Munakwanuka?

Komana mwatañili nakanañachima yibaaba yakatataka yaKaposhi Kakutalila? Talenu neyi mukutwesha kwakula awa malwihu:

• Yikumanyi yisatu yinateli kutukwasha hakwila tutondolweli chaaku chabula kwikala nakashinshi?

Yikuma yisatu diyeniyi: (1) Ikalenu nawoma wakubula kukeña kumuneñesha Nzambi. (1 Pet. 3:12) (2) Ikalenu nachinleji chafumbewa naBayibolu. (3) Zatenu nañovu kulonda muzañalaleña nayuma yimukweti.—4/15, ifu 6-7.

• Tweluka ñahi netu kumukalakela Nzambi nakalemesha hikwatalisha mukwila nawu mpinji yejima chiña tumwekanaña akasika chakadi kwikala nampinji yakudiluñishaku?

Twatela kushinshika hachakutalilahu chaYesu. Wadiluñishileña hampinji yashakaminiyi hamu nawantu nakudiila nawu hamu. Tweluka netu hadiña wakasikaku. Antu amakwawu, nianyanya anyanya, atiyileña kuwaha kwinza kudi yena.—4/15, ifu 10.

• Indi “mulambu” watenawu haYoba 33:24 himulambwinyi nawa Yoba wahetelelumu ñahi?

Izu dakwila nawu mulambu datalisha “mukubuta.” Yoba, watela wateneneña mulambu wakanyama, wateleleli kushika kumesu aNzambi kulonda kubuta hela kutookesha yiluwa yaYoba. Yehova watambwili mulambu waYoba, nawa wabutili hayiluwa yindi nikwenzununa njila kulonda Nzambi yamufuntishili maheta indi nikumukiswila. (Yoba 1:5; 42:12-17)—7/1, ifu 11.

• Indi mutondu wamuolive washimunawu mumukanda waAroma kapetulu 11 wemenañaku chumanyi?

Mutondu wamuolive watalishaña kulubutu lwaAbarahama lwamuchiyedi, dikwila nawu aIsarela akuspiritu. Yehova wudi neyi muji nawa Yesu wudi neyi chishinji chaniwu mutondu wamuolive wachifwikija. Hampinji yamukaaninuwu Yesu kudi aYudeya amavulu, antu abalumukili nakwikala aYudeya ekalili akakwitiya ayinuñili, nakuwanisha naambala yalubutu lwamuchiyedi lwaAbarahama.—5/15, mafu 22-25.

• Tweluka ñahi netu kaluña Kachinana hiluña dakesi kakuyandishilamu antuku?

Yehova wahela yitoñojoka yakwila nawu wakocha antu amomi mukesi. (Yere. 7:31) Kubombelahu, ntañishilu yakwila nawu antu afwa ayiyandishaña hiyesekana nayililu yaNzambi yakukeña nintañishilu yalala yamuBayibolu yakwila nawu afu “hiyeluka chumaku.” (Mukwa. 9:5, 10)—7/1, ifu 15.

• Indi Yehova wakwashaña ñahi antu “abaluka nyichima yawu mwivumu” ‘niakweti spiritu yachikeka puchi’? (Mas. 34:18)

Kufwana nvwali wamuwahi wakumbataña nikukundeja mwana wunakudila, Yehova wekala kwakwihi nawakwakudifukula indi amudililaña nawu yayikwashi. Wakeñaña kuyikundeja nikuwundisha nyichima yawu yabaluka nispiritu yachikeka. Nateli kuyinka maana nikuyikolesha kulonda atweshi kuumika kweseka kudi kwejima kuyanateli kumonawu. (2 Kor. 4:7; Yak. 1:5)—7/1, ifu 23.

• Komana wumi wawantu akuuliluwu kudi Yesu iyala wawanina diwatuña mulambu?

Inehi. Hela chakwila Yesu diyi wakuulili yihita yawantu awanina, wumi wanawa antu hiwatuña mulambuku. Wumi waYesu hohu wawanina diwu wesekeni nawajimbesheliyi Adama. (1 Tim. 2:6)—6/15, ifu 13.

• Indi akwaKristu amwekeshaña ñahi nawu atiyililaña kusoñamisha kwekala haYililu 20:29, 30 kwahoshaña hadi antañishi akutwamba?

Hiyatambwilaña antañishi akutwamba mumatalawu hela kuyimushaku. (Rom. 16:17; 2 Yow. 9-11) AkwaKristu hiyatañaña nyikanda yawakwakusekesha, kutala maprogiramu awu aha TV, nikusandujola maWebu sayiti hasonekawu ntañishilu yawuku.—7/15, mafu 15-16.

• Kwesekeja nachasonekawu haLuka 10:40-42, muloñanyi waweni wutwadikundilaña nawamana kwetu akwakwitiya?

Twadikundaña nawakwetu akwakwitiya, bayi neyi hamuloña wakuyinka hela kutambwila yakudya yayiwahiku, ilaña twafwilaña kudikolesha wumu namukwawu nikuyinka chamukunkulu chakuspiritu. (Rom. 1:11, 12) Hela tuhu yakudya yantesha yinateli kuleñela kudikunda kwamuchidiwu kwikali kwakudikolesha.—7/1, mafu 29, 30.