Antu Jayehova Emikili Mushindu Munyiloña Yayitwikiluwu!

MUCHAAKA cha 1991 nfulumendi yamuSoviet Union yetejeli aYinsahu jaYehova kusonekesha nsakililu yawu munidi ituña. Chamanini nfulumendi yaSoviet Union, nfulumendi yayiha yaRussia niyena yetejeli aYinsahu jaYehova kwikala hakachi kansakililu yetejeluwu muRussia. Iyi nfulumendi yayiha yetejeli nawu nfulumendi yayikulu yakabishili chikupu amana kwetu. Mu 1993 Mutayi wamuMoscow Watalaña Hawuñanji wasonekesheli Izanvu dawaYinsahu jaYehova muMoscow mushimbi. Muchaaka chochimu, nfulumendi yawakaRussia yatuñili nshimbi yayiha, dikwila nawu chipapilu chetejeleña antu kwikala nawuswa. Iyi nshimbi yahosheleña nawu muntu wejima wudi wakasunuka kuya munsakililu yindi. Ichi dichuma chadiña nakutalilawu amana kwetu niahela hadi yaaka yayivulu.

Hanyima yachuma chamwekeni, amana kwetu niahela muRussia atwalekeluhu namudimu wakushimwina, nawa antu amavulu adizili chalala. (2 Tim. 4:2) Kufuma mu 1990 nakushika mu 1995, aYinsahu muMoscow avulili nankashi kufuma ha 300 nakubadika ha 5000! Ayilumbu jawaYinsahu jaYehova chachimwenuwu, atachikili kwakama. Haniyi mpinji, atachikili kuyikabisha, kuyikañesha, nikuyitwala antu jaYehova muyota yanyiloña.

CHATACHIKILUWU KUKEÑAKEÑAWU NYILOÑA

MuJune 1995, dihatachikili kuyikabishawu. Izanvu dawantu amuMoscow dahakwilañaku Chaachi yawaOrthodox muRussian ayitwikili amana kwetu muloña nawu elaña yuma yatama. MuJune 1996, akwakutala hanyiloña ahosheli nawu wena hiyawanini wunsahu wakuyifwisha aYinsahu jaYehova namuloñaku. Ilaña izanvu dawakaMoscow, atwalekeluhu nakuyitwika amana kwetu nyiloña yoyimu kubadika mapampa kasatu. Ilaña mpinji yejima, akwakutala hanyiloña chadiña nakukeñawu wunsahu akañenyeña kuwana hakuyitwikila aYinsahu jaYehova muloña. Nkumininaku haApril 13, 1998, muloña wamanini.

Mukwakwimenaku amahaku wahosheli nindi hiyawanini wunsahu wamwekesheleña nawu aYinsahu jaYehova afumpileña nshimbuku. Ilaña wahosheli nindi njila yikwawu yakulekeshelamu aYinsahu yidi yakuya nakuyilobela. Antu diwu ayili nakulomba bayi akapokolaku. Dichi ihaku wakuNorthern Administrative Circuit of Moscow diyi wayili nakuyilombela amana kwetu. HaSeptember 29, 1998, atachikili kusompa nyiloña muChota chaMunkambi chaGolovinsky muMoscow.

BAYIBOLU AYIZATISHILI HAKUSOMPA NYILOÑA MUCHOTA

Tatyana Kondratyeva diyi wadiña ihaku. Wazatishili lushimbi lwafwachikiluwu mu 1997 hakukabisha aYinsahu. Ilu lushimbi lwahosheleña nawu akwaKristu amuOrthodox, Islam, Judaism, niBuddhism diyi nsakililu yetejeluwu munidi ituña. Chipapilu chimu chansañu chalumbulwili nawu Chaachi yawaOrthodox yamuRussia  diyaleñeleli nfulumendi yituñi ilu lushimbi muloña iyi Chaachi yakeñeleña nfulumendi yikanishi aYinsahu jaYehova. (Chipapilu chansañu achisonekeli, haJune 25, 1999.) Ilu lushimbi lwetejeleña yota yanyiloña kukanisha hela kulekesha nsakililu yaleñeleleña antu aheleña akwawu. Iwu ihaku wahosheli nindi nfulumendi yatela kulekesha aYinsahu jaYehova muloña aleñelaña antu aheleña akwawu nawa asandaña yisaka.

