Komana Atwansi Atela Kupapatishewa?

CARLOS, * tata yawantu mukwaKristu wamwituña daPhilippines wahosheli nindi: “Nazañalali nankashi hakumona mwanami wamumbanda nekali kambuña aYehova, nawa neluki nami niyena natiyi kuwaha.” Tata yawantu wakuGreece wasonekeli nindi: “Ami niñodami tudi amuzañalu hakumona anyanetu asatu anayipapatishi nakwikala aYinsahu jaYehova iku achidi atwansi. Anakupaminaku kuspiritu nawa atiyaña kuwaha hakumukalakela Yehova.”

Anvwali akwaKristu atela kuzañalala chikupu neyi anyanawu apapatishewa, ilaña mpinji yikwawu akamenaña. Mama yawantu wumu wahosheli nindi: “Natiyili kuwaha nankashi hampinji yoyimu nakameneni.” Muloñadi mama yawantu chazañaleliyi nikwakama? “Nelukili nami ichi dinu mwanami wukudimenaña yomweni kumesu aYehova.”

Atwansi ejima atela kwimika chikonkwanyi chakumukalakela Yehova neyi aYinsahu jindi apapatishewa. Mpinji yoyimu anvwali amwakamaña Nzambi atela kutoñojoka nawu, ‘Neluki nami mwanami nayiluku hambidi, hanu dinu nateli kushinda yuma yatama nakutwalekahu wutooka kumesu aYehova?’ Amakwawu niwena anateli kudihula nawu, ‘Neyi yeñila mukweseka kwakukeña maheta, komana mwanami wukatwalekahu kumukalakela Nzambi namuzañalu nineyena?’ Hanu dinu, kufumbanyi kwamuNsona kunateli kuzatishawu anvwali hakwila eluki nawu anyana anateli kupapatishewa?

Hakwila Nawu Wupapatishewi Chiña Wikala Kambanji kaKristu

Izu daNzambi hidashimunaña yaaka yatela kushikijayi muntu hakwila yapapatishewiku, dalumbulula wuspiritu wawantu atela kupapatishewa. Yesu walejeli atumbanji twindi nindi: “Yenu mwakelishi atumbanji munyuza yejima, mwakayipapatishi.” (Mat. 28:19) Dichi, antu ekala dehi atumbanji twaKristu diwu atela kupapatishewa.

Indi kambanji himuntu wamuchidinyi? Mukanda waInsight on the Scriptures walumbulula nawu: “Idi izu datalisha nankashi kudi antu ejima akuhwelela ntañishilu yaKristu nawa ayilondelaña chikupu.” Komana atwansi  anyanya anateli kwikala atumbanji twaKristu alala? Muhela wunakalakali mudimu wawumishonali mwituña daLatin America hadi yaaka yakubadika ha 40 wasonekeli nsañu yachihandilu chindi nihadi anyikijindi ayedi awambanda nindi: “Twadiña twakula dehi nawa twelukili netu twakeñeleña kumukalakela Yehova kulonda tukashakami muParadisa. Kudihana kwetu kwatuleñeleli kwikala akola hampinji yitwamweni kweseka kwahitañamu atwansi. Hitwaditoñeshaña hakufuukulahu kudihana kudi Nzambi hampinji yitwadiña atwansiku.”

Mwatiyaña ñahi neyi mwanenu yekala kambanji kaKristu? Bayibolu yahoshaña nawu: “Hela mwana wanyanya amwilukilaña kuyuma yelañayi, neyi nyidimu yindi yitooka, hela neyi yoloka.” (Yish. 20:11) Shinshikenu hayililu yamwekeshaña nawu kansi ‘nakuyilaku kumbidi’ hamu neyi kambanji.—1 Tim. 4:15.

Wunsahu Wukumwekesha Nawu Mwanenu Hikambanji kaKristu

Komana mwanenu wayovwahilaña? (Kol. 3:20) Wazataña nyidimu yimwamwinkaña mwitala? Bayibolu yahoshaña hadi Yesu hadiñayi nayaaka 12 nawu: “Hakuyovwahilaña [anvwali jindi].” (Luka 2:51) Eñañi, makonu kwosi mwana wunateli kwovwahila anvwali jindi chaloña. Ilaña akwaKristu alala atela ‘kwenda mumahaji aYesu chikupu.’ Dichi atwansi anakukeña kupapatishewa atela kuyiluka nawu ovwahilaña anvwali jawu.—1 Pet. 2:21.

Shinshikenu hanawa malwihu: Komana mwanenu ‘wasambilaña kukeña Wanta’ mumudimu wakushimwina? (Mat. 6:33) Wakeñaña kushimwina nsañu yayiwahi kudi amakwawu, ntahindi mwamukanjikijaña chikupu hakwila nawu yayi nakushimwina kwitala nikwitala? Komana weluka mudimu windi chineli himukwakushimwina wabula kupapatishewa? Komana wafwilaña kufuntila kudi antu amwekesheli mpwila mwiluña dindi dakushimwina? Komana wadilumbululaña kudi akwawu akashikola nikudi antañishi nindi hiChinsahu chaYehova?

