Munateli ‘Kukooleka Ñahi Munjila Yenu’?

IZU dakwila nawu “kukooleka” twadiluka nankashi. Antu amakwawu anashiki hayifulu yahewulu nawa anaheti chikupu nikuya mpuhu. Amakwawu niwena afwilaña kuheta ilaña akañanyaña.

Hela chochu, kukooleka kwashindamena hayuma yimwalemesha muchihandilu chenu. Kudi cheñi yuma yikwawu yiyedi yalema, chimwazatishaña mpinji yenu niñovu nichimwafuukulañahu.

AkwaKristu amavulu eluka nawu kudikita chikupu mumudimu wakushimwina kwayizañaleshaña nankashi. Kwikala nachikonkwanyi chakuzata mumudimu wampinji yejima kunakwashi atwansi niakulumpi kukooleka munjila yawu. Ilaña, amakwawu anateli kutoñojoka nawu mudimu wakushimwina watiyishaña wuudi nawa muchihandilu chawu hiyawulemeshañaku, ashaña maana kuyikonkwanyi yikwawu. Muloñadi chelilañawu mwenimu? Mwatela kwila ñahi kulonda mubuli kudiwula iwu mudimu walema chikupu? Nawa munateli ‘kukooleka ñahi munjila yenu’?—Yosh. 1:8.

Nyidimu Yikwawu niYisela

AkwaKristu atwansi atela kwiluka chachiwahi mwakukumina hakumukalakela Nzambi nikuzata nyidimu yikwawu. Atwansi elaña mwenimu atela akakooleka chikupu muchihandilu nawa tunakuyihameka nankashi.

Dichi, atwansi akwaKristu amakwawu, anakusweja kwiñija nyitu munyidimu yikwawu niyisela. Nyidimu yeniyi hiyatamaku. Ilaña, atwansi akwaKristu atela kudihula nawu: ‘Mpinji yamuchidinyi yakeñekaña hakwila nawu nizati iyi nyidimu? Iyi nyidimu yikunleñela nidikundeña nawantu amuchidinyi? Yililu yamuchidinyi yikwetuwu antu inikudikundañanawu hakuzata iyi nyidimu? Komana chihandilu chami chikushindamena haniyi nyidimu?’ Mwatela kwiluka nenu muntu nateli kwiñija mutu muniyi nyidimu nawa hakwikalaña nañovu hela nampinji yakukolesha wubwambu windi naNzambuku. Komana, chachiwahi kwiluka yuma yalema yimwatela kutwamijaku.—Efwes. 5:15-17.

Talenu chakutalilahu chaWiktor. * Wahosheli nindi: “Chinadiña nayaaka 12, nadibombeli nezanvu dawakwakuhema ngunja yatenañawu nawu volleyball. Chimwahitili mpinji, ansomweneni mali niyawaana yayivulu. Nadiña nakukooleka kwakuya mpuhu.” Chimwahitili mpinji, Wiktor watachikili kuneña chelili ichi chisela chitachiki kuluwañesha wubwambu windi naYehova. Ifuku dimu, chelili nindi yatañi Bayibolu waholokeleli mutulu. Cheñi nawa, welukili nindi mudimu wakushimwina hiwadiña nakumuzañaleshaku. “Iyi ngunja yanzeyesheleña chikupu, nawa nelukili nami yamanishileña iyena dami dakuspiritu. Nelukili nami hinazatileña nañovuku.”

Kutaña Shikola Yahewulu

MukwaKristu wukweti mudimu wakwakamena chisaka chindi kuSpiritu, nawa nikuyinka yuma yakumujimba. (1 Tim. 5:8) Komana, hakwila nawu yeli mwenimu chiña yekala nadigili yahashikola yamuñoñi hela yamusukula?

Chakuwaha neyi mwiluka kutaña shikola yahewulu chiyaluwañeshaña wubwambu wamuntu naYehova. Tulumbululenu iyi nsañu kuhitila mukushinshika hachakutalilahu chasonekawu muNsona.

