Komana Munateli Kumwimbujola Fwinehasi Neyi Muholokela Mukukala?

HIKUKOOLEKA kwakweni hakukalakala neyi eluda muchipompelu. Hela chochu, Izu daNzambi dahoshaña nawu aeluda amonaña kukala. Mpinji yikwawu, asompaña nyiloña yawantu akoñaña yiluwa ‘nakumusompelaku Yehova.’ (2 Kushi. 19:6) Hela nkoñi anateli kumwinka mudimu wakwila hanadiloñeshuku, neyi chichamwekeni kudi Mosi, wehwili kutalisha hamudimu wamwinkeluwu nindi: “Ami yaminyi mwaka niyi kudi Fwaro?”—Kwid. 3:11.

Nyikanda, ayisonekeli nawunlomboli waspiritu yajila nawa ñovu yoyimu diyakwashaña muntu kukalakala neyi eluda, yatulejaña yakutalilahu yawankoñi atwesheli kuumika kweseka. Fwinehasi wadiña mwana kaEleyazari nawa mwizukulu aAroni wateleleli kwikala kapristu muneni. Yuma yisatu yamwekeni muchihandilu chindi yamwekeshaña aeluda makonu chatelawu kumwekeshawu wulobu, kashinshi, nikushindamena hadi Yehova hampinji yamonañawu kukala.

‘Washikeneni Dakunyamuka’

Hampinji yatekeleluwu aIsarela Muyana yaMowabi Fwinehasi wadiña mukwenzi. Bayibolu yashimuna nawu: “Antu atachikili kwila wuvumbi nawanyana kawaMowabi awambanda. . . . Antu adiili, adifukwili kudi akishi awu.” (Kuch. 25:1, 2) Yehova wayibabesheli akwakwila chatama nachipupu. Indi Fwinehasi watiyileña ñahi hampinji yatambwilileñayi nyijimbu yayiluwa yawantu nichipupu?

Bayibolu yashimunaña nawu: “Akasumukili mwana kaIsarela wumu hakwinza hakuleta kudi ana kwindi mumbanda wakaMidiyani kumesu aMosi, nikumesu achipompelu chawanyana kaIsarela chejima, chadiñi nakudilawu kuchisu chetenti dakubulakena.” (Kuch. 25:6) Chumanyi chateleli kwilayi kapristu Fwinehasi? Wachidiña kansi, nawa kaIsarela waluwañesheli wadiña kalamba walombweleña antu hakudifukula.—Kuch. 25:14.

Ilaña Fwinehasi wachinineña Yehova, bayi antuku. Chayimweniyi awa antu ayedi, hohenohu wasendeli iyoña muchikasa chindi nakumulondela iyala mwitenti nawa wayitapili mwayedi wawu. Indi Yehova wamweni ñahi wulobu waFwinehasi nikufuukulahu swayi? Hohenohu Yehova wamanishili chipupu nawa wakwatili chitiyañenu naFwinehasi nindi wupristu wukekalaña windi nawanyanindi ‘haya nyaka.’—Kuch. 25:7-13.

Hela chochu, aeluda akwaKristu makonu hiyaletaña ndombuku. Ilaña kufwana Fwinehasi, aeluda atela kunyakala kufuukulahu nikwikala nawulobu. Chakutalilahu, hahitili hohu tukweji twantesha kufuma hamutondeluwu Guilherme kwikala eluda nawa amulejeli nawu yekali hakomiti yawunsompeshi. Muntu wakoñeli muloña wadiña eluda wamukwashili Guilherme hampinji yadiñayi kansi. Wahosheli nindi: “Chankalilili nankashi kushakama haniyi kometi. Nawufuku tulu hinatumwenuku. Nadiña nakutoñojoka hohu mwakusompela iwu muloña chakadi kuleka yitoñojoka yami yinkañeshi kulondela nshimbi jaYehova. Nalombeli  hadi mafuku amavulu nikusandujola munyikanda yashindamena haBayibolu.” Ichi chamukwashili yekali nawulobu wakuzata naniku kukala nakukwasha mana kwindi waluwañesheli kuspiritu.—1 Tim. 4:11, 12.

