Chimwatela Kulombolaña Kudifukula kwaChisaka niKudiza Nkawenu

HAKUTACHIKA kwachaaka cha 2009, yipompelu yawaYinsahu jaYehova mukaayi kejima ahimpili ndandanda yawu yakupompa. Kupompa kuyedi kwamukachi kamulungu akubombeli hamu, nawa atukolesheli kuzatisha mpinji yamelela kulonda twikaleña nakudifukula kwachisaka hela kudiza nkawetu. Komana munakuzatisha iyi mpinji chachiwahi? Komana munakuhetelamu chikupu?

Nsañwinyi yitwatela kudiza hakudifukula kwachisaka? Izaza Dalombolaña hidalejaña yisaka nsañu yatela kudizañawu mulungu nimulunguku. Chineli nshakaminu yashiyashana, mutu wachisaka chejima hela muntu wejima watela kufuukulahu mwatela kuzatishilayi chachiwahi iku kudifuukula kwachisaka kwamulungu nimulungu.

Amakwawu niwena azatishaña iyi mpinji hakuloñesha nsañu yakudiza hakupompa kwachipompelu, ilaña kudifukula kwachisaka hikwatela kushindamena hohu hakuloñesha kupompaku. Amakwawu atañaña, kuhanjeka hansañu, nikuhema chimwenu chinakumwekesha nsañu yamuNsona, kulonda anyana ahetelumu. Hichinakukeñeka mpinji yejima kuzatishaña malwihu niñakwilu, neyi chitwelaña hakupompaku. Mpinji yakudifukula kwachisaka yatela kwikala mpinji yakuhanjeka nikushimuna yuma yidi munyichima yetu. Diyi mpinji yitwatela kutoñojoka chachiwahi nikuhanjeka hayuma yayiwahi yitwatañaña muBayibolu. Neyi twila mwenimu, antu ejima akudiluñishaña haniyi mpinji yitwashakamaña hamu.

Tata yawantu wumu wukweti anyana asatu wasonekeli nindi: “Kakavulu kudifukula kwachisaka kwashindamenaña hohu hakutaña Bayibolu. Wejima wetu twatañilaña chadimu tupetulu, kuhiñahu anyana atondaña nsañu yinakukeña kusandujolawu, nkumininaku akushimuna yuma yawanawu. Michael [wudi nayaaka yitanu nayiyedi] kakavulu waleñaña mwevulu hela kusoneka nsañu yinatañiyi. David niKaitlyn [adi nayaaka 13 ni 15] asonekaña nsañu yamuBayibolu neyi kwiji amweneña yuma yamwekeneña. Chakutalilahu, hampinji yitwatañileña hadi Yosefu chalumbulwileñayi yilota yamukwakutuña mankendi nimukwakutwala lupasa, Kaitlyn wasonekeli nsañu neyi kwiji niyena wadiña mukaleya nawa wamweneña yuma yamwekeneña.”—Kutach., kape. 40.

Hela chochu, nshakaminu yambuka. Muntu wejima hela chisaka chinateli kutondahu yuma yatela kudizawu. Chikasha chinalondeluhu chinakumwekesha njila jajivulu jimwatela kuzatisha hakudifukula kwachisaka hela hakudiza nkawenu. Hadaha, munateli kutoñojoka hanjila jikwawu.

[Chikasha/Mwevulu wudi hefu 6, 7]

 Nsañu yatela kudiza yisaka yikweti anyana anyanya:

• Tañenu nikuhanjeka nsañu yidi mumukanda waIfipusho Abacaice Bepusha ne Fyasuko Ifingabafwa.

• Hitulukenu munsañu yinakuhosha nawu “What if . . . ?” (Talenu The Watchtower May 15, 1996, ifu 14, maparakalafu 17-18.)

• Hoshenu hayikonkwanyi yimwatela kashikija kumpinji yakumbidi hela katataka.

• Mumpinji mumpinji, talenu nikuhanjeka havidiyo yamuBayibolu.

• Hanjekenu hachibaaba chamuKaposhi Kakutalila chinakuhosha nawu “For Young People.”

Nsañu yatela kudizawu antu adisumbula abula anyana:

• Hanjekenu hatupetulu 1, 3, 11-16 twamukanda waChakwikala naMuzañalu muChisaka.

• Hanjekenu hayikuma yimwawana hakutaña Bayibolu.

• Loñeshenu nsañu yimwakahanjekahu haKudiza Bayibolu haChipompelu hela Hakudiza kwaKaposhi Kakutalila.

• Hanjekenu hachimwatela kusweja kudikita mumudimu wenu wakushimwina hamu neyi adisumbula.

Nsañu yatela kudizawu amana kwetu ajiki niahela hela ekala munsakililu yashiyashana:

• Dizenu nyikanda yayiha yimwatambwili hakupompa kwankambi.

• Tañenu maYearbook amaha nianyaka.

• Keñakeñenu nsañu yinakuhosha hamalwihu avula kwihulawu mwiluña denu mumwashimwinaña.

• Loñeshenu nsañu yimukuzatisha mumudimu wakushimwina.

Nsañu yatela kudiza yisaka yikweti anyana anyanya:

• Hemenu chimwenu chinakumwekesha nsañu yimunatañi muBayibolu.

• Hemenu yisela, yidi hefu 30 ni 31 muAwake!

• Koñenu chuma chikuleñela atwansi kutoñojoka. (Chakutalilahu, talenu mutu wunakwila nawu “Kudizila Bayibolu Mwiluña Mwahembelañawu—Atunyama!” muAwake! yaMarch 8, 1996, mafu 16-19.)

• Tañilenu hamu yibaaba yinakuhosha nawu “Dizishenu Anyanenu” muKaposhi Kakutalila.