Komana Muneñili Dehi Mukunooka Kwanzambi?

“Mazu aNzambi amomi, akweti ñovu.”—HEB. 4:12.

1. Tunateli kwiñila ñahi mukunooka kwaNzambi makonu? Muloñadi kwovwahila chikunateli kutukalila?

 MUCHIBAABA chinafumuhu tunadizi netu tunateli kwiñila mukunooka kwaNzambi makonu neyi tumwovwahila Yehova nikuloñesha kwindi. Kwovwahila kwetu kwamwekeshaña nawu tunakukeña kufuukula kwaYehova kushikijewi. Ilaña mpinji yikwawu chatukalilaña kwovwahila. Chakutalilahu, neyi twiluka netu Yehova nakukeña nindi tuleki yuma yitwakeña, chinateli kutukalila kumwovwahila hohenohu. Neyi chumichi chitumwekena, twatela ‘kwovwahila.’ (Yak. 3:17) Muchinu chibaaba tukuhanjeka hayuma yinateli kumwekesha neyi chakwila tunadiloñeshi kumwovwahila chikupu Nzambi mpinji yejima.

2, 3. Chumanyi chitwatela kutwalekahu kwila kulonda tumuzañalesheña Yehova?

² Komana mwetejaña kufumba kwamuBayibolu? Toñojokenu hachumichi: Bayibolu yatulejaña nawu antu anakukeña kuletayi Yehova mukuloñesha kwindi ‘hiyuma yatiyaña nyuza yejima kuwaha.’ (Hag. 2:7) Ichi chinayi mukwila nawu Nzambi watondaña antu alemeshayi muloña akeña yuma yaloña. Hela chochu, mukukeña Nzambi niMwanindi  kwatusañumwini kuhimpa yililu yetu niyaaku kulonda tumuzañalesheña chikupu Nzambi. Nkumininaku, hanyima yakulomba nikuzata nañovu, twapapatisheweli nikwikala nawuselewa waYehova.—Tañenu Akolose 1:9, 10.

³ Hela chochu, tuchidi abula kuwanina. Twatela kutwalekahu nakuhimpa muchihandilu chetu nikuzata nañovu kulonda twileña yuma yaloña. Ilaña, Yehova watukana nindi wukutukwasha neyi tutwalekahu kuzata nañovu kulonda tumuzañalesheña.

Chitwatela Kwila Neyi Tunakukeña Kuhimpa Muchihandilu

4. Munjilanyi jisatu mutunateli kutambwila kufumba kwamuNsona?

⁴ Henonu kanda tuhimpi muchihandilu chetu, twatela kwiluka yuma yitwatela kuhimpa. Yehova watukwashaña munjila jamboka-mboka. Nateli kutukwasha kuhitila mumpanji yikuhanawu Hetala daWanta hela chibaaba chikusonekawu munyikanda yetu yikutukwasha twiluki netu yuma yitunakutoñojoka niyililu yetu yaheña. Mpinji yikwawu hitunateli kwiluka netu twatela kuhimpa nihanyima yakutiyilila kumpanji hela kutaña mumukandaku, dichi Yehova nateli kuzatisha mana kwetu hela muhela muchipompelu kulonda atukwashi munjila yayiwahi.—Tañenu Aŋalija 6:1.