Baruki wadiña nsoneki yakaprofwetu Yeremiya. Mpinji yimu, chatela yashi muchima hakukooleka kwakumukalakela Yehova, Baruki watachikili kukeña maheta. Yehova welukili yuma yadiña mumuchima windi nawa  wamusoñamishili kuhitila mudi Yeremiya nindi: “Wudi nakukeñakeña yuma yeyi yamaneni tahindi? Bayi wuyikeñakeñaku.”—Yere. 45:5.

Baruki wadiña nakukeña ‘yumanyi yamaneni’? Hadaha wakeñeleña nindi atiyakani mpuhu mumpinji yawaYudeya. Indi kwiji yuma yamaneni yafwilileñayi yadiña maheta. Hichikweti muloña nachuma chafwilileñayuku, wakañenyi kutwamijaku yuma yalema, yateleleli kumukwasha yakundami kwakwihi naYehova. (Fwi. 1:10) Ilaña, Baruki watiyilili chamusoñamishiluwu kudi Yehova kuhitila mudi Yeremiya wahandishili wumi windi neyi chuma chakupupa kunjita.—Yere. 43:6.

Chumanyi chitukudizilaku kuniyi nsañu? Kufumba kwatambwililiyi Baruki kwamwekeshaña nawu kudi chuma chaluwankeni. Wakeñeleña yuma yamaneni. Neyi mwawana dehi mwakuhandila, komana mwalala mwatela kuzatisha mpinji, mali, niñovu yakutaña shikola yahewulu hamuloña wakukeña kudizañalesha hela kwila yuma yinakukeña anvwali niantaña?

Talenu hadi Grzegorz wadizili nyidimu yajikopyuta. Hamuloña wekakeja dawakwawu, watachikili kudiza chikupu nyidimu yikwawu kubombela hayina yadiziliyi. Dichi mumpinji yantesha hadiña cheñi nampinji yakuzata nyidimu yakuspirituku. Wahosheli nindi: “Natiyileña neyi kwiji anashinkili muwina. Chinleji chami chankabishileña muloña nakañenyeña kushikija yikonkwanyi yakuspiritu yinemikili.”

Kwiñija Mutu Mumudimu Wumwazataña

Izu daNzambi dakoleshaña akwaKristu alala kuzata nañovu nikwikala akwanyidimu niakakwiñija nyidimu adikita. Kapostolu Pawulu wasonekeli nindi: “Yuma yejima yimukwila yilenu namuchima wakukalakela Mwanta, bayi chakukalakela antu hohuku.” (Kol. 3:22, 23) Hela chakwila mwatela kuzata chikupu nañovu, kudi chuma chikwawu chimwatela kwila, kulonda kwikala nawubwambu wawuwahi naNleñi. (Mukwa. 12:13) Neyi mukwaKristu yasweja kwiñija mutu mumudimu windi wakumujimba, hanateli kusha maana kuyuma yakuspirituku.

Kwiñija mutu mumudimu wakumujimba kunateli kuleñela mukwaKristu kuzeya nikukañanya kukolesha wuspiritu windi nikukwasha chisaka chindi. Mwanta Solomoni wahosheli nindi ‘chakudya chamumakasa ayedi chakudya nakukabakana’ kakavulu mwafumaña ‘kwakukabila tuhu mpepela.’ Neyi mukwaKristu yasweja kwiñija mutu mumudimu wakumujimba, nateli kukata kwamabinjila. Muntu wamuchidiwu mudimu windi wunateli kumutadika wuduñu nawa chafumañamu wazeyaña. Neyi azeyaña chamuchidiwu, komana mwalala nateli ‘kuzañalala . . . nakumona kuwaha kunyidimu yejima yakukabakanayi’? (Mukwa. 3:12, 13; 4:6) Sweje-e dinu, komana wukwikalaña nañovu yakuzata nyidimu yamuchisaka nikuzata nyidimu yakuspiritu?

Janusz, washakamaña Kumusela waEurope  weñijili mutu mumudimu wakulandisha yuma yadimineñayi mwitempa. Wahosheli nindi: “Antu akwituña adiña nakunhameka muloña nadiña sakudikita nawa natwesheleña kumanisha nyidimu yejima yanyikeleñawu. Ilaña kuspiritu nafuntili mwishina, nawa nalekeli kuya mumudimu wakushimwina. Kuhiñahu nalekeli kuya nakupompa. Nadeteli hebwambu nawa nakanineña kutiyilila kufumba kwawaeluda, nafumini nimuchipompelu.”

