Kubulakana Kwalema Nankashi Kutwakanukaña

“CHIKUMANA kunu kubulakana, mukuhosha nenu, ‘Mwalala iku kubulakana kwahachaaka kwalema nankashi tukakwanukaña!’” Mana kwetu Stephen Lett waMwizaza Dalombolaña dawaYinsahu jaYehova chahosheliyi awa mazu, wakolesheli izaza dawantu apompeli asweji kutiyilila. Awa antu enjili kukubulakana kwahachaaka kwamunaambala 126 kwaWatch Tower Bible and Tract Society of Pennsylvania, kwadiñaku haOctober 2, 2010, Hetala Deneni Dakupompela dawaYinsahu jaYehova muMusumba waJersey, New Jersey, U.S.A. Yumanyi yashimwinuwu haniku kubulakana kwalema kutwakanukaña?

Mpanji yakutachikilahu yahaniniyi mana kwetu Lett neyena yahosheleña hekalu daYehova damwiwulu kwesekeja nachadilumbululawu mumukanda wamuBayibolu waEzekeli. Iwu motoka weneni walema, wemenañaku kuloñesha kwaNzambi, kwalombolañayi Yehova. Mana kwetu Lett wahosheli nindi, kuloñesha kwamwiwulu, mwekala yileñaleña yakuspiritu, kwendaña mukunyakala chikupu neyi chakenaña nzaji. Dikwila nawu, kwendaña mukunyakala kwesekeja nakufuukula kwaYehova. Kuloñesha kwaYehova Nzambi kwaheseki nikwena kunakuyilaku hambidi. Mana kwetu Lett wahosheli hayuma yayiwahi yinakuzatika mukuloñesha kwaNzambi kutwamonaña namesu muyaaka yamakonu.

Chakutalilahu, nyitayi yayivulu anakuyibomba hamu nikuyikolesha, kulonda antu amavulu adiña nakuzatila hanyikala yaBeteli munawa matuña aswejeña kusha maana hamudimu wakushimwina. Mana kwetu Lett wakonkomweneni izaza kutwalekahu nakulombelaku Izaza Dalombolaña, dinakwimenaku izanvu danduñu, kulonda atwalekuhu kwikala ashinshika nikwikala namaana.—Mat. 24:45-47.

Yileji Yayiwahi niKwihujola Kwakukolesha

Tab Honsberger, wekala Mukomiti yaMutayi mwituña daHaiti, washimwini chileji chawushona hayuma yamwekeni hanyima yamutentashi wahitili haJanuary 12, 2010, wajilumwini antu akushika ku 300,000 munidi ituña. Washimwini nindi akulumpi jansakililu alejaña antu nawu antu afwili ayibabesheli kudi Nzambi hamuloña wakubula chikuhwelelu ilaña wakiñili antu amawahi. Ilaña, ambanji amavulu akasiluwu mukaleya aditemokeleli chahumokeli mpwembu jakaleya namutentashi. Antu amavulu amuHaiti akweti nyichima yayiwahi anakukundejewa kuhitila mukudiza chalala chahoshaña hamafuku akala itunakushakamamu. Mana kwetu Honsberger washimwini mazu ahosheli mana kwetu washinshika wakuHaiti wajimbesheli ñodindi muwubanji wamwekeni nindi: “Nendaña kwanampweji kushika nikulelu. Neluki wanyi mpinji yinakaleka kudila, ilaña nazañalalaña hakumona kukeña kwamwekeshaña kuloñesha kwaYehova. Nikweti kuchiñeja, nawa inakufwila kukwasha antu amakwawu niwena ekali nakuchiñeja.”