Komana walemesha kupompa kwachipompelu? (Mas. 122:1) Watiyaña kuwaha kwakulahu hakudiza kwaKaposhi Kakutalila niHakudiza Bayibolu Hachipompelu? Komana wahanaña jimpanji nikwakulahu Mushikola yaMudimu waTeokalatiki?—Heb. 10:24, 25.

Komana mwanenu wafwilaña kwikala nayililu yayiwahi kuhitila mukutondolwela kudikunda nawantu atama hashikola nikumaluña amakwawu? (Yish. 13:20) Yumanyi yakeñeshayi hadi tumina, nyivwimbimbi, maprogiramu aha T.V, yisela yahavidiyo, nikusandujola haIntaneti? Komana nhoshelu yindi niyililu yamwekeshaña nawu wakeñaña kulondela nshimbi jamuBayibolu?

Komana mwanenu weluka nsañu yamuBayibolu? Natweshi kushimuna yuma yadizañayi haKudifukula kwaChisaka kwamelela mumazwindi? Komana nateli kulumbulula nsañu yapela yamuBayibolu? (Yish. 2:6-9) Komana watiyaña kuwaha kutaña Bayibolu nikudiza nyikanda yasonekaña izanvu danduñu wamaana nikashinshi? (Mat. 24:45) Wehulaña malwihu hansañu yatañishaña Bayibolu nimavasi?

 Awa malwihu anateli kuyikwasha kulonda mwiluki neyi mwanenu nakuyilaku hambidi kuspiritu. Chimwashinshika hanawa malwihu, munateli kwiluka nenu mwanenu watela kuzatila hayuma yimu henohu kanda yapapatishewi. Ilaña, neyi chihandilu chindi chimwekesha nawu mwalala hikambanji nawa wadihana chikupu kudi Nzambi, munateli kumwiteja nenu yapapatishewi.

Atwansi Anateli Kumuhameka Yehova

Ambuña aNzambi amavulu amwekesheli chikuhwelelu nikashinshi hadiñawu atwansi. Toñojokenu hadi Yosefu, Samweli, Yosiya, niYesu. (Kutach. 37:2; 39:1-3; 1 Sam. 1:24-28; 2:18-20; 2 Kushi. 34:1-3; Luka 2:42-49) Anyana kaFwilipu awana awambanda, aprofweteleña, atela ayidizishili chachiwahi kufuma tuhu kuwansi.—Yil. 21:8, 9.

Chinsahu wumu mwituña daGreece wahosheli nindi: “Ampapatishili hinadiña nayaaka 12. Hinaditoñeshañaku. Kufuma hampapatishiluwu, hanahiti yaaka 24, nashakami yaaka 23 mumudimu wampinji yejima. Kumukeña Yehova kwankwashili kuumika kukala kunamweneña hampinji yinadiña kansi. Hinadiña nayaaka 12 hinelukili nsañu yamuNsona neyi chineluka hayinu mpinjuku. Ilaña nelukili nami namukeñeli Yehova nawa nakeñeleña kumuzatila haya nyaka. Namusakililaña muloña nankwashi kutwalekahu nakuzata mudimu windi.”

Hela chakwila wudi kansi hela wudi mukulumpi, muntu wakeñaña kwikala kambanji walala watela kupapatishewa. Kapostolu Pawulu wasonekeli nindi: “Namuchima muntu wetiyaña nakutambula kuloña; nakanwa wetejaña nakumona kuhanda.” (Rom. 10:10) Neyi kambanji kaKristu wakansi yapapatishewa, dikwila nawu yena nianvwali jindi anakoñi chuma chalema nankashi. Bayi mwiteja chuma chidi chejima chiyikañeshi enu hela mwanenu kuwana muzañalu weneni wafumaña mukupapatishewaku.

[Tumazu twaheshina]

[Chikasha chidi hefu 5]

Chimwatela Kumona Kupapatishewa

Anvwali amakwawu atoñojokaña nawu neyi mwanawu yapapatishewa hichuma chachiwahi ilaña mwekala wubanji, neyi chochekala muntu wunatambuli lasensi yawuñendeshi. Komana muntu nateli kukañanya kwikala nachihandilu chachiwahi kumbidi hamuloña wakupapatishewa nikuzata mudimu wajila? Hidichashimuna Bayiboluku. Mukanda waYishimu 10:22 wahosha nawu: “Nkisu yaYehova yaheteshaña muntu, habombelañaku kukalaku.” Pawulu niyena wamusonekeleli mukwenzi Timotewu nindi: “Kwakama Nzambi, nikutiya kuwaha, hikuheta kwakweni.”—1 Tim. 6:6.