5. Mpinji yikwawu neyi anakutufumba twelaña ñahi? Muloñadi aeluda akwaKristu chiyatela kutwalekahu nakutukwasha?

⁵ Chakala kwiteja kufumba kunakufuma kudi muntu wabula kuwanina, hela tuhu neyi atufumba munjila yayiwahi nawa yakukeña. Ilaña, kwesekeja nachahosha Aŋalija 6:1, Yehova waleja aeluda ‘kutufumba’ ‘naspiritu yakudizoza’ dikwila nawu kutuleja munjila yayiwahi. Neyi twiteja mukutufumbawu, tukwikala antu amawahi kumesu aYehova. Eñañi, mukulomba kwetu twamulejaña Yehova netu hitwawaninaku nawa twaluwañeshaña. Ilaña, neyi eluda yatuleja chuma chitwaluwañeshaña, kakavulu twakulaña munjila jashiyashana. Twesekaña kushimuna chaleñela hela netu hitwaluwañesha chikupuku. Mpinji yikwawu twahoshaña netu watufumba hatukeñaku nawa hahosheli munjila yayiwahuku. (2 Anya. 5:11) Neyi aeluda atuleja yuma yitwabula kukeña tunateli kuhila nankashi. Chakutalilahu, anateli kutuleja nawu ntaña yetu nakwila yuma yatama, hela nawu nvwalilu yetu yatama. Hadaha akutuleja nawu tuweleña hela nawu tuhimpi yisela yitwahemaña. Hamuloña wakuhila tunateli kutuboka. Tunateli kuneña nikuneñesha mana kwetu wunakutukwasha. Chikwila neyi ndulu yinamani dehi, kakavulu twetejaña netu mwatufumbayi mwalala.

6. Indi mazu aNzambi akweti ñahi ñovu ‘yakushinshika yitoñojoka niyafuukulaña muchima’?

⁶ Nsona hanashindameni mutu wachinu chibaaba yinakutuleja nawu mazu aNzambi “akweti ñovu.” Eñañi, izu daNzambi dikweti ñovu yakuhimpa chihandilu chawantu. Bayibolu yatukwashili nawa twahimpili henohu kanda tupapatishewi. Yinateli cheñi kutukwasha tuhimpi muchihandilu chetu nihanyima yakupapatishewa. Mumukanda wayisonekeleliyi Aheberu, Pawulu wasonekeli cheñi nindi mazu aNzambi “apwikaña nakwambula wumi naspiritu, manuñi namanji, asweja kushinshika yitoñojoka niyafuukulaña muchima.” (Heb. 4:12) Dikwila nawu, neyi twiluka yuma yakeñañayi Nzambi nindi twili, njila yitwatambwilañamu kufumba kwamuBayibolu yikumwekesha chitwekala mumuchima wetu. Komana mpinji yikwawu hekalaña chaambu chatumonañawu antu nichitwekala mukachi kamuchima wetu? (Tañenu Matewu 23:27, 28.) Toñojokenu chimwatela kwila muniyi nsañu yitukuhanjekahu.

Endelenuña Hamu Nakuloñesha kwaYehova

7, 8. (a) Muloñadi Aheberu akwaKristu chiyateleleluwu kutwaleka nakwovwahila nshimbi jikwawu jamwinkeluwu Mosi? (b) Muloñadi chitukuhoshela netu hiyadiña nakulondela mwafuukwiliyi Yehovaku?

⁷ Etu amavulu twiluka chikupu mazu ekala haYishimu 4:18 ahosha nawu: “Njila yawantu  aloña yidi neyi mwaana wahakucha, wayaña nakutooka nichikushika itañwa mwiwulu.” Dikwila nawu mukuhita kwampinji tunateli kwiluka chikupu yuma yakeñañayi Yehova kudetu nikwila yuma yamuzañaleshaña.

⁸ Neyi chitwadizili muchibaaba chinafumuhu, chelili Yesu nafwi dehi Aheberu akwaKristu akeñeleña kutwalekahu kulondela Nshimbi yamwinkeluwu Mosi. (Yil. 21:20) Hela chakwila Pawulu walumbulwili chikupu nindi akwaKristu hiyateleli cheñi kwovwahila Nshimbi yamwinkeluwu Mosiku, amakwawu akaanini mwahosheliyi. (Kol. 2:13-15) Hadaha atoñojokeleña nawu neyi atwalekeluhu nakulondela Nshimbi jikwawu jamwinkeluwu Mosi, adi kuleka kuyikabisha. Pawulu wayilumbulwilili chikupu Aheberu akwaKristu nindi neyi atwalekahu nakudikaña namwaya kufuukula kwaNzambi hiyakeñila mukunooka kwaNzambuku. * (Heb. 4:1, 2, 6; tañenu Aheberu 4:11.) Hakwila atambwili wuselewa waYehova, ateleleli kwiluka nawu wakeñeleña nindi antu jindi adifukuleña munjila yambukaku.