 Mark Sanderson, chayinu mpinji wekala muchisaka chaBeteli kuBrooklyn, washimwini chileji chakwituña daPhilippines. Iwu mana kwetu wadiña muKomiti yaMutayi munidi ituña, wazañaleli hakushimuna kuvulilaku kwawakwakushimwina aWanta mukusinsashana namapesenti 32 ninaambala yawantu anakudiza Bayibolu chiyabadikili akwakushimwina. Washimwini nsañu yamana kwetu wejina daMiguel wukweti mwizukulwindi ajahiluwu. Miguel wazatili nañovu chikupu hakwila mbanji amusompeshi nakumusha mukaleya. Chimwahitili mpinji, hampinji yadiñayi nakushimwina mukaleya, Miguel wadibulakeni nanona mbanji. Hela chakwila watiyili woma, Miguel wahosheli nindi mukuwunda nawa naluwi. Nkumininaku watachikili kudiza naniwu iyala, wetejeli chalala nawa wamukeñeli Yehova. Chayinu mpinji wapapatishewa dehi. Miguel wamukeña nankashi nawa nakufwila kumufumisha swayi iwu mana kwindi wamuha mukaleya. *

Kuhiñahu hahiñili progiramu yakwihujola hachihandilu chawamana kwetu kwalombweluwu kudi Mark Noumair, ntañishi wamuDipatimenti yaShikola yaTeokalatiki. Wehujoleli amayala asatu niañodi jawu, Alex niSarah Reinmueller, David niKrista Schafer, Robert niKetra Ciranko. Alex Reinmueller, mukwakukwasha Komiti yawakwaKusoneka, washimwini chadiziliyi chikupu chalala hampinji yazatileñayi wupayiniya muCanada hadiñayi nayaaka 15, kakavulu wazatileña nkawindi. Chamwihwiluwu antu amukwashili haBeteli, Mana kwetu Reinmueller wateneni amana kwetu asatu ashinshika, walumbulwili wejima wawu chiyamukwashiluwu hakwila nawu yakuliluku kuspiritu. Ñodindi Sarah, washimwini hawubwambu wakwatiliyi namuhela womikili hadi yaaka yayivulu mukaleya kakuChina kukola chikuhwelelu chindi. Sara wahosheli nindi washindameneni hadi Yehova kuhitila mukulomba.

David Schafer, wazatilaña hamu naKomiti Yatañishaña, wahamekeli amama yindi hakwikala nachikuhwelelu chakola nawa wahosheli hadi amana kwetu azatileña mudimu wakutema nyitondu nawa amukwashili kuzata mudimu wawupayiniya wakukwasha hadiñayi kansi. Ñodindi Krista, wahamekeli chikupu chamukwashiluwu kudi akulumpi amuchisaka chaBeteli alondeleli kufumba kwaYesu nawa adiña ‘ashinshika nimutuyuma twanyanya.’—Luka 16:10.

Robert Ciranko wazatilaña hamu naKomiti Yasonekaña Nyikanda, wanukili ankaka jindi awana, afumini kwituña daHungary nawa adiña akwaKristu awayishewa. Hadiñayi kansi wazañaleleña hampinji yayileñayi kukupompa kweneni muyaaka yamuma 1950 nawa welukili nindi kuloñesha kwaYehova kwadiña kweneni kubadika chipompelu mwadiñayi. Ñodindi, Ketra,  washimwini chadiziliyi kwikala washinshika hampinji yazatileñayi wupayiniya muchipompelu mwenzeli akwakasekesha niyikonkojola. Womikili nawa chimwahitili mpinji amutemesheli kuya nakuzata mudimu wawupayiniya wadimena muchipompelu mwadiña kunuñañana kwamuzañalesheli nankashi.

Kuhiñahu, Manfred Tonak washimwini chileji chamwituña daEthiopia. Idi ituña dafuma tuhu kushankulu nawa makonu anadikiswili, mudi akwakushimwina nsañu yayiwahi akubadika ha 9,000. Amavulu ashakamaña kwakwihi hela mumusumba weneni waAddis Ababa. Komana maluña ekala kwakulehi anakukeñeka chikupu akwakushimwina aWanta. Hakwila nawu ashimwini munawa maluña ekala kwakulehi, aYinsahu amuEthiopia ekala kumatuña acheñi ayitambikili kwinza nakuhempula kulonda akashimwini kumaluña ekala kwakulehi. Antu amavulu enjili, akolesheli aYinsahu amunidi ituña nawa awanini antu adiña nakutiyilila.

