Kutachika Kusoneka Kaposhi Kakutalila Mwidimi Dapela Dawundeli

TUDI amuzañalu hakubidika Kaposhi Kakutalila katachi mwidimi Dawundeli dapela. Iyi magazini yayiha akweseka kuyizatisha hadi chaaka chimu, neyi yikukwasha antu, akatwalekahu nakuyipulinta. Akuyitemeshaña kuyipompelu hampinji yoyimu namagazini atemeshañawu mpinji yejima.

Chalema nankashi muntu wejima kutiyisha nsañu yitwadizaña muKaposhi Kakutalila kakudizamu mulungu nimulungu. Muloña Kaposhi Kakutalila Kakudizamu diyi njila yayeni ‘nduñu wamaana nikashinshi’ yinakudizishilamu antu jaNzambi makonu. (Mat. 24:45) Hanu dinu muloñadi chitunakukeñela Kaposhi Kakutalila mwidimi dawundeli dapela?

Amana kwetu niahela amavulu mukaayi kejima azatishaña idimi Dawundeli hakupompa ilaña mpinji yejima hiyatiyishaña idimi Dawundeli dazatishañawu muKaposhi Kakutalilaku. Kudi yuma yayivulu yaleñelaña. Chakutalilahu, idimi Dawundeli adihoshaña mumatuña amavulu muAfrica, Asia, niSouth Pacific. Amana kwetu ashakamaña munawa matuña azatishaña idimi Dawundeli hakupompa nimumudimu wakushimwina, ilaña ahoshaña nimadimi amakwawu kumatalawu. Cheñi nawa, idimi Dawundeli dahoshañawu munawa matuña dinateli kwambukaku nedimi Dawundeli dazatishañawu muKaposhi Kakutalila. Amana kwetu niahela amakwawu hiyatunduka mumatuña mwazatishañawu hohu idimi Dawundeli hakupompa. Nawa chayikalilaña kutiyisha nsañu yidi muKaposhi Kakutalila muloña idimi Dawundeli hidimi dawuku. Atwansi amakwawu avulaña hohu kuhosha idimi Dawundeli niwena chayikalilaña kutiyisha nsañu yidi muKaposhi Kakutalila. Magazini yaWundeli yidi mwidimi dapela yikuleñela chiyipeleli amana kwetu niahela mukaayi kejima kuhetelamu muKudiza kwaKaposhi Kakutalila.

Hela chakwila muniyi magazini anazatishi idimi dapela Dawundeli kubadika magazini asonekañawu mpinji yejima, magazini ejima ayedi akushimunaña nsañu yoyimu yalala yamuBayibolu. Yikwikalaña nanaambala yamaparakalafu wowamu, malwihu, nyevulu, niamalwihu akuhitulukamu. Dichi muntu nimuntu wukufuukulahu yomweni magazini yinakukeña kudizayi nikuzatisha haKudiza Kaposhi Kakutalila.

Tuneluki chikupu netu magazini yamwidimi dapela Dawundeli yikukwasha amana kwetu niahela amavulu, kushilahu niatwansi, kuloñesha Kaposhi Kakutalila Kakudizamu mulungu nimulungu. Yehova wakeña ‘ana kwetu ejima,’ nawa twamusakililaña netu nakuzatisha ‘nduñu wamaana nikashinshi’ wunakutuloñeshela yuma yejima yitwakeñaña hampinji yatelela.—1 Pet. 2:17.

Izaza Dalombolaña dawaYinsahu jaYehova