Komana Yehova Wayiluka?

“Yehova weluka antu indi.”—2 TIM. 2:19.

1, 2. (a) Yesu washili muchima kuchumanyi? (b) Malwihwinyi itwatela kutoñojokahu?

 IFUKU dimu kaFwarisi wumu wamwinhwili Yesu nindi: “Lushimbi lwabadika nshimbi jejima lushimbinyi?” Yesu wakwili nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.” (Mat. 22:35-37) Yesu wamukeñeli Tata yindi wamwiwulu chikupu nawa welileña mwatalisha awa mazu. Yesu washili cheñi maana hakwikala nawubwambu wawuwahi naYehova, wamwekesheli mwenimu kuhitila mukwikala washinshika muchihandilu chindi. Dichi, henohu kanda yafwi, wahosheli nindi Nzambi wamwilukili nindi wadiña nakwovwahila chikupu nshimbi Jindi. Dichi Yesu watwalekeluhu nakushakama mukukeña kwaYehova.—Yow. 15:10.

² Antu amavulu makonu ahoshaña nawu amukeña Nzambi. Anetu nawa twekala hakachi kanawantu. Hela chochu, twatela kudihula chikupu netu: ‘Komana Nzambi wañiluka? Indi Yehova wamonaña ñahi? Wañiluka nindi nekala muntu windi?’ (2 Tim. 2:19) Kwikala nawubwambu wawuwahi naMwanta wakuleña kwejima hichuma chachiwahi nankashi.

3. Muloñadi antu amakwawu chichayikalilaña kwiluka nawu anateli kukundama kudi Yehova, nawa chumanyi chikuyikwasha kulonda ahimpi yitoñojoka yawu?

³ Ilaña, antu amakwawu amukeña nankashi Yehova chayikalilaña kukuhwelela nawu anateli kwikala amabwambu jaNzambi. Amakwawu atoñojokaña nawu hiyalemaku, dichi hiyanateli kwikala antu jaYehovaku. Twazañalalaña hakwiluka netu, Nzambi watumwenaña munjila yacheñi. (1 Sam. 16:7) Kapostolu Pawulu walejeli akwawu akwaKristu nindi: “Muntu wakeña Nzambi, diyi elukawu kudi Nzambi.” (1 Kor. 8:3) Hakwila nawu Nzambi yayiluki mwatela kumukeña. Toñojokenu: Muloñadi chimunakutañila iyi magazini? Muloñadi chimunakufwila kumukalakela Yehova namuchima wenu wejima, nawumi wenu wejima, namaanenu ejima ninañovu jenu jejima? Neyi mwadihana dehi kudi Nzambi nawa mwapapatishewa dehi, muloñadi chimwafuukwiluhu kwila mwenimu? Bayibolu yalumbulula nawu Yehova washinshikaña munyichima, wakokaña antu amwovu. (Tañenu Hagayi 2:7; Yowanu 6:44.) Dichi, munateli kwiluka nenu munakumukalakela Yehova muloña nakukeña nindi mumukalakeleña. Hakashiya antu akokolayi neyi atwalekahu kwikala ashinshika kudi yenaku. Nzambi wayilemesha nankashi nawa wayikeña chikupu.—Mas. 94:14.

4. Muloñadi chitwatela kutwalekahu kutoñojoka hakulema kwawubwambu wetu naNzambi?

⁴ Neyi Yehova yatukokola, twatela kusha maana hakushakama mukukeña kwindi. (Tañenu Yuda 20, 21.) Anukenu nenu, Bayibolu yashimuna nawu chaswayi kuhuñumuka nakufuma kudi Nzambi. (Heb. 2:1; 3:12, 13) Chakutalilahu, henohu kanda yahoshi mazu ekala ha 2 Timotewu 2:19, kapostolu Pawulu wateneni aHimenusa naFwiletu. Awa amayala ayedi mpinji yimu adiña antu jaYehova, ilaña asenukili munsañu yalala. (2 Tim. 2:16-18) Anukenu nenu, nimuyipompelu yamu Aŋalija, antu amakwawu elukiluwu kudi Nzambi hiyatwalekeluhu nakwenda muchijeji chakuspiritu muyendeleñaku. (Ŋal. 4:9) Tulemeshenu wubwambu wetu wutukweti naNzambi.

5. (a) Yililwinyi yitwatela kwikala nayu hakwila nawu atwiluki kudi Nzambi? (b) Yakutalilahwinyi yitukuhanjekahu?

⁵ Kudi yililu yitwatela kwikala nayu neyi  tunakukeña netu atwiluki kudi Yehova. (Mas. 15:1-5; 1 Pet. 3:4) Chikuhwelelu nikudizoza kwambwileña antu elukiluwu kudi Nzambi. Tushinshikenu hayakutalilahu yiyedi yawantu akeñeluwu kudi Yehova hamuloña wakwikala naniyi yililu. Tukushinshika cheñi hadi muntu wadinkeli wanta nawa hamuloña wakudinka wanta amukaanini kudi Nzambi. Tukudizilaku yuma yalema kuniyi yakutalilahu.