Ñaji wahakwililuku amana kwetu wehwili nindi: “Anyi ekala muChipompelu chaMoscow afumpaña nshimbi nawa aleñelaña antu aheleña akwawu?” Ihaku hateneni ijina damuntu wudi wejimaku. Ilaña wahosheli nindi nyikanda yawaYinsahu jaYehova diyaleñelaña antu aheleña akwawu amunsakililu yacheñi muloña iyi nyikanda yatañishaña nawu aYinsahu jaYehova diwu ekala munsakililu yalala.

Ñaji wumu wadiña Chinsahu, wamwinkeli nsompeshi Bayibolu nawa wanoneli yikwawu nakwinka ihaku. Kuhiñahu watañili nsona yaAefwesesa 4:5 wahosha nawu: “Kwekala Mwanta wumu, nikukuhwelela kumu, nichipapatishu chimu.” Nsompeshi, ihaku, niñaji wejima wawu akwatili maBayibolu mumakasa, nawa ahanjekeli hansona yikwawu yidi neyi Yowanu 17:18 niYakoba 1:27. Nsompeshi wenhwili nindi: “Komana iji nsona jaleñelaña antu aheleña antu amunsakililu yacheñi?” Ihaku wahosheli nindi hichikweti muloña namwatoñojokeleñayiku muloña hadiña wakuluka yitembi munsañu jamuBayiboluku. Kuhiñahu ñaji wasolweli nyikanda yamuChaachi yaOrthodox muRussia yahosheleña yuma yatama hadi aYinsahu jaYehova nawa wenhwili nindi: “Komana iyi nsañu yasonekawu muniyi nyikanda yafumpaña nshimbi?” Ihaku wahosheli cheñi nindi hichidi namuloña namwatoñojokeleñayiku muloña hadiña wakuluka yitembi munsañu jansakililuku.

NYILOÑA YAKADI WUNSAHU

Chelili ihaku yatwinki aYinsahu muloña wakwila nindi asandaña yisaka, wahosheli nindi wunsahu wumu wamwekeshaña nawu asandaña yisaka muloña hiyanakanaña mafuku akunooka adi neyi Krisimansiku. Wahosheli cheñi nindi aYinsahu hiyetejaña anyanawu kunooka hela kwila yuma yatela kuyizañaleshaku. Nkumininaku wahosheli nindi nshimbi yamuRussia hiyetejaña antu kwanakana Krisimansiku. Muntu yowumu wahosheli cheñi nindi kanda yahosheñahu dehi nawanyana kawaYinsahu jaYehova nawa kanda yapompeñahu dehi nawaYinsahu jaYehova.

Ihaku watambikili nkuluñaña wokaña antu azaluka kulonda yashimuni mwatoñojokeleñayi. Iwu nkuluñaña wahosheli nindi kutaña nyikanda yawaYinsahu kwaleñelaña muntu kuluwankana muwoñu. Wetejeli nindi iyi nsañu yasonekeliyi wayifumishili munsañu yasonekeluwu kudi akulumpi amuChaachi yaOrthodox muMoscow. Wahosheli cheñi nindi kanda yokeñahu dehi muyeji wadiña Chinsahu chaYehova. Ndotolu mukwawu wahosheli muchota nindi, wadiña nakushinshika chihandilu  chawaYinsahu akubadika ha 100 muMoscow. Wahosheli nindi awaYinsahu adiña akola ngu-u nawa chekaliluwu aYinsahu jaYehova alemesheleña chikupu nsakililu jikwawu kubadika kumpinji yakunyima.

