Temukenu Lufuchi Nakuumika

‘Tutemukenu lufuchi lwanatupiminuwu nakuumika.’—HEB. 12:1.

1, 2. Kapostolu Pawulu wesekejeli chihandilu chawakwaKristu nachumanyi?

 CHAAKA nichaaka kwekalaña yisela yakutemuka lufuchi mumaluña amavulu. Akwakutemuka lufuchi amakwawu akuluka yitembi, nawa akeñaña kuhita nakushika kunsa. Ilaña akwakutemuka amakwawu eluka nawu hiyanateli kuhita nakushiyamu akwawuku. Wena afwilaña hohu kumanisha lufuchi nakushika kumufunda.

² MuBayibolu, chihandilu chawakwaKristu achesekeja nakutemuka lufuchi. Kapostolu Pawulu wahosheli hanichi chikuma hampinji yayisonekeleliyi akwaKristu akunyima amuKorinda mumukanda windi watachi. Wasonekeli nindi: “Muneluki nenu antu adesekaña lufuchi lwawu atemukaña wejima wawu, kwinza kusomona, akusomona wumu hohu. Ninenu temukenu kulonda akayisomoni.”—1 Kor. 9:24.

3. Pawulu watalishili mudihi hakuhosha nindi wumu hohu diyi akasomonawu?

³ Komana Pawulu watalishili mukwila nindi mukwaKristu wumu hohu diyi wakatambula nfwetu yawumi, ilaña ejima anakutemuka lufuchi anakudikabisha tuhu? Inehi! Akwakutemuka lufuchi lwakudibecha adizileña nakudinkaku nankashi nachikonkwanyi chakukeña kuhita nakushiyamu akwawu. Dichi Pawulu wakeñeleña nindi akwawu akwaKristu azati nañovu kulonda atwalekuhu kwikala ashinshika kudi Yehova nikumanisha lufuchi lwayipimininuwu. AkwaKristu ejima akwila mwenimu akayisomona wumi wahaya nyaka.

4. Chumanyi chitwatela kwiluka halufuchi lwanatupiminuwu?

⁴ Awa mazu atukoleshaña nankashi, ilaña atuleñelaña cheñi kutoñojoka chikupu hachihandilu chetu. Neyi twilaña yuma yamuzañaleshaña Yehova, tukwikala nakuchiñeja kwakuwahi kwakushakama haya nyaka mwiwulu hela hamaseki. Ilaña chihandilu chamukwaKristu chidi neyi kutemuka lufuchi munjila yayilehi mudi wubanji wawuvulu. (Mat. 7:13, 14) Chawushona, antu makwawu atachika dehi kwenda chovu, amakwawu aleka, amakwawu niwena adimbukila hakachi. Nyihetwinyi niwubanjinyi wudi mulufuchi lwakuya kuwumi? Munateli kuyitondolwela ñahi? Chumanyi chimwatela kwila kulonda mutemuki nakushika kunsa nakutambula nfwetu?

Twatela Kuumika Hakwila Twakashiki Kumufunda

5. Chumanyi chalumbulwiliyi Pawulu hamukanda waAheberu 12:1?

⁵ Hamukanda wasonekeleli Aheberu akwaKristu amuYerusalema nimuYuda, Pawulu wahosheli cheñi hadi akwakutemuka lufuchi. (Tañenu Aheberu 12:1.) Walumbulwili muloña wateleleluwu akwaKristu kutwalekahu nakutemuka lufuchi lwawu nichuma chateleli kwilawu kulonda akashiki kumufunda. Henohu kanda tushinshika hakufumba kwaPawulu kwonenewa kwalejeliyi akwaKristu Aheberu kulonda tumoni yuma yitwatela kudizilaku, tusambilenu kushinshika chuma chamuleñeleli Pawulu yasoneki mukanda nichuma chafwilileñayi nindi antañi jindi akoñi.

6. Ikakeja damuchidinyi damweneñawu akwaKristu kudi akulumpi jansakililu?

⁶ AkwaKristu amuyaaka nkulakaji yakusambila, sweje-e ashakamineña muYerusalema nimuYuda, ahitili mukweseka kwakuvulu nimukukala. Akulumpi jansakililu yawaYudeya adiña nakuyikakeja chikupu, nawa adiña  nakuluwañesha antu nankashi. Hakusambila, aleñeleli antu kukuhwelela nawu Yesu Kristu hadiña nakwovwahila nfulumenduku nawa wadiña mbanji wateleleli kufwa. Awa akulumpi jansakililu amujahili Yesu Kristu, nawa akeñeleña kulekesha antu adiña nakushimwina hadi Yesu. Mumukanda waYililu, twatañañamu nsañu yahoshaña hachuma chamwekeni hanyima yaPentekosta 33 C.E. Dichi akwaKristu ashinshika chihandilu chayikalili chikupu.—Yil. 4:1-3; 5:17, 18; 6:8-12; 7:59; 8:1, 3.