9. Twatela kutiya ñahi neyi nduñu wamaana nikashinshi ahimpa nsañu yitweluka yamuBayibolu?

⁹ Makonu nduñu wamaana nikashinshi watukwashaña kwiluka ntañishilu yamuBayibolu munjila yambukaku nayitweluka. Ichi bayi chituneñeshaku; ilaña chatela kutuleñela tusweji chikupu kukuhwelela izanvu danduñu wamaana nikashinshi. Antu amwizanvu demenañaku iwu ‘nduñu’ neyi eluka nawu atela kulumbulula hela kwolola yikuma yikwawu yansañu yalala yitwabula kutiyisha, alumbululaña chikupu. Eluka nawu amakwawu anateli kuhosha mazu atama hadi izanvu danduñu wamaana nikashinshi hamuloña wakuhimpa, wena hiyakamañaku. Chuma chalema chakeñañawu hikulondela mwafuukulañayi Nzambi. Mwatiyaña ñahi neyi chakwila ahimpa nsañu yitweluka yamuBayibolu?—Tañenu Luka 5:39.

10, 11. Chumanyi cheliluwu atudizi aBayibolu chayilejeluwu kuzatisha njila jajiha jakushimwinamu? Tukudizilaku chumanyi kunichi chakutalilahu?

¹⁰ Tushinshikenu hachakutalilahu chikwawu. Hayaaka nkulakaji yinahituhu, Atudizi aBayibolu ahanineña mpanji chachiwahi atoñojokeleña nawu kuhana mpanji yadiña njila yayiwahi yakushimwinamu kudantu. Atiyileña kuwaha kuhosha kumesu awantu amavulu. Amakwawu atiyileña kuwaha neyi antu hiyakuyihameka hampanji yahanawu. Ilaña chimwahitili mpinji, antu jaYehova elukili chikupu nawu wakeñeleña nindi adikiteña chikupu kubadika kuhanaña hohu jimpanji. Yehova wakeñeleña nindi ashimwineña kwitala nikwitala nimunjila jikwawu. Antu amakwawu ahanineña chiwahi jimpanji hiyakeñeleña kushimwina kwitala nikwitalaku. Mpanji jahanineñawu jaleñeleli antu amakwawu kutoñojoka nawu adiña amukeña Yehova nawa amwovwahilileña, ilaña yililu yawu yamwekesheli nawu hiyamwovwahilileñaku. Tuneluki netu Yehova hatiyili kuwaha nayililu yamwekesheleñawuku. Dichi afumini mukuloñesha kwindi.—Mat. 10:1-6; Yil. 5:42; 20:20.

¹¹ Atudizi aBayibolu amakwawu chadiña nakuyikalila kushimwina kwitala nikwitala, sweje-e hakutachika. Ilaña ovwahilili nikwikala ashinshika kukuloñesha kwaYehova. Chimwahitili mpinji, chayipeleleli kushimwina kwitala nikwitala. Yehova wayikiswilili nankashi. Chumanyi chimwelaña neyi nduñu wamaana nikashinshi yayileja kuzatisha njila yakushimwinamu yimwabulahu dehi kuzatisha? Komana mwovwahilaña hela chakwila oyu njila yakushimwina yinayikalili?

Neyi Ntaña Yetu Yaleka Kudifukula Kudi Yehova

12, 13. (a) Muloñadi Yehova chatulejelañayi nindi muntu wabula kubalumuka mumuchima amuhañi muchipompelu? (b) Chumanyi chinateli kuyikalila chikupu anvwali akwaKristu?