Munateli Kukooleka Muwumi Wenu

Tunahanjeki hanyidimu yisatu yinateli kusweja kwiñijamu mukwaKristu mutu nakukisañana wubwambu windi naYehova. Haniyi nyidimu yitunahanjekuhu haduhu wumwazataña? Neyi hadi wumwazataña, malwihu analondeluhu, jinsona, nimazu anashimunuwu akuyikwasha kulonda mwiluki neyi mwalala munateli kukooleka muwumi wenu.

 Nyidimu yikwawu niyisela: Komana munadiñijimu chikupu muniyi nyidimu? Komana iyi nyidimu yinakuyimanishila mpinji yimwazatilileñamu nyidimu yakuspiritu? Komana kudikunda nawakwenu akwakwitiya hikunakuyizañaleshaku? Neyi hikunakuyizañaleshaku, mwatela kumwimbujola Mwanta Davidi, wamulembeleli Yehova nindi: “Ñilukishi njila yinukwenda muloña natalishi muchima wami kwiwulu kudeyi.”—Mas. 143:8.

Wiktor, itwashimuna hakusambila amukwashili kudi nkoñi wendaña. Nkoñi wendaña wamulejeli nindi: “Eyi wunakuhameka chikupu mudimu wakuhema ngunja yavolleyball.” Wiktor wahosheli nindi: “Ichi chaneñesheli hama, nelukili nami naswejeli kwiñijamu mutu. Kufumahu, nalekeli kudikunda nawamabwambu akwituña mutwahemeneneña ngunja nawa natachikili kudikunda nawamabwambu amuchipompelu.” Chayinu mpinji, Wiktor nakumukalakela Yehova neyena muchipompelu mwekalayi. Wahosheli nindi: “Mwatela kwihula amabwambu jenu, anvwali, hela aeluda muchipompelu kulonda ayileji neyi chakwila nyidimu yakushikola yinakuyileñela kukundama kudi Yehova hela nehi.”

Komana kwila muyileja aeluda muchipompelu chenu nenu munakukeña kwikala nakukooleka kwakumukalakela Nzambi munyidimu yikwawu nehi? Kwila mukwashaku atushinakaji akeñaña muntu wakuhanjeka nindi hela wakuyikwasha, hadaha kuya nakuyilandilaku jinakukeñawu hela kuyikwashaku tunyidimu twahetala nehi? Hichidi namuloña nayaaka yimukwetuku, munateli kukalakala mudimu wakushimwina wampinji yejima, nakulejaku antu amakwawu yuma yayileñela kwikala amuzañalu.

Shikola yahewulu: Yesu wasoñamishili chichatamina ‘kukeña kudilemesha eyaweni.’ (Yow. 7:18) Neyi mufuukulahu kutaña shikola kwesekeja nahimunakukeña kukumina, komana ‘munashinshiki yuma yabadika kulema’?—Fwi. 1:9, 10.

Grzegorz, wadizili mudimu wajikopyuta, wahimpili muchihandilu chindi. Wahosheli nindi: “Natiyilili chikupu mwafumbiluwu aeluda nawa nahimpili chihandilu chami. Nelukili nami hinatela cheñi kutwalekahu nakutaña shikola yahewuluku. Muloña namweni nami yikumanishila mpinji niñovu jami.” Grzegorz watachikili kudikita chikupu nyidimu yamuchipompelu. Chimwahitili mpinji, wamanishili shikola yinakutenawu nawu Shikola Yakudiza Bayibolu Yawamana Kwetu Ajiki. Eñañi, ‘wawanini mpinji’ yakutwalekahu kutaña shikola yakuspiritu.—Efwes. 5:16.

Mudimu wakumujimba: Komana muneñiji mutu mumudimu wumwazataña nakudiwula yuma yakuspiritu? Mwekalaña nampinji yakuhanjeka nachisaka chenu? Komana munakuzata nañovu kulonda muhaneña jimpanji jajiwahi muchipompelu? Komana mwekala nampinji yakuhanjeka hayuma yinateli kukolesha antu amakwawu? “Mutiyi Nzambi woma, hembaku kuleja kwindi,” Yehova wakakukiswila chikupu nawa ‘wukuluñisha muchima weyi nanyidimu yeyi yiwukukabakana.’—Mukwa. 2:24; 12:13.