Nkakulula Yawakwakukuhwelela

6. (a) Chumanyi cheliliyi Abarahama hamuloña wakukuhwelela muyikaninu yaYehova? (b) Indi Abarahama amwilukili ñahi kudi Yehova?

⁶ Abarahama himuntu “wamwitiyili Yehova.” Dichi amutena nawu “nkakulula yawakwakukuhwelela ejima.” (Kutach. 15:6; Rom. 4:11) Hamuloña wakwikala nachikuhwelelu, Abarahama wadihanini kushiya mukala windi, amabwambu jindi, nimaheta indi, wayili kwituña dacheñi. (Kutach. 12:1-4; Heb. 11:8-10) Abarahama watwelekeluhu kwikala nachikuhwelelu chakola. Chumichi chamwekeni hampinji yovwahililiyi nshimbi yaYehova yamulejeluwu nawu ‘yalambuli mwanindi Isaka.’ (Heb. 11:17-19) Abarahama wamwekesheli chikuhwelelu muyikaninu yaYehova, dichi Nzambi wamulemesheli chikupu; wamwilukili chikupu Abarahama. (Tañenu Kutachika 18:19.) Yehova hamwilukili hohu Abarahamaku; wamukeñeli Abarahama ibwambu dindi.—Yak. 2:22, 23.

7. Chumanyi chelukiliyi Abarahama hayikaninu yaYehova nawa wamwekesheli ñahi chikuhwelelu chindi?

⁷ Chidi chalema kwiluka netu Abarahama haswanini ituña damukaninuwu hayina mpinjiku. Nawa cheñi hamweni anyanindi hiyakuvula “neyi wusekulula wekala hachikumu chakaluñalwijiku.” (Kutach. 22:17, 18) Hela chakwila iyi yikaninu hiyashikijeweli mumpinji yaAbarahamaku, watwalekeluhu nakwikala nachikuhwelelu chakola mudi Yehova. Welukili nindi Nzambi washikijaña yikaninu yindi mpinji yejima. Eñañi, Abarahama washakamineña chihandilu chindi kwesekeja nayuma yakuhweleleliyi. (Tañenu Aheberu 11:13.) Komana Yehova watwiluka nindi tukweti chikuhwelelu neyi chadiña naAbarahama?

Kumuchiñeja Yehova Kwamwekeshaña Nawu Tudi Nachikuhwelelu

8. Yumanyi yafwilañawu nankashi antu?

⁸ Kudi yuma yitwafwilaña nankashi muchihandilu, yidi neyi kwiñila mumaluwi, kuvwala anyana, nikwikala akola kumujimba. Kukeña iyi yuma hikwatamaku. Ilaña etu amavulu yuma yitwakeñaña hitwayiwanañaku. Neyi chumichi chitumwekena, njila yitukuzatilamu nakukala yikumwekesha neyi mwalala tukweti chikuhwelelu chakola.

9, 10. (a) Yumanyi yelañawu antu amakwawu hakuwana yuma yakeñañawu? (b) Mwatoñojokaña ñahi hakushikijewa kwayikaninu yaNzambi?

 ⁹ Tunateli kuluwañesha neyi tutachika kukeña yuma yitwafwilaña munjila yambukaku namaana aNzambi. Chinateli kukisañana wubwambu wetu naYehova. Chakutalilahu, antu amakwawu akeñaña njila yakuyukilamu yabulaña kwesekana nanshimbi jaYehova. Amakwawu eñilaña nyidimu yayileñelaña abuleña kuwana mpinji yakushakama hamu nayisaka yawu hela akañanyeña kuya nakupompa. Amakwawu atachikaña kukeña muntu wabula kwitiya. Neyi mukwaKristu yalondela njila yamuchidiwu, komana mwalala nakukeña amwiluki kudi Yehova? Neyi Abarahama walekeli kuchiñeja kushikijewa kwayikaninu yamukaninuwu kudi Nzambi, indi Yehova wadi kutiya ñahi? Chumanyi chadi kumwekana neyi Abarahama watachikili kwila yuma munjila yakeñeleñayi yomweni, kwikala nachihandilu chachiwahi nikutiyakana ijina chatela yamuchiñeji Yehova? (Esekejenu Kutachika 11:4.) Komana Yehova wadi kutwalekahu nakumumona nindi hibwambu dindi?