Haniyi progiramu hadiña mpanji yakulondashana yahosheleña hadi aYinsahu jaYehova amuRussia ninyiloña yayitwikiluwu. Aulis Bergdahl membala waKomiti yaMutayi muRussia washimwini chatachikiluwu kuyikabishawu aYinsahu muRussia, sweje-e muMoscow. Philip Brumley wekala muDipatimenti yaWunsompeshi hamutayi wakuUnited States washimwini yuma yayiwahi yinamwekani mutukweji twakatataka chelili Chota chakuEurope chatalaña Hawuswa Wawantu (ECHR) atiyi nyiloña yitanu nayiwana yayitwikiluwu aYinsahu. Chota chashikeneni dakwiteja nawu nyiloña yejima yitanu nayiwana yadiña yakutwamba, nawa munyiloña yayivulu chota chazatili nañovu kulonda alumbululi chikupu nawu wunsahu wawu wadiña wakutwamba. Hela chakwila kanda twiluki yuma yakafumamu, Mana kwetu Brumley wahosheli nindi tunakuhweleli netu munahakuli ichi Chota mukuleñela nyiloña yidi mumatuña amakwawu ayisompi chachiwahi.

Hanyima yakutiya iwu mujimbu wawuwahi, Mana kwetu Lett wabidikili nindi chota cha ECHR chamweni nawu chachiwahi kumanisha muloña wamusonku watachikiluwu dehi kusompa nfulumendi yetuña daFrance nawaYinsahu jaYehova. Ichi Chota chalemeshawu chikupu chetejeli nawu achitwalilaña hohu nyiloña yantesha. Chayinu mpinji Chota cha ECHR chatala dehi hanyiloña yayitwikawu aYinsahu jaYehova yakushika ku 39, nawa chatuyiñisha munyiloña 37. Mana kwetu Lett wakolesheli antu jaNzambi kushiya nyiloña yejima yichidi kusompawu mumakasa aYehova Nzambi mukulomba.

Chileji chakukumishaku achihanini kudi Richard Morlan, ntañishi wamwiha waShikola yawaEluda muChipompelu. Wahosheli neyena haniyi shikola nichinakuhamekawu aeluda anahiti dehi muniyi shikola.

 Mpanji Jikwawu Jahaninuwu Antu Amwizanvu Dalombolaña

Mana kwetu Guy Pierce waMwizaza Dalombolaña waheneni mpanji yayiwahi yahosheleña hansona yachaaka cha 2011 yinakuhosha nawu, ‘Batamenu mwijina daYehova.’ (Zef. 3:12) Wahosheli nindi hela chakwila yinu himpinji yatela kuzañalalawu chikupu antu jaYehova, himpinji yatelawu cheñi kutoñojoka chikupu. Ifuku daYehova deneni didi kwakwihi; ilaña, antu achidi kubatama munsakililu yakutwamba, munyitayi yajipolitiki, mumaheta, muyuma yinakuyileñela atoñojokeña hohu hayuma yayiwahi, niyuma yadifwanaku. Hakwila nawu tuwani chiswamu chalala, twatela kutambika hejina daYehova, kumwiluka, kumulemesha chikupu, nikukuhwelela Muntu wukweti ijina denidi, nikumukeña nayuma yetu yejima yitukweti.

Kuhiñahu mana ketu David Splane waMwizaza Dalombolaña wahanini mpanji yayiwahi nawa yakusañumuna yadiña namutu wakwila nawu “Komana Muneñili Dehi Mukunooka kwaNzambi?” Wahosheli nindi kunooka kwaNzambi hikwatalisha mukwikala ankopiku, muloña Yehova niMwanindi ‘achidi kukalakala nihanu’ nimwiifuku dachifwikija dakunooka kulonda kushikija chachiwahi mwafuukulayi Nzambi hayuma yaleñayi hamaseki. (Yow. 5:17) Hanu dinu, tunateli kwiñila ñahi mukunooka kwaNzambi? Kufuma kunshidi nikunyidimu yakudiyiñisha diyi ñakwilu yanilu lwihu. Twatela kukuhwelela nikutoñojoka hakufuukula kwaNzambi, nikukoña yuma yitukutwesha yinateli kukwasha iku kufuukula kwindi. Mpinji yikwawu, chinateli kutukalila chikupu, ilaña twatela kwiteja kufumba nikulondela munakutuleja kuloñesha kwaYehova. Mana kwetu Splane wakonkomweneni izaza kuzata nañovu kulonda eñili mukunooka kwaNzambi.