Aeluda emikaña chakutalilahu nakumwekesha chikuhwelelu nikashinshi kuhitila mukwikala nawulombu nikunyakala kufuukulahu neyi kukala kumwekana muchipompelu. Dichi, akwaKristu amakwawu niwena atela kumwekesha wulobu, kuhitila mukushimuna yiluwa yamaneni yinelukuwu. Chochimu, chakeñekaña kwikala nakashinshi hakuleka kudikunda nebwambu denu hela ntaña yenu wahañawu.—1 Kor. 5:11-13.

Kashinshi Kakañeshaña Kukala

Fwinehasi bayi neyi wamwekesheli wulobu chakadi kutoñojoka, neyi chelañawu atwansiku. Talenu chamwekesheliyi kashinshi, nimaana hampinji yatambwililiyi mujimbu wukwawu. Muchidi waRubeni niwaGadi nimuchidi waManase wachibalu atuñili kameña kwakwihi naKaloña Yodana. A Isarela amakwawu amweni nawu kameña kadiña kakuzatisha kukudifukula kwakutwamba nawa adipompesheli nawu ayi nakwasa njita.—Yosh. 22:11, 12.

Chumanyi cheliliyi Fwinehasi? Fwinehasi, hamu nawatulamba amuIsarela, ahanjekeli chachiwahi haniyi nsañu nawantu atuñili kameña. Muchidi watwikiluwu muloña washimwini jiika, walumbulwili nawu kameña kadiña ‘kakumukoñela Yehova mudimu windi.’ Dichi amanishili kukala.—Yosh. 22:13-34.

Neyi mukwaKristu yatiya mbonji hela mujimbu watama hadi mukwawu kambuña aYehova, chikuwaha neyi yamwimbujola Fwinehasi! Kashinshi katuleñelaña tubuli kuvulumuna hela kushimuna nsañu yatama hadi amana kwetu.—Yish. 19:11.

Indi kashinshi kanateli kukwasha ñahi aeluda kwila neyi chelili Fwinehasi? Jaime, eluda wunazati hadi yaaka yakubadika hekumi dimu wahosheli nindi: “Neyi mukwakushimwina yatachika kulumbulwila kukala kunakumonayi namukwawu, nanyakalaña kulomba kudi Yehova kulonda yankwashi nibuli kuhakwilaku wumu ilaña nizatishi kufumba kwamuNsona. Muhela wumu wenjili nakunleja chiluwa chamukoñeluwu kudi mana kwetu wamuchipompelu chikwawu. Chineli iwu mana kwetu wadiña ibwambu dami, chadi kwikala chaswayi kuhosha nindi. Ilaña, nahanjekeli naniwu muhela hanshimbi jamuBayibolu jashiyashana. Wetejeli nindi wukusambila kuhosha namana kwetu yomwenindi. (Mat. 5:23, 24) Hakusambila hiyaleteli kuwunda hakachi kawuku. Dichi namulejeli muhela kutoñojoka hanshimbi yikwawu yamuNsona. Muhela wafuukwiluhu kulombela haniku kukala nikufwila kumwanakena.”

Chumanyi chafuminumu? Jaime wahosheli nindi: “Chimwahitili tukweji, muhela wenjili cheñi. Walumbulwili nindi, mana kwetu waditoñesheli hayuma yahosheliyi. Wafuukwiluhu kuzatila hamu namuhela mumudimu wamwiha nawa mana kwetu wamuhamekeli iwu  muhela. Dichi kukala akumanishili. Komana iku kukala kwadi kumana neyi chakwila, ami namwekesheli chaambu, nakudiñija muniku kukala?” Bayibolu yatufumbaña nawu: “Bayi wulundumukila hanzi swayi neyi nakazuñuku.” (Yish. 25:8) Aeluda adi nakashinshi alejaña chachiwahi akwaKristu adi nakukala kuzatisha nshimbi jamuNsona kulonda aleti kuwunda.

Walombeli Kudi Yehova

Fwinehasi wadiña nakukooleka kwakwikala kapristu kawantu jaNzambi atondewa. Neyi chitunahanjekuhu, wadiña nawulobu chikupu nimaana, nihampinji yachidiñayi kansi. Hela chochu, washindameneni hadi Yehova hakwila nawu yamanishi kukala kwamweneñayi.

