Malwihu Kufuma Kudi Antañi

Indi nsañu yasonekañawu muchileji chamudimu chahachaaka yatalisha mudihi?

Chaaka nichaaka lipoti yamudimu wakushimwina ayisonekaña muYearbook. Twazañalalaña hakutaña nsañu yinakuhosha hamudimu wunakuzata antu jaYehova mukaayi kejima wakushimwina Wanta waNzambi nikutañisha antu. Hakwila twiluki mwatalisha iyi lipoti, tunakukeña atulumbulwili kulonda twiluki mwatalisha nyitu nimanaambala amakwawu. Tushinshikenu haniyi yakutalilahu.

Chaaka chamudimu. Chaaka chamudimu chatachikaña muSeptember nawa chamanaña muAugust. Lipoti yamuYearbook yahoshaña hamudimu wachaaka chinamani. Chakutalilahu, Yearbook yamu 2011 yashimunaña lipoti yachaaka chamudimu cha 2010, kufuma haSeptember 1, 2009, nakushika haAugust 31, 2010.

Kuvulilaku kwawakwakushimwina ninaambala yawakwakushimwina. Akwakushimwina hiyaYinsahu apapatishewa niabula kupapatishewa awanisha yuma yakeñekaña hakwikala akwakushimwina nsañu yayiwahi yaWanta. “Naambala yakuvulilaku kwawakwakushimwina” ayifumishaña mukakweji kadi kejima kamuchaka mwahaninuwu malipoti amavulu. Nawa yinateli kubombelahu nimalipoti enjili mukulaba abulili kuchindilawu kukakweji kamanini. “Naambala yawakwakushimwina” hinaambala yejima yawakwakushimwina ahanaña lipoti yamumudimu wakushimwina kakweji nikakweji.

Maora ejima. Yearbook yamu 2011 yinakumwekesha nawu maora ejima azatiluwu aYinsahu jaYehova mumudimu wakushimwina abadikili ha 1.6 biliyoni. Ilaña munawa maora hiyabombelamu mpinji yitwazatishaña hakudifukula kudi Yehovaku. Chakutalilahu, hiyachindilañaku mpinji yazatishañawu aeluda hakubiña anyikoku muchipompeluku, dikwila nawu kuyikwasha nikuyikolesha. Cheñi, hiyachidilañaku mpinji yitwazatishaña hakuya nakupompa, kudiza Bayibolu, nikutoñojoka hayuma yitwadizañaku.

Mali azatishiluwu. Muchaaka chamudimu cha 2011, aYinsahu jaYehova azatishili mali akubadika ha $155 miliyoni hakukwasha apayiniya adimena, amishonali, niankoñi endaña. Ilaña hakupulinta maBayibolu, nyikanda nimagazini azatishili mali acheñi. Nawa iyi naambala yamali hiyanabombelumu mali akeñekaña hakukwasha amana kwetu niahela akubadika ha 20,000 azataña mudimu wakudikeñela wahaBeteli mukaayi kejimaku.

Adiiluku hachanukishu. Iyi hinaambala yawaYinsahu ejima apapatishewa adyaña mankendi nikunwa vinyu Hachanukishu. Ilaña iyi naambala hidiyi naambala yejima yawawayishewa adi hamasekiku. Chakutalilahu, antu amakwawu hiyeluka chalumbuluka kuya mwiwuluku, muloña kumpinji yakunyima akuhweleleli muyuma yacheñi hela hamuloña wakukala kukwetuwu. Dichi hitunateli kwiluka naambala yawantu awayishewa adi hamasekiku, nawa hichinakukeñeka nawu tuyiluki ejimaku. Izaza Dalombolaña hidahembaña majina awantu ejima adyaña kudinkendi nianwaña vinyu yaChanukishuku. *

Tweluka netu hampinji yakatachika lukadi lweneni hanu hamaseki hakekala antu awayishewa amakwawu “ambuña Nzambi yetu.” (Chim. 7:1-3) Chineli achidi hanu hamaseki, awayishewa anakudikita nankashi mumudimu wakushimwina nikutañisha. Lipoti yahachaaka yinakumwekesha antu jaYehova mukaayi kejima chinakuzatawu iwu mudimu wabadika kulema muchihandilu chawantu.

[Tumazu twaheshina]