Komana Munakwiteja Yehova Yekali Iseka Denu?

“Sambilenu kukeña wanta windi nikuloña kwindi, niyuma yejimiyi akayishilaku.”—MAT. 6:33.

1, 2. (a) Indi ‘aIsarela ambala aNzambi,’ itwatañaña haAŋalija 6:16 hiyanyi? (b) Hamukanda waMatewu 19:28, indi “nyuza yaIsarela ikumi nayiyedi” yemenañaku anyi?

 NEYI mutaña ijina dakwila nawu Isarela muBayibolu, chumanyi chimwatoñojokaña? Komana mwatoñojokaña hadi Isaka mwana kaYakoba, atumbiluwu ijina dikwawu nawu Isarela? Indi kwiji mwatoñojokaña hadi anyanindi, munza waIsarela wakushankulu? Komana mwatoñojokañahu hadi Isarela wakuspiritu? Ijina daIsarela neyi aditena muchifwikija, kakavulu datalishaña kudi ‘aIsarela ambala aNzambi,’ a 144,000, awayishawu naspiritu yajila kulonda akekali anyanta niatupristu mwiwulu. (Ŋal. 6:16; Chim. 7:4; 21:12) Ilaña talenu njila yikwawu mwatenenañawu nyuza yaIsarela ikumi nayiyedi yitwawanaña haMatewu 19:28.

² Yesu wahosheli nindi: “Hakuleña kwakwiha chakashakamayi Mwana kamuntu hetanda dawanta dakulema kwindi, enu nawa munanlondami mwakashakama hamatanda awanta ikumi nayedi, nakusompesha nyuza yaIsarela ikumi nayiyedi.” Muniyi vasi, “nyuza yaIsarela ikumi nayiyedi” hiyantu akasompeshawu kudi atumbanji twaYesu awayishewa nawa akatambwila wumi wahaya nyaka muParadisa hamaseki. Akahetela munyidimu yawupristu yikazata a 144,000.

3, 4. Chakutalilahwinyi chachiwahi chemikawu awayishewa ashinshika?

³ Kufwana atupristu niaLevi akunyaka, awayishewa makonu amonaña mudimu wawu nawu walema chikupu. (Kuch. 18:20) Awayishewa hiyakuhwelela nawu atela kuyinka iluña hela mpata hanu heseki nawu diwu wuswana  wawuku. Ilaña atalilaña mpinji yakekalawu anyanta niatupristu mwiwulu hamu naYesu Kristu. Akatwalekahu kumukalakela Yehova muniwu mudimu, neyi chamwekeshaña mazu itwatañaña haChimwekeshu 4:10, 11 kutalisha hadi awayishewa hayifulu yawu mwiwulu.—Ezek. 44:28.

⁴ Hampinji yachiduwu hamaseki, awayishewa atela kwikala nachihandilu chinakumwekesha nawu Yehova diyi iseka dawu. Mudimu wawu wakumukalakela Nzambi awulemesha chikupu. Akuhwelela mumulambu waKristu wefutu danyiloña nawa atwalekañahu nakumulondela, dichi ‘akoleshaña kutambika kwayitambikiluwu nikutonda kwayitondeluwu.’ (2 Pet. 1:10) Akweti wuswa nichihandilu chashiyashana. Ilaña, kubula kuwanina hikwayileñelaña akañanyeña kukalakala chikupu mumudimu waNzambuku. Dichi, atwamijañaku mudimu waNzambi muchihandilu chawu nikuzata hakumina ñovu jawu. Nawa emikilaña antu achiñejaña kushakama muparadisa hamaseki chakutalilahu chachiwahi.