¹² Tuneluki chikupu netu hakwila nawu tumuzañaleshi Yehova twatela kwikala awunyonji  muyuma yejima. (Tañenu Titusa 2:14.) Kudi yuma yatela kuleñela tukañanyi kwovwahila ilu lushimbi. Chakutalilahu, toñojokenu haniyi nsañu: AkwaKristu ashinshika adi namwana wumu hohu weyala, nawa yafuukulahu kufuma muchalala. Natonduhu “kuluña mpinji yantesha nachiseki chanshidi” kubadika kwikala nawubwambu wawuwahi naYehova ninawanvwali jindi. Hanateli kwikala muchipompeluku. Dichi amuhaña nimuchipompelu.—Heb. 11:25.

¹³ Chayineñeshaña chikupu anvwali. Eluka chahosha Bayibolu nawu “neyi muntu anatenuwu nawu himana kwenu wukwikala chivumbi, hela mukwalwisu, hela mukwakupesha, hela mukwakutukana, hela mukwakusheta walwa, hela mukwanyilami, nami muntu wudi ochu, bayi mudibomba ninduku, hela kudya nindi chinjila.” (1 Kor. 5:11, 13) Eluka nawu izu dakwila nawu “muntu” dabombelamu antu amuchisaka abulaña kushakama itala dimu. Ilaña hamuloña wakusweja kumukeña mwanawu anateli kutoñojoka nawu: “Twatela kuhanjekaña namwanetu chikupu. Neyi tukubulaña kuhanjeka nindi hanateli kufunta kudi Yehovaku.” *

14, 15. Chumanyi chatela kwanukañawu anvwali neyi anakukeña kuhosha namwanawu wahañewa?

¹⁴ Twaneñaña hakumona chakabakanañawu awa anvwali. Muloña mwanawu wateleleli kuleka yuma yakoñeleñayi, ilaña wakeñeli kutwalekahu kwila yuma yatama kubadika kushakama hamu nawanvwali jindi ninawantu amuchipompelu. Anvwali akeñaña kukwasha mwanawu ilaña hiyanateli kumulekesha munafuukiliyiku. Dimuloña waneñelañawu chikupu.

¹⁵ Hanu dinu chumanyi chatela kwila anvwali? Komana akwovwahila nshimbi yaYehova? Ntahindi akutachika kutoñojoka nawu anateli kuhanjekaña mpinji yejima namwana ahañawu nikuhosha nawu “ahanjekaña nindi hohu nsañu jamuchisaka”? Hakufuukula hansañu yamuchidiwu, atela kwiluka chuma chakeñañayi Yehova nindi akoñi. Nzambi wakeñaña nindi kuloñesha kwindi kwikala kwakadi majilu, nikukwasha muntu wunavulumuni yafunti muchipompelu. Anvwali akwaKristu anateli kumwekesha ñahi nawu anakukeña chuma chakeñañayi Yehova?

16, 17. Chumanyi chitwadizilaña kuchakutalilahu chaAroni?

¹⁶ Aroni mana kwaMosi wamweni kukala hamuloña wayuma yakoñeluwu anyanindi ayedi awamayala. Anyanindi aNadabi naAbihu ahanini mulambu munjila yaheña nawa Yehova wakaanini. Yehova watemesheli kesi kufuma mwiwulu nawa afwili. Eñañi, hiyateleleli cheñi kudikunda nawanvwali jawuku. Ilaña kudi cheñi yuma yikwawu. Yehova wamulejeli Aroni nianyanindi awamayala ashinshika nindi: “Enu kuvuula kunyitu hela kutabula yuma yenu yakuvwala [hachipenji] chinjila, kuchina kufwa, kuchina niantu ejima kumona kuzuwa [kwaYehova].” (Lev. 10:1-6) Awa mazu anatiyakani chikupu. Twatela kumukeña Yehova  nankashi kubadika chitwakeña antu amuchisaka abula kashinshi.

¹⁷ Makonu, Yehova hashikenaña dakujilumuna antu afumpaña nshimbi jinduku. Wayimwekesheleña kukeña nawa wayinkaña mpinji yakuleka yuma yatama yakoñañawu. Yehova nateli kutiya ñahi, neyi anvwali atwalekahu kufumpa nshimbi jindi kuhitila mukuhanjekaña munjila yabula kutelela namwanawu weyala hela wamumbanda wahañawu muchipompelu wabulaña kubalumuka mumuchima?