¹⁰ Yumanyi yimwakeñeshaña nankashi? Komana mukweti chikuhwelelu chakola chikuyileñela mumuchiñejeña Yehova, watukana nindi wukatwinka yuma yitwakeñaña? (Mas. 145:16) Yikaninu yaYehova yikwawu hiyinateli kushikijewa hampinji yitunakeñiku. Ilaña neyi tutwalekahu kumwekesha chikuhwelelu neyi chadiña naAbarahama, Yehova hakatuvulamenaku. Wakatwinka yuma yitwakeñaña.—Heb. 11:6.

Chakutalilahu Chakudizoza niKudinka Wanta

11. Nyidimwinyi yakalakeleñayi Kora, nawa yililu yamuchidinyi yamwekesheliyi kudi Nzambi?

¹¹ Hekala chaambu cheneni chikupu hakachi kaMosi naKora kutalisha hakulemesha ntanjikilu yaYehova nikufuukula kwindi. Yehova wayilukili kwesekeja nayuma yakoñeluwu. Kora wadiña kaLevi wamuchisaka chaKohati nawa wadiluñishili muloña wadina nakukooleka kweneni. Hadaha wadiña nakukooleka kwakumona Yehova chapulwishiliyi aIsarela haKaluñalwiji Kachinana, kuhakwilaku wunsompeshi waYehova wasompesheliyi aIsarela adikañili Hampidi yaSinayi, nimudimu wakusenda chimbañu chachitiyañenu. (Kwid. 32:26-29; Kuch. 3:30, 31) Wadiña washinshika kudi Yehova hadi yaaka yayivulu nawa antu amavulu muIsarela amulemesheli.

12. Kwesekeja nachinamwekeshuwu hefu 28, kuditiya kwaKora kwaluwañesheli ñahi wubwambu windi naNzambi?

¹² Hela chochu, hela chakwila munza waIsarela wadiña kwakwihi nakwiñila Mwituña daChikaninu, Kora wamweni nindi Yehova waluwañesheli munjila yadiña nakulombwelamu munza. Kuhiñahu amayala amakwawu 250 alombweleña mumunza adibombeli naKora hakufwila kuhimpa yuma. Kora niakwawu atela atoñojokeleña nawu akoñeleña mwaloña kwesekeja nawubwambu wawu naYehova. Amulejeli Mosi nawu: “Munadikilakeshi dehi, chipompelu chejima chajila niwunashaluhu hosi, Yehova wudi mukachi kawu hohu.” (Kuch. 16:1-3) Mwalala aswejeli kudikuhwelela chikupu nikuditiya! Mosi wayilejeli nindi: “Yehova wakamwekesha windi.” (Tañenu Kuchinda 16:5.) Chashikili ifuku damuchiyedi, Kora niantu ejima adikañili adiña kukabadi kindi afwili.—Kuch. 16:31-35.

13, 14. Indi Mosi wamwekesheli ñahi kudizoza?

¹³ Kwambukaku, Mosi “wadiñi mwovu nankashi kubadika amayala ejima ekala heseki dejima.” (Kuch. 12:3) Wamwekesheli kwovwaha kwindi nikudizoza kuhitila mukufwila chikupu kulondela wunlomboli waYehova. (Kwid. 7:6; 40:16) Kwosi wunsahu wamwekeshaña nawu Mosi wadiña nakujinooka njila yaYehova yakoñeleleñamu yuma hela nawu wahilili hakulondela njila  jamulejeluwu kudi Yehova. Chakutalilahu, Yehova wahanini nshimbi jejima jakulondela hakutuña tabanaka, chidi neyi wulombu wawanda ninaambala yañanda yazatishiluwu hakutuña mahina. (Kwid. 26:1-6) Neyi nkoñi wayilombolaña mukuloñesha kwaNzambi yayileja nshimbi jinakumwekana kukala chikupu, mpinji yikwawu munateli kuhila. Hela chochu, Yehova diyi nkoñi wawanina, wenkaña chikupu ambuñindi nyidimu nawa wayikuhwelela. Kudi yuma yayiwahi yaleñelaña yahaneña nshimbi jajivulu. Ilukenu nenu, Mosi chamwinkeluwu nshimbi jajivulu jakulondela kudi Yehova hahililuku, hamweni nindi Yehova wadiña nakumusawula hela kumukañeshaku. Ilaña, Mosi walejeli antu ‘kwila mwayilejeluwu’ hakulondela nshimbi jaNzambi. (Kwid. 39:32) Mwalala Mosi wadiña wadizoza! Mosi welukili nindi mudimu wadiña wambala waYehova nawa yena amuzatishili hohu hakwila mudimu awuzati.