5. Indi akwaKristu ejima anateli kumwekesha ñahi nawu Yehova diyi iseka dawu, nawa muloñadi chichakalilaña?

⁵ Hela tukweti kuchiñeja kwakuya mwiwulu hela kwakushakama hamaseki, twatela ‘kudibonda, nikunyamuna mutondu wakuyandishila nakutwalekahu kumulonda Kristu.’ (Mat. 16:24) Yihita yawantu achiñejaña kushakama muParadisa hamaseki anakudifukula kudi Nzambi nawa anakumulondela Kristu. Hiyazataña hohu chantesha mumudimu waNzambi neyi eluka nawu anateli kudikita chikupuku. Antu amavulu chayileñelaña kuleka kukeña yuma yayivulu muchihandilu chawu nakwikala apayiniya. Amakwawu azatañaku wupayiniya hadi tukweji twantesha chaaka nichaaka. Amakwawu niwena, hela chakwila hiyatweshaña kuzata wupayiniyaku, adikitaña nankashi mumudimu wakushimwina. Antu wenawa adi neyi Mariya wadihanini, wechilili malasha hadi Yesu. Wahosheli nindi: “Nañilili mudimu wawuwahi. . . . Yena kwindi neli mwashika ñovu jindi.” (Maku 14:6-8) Chinateli kutukalila kuzata hakumina ñovu jetu, muloña tunakushakama mukaayi kanakuyulewa naSatana. Ilaña, twadikitaña chikupu nikukuhwelela mudi Yehova. Talenu njila jiwana mutwamwekeshelaña kumukuhwelela Yehova.

Kusambila Kukeña Wanta waNzambi

6. (a) Indi antu mukaayi amwekeshaña ñahi nawu iseka dawu dekala muwumi wamakonu hohu? (b) Muloñadi chitwatela kumwimbujola Davidi?

⁶ Yesu walejeli atumbanji twindi kusambila kukeña Wanta windi nikuloña kwaNzambi. Antu amukaayi asambilaña kukeña yuma yakudizañalesha aweni diwu ‘antu amakonu, adyaña yamuwumi wunu wakatataka hohu.’ (Tañenu Masamu 17:1, 13-15.) Hamuloña wakubula kulemesha Nleñi yawu, antu amavulu ashaña maana hakwikala nachihandilu chachiwahi, kwikala nachisaka, nikushiya wuswana. Iseka dawu dekala muwumi wamakonu hohu. Ilaña Davidi, washili maana hakwikala ‘nejina dadiwahi’ naYehova, neyi chakonkomweneni mwanindi nindi antu ejima atela kwikala nejina dadiwahi. (Mukwa. 7:1) Kufwana Asafwi, Davidi welukili nindi kwikala ibwambu daYehova kwalema nankashi kubadika kusha maana kuyuma yamuchihandilu. Watiyili kuwaha chikupu kwenda naNzambi. Makonu, akwaKristu amavulu atwamijañaku yuma yakuspiritu kubadika nyidimu yawu yakumujimba.

7. Nkiswinyi jatambwililiyi mana kwetu wumu hamuloña wakusambila kukeña Wanta?

⁷ Talenu chakutalilahu chaJean-Claude, wamwituña daCentral African Republic. Hieluda wasumbula wudi nawanyana asatu. Munidi ituña, hichapela kuwana mudimuku, nawa antu anateli kwila chuma chidi chejima kulonda atwalekuhu namudimu wawu. Ifuku dimu, mukulumpi wamudimu wamulejeli Jean-Claude nindi yatachiki kuzata nawufuku, kutachika nampinji ya 18:30, mafuku atanu nayedi mumulungu. Jean-Claude wamulejeli nindi wakamenaña chisaka chindi kumujimba, hampinji yoyimu wayikwashaña kulonda ekaleña nawubwambu wawuwahi naNzambi. Washimwini cheñi nindi wudi nanyidimu yakalakalañayi muchipompelu. Indi mukulumpi wanyidimu wakwili nindidi? Wamulejeli nindi “Neyi wudi nakukooleka kwakuwana mudimu, hiwatela kwanukaña yuma yikwawuku,  kushilahu tuhu niñodeyi, anyaneyi, nikukala kuwukweti. Wumi weyi wejima watela kushindamena hamudimu, bayi kuchuma chidi chejimaku. Tondakuhu chuma chimu: nsakililu yeyi hela mudimu weyi.” Neyi yenu mwadiña mukukala kwamuchidiwu mwadi kwila ñahi? Eñañi, Jean-Claude welukili nindi neyi mudimu windi wumana, Nzambi nateli kumwakamena. Wukwikala nampinji yakukalakala chikupu mudimu waNzambi, nawa Yehova nateli kumukwasha kulonda yakameni chisaka chindi nayuma yakumujimba. Dichi, wayili kukupompa kwahiñiluhu kwamukachi kamulungu. Hanyima yakupompa, wayili kumudimu hela chakwila welukili wanyi neyi mudimu windi wachidiña kwoku. Chimwahitili mpinji yantesha, amutemesheleli nshiña. Mukulumpi wamudimu amuhañili, ilaña mana kwetu watwalekeluhu nakuzata.