TWEMIKILI MUSHINDU, ILAÑA NYILOÑA HIYAMANINUKU

HaMarch 12, 1999, nsompeshi watondeli antu ataña chikupu atanu kulonda asandujoli nsañu yekala munyikanda yawaYinsahu jaYehova, nawa muloña awimikili. Henohu kanda emiki iwu muloña, Mutayi Watalaña Nsañu Jawuñanji wamwituña daRussia niwena walejeli izanvu dawantu ataña kusandujola nsañu yasonekawu munyikanda yetu. HaApril 15, 1999, idi izanvu dashimwini nawu hiyawaninumu nsañu yatama munyikanda yetuku. Dichi haApril 29, 1999, Mutayi Watalaña Nsañu Jawuñanji wahakwili nawu aYinsahu jaYehova hinsakililu yetejawu munshimbi mwituña daRussia. Ilaña muMoscow, nsompeshi wahosheli nindi antu atanu atondeliyi atela kutwalekahu kusandujola nsañu yekala munyikanda yawaYinsahu jaYehova. Chumichi chadiña chakuhayamisha. Mutayi Watalaña Nsañu Jawuñanji mwituña dejima damuRussia wahosheli nawu aYinsahu jaYehova ovwahilaña nshimbi nawa atela kwikala nsakililu yetejawu munshimbi. Ilaña hampinji yoyimu, Mutayi Watalaña Nsañu Jawuñanji muMoscow wadiña nakukeñakeña nsañu hadi aYinsahu jaYehova muloña antu amakwawu ayitwikileña muloña nawu afumpaña nshimbi.

Chimwahitili yaaka yiyedi nyiloña yamuMoscow yatachikili cheñi. HaFebruary 23, 2001, Nsompeshi wejina daYelena Prokhorycheva wahakwili nindi kwosi muloña watela kukañesha nyidimu yawaYinsahu jaYehova muMoscow.  Nkumininaku, chota chahakwili nawu nyiloña yejima yayitwikileñawu amana kwetu yadiña yakutwamba! Ilaña ihaku wakaanini mwahakwiluwu nawa walejeli chota chamumusumba wamuMoscow chitali haniyi nsañu. Chimwahitili tukweji tusatu, haMay 30, 2001, ichi chota chakaanini mwahosheli Ihaku wejina daProkhorycheva. Chota chashimwini nawu iyi nsañu akayisompi cheñi kudi ihaku yowumu ilaña kwakekali nsompeshi wacheñi.

TWAKAÑENYI KWIMIKA MUSHINDU ILAÑA NYILOÑA YACHIDIÑA KWOKU

HaOctober 30, 2001, nyiloña yatachikili cheñi. Ayisompeli nehaku wejina daVera Dubinskaya. Ihaku wejina daKondratyeva watwikili cheñi aYinsahu jaYehova muloña wakuhela akwawu. Ilaña wahosheli nindi nfulumendi yatela kulekesha aYinsahu jaYehova kulonda ekali akiñewa. Chachitiyiluwu, aYinsahu ejima akushika ku 10,000 muMoscow afwachikili chipapilu, chakuleja nsompeshi nawu wena kwawu hiyakeñeleña “kukiñewa” kwashimwineñayi iwu ihakuku. Chakuhayamisha hefuku dodimu mwahitili yaaka ikumi kufuma hefuku daOctober 30, 1991, hetejeli nfulumendi nawu nfulumendi yaSoviet yadiña nakuyandisha aYinsahu jaYehova hamuloña wansakililu yawu.

Ihaku wahosheli nindi hateleleli kushimuna wunsahu wamwekesheleña nawu aYinsahu akoñeleña yuma yatamaku. Wahosheli nindi iwu muloña hiwemeneni hayuma yelañawu aYinsahu jaYehovaku ilaña, washindameneni hanyikanda yawu nihayuma yakuhwelelawu. Wahosheli nindi wukutambika muntu wamuChaachi yaOrthodox yamuRussia kulonda yemenuku wunsahu muchota. Ichi chamwekesheli hatooka nawu Akulumpi amuChaachi yaOrthodox yamuRussia diwu akeñeleña nawu aYinsahu ayilekeshi. HaMay 22, 2003, ihaku wahanini nshimbi yakwila nindi izanvu dawankuluñaña dishakami cheñi nakusandujola hanyikanda yawaYinsahu jaYehova.