¹⁴ Mosi wamwekesheli cheñi kudizoza nihampinji yamweniyi kukala. Mpinji yimu, Mosi wazuwili chelili antu atachiki kumutobwesha nawa hamulemesheli Yehovaku. Chafuminumu, Yehova wamulejeli Mosi nindi hakeñija antu Mwituña daChikaninuku. (Kuch. 20:2-12) Yena nimana kwindi Aroni, akabakeni hadi yaaka yayivulu nakutiyilila chatobeleñawu aIsarela. Kuhiñahu, hamuloña wakwila Mosi waluwañesheli, hatambwilili chuma chadiña nakutalilayi hadi mpinji yayilehuku! Chumanyi cheliliyi Mosi? Hela chakwila waneñeli, Mosi wadizozeli nakwiteja mwafuukwiliyi Yehova. Welukili nindi Yehova hiNzambi waloña, nawa haheñeshaña wuñajiku. (Kuhit. 3:25-27; 32:4) Neyi mutoñojoka hadi Mosi, komana mwamumonaña nenu himuntu elukiluwu kudi Yehova?—Tañenu Kwidika 33:12, 13.

Kudizoza Kwalema Hakwila Nawu Tumwovwahili Yehova

15. Chumanyi chitunateli kudizila kuyililu yaKora yakuditiya?

¹⁵ Tunateli kwikala hohu nawuselewa waYehova neyi twitejaña yuma yinakuhimpawu nikulemesha antu anakuzatishayi Yehova muchipompelu. Twelaña ñahi neyi antu anakuzatishayi Yehova afuukulahu hela ahimpa  nzatilu yamuchipompelu? Kora niakwawu ambukili kudi Nzambi hamuloña wakusweja kudikuhwelela, kuditiya, nikubula chikuhwelelu. Hela chakwila Kora wamweneña nindi Mosi wadiña washinakaja dehi diyi wafuukwileña mwatoñojokeleñayi, ilaña Yehova diyi walombweleña munza. Kora helukili mwenimuku nawa wakañenyi kumwekesha kashinshi kudi antu azatishileñayi Nzambi. Chadi kuwaha neyi Kora wamuchiñejeli Yehova nindi yalumbululi yuma yabulili kwilukayi hela kuhimpa yuma yidi yejima. Chafuminumu, Kora watamishili ijina dindi dakwikala washinshika kuhitila muyililu yakuditiya yamwekesheliyi.

16. Indi chakutalilahu chaMosi chakudizoza chikutukwasha ñahi?

¹⁶ Iyi nsañu yinakusoñamisha chikupu aeluda niantu ejima muchipompelu makonu. Chakeñekaña kudizoza hakumuchiñeja Yehova nikulondela wunlomboli wawantu atondawu anakulombola. Komana twamwekeshaña netu twadizoza nikwikala amwovu neyi Mosi? Komana twalemeshaña antu atulombolaña nikwovwahila mwatulejañawu? Komana twawundishaña muchima mwivumu neyi atuneñesha? Neyi twila mwenimu anetu nawa akutwiluka kudi Yehova. Wukutukeña neyi twikala adizoza nawa ovwahila.

Yehova Weluka Antu Indi

17, 18. Chumanyi chinateli kutukwasha kulonda atwalekuhu kutwiluka nawu tudi antu jaYehova?

¹⁷ Chachiwahi kushinshika hadi antu akwokweliyi Yehova nawa elukiliyi chikupu. Abarahama niMosi adiña abula kuwanina nawa aluwañesheleña neyi chochitwaluwañeshaña. Ilaña, Yehova wayilukili nindi adiña antu jindi. Hela chochu, chakutalilahu chaKora chamwekeshaña nawu chaswayi kufuma kudi Yehova nawa hanateli cheñi kutwilukaku. Wejima wetu twatela kudihula netu: ‘Indi Yehova wanmonaña ñahi? Chumanyi chitwatela kudizila kuniyi yakutalilahu yamuBayibolu?’

¹⁸ Munateli kuzañalala hakwiluka nenu Yehova wamonaña antu ashinshika nindi hiyantu jindi akokolayi. Twalekenuhu kwikala nachikuhwelelu, kudizoza, nikwikala nayililu yikwawu yikuyileñela ayikeñi kudi Nzambi yetu. Kutwiluka kudi Yehova hikukooleka kweneni kwaletaña muzañalu muchihandilu chetu makonu, nawa kukaleta nkisu kumpinji yakumbidi.—Mas. 37:18.

Munakwanuka?

• Wubwambu wamuchidinyi wumwatela kudiluñisha naYehova?

• Munateli kwimbujola ñahi chikuhwelelu chaAbarahama?

• Yumanyi yitunateli kudizila kudi Kora niMosi?

[Malwihu aKuzatisha haKudiza]

[Mwevulu wudi hefu 26]

Kufwana Abarahama, twakuhwelela netu Yehova wukashikija chikupu yikaninu yindi?

[Mwevulu wudi hefu 28]

Kora hakeñeleña kwovwahila wunlomboliku

[Mwevulu wudi hefu 29]

Komana Yehova wayiluka nindi mwovwahilaña wunlomboli?