Eñañi, kumukalakela Yehova hikwapelaku. Yeremiya wahitili mukukala kwamboka-mboka hadiñayi kaprofwetu kaNzambi. Hela chochu, wasonekeli hakudifukula kwindi kudi Nzambi walala nindi: “Mazu eyi anluñishili, antiyishili kuwaha mumuchima wami. Muloña antenena dehi ijina deyi, eyi Yehova Nzambi wamazaza.” (Yere. 15:16) Yeremiya welukili nindi mudimu waNzambi diwu wamuleteleleña muzañalu. Kaayi kaSatana dikanakuleta yihuñu. Dichi anvwali atela kukwasha anyanawu kulonda eluki chaambu chidihu.—Yere. 1:19.

 [Chikasha/Mwevulu wudi hefu 6]

Komana Mwanami Watela Kuhembelela Yakapapatishewi Neyi Nakuli Dehi?

Mpinji jikwawu, hela neyi anyana awanisha yuma yakeñekaña hakwila apapatishewi, anvwali jawu anateli kufuukulahu nawu akapapatishewi kumbidi. Yumanyi yaleñelaña?

Nachinaña nami neyi mwanami yapapatishewa, hadaha kumbidi wakavulumuna nawa akamuhaña. Komana mwalala twatela kukuhwelela netu kansi wahembelelaña nindi yakapapatishewi neyi nakuli dehi hanateli kulumbulula kumesu aNzambi hayililu yindi yakoñañayuku? Solomoni wasonekeli awa mazu kudi atwansi nindi: “Ilukaku, hansañu yayuma yejimiyi [yililu yeyi] Nzambi wamba kakushikija kukusompesha.” (Mukwa. 11:9) Hampinji yasonekeliyi Pawulu nindi: “Wejima wetu twamba kalumbulula kudi Nzambi mutwelaña hamuntu hamuntu,” wateneni muntu wejima kansi nimukulumpi.—Rom. 14:12.

Akwakudifukula ejima apapatishewa niabula kupapatishewa akalumbulula kumesu aNzambi. Mwatela kwiluka nenu Yehova wakiñaña ambuñindi kuhitila ‘mukubula kwiteja ayeseki chabadika muñovu jawu.’ (1 Kor. 10:13) Neyi ekala ‘ababala’ nawa ashinda kweseka, Nzambi nateli kuyikwasha. (1 Pet. 5:6-9) Mama yawantu mukwaKristu wasonekeli nindi: “Anyana apapatishewa atela kutondolwela chikupu yuma yatama yamukaayi. Mwanami wapapatisheweli nayaaka 15, wahoshaña nindi kupapatishewa kwakiñaña muntu. Wahosheli nindi, ‘Hiwunateli kutoñojoka hakwila yuma yinateli kufumpa nshimbi jaYehovaku.’ Kupapatishewa kwatusañumunaña kwila yuma yaloña.”

Neyi mwayifumbaña anyanenu nikuyimikila chakutalilahu chachiwahi chakumwovwahila Yehova, munateli kukuhwelela nenu akatwalekahu neyi anapapatishewi dehi. Mukanda waYishimu 20:7 wahosha nawu: “Muntu waloña wendaña mwindi mwamuwahi, anyanindi akumulondela munyima anakooleki.”

Inakukeña mwanami akasambili kushikija yikonkwanyi yikwawu. Atwansi atela kwiluka chakudizatila kulonda kumpinji yakumbidi akatweshi kudihemba aweni. Ilaña, hichinateli kuwahaku neyi tuyikoleshaña netu chihandilu chawu chishindameni hohu hakutaña shikola nikwikala namali chatela ashi maana kukudifukula kwalala. Kutalisha ‘hambutu,’ hela izu daWanta dabulaña kukula, Yesu wahosheli nindi: “Anakuwuwu mukachi kanyiña, diyi muntu wukwila chakutiyayi mazu, kwakama kwamakonu nikudimbana kwamaheta hikuvumbisha mazu, niyena wukwikala wakasoñaña.” (Mat. 13:22) Neyi nvwali yakoleshaña mwanindi kwimika yikonkwanyi yamukaayi nikumona wubwambu windi naYehova neyi hichuma chabula kulema, chikumuleñela mwana kubula kwikala nampwila yakukalakela Nzambi.

Eluda wakuluka yitembi wahosheli hadi atwansi atela kupapatishewa ilaña akanishañawu kudi anvwali jawu nindi: “Neyi mumukañesha kansi wunakukeña kupapatishewa, munateli kumuleñela yafunti hanyima kuspiritu nawa nateli kuneña.” Nawa nkoñi wendaña wasonekeli nindi: “Kansi nateli kutachika kutoñojoka nindi hanateli kukula kuspirituku. Nateli kutachika kukeña yuma yamukaayi.”

[Mwevulu]

Komana mwatela kutwamijaku shikola yayunivesiti?

[Mwevulu wudi hefu 3]

Kansi wanyanya nateli kumwekesha nawu nateli kwikala kambanji

[Nyevulu yidi hefu 3]

Kuloñesha nikwakulahu hakupompa

[Mwevulu wudi hefu 4]

Kwovwahila anvwali

[Mwevulu wudi hefu 4]

Kuya nakushimwina

[Mwevulu wudi hefu 4]

Kulomba nkawindi