Janusz, itwatena hakusambila, mumudimu windi wakulandulula wetempa himwafumini yuma yalalaku; nawa waholokeli chikupu. Chelili mali amumani, nawa wadiña nanyikudi, watachikili kumukalakela Yehova. Janusz wadiloñesheli chachiwahi nawa chayinu mpinji hipayiniya wampinji yejima nawa hieluda muchipompelu. Wahosheli nindi: “Chinawana yuma yashikila yinakukeña, mpinji yoyimu nizatisha ñovu yami munyidimu yakuspiritu, kuwunda kwenzalaña muyitoñojoka yami nimumuchima.”—Fwi. 4:6, 7.

Wanenu mpinji yakushinshika chachiwahi namuchima wumu hayitoñojoka yenu niyuma yimwatwamijañaku. Kumukalakela Yehova dikwaleñelaña kukooleka chikupu muchihandilu. Dihatela kushindamena chihandilu chenu.

Mwatela kuhimpa muyuma yikwawu, nakufumishahu yuma yabula kulema “kulonda mushinshiki mwaya muchima waNzambi, diwu wawuwahi, watiyishaña kuwaha, walala chikupu.” (Rom. 12:2) Dichi munateli ‘kukooleka munjila yenu’ kuhitila mukumukalakela Nzambi nawumi wenu wejima.

[Tumazu twaheshina]

[Chikasha/Mwevulu wudi hefu 31]

Munateli Kukooleka Ñahi Munjila Yenu?

Chineli kudi yuma yayivulu yinateli kuyimanishila mpinji, munateli kutondolwela ñahi chaaku chakudiwula yuma yabadika kulema? Ikalenuku nampinji yakushinshika chikupu hayililu yenu nihayuma yimwatwamijaku kuhitila mukushinshika hamalwihu adi heshina:

NYIDIMU YIKWAWU NIYISELA

▪ Yililu yamuchidinyi yikwetuwu antu imwadikundañanawu hakuzata iyi nyidimu?

▪ Mpinji yamuchidinyi yakeñekaña hakwila nawu mukoñi iyi nyidimu?

▪ Komana yinateli kuleñela chihandilu chenu chisweja kushindamena haniyi nyidimu?

▪ Komana iyi nyidimu yinakuyimanishilaña mpinji yimwatela kumukalakela Yehova?

▪ Iyi nyidimu yayileñela mudikundeña nawantu amuchidinyi?

▪ Komana mwakeñeshaña kudikunda nawantu wenawa kubadika akwenu akakwitiya?

SHIKOLA YAHEWULU

▪ Neyi mwawana dehi mwakuhandila, komana mwalala mwatela kuzatisha mpinji, mali, niñovu yakutaña shikola yahewulu?

▪ Hakwila nawu muhandeña chiwahi, komana mwalala chiña nawu mwikala nachipapilu chakushikola yamusukula (college) nishikola yamuñoñi (university)?

▪ Komana mukwikalaña nampinji yakuya nakupompa?

▪ Komana ‘munakushinshika yuma yabadika kulema’?

▪ Komana mwatela kusweja kumukuhwelela Yehova nenu nateli kuyinka yuma yimwakeñaña?

MUDIMU

▪ Komana mudimu wumwazataña wayileñelaña kwikala nampinji yakudiluñisha muchihandilu chenu?

▪ Chimwafuma kumudimu mwekalaña nañovu yakuzata nyidimu yamuchisaka ninyidimu yakuspiritu?

▪ Mwekalaña nampinji yakuhanjeka nachisaka chenu?

▪ Komana muneñiji mutu mumudimu wumwazataña nakudiwula yuma yakuspiritu?

▪ Komana mudimu wunayileñeli mukañanyeña kuhana mpanji jajiwahi hakupompa?

[Mwevulu wudi hefu 30]

Yehova wamusoñamishili Baruki wakeñesheleña maheta