HaFebruary 17, 2004, chota chahumañeni cheñi kulonda atiyi yuma yawaninuwu munyikanda. Mukusandujola kwawu, ankuluñaña awanini nawu nyikanda yetu yadizishaña antu chakwikala namuzañalu muchisaka nikwikala namaluwi amawahi. Hiyawaninumu nsañu yamwekesheleña nawu twadizishaña antu netu aheleña akwawuku. Ankuluñaña amakwawu niwena etejeli. Nsompeshi weluka nsañu jakunyaka jansakililu wenhwili nindi: “Muloñadi aYinsahu jaYehova chayilañawu nakushimwina?” Nkuluñaña wahosheli nindi akwaKristu atela kushimwina. Wahosheli nindi Bayibolu yayilejaña nawu ayeña nakushimwina nawa Kristu walejeli atumbanji twindi kushimwina mumatuña ejima. Hela chakwila kwadiña wunsahu wejimiwu, haMarch 26, 2004, nsompeshi walekesheli nyidimu yawaYinsahu jaYehova muMoscow. HaJune 16, 2004, Chota chaMumusumba waMoscow chetejeli mwafuukwiluwu. Iku kufuukula kwawu kwatalishili mukwila nawu yipompelu yamuMoscow hiyadiña namutayi wamushimbi wakuyimenakuku. Ayilumbu afwilileña kuleta kukala hadi amana kwetu nikulekesha mudimu wawu wakushimwina.

Chumanyi cheliluwu amana kwetu? Amana kwetu mwituña daMoscow hiyetejeli ayilumbu jawu kuyilekeshaku. Atwalekeluhu kushimwina nsañu yayiwahi. (1 Pet 4:12, 16) Elukili chikupu nawu Yehova wukuyikwasha. Nawa adiloñesheli kuhakwilaku wuswa wawu wakudifukula kudi Yehova.

ATWALEKELUHU KUYIYANDISHA

HaAugust 25, 2004, amana kwetu atemesheli mukanda kudi Vladimir Putin, wadiña kajiña mpata mwituña daRussia haniyi  mpinji. Muniwu mukanda, amulejeli chatiyiluwu chelili yota yamuMoscow yilekeshi mudimu wawu. Mukanda wasonekeluwu wadiña nayipapilu 76 nawa antu akushika ku 315,000 diwu afwachikiluku. Hampinji yoyimu, Akulumpi amuChaachi yamuOrthodox muRussia ahosheli nawu: “Twahela chikupu nyidimu yawaYinsahu jaYehova.”

Antu amakwawu amuRussia akuhweleleli nyiloña yakutwamba yayitwikiluwu aYinsahu jaYehova nawa atachikili kuyikabisha. A Yinsahu jaYehova chayawu nakushimwina muMoscow ayeteleña kudi ayilumbu jawu. Iyala wumu wahilili chikupu nawa wakeñeleña nindi muhela afumi mwitala mwadiña nakushimwinayi. Wamuhañili nikumutukula munyima. Muhela wadimbukili nawa wadikatishili kumutu, wakeñekeleña kumutwala kuchipatela. Ilaña atupokola hiyamukwatili ona iyala wamweteluku. Atupokola akwatili aYinsahu amavulu, nakuyikabisha neyi ambanji, nawa ayikamikili mukaleya. Hamuloña wakuchina nawu akamba kayihaña hanyidimu, antu ahembeleña matala mwapompeleleñawu amana kwetu atachikili kukaana nawu aYinsahu hiyatela kuyisonkelaku. Yipompelu yayivulu hiyadiña nakwakupompelaku. Chakutalilahu, yipompelu 40 yapompeleleña muMatala aWanta awana adiña mwitala dimu. Chipompelu chimu chapompeleña kupompa kwawantu amavulu nampinji ya 7:30 nantentemena. Nkoñi wendaña wahosheli nindi akwakushimwina ahindukileña nabudidi nampinji ya 05:00 hakwila nawu adiloñeshi, hiyaneñeleñaku nawa atwalekeluhu nakupompa haniyi mpinji kubadika hachaaka chimu.