8, 9. Tunateli kwimbujola ñahi atupristu niaLevi hakumwekesha netu Yehova diyi iseka detu?

⁸ Hadaha ninenu mwamonahu dehi kukala kwokumu. Mwatela mwadiña nakudakamena nenu, ‘Nukutwesha ñahi kukwasha chisaka chami neyi chakwila mudimu wumana?’ (1 Tim. 5:8) Hela chakwila mwamonahu dehi kukala kwamuchidiwu hela kanda, mwatela mweluka nenu Nzambi hatiyishaña nsonyi antu amumonaña nawu diyi iseka dawu, nawa atwamijañaku mudimu windi muchihandilu chawuku. Hampinji yalejeliyi Yesu atumbanji twindi nindi sambilenu kukeña wanta, wayikonkomweneni nindi: “Niyuma yejimiyi,” yidi neyi yakudya, yakunwa, hela yakuvwala, “akayishilaku.”—Mat. 6:33.

⁹ Toñojokenu hadi aLevi, abulili kutambwila wuswana wetuña. Chineli ashili muchima hakudifukula kwalala, akuhweleleli mudi Yehova nawu wukuyinka yuma yakumujimba, muloña wayilejeli nindi: ‘Iseka denu yami.’ (Kuch. 18:20) Hela chakwila hitwakalakalaña mutembeli neyi chakalakeleñawu atupristu niaLeviku, tunateli kwimbujola yililu yawu, nakukuhwelela netu Yehova wukutwakamena. Chineli hitukusweja kwiñila mumafuku akukuminina, twatela kusweja kumukuhwelela Nzambi netu wukutwakamenaña.—Chim. 13:17.

Kusambila Kukeña Kuloña kwaNzambi

10, 11. Antu amakwawu amwekesha ñahi nawu amukuhwelela Yehova kutalisha hanyidimu yawu yazatañawu? Shimunenu chakutalilahu.

¹⁰ Yesu wakonkomweneni atumbanji twindi ‘kusambila kukeña kuloña kwaNzambi.’ (Mat. 6:33) Ichi chatalisha mukutwamijaku nshimbi jaYehova jahoshaña hakwila yuma yaloña nikutondolwela yuma yatama bayi yitoñojoka yawantuku. (Tañenu Isaya 55:8, 9.) Munateli kwanuka nenu kunyaka, antu amavulu adiña nakudima makanya hela kulandisha makanya, kudizisha antu amakwawu chakuzuña njita, hela kutuña nikulandisha mata akwasa nachu njita. Hanyima yakudiza chalala, amavulu afuukwiluhu kuhimpa mudimu nikuwanisha yuma yakeñekaña hakwila apapatishewi.—Isa. 2:4; 2 Kor. 7:1; Ŋal. 5:14.

¹¹ Andrew wemika chakutalilahu chachiwahi. Yena niñodindi chamwilukiluwu Yehova, afuukwiluhu kumukalakela. Andrew wadiña wakeñesha mudimu wazatileñayi ilaña wawulekeli. Muloñadi? Muloña mutayi wazatilileñayi wadiñijileña munsañu janjita nawa yena wafwilileña kusambila kukeña kuloña kwaNzambi. Hampinji yalekeliyi Andrew mudimu wazatileñayi, wadiña nawanyana ayedi, nawa mali adiñayi nawu ateleleli kuyikwasha hohu mutukweji twantesha. Kwesekeja nayitoñojoka yawantu, watela wamwekeni neyi hadiñahu ‘nawuswana’ wudi wejimaku. Wamukuhweleli Nzambi, nawa wayili nakukeña nyidimu. Chanukayi, yena nichisaka chindi anateli kuhosha nawu Yehova wakwashaña. (Isa. 59:1) Kuhitila mukubula kukeña yuma yayivulu muchihandilu chawu, Andrew niñodindi akweti kukooleka kwakukalakala mudimu wampinji yejima. Wahosheli nindi, “Mpinji yikwawu twakamaña hansañu  jamali, kwakushakama, kukola kwakumujimba, nikwiluka netu hitukushinakaja. Ilaña Yehova watukwashaña mpinji yejima. . . . Tunateli kuhosha chakadi kuhita mumbadi netu kumukalakela Yehova, kwakuwahi nankashi nawa dichuma chabadika kulema chatela kwilawu antu.” *—Mukwa. 12:13.

