayi mumbanda wamaana kulonda amukwasheña nfumwindi?

• Atwansi anateli kukwasha ñahi hakwila nawu yisaka yawu yikali yatona kuspiritu?

[Malwihu aKuzatisha haKudiza]

[Mwevulu wudi hefu 9]

Mumbanda wamaana amuhamekaña nankashi kudi iyala wapama kuspiritu