MULOÑA WAMUCHOTA ‘WAHANINI WUNSAHU’

A Yinsahu akeñeleña kumwekesha nawu kulekesha mudimu wawu wakushimwina  muMoscow hikwadiña kwamushimbuku. Dichi muDecember 2004, añanji etu ehwili wukwashu kuChota chamuEurope Chatalaña Hawuswa Wawantu. Chimwahitili yaaka yitanu nachimu, haJune 10, 2010, hanyima yakushinshika chikupu hanyiloña yejima yatutwikileñawu, Chota chahakwili nawu aYinsahu hiyakweti muloñaku! Chota chahakwili nawu nyiloña yejima yatutwikiluwu yadiña yakutwamba. Ahakwili cheñi nawu nfulumendi yamuRussia yateleleli kuleka kuyikañesha aYinsahu nikuzata nañovu kulonda aleki yuma yatama yayikoñeleñawu. Chahakwiluwu mwenimu, nfulumendi yaRussia yakeñeleña nawu iyi nsañu akayisompi cheñi. Dichi ehwili Añanji Akweti Yifulu Yahewulu amuChota, dikwila nawu, Chota chamuEurope chikweti Añanji Amaneni, kulonda ahakuli iyi nsañu. Ilaña haNovember 22, 2010, ansompeshi atanu amuChota chaEurope ahosheli nawu Añanji Amaneni hiyateleleli kutiyilila cheñi kuniyi nsañuku. Ichi chatalishili mukwila nawu nyiloña yahakwiluwu haJune 10, 2010, diyadiña yakukumishaku nawa atela kulondela mwahakwiluwu.—Talenu kachikasha kanakuhosha nawu “Mwahakwili Chota Chanyiloña,” hefu 8.

Chota chamuEurope chahakwila nawu Nshimbi Yatuñiluwu muEurope Yakukiña Wuswa waWantu yakiñaña nyidimu yawaYinsahu jaYehova. Iku kufuukula bayi neyi kunakundami kwituña daRussia hohuku. Ilaña kunakundami cheñi nikumatuña amakwawu 46 ekala muniwu Mutayi wamuChota chaEurope. Ansompeshi amavulu, akwakutuña nshimbi niantu amukaayi adizaña hawuswa wukwetuwu antu niwena anakukeña kwiluka mwafuukwiluwu. Muloñadi? Chelili ansompeshi amuChota chamuEurope afuukuluhu, azatishili yakutalilahu yitanu nayisatu yahakwili chota chamuEurope hasambililuwu kuyiñisha aYinsahu jaYehova. Azatishili cheñi kufuukula kutanu nakuwana kwahakwiluwu muyota yamaneni yamuArgentina, Canada, Japan, Russia, South Africa, Spain, United Kingdom, niUnited States kwayiñishiluwu aYinsahu jaYehova. Dichi aYinsahu jaYehova mukaayi kejima anateli kuzatisha mwafukwili Chota chamuEurope hakukiña kudifukula kwawu.