12. Chililwinyi chatela kuyikwasha hakwila nawu mutwamijeñaku kuloña kwaNzambi? Shimunenu chakutalilahu chamwiluña denu.

¹² Yesu walejeli atumbanji twindi nindi: “Neyi mukweti kukuhwelela kwakweseka nakalubutu kamostadi, mwadi kuyila mpidi iyi nenu, Tutulukaku kunu wuyi kuna; yadi kututuluka. Kwosi chuma chimwadi kukañanyaku.” (Mat. 17:20) Komana munateli kusambila kukeña kuloña kwaNzambi neyi chakwila mukufuma yuma yakala? Neyi mukutwesha wanyi, mwatela kwihula antu amakwawu muchipompelu. Chakadi kujina mukukolelaku kuspiritu neyi mutiya chayikwashawu kudi Yehova.

Hamekenuña Yuma Yakuspiritu Yatuloñeshelañayi Yehova

13. Neyi tusweja kudikita chikupu mumudimu waYehova, yumanyi yakuspiritu yitwatela kukuhwelela?

¹³ Neyi mulemesha kukooleka kumukweti kwakumukalakela Yehova, munateli kumukuhwelela nenu wukuyinkaña yuma yakumujimba yimwakeñaña niyakuspiritu neyi chayakameneniyi aLevi. Toñojokenu hadi Davidi. Hela chakwila waswamini mwiyeñu, wakuhweleleli nindi Nzambi wukumukwasha. Anetu nawa twatela kumukuhwelela Yehova hela neyi tumona netu kwosi watela kutukwasha. Anukenu nenu cheñililiyi Asafwi “mumalala aNzambi,” dihelukiliyi chuma chamuneñesheleña. (Mas. 73:17) Chochimu, twatela kumukuhwelela Nzambi netu wukutwinka yuma yitwakeñaña kulonda tutwalekuhu kwikala nawubwambu wawuwahi nayena. Ichi chikumwekesha nawu twalemesha mudimu wetu wakumukalakela Nzambi hichidi namuloña nakukala kutunakumonaku. Tukumwekesha netu Yehova diyi iseka detu.

14, 15. Twatela kwila ñahi neyi kwikala kuhimpika mukutiyisha kwetu kwachalala chamunsona nawa muloñadi?

¹⁴ Komana mwamukuhwelelaña Yehova hampinji yatukwashañayi kwiluka “yuma yaNzambi yayeni yakunama” yamuBayibolu? (1 Kor. 2:10-13) Kapostolu Petulu wemikili chakutalilahu chachiwahi hampinji yalejeliyi Yesu antu adiña nakumutiyilila nindi: “Neyi mukubula kudya musunyi waMwana kamuntu, mubula kunwa nimashi indi, himukwikala nawumi mudenu awenuku.” Hamuloña wakubula kwiluka mwatalishiliyi, atumbanji amavulu ahosheli nawu: “Mazu awa akala; wukutwesha kutiyamu hinyi?” Dichi “hiyakufuntamu.” Ilaña Petulu wahosheli nindi: “Tukuya kudinyi? Eyi yeyi wukweti mazu awumi wahaya nyaka.”—Yow. 6:53, 60, 66, 68.

¹⁵ Petulu helukili chikupu mwatalishiliyi Yesu chahosheliyi hakudya musunyi nihakunwa mashi induku. Ilaña wakuhweleleli nindi Yehova wamuzatishileña Yesu kulonda yakwashi antu eluki chalala. Neyi kwikala kuhimpika hakutiyisha chalala chamuBayibolu, komana mwafwilaña kwiluka chinaleñeli kwikala kuhimpa? (Yish. 4:18) ABereya amuyaaka nkulakaji yatachi “anyakeli kutambula mazu; hiyakutalatala munyikanda yajila hefuku hefuku, amoni neyi yumiyi dimu yaya.” (Yil. 17:11) Neyi muyimbujola chikuyileñela musweji kulemesha kukooleka kwenu kwakumukalakela Yehova, nikumwekesha nenu diyi iseka denu.

