Malwihu Kufuma Kudi Antañi

Komana tunateli kushimuna chikupu wuprofwetu wejima wahoshaña hadi Mesiya wekala Munsona jachiHeberu?

Neyi tudiza nakanañachima Nyikanda yachiHeberu yikutukwasha kwiluka wuprofwetu wawuvulu washikijeweli hadi Yesu Kristu. Iwu wuprofwetu washimwinineñahu dehi chakavwalikayi Mesiya, mpinji yakumwekana kwindi, yuma yakakoñayi, chakamuyandishawu nichufulu chindi mukuloñesha kwaYehova Nzambi. Yuma yejimiyi yatukwashaña kumwiluka chikupu netu Yesu diyi Mesiya. Hela chochu, twatela kushaku kashinshi neyi tunakukeña kwiluka wuprofwetu wejima wahoshaña hadi Mesiya wekala muNyikanda yachiHeberu.

Bayi neyi antu ejima etejaña hela kukaana wuprofwetu wahoshaña hadi Mesiyaku. Mumukanda wasonekeliyi waThe Life and Times of Jesus the Messiah, Alfred Edersheim wahosheli nindi, munyikanda yawaYudeya akushankulu achindujolamu yibaaba yakushika ku 456 yamuNyikanda yachiHeberu nawu diyi yahoshaña hadi Mesiya, hela chakwila yayivulu hiyashimunaña jiika hadi Mesiyaku. Neyi tusandujola chikupu iyi yibaaba 456 yikutuleñela kujinoka neyi mwalala yibaaba yikwawu hiwuprofwetu wahoshaña hadi Yesu Kristu. Chakutalilahu, Edersheim wahosheli nindi aYudeya amweneña nsona yaKutachika 8:11 nawu yahosheleña hadi Mesiya. Atoñojokeleña nawu “ifu damuolive, daleteli katela, dafumini kuMpidi yaMesiya.” Iwu nsoneki wateneni cheñi nsona yaKwidika 12:42. Hakulumbulula chabulili kutiyishawu aYudeya iyi nsona, wasonekeli nindi: “Neyi chochafuminiyi Mosi muchinkala mpata, dichakafumayi Mesiya muRoma.” Chakadi kujina akwakusandujola nsañu niantu amakwawu akañanyaña kwiluka mwatalisha iji nsona jiyedi nikulumbulula kwakutwamba hadi Yesu Kristu.

Neyi tusha hohu muchima hawuprofwetu washikijeweli hadi Yesu Kristu, chikutukalila kwiluka naamba yayeni yaniwu wuprofwetu. Chakutalilahu, mumukanda waIsaya kapetulu 53, mwekala nsañu yayivulu yawuprofwetu yahoshaña hadi Mesiya. Hansona yaIsaya 53:2-7 aprofweteli nawu: “Hakweti nimwekalilayi . . . Amudiwili amuumbili kudi antu . . . Naditwiki yuma yetu yakala . . . Amukatishilili nyiloña yetwetu . . . Neyi mwana kamukoku akutwalawu nakujaha.” Komana ichi chibaaba chejima chamumukanda waIsaya kapetulu 53 twatela kuchitena netu hiwuprofwetu wumu waMesiya, ntahindi iyi yuma yejima yamumwekeneni Mesiya twatela kuyimona netu hiwuprofwetu wadimena?

Shinshikenu cheñi, hansona yaIsaya 11:1, hitwatañaña netu: “Muchishinji chaJesi mwakamena mutombu mutayi wakunyiji yindi wakasoña nyikabu.” Iwu wuprofwetu wawanikaña cheñi muvasi 10, namazu wowamu. Komana twatela kuchinda awa mavasi ayedi netu hiwuprofwetu wambukaku ntahindi hiwuprofwetu wumu wuyafuntisha funtishahu? Mutwatela kukunkulula kutalisha haIsaya kapetulu 53 nikapetulu 11 munateli kumwekesha chikupu wuprofwetu wejima wahoshaña hadi Mesiya.

Dichi, bayi tusweja kusha muchima hakukeña kwiluka wuprofwetu wejima wahoshaña hadi Mesiya wekala Munyikanda yachiHeberuku. Kuloñesha kwaYehova kwasoneka jindandanda jawuprofwetu wawuvulu wahoshaña hadi Yesu nichiwashikijewaña. * Iji ndandanda jinateli kutukwasha nikutukolesha hakudiza kwahalwetu nachisaka nimumudimu wetu wakushimwina. Kubombelahu, wuprofwetu wawuvulu wahosha hadi Mesiya, hela chakwila hitweluka naambalaku, wamwekeshaña wunsahu wakwila nawu Yesu diyi Kristu, hela Mesiya.

[Tumazu twaheshina]