Amayala akuGibeya akumuchidi waBenjamini akoñeli chuma chatama, akakejeli ntombu yawaLevi nawu akami nindi nawa amujahili, dichi nyichidi yikwawu yanyamukili ayili nakwasa njita nawaBenjamini. (Ansomp. 20:1-11) Alombeli kudi Yehova nawu yayikwashi henohu kanda atachiki kuzuña, ilaña ayishindili mapampa kayedi, amavulu afwili. (Ansomp. 20:14-25) Komana ateleleli kutoñojoka nawu kulomba kwawu hikwashikileña kudi Yehovaku? Komana mwalala Yehova wakeñeleña nindi ayi nakwasa njita hamuloña wachuma chatama chamwekeni?

Fwinehasi hamuloña wakwikala nachikuhwelelu chakola, haniyi mpinji wadiña kapristu muneni wawaIsarela, wenjili nakumanisha kukala. Walombeli nindi: “Niyi cheñi nakadasi njita nawanyana kamana kwami Benjamini, tahindi nichileki?” Hakwakula kulomba kwawu, Yehova wayinkeli aBenjamini mumakasawu, nawa Gibeya amujilumwini.—Ansomp. 20:27-48.

Chumanyi chitwatela kudizilaku? Kukala kukwawu kwamwekanaña muchipompelu kwatwalekañahu hela chakwila aeluda azataña nañovu nikulomba wukwashu waNzambi. Neyi chumichi chimwekana, aeluda atela kwanuka mazu aYesu akwila nawu: ‘Twalekenuhu nakulomba akuyinka; keñakeñenu mukuwana; dondomwenenu akuyenzulwila.’ (Luka 11:9) Hela chakwila kulomba kwawu abula kukwakula swayi, ankoñi atela kwiluka nawu Yehova nateli kwakula hampinji yindi yatelela.

Chakutalilahu, chipompelu chamuIreland chakeñeleña chikupu nawu atuñi Itala daWanta, ilaña mukulumpi watalaña jakutaña matala wamunidi iluña wakaanini. Wakaanishili maluña ejima hakeñeleña kutuñilawu amana kwetu. Chamwekeni neyi muntu wateleleli kuyinka iluña hakutuñila wadiña mukulumpi watalaña jakutuña matala wamwituña dejima. Komana kulomba kwadi kuyikwasha neyi chikwamukwashili Fwinehasi kumpinji yakunyima?

Eluda wamunidi iluña wahosheli nindi: “Hanyima yakulomba chikupu nikulembelela, twayili kukasanji kamukulumpi watalaña jakutuña matala. Anlejeli nawu mukuhita nyilungu hakwila tukadimoni naniwu mukulumpi. Hela chochu, twatwesheli kuhanjeka nindi hadi jiminiti jitanu. Chamweniyi yipapilu hitwafunjekeli mwakutuñila, washikeneni dakwiteja, nawa kufumahu mukulumpi wamunidi iluña watachikili kutukwasha. Ichi chuma chamwekeni chatuleñeleli twiluki netu kulomba kwalema.” Eñañi, Yehova wakulaña kulomba kwakufuma hamuchima kwawaeluda amukuhwelelaña.

Fwinehasi wadiña namudimu weneni muIsarela wakushankulu; ilaña, hamuloña wakwikala nawulobu, kashinshi, nikushindamena hadi Nzambi, watwesheli kumanisha kukala munjila yayiwahi. Nawa Fwinehasi wadiña nawuselewa waYehova hamuloña wakwakamena chikupu chipompelu chaNzambi. Chimwahitili yaaka 1,000, Ezera amoneneni kusoneka nindi: “Mwana kaEleyazari Fwinehasi diyi wayiyulileña hamwaka, Yehova wadiñi nayena.” (1 Kushi. 9:20) Tunakulomba netu antu ejima anakulombola antu jaNzambi makonu, dikwila nawu akwaKristu ejima amukalakelaña nakashinshi eleña mwomumu.