Kusumbwila Chiña Mudi Mwanta

16. Nzambi nateli kwikala ñahi iseka detu kutalisha halushimbi lwekala ha 1 Akorinda 7:39?

¹⁶ Njila yikwawu akwaKristu muyatela kuhemba kufuukula kwaNzambi yidi yakutiyilila kufumba kwamuBayibolu kwakusumbula hela kusumbukila “mudi Mwanta hohu.” (1 Kor. 7:39) Antu amavulu afuukulahu kushakama wujiki kubadika kufumpa ilu lushimbi. Nzambi wakamenaña chachiwahi antu ovwahilaña. Chumanyi chelili Davidi hampinji yatiyiliyi wuudi nawa hamweniyi nindi hadiña namuntu wakumukwashaku? Wahosheli nindi: “Hinukuhuñunwina matopi ami kumesu indi [Nzambi], hinukumuleja munamoni yihuñu. Chelili spiritu yami jinamukañi  dehi mukachi kami eyi welukili njila yami.” (Mas. 142:1-3) Yeremiya wamukalakeleli Nzambi hadi yaaka yayivulu nakashinshi muwujiki. Niyena watela watiyileña wuudi. Munateli kudiza hachakutalilahu chindi mukapetulu 8 kamukanda waChibemba wudi namutu wunakwila nawu Nsañu Yatulejañayi Nzambi Kuhitila Mudi Yeremiya.

17. Indi muhela wumu mujiki womikaña ñahi nawuudi wakwikala nkawindi?

¹⁷ Muhela wakwituña daUnited States wahosheli nindi, “Hinafuukulahu kushakama wujikiku. Natela kusumbuka neyi niwana muntu watelela. Amama hiyetiyaku, dichi akanjikijaña nawu nisumbuki tuhu namuntu wudi wejima. Nayinhwili amama neyi atela kwiteja kwikala asamuloña neyi chakwila maluwi ami amana. Chimwahitili mpinji, amama amweni nawu nazatileña mudimu wawuwahi, nadihembeleña nawa nadiña wamuzañalu. Dichi alekeli kunkakeja.” Iwu muhela mpinji yikwawu watiyaña wuudi. Wahosheli nindi, “Chinatiya wuudi, nakuhwelelaña mudi Yehova. Hashiyaña nkawamiku.” Chumanyi chamuleñelaña yamukuhweleli Yehova? “Kulomba kwankwashaña kwiluka nami Nzambi wekala kwoku nawa hinidi nkawamiku. Mukwakubadika yuma yejima watiyililaña, muloñadi chinukubulila kuzañalala nikutoñojoka nami wanlemesha?” Hamuloña wakukuhwelela nindi “chikweti kukooleka yowu kuhana, kutambula chakuminamu,” wahosheli nindi: “Nesekaña kudihana kulonda nikwashi antu amakwawu, chakadi kukuhwelela nami akunfweta. Neyi nitoñojoka nami, ‘Chumanyi chinatela kwila kulonda nimukwashi iwu muntu?’ Chanzañaleshaña.” (Yil. 20:35) Eñañi, wamumonaña Yehova nindi diyi iseka dindi, nawa nakudiluñisha nakukooleka kwakumukalakela.

18. Munateli kwikala ñahi iseka daYehova?

¹⁸ Hichidi namuloña nakukala kudi kwejima kumwatela kumonaku, munateli kumwekesha nenu Nzambi diyi iseka denu. Chimukumwekeshaña nenu diyi iseka denu, mukwikala hakachi kawantu jindi amuzañalu. (2 Kor. 6:16, 17) Ichi chikuyileñela mwikali iseka daYehova, neyi chadiña antu amakwawu kunyima. (Tañenu Kuhituluka 32:9, 10.) Neyi chekalili Isarela iseka daNzambi hakachi kanyunza, anenu nawa nateli kuyitonda mwikali iseka dindi nikuyakamena chachiwahi.—Mas. 17:8.

[Tumazu twaheshina]

Mukwakula Nenudi?

Yehova nateli kwikala ñahi iseka denu

• kuhitila mukusambila kukeña Wanta waNzambi nikuloña kwindi?

• kuhitila mukumwekesha kusakilila hayakudya yakuspiritu?

• kuhitila mukwovwahila lushimbi lwaNzambi lwakusumbwila nikusumbukila mudi Mwanta hohu?

[Malwihu aKuzatisha haKudiza]

[Mazu ekoku adi hefu 13]

Yehova wekalaña iseka detu neyi tutwamijaku mudimu windi muchihandilu chetu

[Mwevulu wudi hefu 15]

Chakutalilahu chaYeremiya chatukoleshaña chikupu