18, 19. Nkiswinyi yatela kutambwila antu amuchisaka neyi atwalekahu kwikala ashinshika kudi Yehova?

¹⁸ Antu amavulu ahoshaña nawu afuntili muchipompelu muloña amabwambu jawu niantaña atwalekeluhu kwikala ashinshika kudi Yehova nawa hiyahanjekeleña nawuku. Chakutalilahu, kansi wamumbanda walejeli aeluda nindi chaleñeleli yahimpi chihandilu chindi muloña wachuma cheliliyi mana kwindi. Mana kwindi wadiña washinshika kudi Yehova nawa walondeleleña nshimbi jindi hampinji yamuhañiluwu. Chamuleñeleli kukeña kufunta kuchipompelu.

¹⁹ Dichi, chumanyi chitwatela kwila? Twatela kumwovwahila Yehova muyuma yejima muchihandilu chetu. Hamuloña wakubula kuwanina mpinji yikwawu chatela kutukalila. Ilaña twatela kwiluka netu yuma yejima yatulejañayi Yehova yatukwashaña.

“Mazu aNzambi Amomi”

20. Munjilanyi jiyedi mutwatela kulumbulwila nsona yaAheberu 4:12?

²⁰ Pawulu chasonekeliyi nindi “mazu aNzambi amomi,” hadiña nakuhosha haBayiboluku. * (Heb. 4:12) Mavasi amakwawu amunaka kapetulu amwekeshaña nawu wahosheleña hayikaninu yaNzambi. Pawulu watalishili mukwila nindi yikaninu yaNzambi mpinji yejima yashikijewaña. Yehova wahosheli hezu dindi nindi: “Izu dami . . . hidakafunta kudami makasakasaku, . . . dakakoña chachiwahi mudimu wadu wunaditemesheleli.” (Isa. 55:11) Dichi, twatela kuwunda neyi Nzambi kanda yashikiji yikaninu yindi hampinji yitunakukeña. Twatela kukuhwelela netu Yehova nakuzata kulonda yashikiji mwakanayi.—Yow. 5:17.

21. Indi mukanda waAheberu 4:12 wunateli kukolesha ñahi atushinakaji atwalekuhu kumukalakela Yehova?

²¹ Antu amavulu ‘amwizaza deneni’ anamukalakeli Yehova hadi yaaka yayivulu. (Chim. 7:9) Amavulu hiyakuhweleleli nawu akashinakajila mukanu kaayi katamaku. Ilaña achidi kudikita mumudimu waYehova. (Mas. 92:14) Eluka nawu “mazu aNzambi amomi” nawa Yehova wukashikija yikaninu yindi. (Heb. 4:12) Eluka nawu Nzambi nakuzatila hakushikija kufuukula kwindi hakuleña iseki niantu. Muyinu mpinji yefuku damuchitanu nachiyedi, Yehova nakunooka, nawa weluka chikupu nindi kufuukula kwindi kukashikijewa nawa izanvu dawantu jindi anakuzatila hamu namwaya kufuukula kwindi. Indi enu? Komana mweñila dehi mukunooka kwaNzambi?

[Tumazu twaheshina]

Munakwanuka

• Twatela kwila ñahi kulonda twiñili mukunooka kwaNzambi makonu?

• Neyi tudiza muBayibolu nawa twiluka yuma yakeñañayi Nzambi nindi twili, twamwekeshaña ñahi netu tunakukeña kumuzañalesha Nzambi?

• Yumanyi yinateli kuleñela chitukalili kwovwahila yuma yatulejañayi Yehova? Muloñadi chitwatela kumwovwahila?

• Munjilanyi jiyedi mutwatela kwilukila mwatalisha Aheberu 4:12?

[Malwihu aKuzatisha haKudiza]

[Mwevulu wudi hefu 31]

Anvwali aneñaña chikupu!