Yesu walejeli atumbanji twindi nindi: “Akayitwala nikumesu awanguvulu, nikumesu awanyanta, kukoola nsañu yamami, kulonda chakayilili wunsahu niwena niaJentili.” (Mat. 10:18) Dichi nyiloña yejima yadiña muRussia hadi yaaka 15 yinahituhu yinaleñeli antu amuMoscow niantu akumatuña amakwawu kumwiluka Yehova chikupu. Yuma yejima yamwekeni muniyi nyiloña ‘yinahani wunsahu’ nawa yinaleñeli ‘kutwala nsañu yayiwahi kumbidi.’ (Fwi. 1:12) Kwosi muloña hela muntu wunateli kutulekesha kushimwina nsañu yayiwahi yaWanta. Tunakulomba netu Yehova yatwalekuhu nakukwasha amana kwetu niahela akweti wulombu amuRussia, itwakeña nankashi.

[Chikasha/Mwevulu wudi hefu 6]

Chaleñeleli Muloña wakuRussia Awuhakwili kuFrance

Ituña daRussia dafwachikili kuNshimbi yamuChota chaEurope yatalaña Hawuswa waWantu HaFebruary 28, 1996. (HaMay 5, 1998, ituña daRussia detejeli iyi Nshimbi.) Kuhitila mukufwachika kunichi chitiyañenu, nfulumendi yaRussia yahosheli nawu antu jawu akweti

‘wuswa wakutonda nsakililu yinakeñuwu niwuswa wakuzatisha yuma yakuhwelelawu kumatalawu, kumesu awantu nawa atela kuhimpa nsakililu yawu neyi anakukeña.’—Chibalu 9.

‘wuswa wakushimuna nikusoneka munjila yayiwahi yuma yinakutoñojokawu nikushimuna nsañu kudi antu amakwawu.’—Chibalu 10.

‘wuswa wakupompa chakadi kuyiluwañesha.’—Chibalu 11.

Antu hela nyitayi akukabishawu hamuloña wakwila nawu anafumpi nshimbi yanichi chitiyañenu atela kusoneka yipapilu yejima yanyiloña nakutwala muloña wawu kuChota chamuEurope chatalaña Hawuswa waWantu muStrasbourg, muFrance (chota chinamwekeshuwu hewulu). Mwekala ansompeshi 47, iyi naambala yesekana nanaambala yamatuña afwachikili Kuchitiyañenu chamuEurope Chakukiña Wuswa Wawantu. Mwahakulaña ichi Chota kwosi watela kukaana kulondelamuku. Matuña afwachikili kunichi chitiyañenu atela kulondela mwahakulaña ichi chota.

[Chikasha chidi hefu 8]

Mwahakwili Chota Chanyiloña

Iyi diyi nsañu yafuukwiluwu ansompeshi amuChota chamuEurope.

A Yinsahu jaYehova ayitwikili muloña wakwila nawu asandaña yisaka. Ansompeshi ahakwili nawu iwu wunsahu wakutwamba. Ahosheli nawu:

“Kukala kwafumaña kudi antaña jawaYinsahu abula kwitiya akanaña nawa abulaña kukeña kulemesha wuswa wawaYinsahu wakulondela yuma yakuhwelelawu munsakililu yawu.”—Para. 111.

Chota hichawanini cheñi wunsahu wakwila nawu aYinsahu “aluwañeshaña yitoñojoka yawantuku.” Ahosheli nawu:

“Chota chahayamini hakumona nawu yota [muRussa] yakañenyi kutena ijina damuntu waluwankeni muyitoñojoka hamuloña wakutaña nyikanda yawaYinsahu.”—Para. 129.

Muloña wukwawu wayitwikiluwu wadiña wakwila nawu aYinsahu jaYehova atamishaña wumi wawanakwawu hamuloña wakukaana kuyisha mashi. Ansompeshi amuChota chamuEurope akaanini iwu wunsahu. Ahosheli nawu:

“Muntu wukweti wuswa wakwiteja hela kukaana njila yakumuukilamu, hela kutonda njila yikwawu yakumuukilamu, kwesekeja namwaya nshimbi yakulondela munakeñiyi nimunafuukiliyi. Chakutalilahu, muntu wakula dehi, nateli kufuukula kwiteja hela kukaana kumuladika hela kumuuka, hela kukaana kumusha mashi.”—Para. 136.