Mpanji yakukumishaku, ayihanini kudi mana kwetu Anthony Morris waMwizaza Dalombolaña, yadiña namutu wakwila nawu “Yumanyi Yitunakuchiñeja?” Nayililu yakusoñamisha nikukeña, Mana kwetu Morris wanukishili izaza hayuma yashimunawu muwuprofwetu yikamwekana kumbidi, yuma yatalilañawu chikupu antu ejima ashinshika. Hayumiyi hadi nikubidika kwakwila nawu “Kwamwena, kwanzo-o;” nikujilumuka kwansakililu yakutwamba. (1 Tesa. 5:2, 3; Chim. 17:15-17) Mana kwetu Morris wasoñamishili nindi chitwamona yuma yinakumwekana munsañu yahampepela yinakubula kushikija wuprofwetu bayi tuhoshaña netu, “Amagedoni yinashikiku.” Wahosheli nindi twatela tumwekesheña yililu yashimunawu haMika 7:7 yamuzañalu, kuwunda, nikuchiñilila. Hampinji yoyimu, wakolesheli antu ejima kukundama kwakwihi Nezaza Dalombolaña, kudinuña hamu neyi chelaña amashidika anakuya kunjita. Wahosheli nindi: “Dikwatishenu munyichima yenu, enu ejima mwamuchiñejaña Yehova.”—Mas. 31:24.

Hakukunkulula, abidikili nsañu yalema yakuzañalesha yitwamba kanukaña. Mana kwetu Geoffrey Jackson waMwizaza Dalombolaña wabidikili nindi anakufuukula kweseka kusoneka Kaposhi Kakutalila kakudizamu mwidimi dawundeli dapela kulonda antu abula kwilukisha kutaña idimi daWundeli aheteleñamu. Kuhiñahu mana kwetu Stephen Lett wabidikili nindi Izaza Dalombolaña dinaloñeshi kulonda ankoñi ankambi niwena ayibiñeña niañodijawu mwituña daUnited States. Wabidikili cheñi nindi Shikola yaKudiza Mudimu wawuNkoñi akuyitenaña nawu Shikola Yakudiza Bayibolu Yawamana Kwetu Ajiki. Nawa wabidikili cheñi shikola yayiha yikutenañawu nawu Shikola yaKudiza Bayibolu yawakwaKristu Adisumbula. Iyi shikola yikudizishaña antu adisumbula kulonda akalakaleña chikupu mukuloñesha kwaYehova. Mana kwetu Lett wabidikili cheñi nindi Shikola yawaNkoñi Endaña niAñodijawu niShikola Yawamamembala Amukometi yaMutayi niAñodijawu yikwikalañaku kayedi hachaaka kuPatterson, nawa anakuloñesha kulonda antu awanikili kushikola yakunyima akawanikeñaku cheñi kamuchiyedi.

Mana kwetu John E. Barr wayaaka 97 wunakalakali hadi yaaka yayivulu Mwizaza Dalombolaña, wakunkulwili progiramu munjila yayiwahi kuhitila mukulomba mukudizoza nawa kwakufuma hamuchima. * Chamanini iku kubulakana antu ejima azañaleli nawa idi ifuku akadanukaña.

[Tumazu twaheshina]

[Mazu ekoku adi hefu 19]

Antu ejima adiña mwizaza azañaleli nampanji yakwihujola hachihandilu chawamana kwetu

[Mazu ekoku adi hefu 20]

Yehova nakiswili mudimu wakushimwina muEthiopia