7. Mpinjinyi yakala yashakamineñamu akwaKristu asonekeleliyi Pawulu mukanda?

⁷ Chuma chikwawu chaleñeleli awa akwaKristu ashakameña mumpinji yakala, muloña musumba waYerusalema wadiña kwakwihi nakujilumuka. Yesu wayisoñamishili nindi Nzambi wakajilumuna Yerusalema. Wayilejeli chuma chakamwekana henohu kujilumuka kanda nichuma chateleleli kukoñawu hakwila nawu apuluki. (Tañenu Luka 21:20-22.) Chumanyi chateleleli kwilawu? Yesu wayisoñamishili nindi: “Babalenu enu aweni, nyichima yenu yakenda kasweja kwikuta, nakusheta walwa, nikwakama yuma yawumi wunu, ifuku odu dakenda kayikasumwisha neyi muhetu.”—Luka 21:34.

8. Chumanyi chaleñeleli akwaKristu amakwawu kufunta hanyima nakuleka kumukalakela Yehova?

⁸ Hampinji yasonekeliyi Pawulu mukanda windi kudi Aheberu, mwahitila yaaka kwakwihi na 30 kufuma hasoñamishiliyi Yesu. Chumanyi chamwekeni kudawa akwaKristu muniyi yaaka 30? Antu amakwawu ahuñumukili nekakeja ninayuma yaluwañeshaña yamwekanaña muchihandilu ifuku niifuku nawa akañenyi kuyilaku hambidi kuspiritu nikukolesha wubwambu wawu naYehova. (Heb. 5:11-14) AkwaKristu amakwawu atela atoñojokeleña nawu chadiña chachiwahi kwikala nachihandilu neyi chadiña nawaYudeya amavulu. Atoñojokeli nawu aYudeya hiyalekeli kumukalakela Nzambi chikupuku; achidiña kulondela Nshimbi yaMosi. Cheñi, muchipompelu mwadiña antu akanjikijileña akwawu nawu ovwahili Nshimbi yaMosi nitushidikilu twawaYudeya. Indi Pawulu wahosheli nindidi hakwila nawu yakwashi amana kwindi akwaKristu kwikala atona kuspiritu nikuumika hakutemuka munilu lufuchi?

9, 10. (a) Kumakumishilu amukanda waAheberu kapetulu 10, twatañañaku mazwinyi akukolesha ahosheliyi Pawulu? (b) Muloñadi Pawulu chasonekeleliyi hanyidimu yakashinshi yakoñeluwu ayinsahu akunyaka?

⁹ Yehova wamoneneni Pawulu kusoneka mukanda wakukolesha akwaKristu Aheberu. Mukapetulu 10 kamukanda windi, Pawulu wahosheli nindi Nshimbi “jikweti mwevulu wayuma yayiwahi yikwinza” nawa walumbulwili cheñi ifutu damuloña daKristu chidalemena. Kukumana kwakapetulu, Pawulu wakonkomweneni antañi indi nindi: “Chiña mutatakena kulonda chimukwila muneli dehi muchima waNzambi mwakatambuli chikaninu. Nawu, Hanashali hanti nakwinza yena elañawu nawu wakenza, hakalabaku.”—Heb. 10:1, 36, 37.

¹⁰ Mumukanda waAheberu kapetulu 11, Pawulu walumbulula chachiwahi mwatalisha kumukuhwelela chikupu Nzambi. Nawa washimuna yakutalilahu yakunyaka yawamayala niambanda adiña nachikuhwelelu. Muloñadi chahosheleliyi hachikuhwelelu henohu kanda yahoshi cheñi hakuumika? Muloña wakeñeleña awa akwaKristu eluki nawu hakwila amwekeshi chikuhwelelu chalala mudi Yehova, ateleli kuumika nikubula woma. Chakutalilahu chachiwahi chemikili ambuña aYehova ashinshika akunyaka chadi kukolesha Aheberu kuumika kweseka nikukala kwamweneñawu. Dichi, hanyima yakushimuna nyidimu yañovu yakoñeluwu antu ashinshika akunyima, Pawulu wahosheli nindi: “Chanatunyeñumukuwu kudi ivu dawayinsahu dikumaha, tutentekenu yuma yikutulemenaña yejima, ninshidi oyu yanyakalaña kutulamata, tutatakenenu [tuumikenu] nakutemuka njila yanatupiminuwu.”—Heb. 12:1.

“Ivu dawaYinsahu”

11. Kutoñojoka hachakutalilahu ‘chevu dawayinsahu deneni,’ kunateli kutukwasha ñahi?

¹¹ Pawulu wahosheli nindi ambuña  aYehova adiñaku henohu akwaKristu kanda ekaluku adiña ‘ivu deneni dawayinsahu datunyeñumuka.’ Atwalekeluhu kwikala ashinshika kudi Yehova sampu nikukufwa kwawu, nawa chakutalilahu chawu chamwekeshaña nawu, akwaKristu anateli kwikala ashinshika kudi Yehova nimukukala. Idi “ivu dawaYinsahu” dadiña neyi akwakutemuka lufuchi ashikili kumufunda. Chakutalilahu chawu chakoleshaña amakwawu kutwalekahu nakutemuka kushika nikumufunda. Neyi chakwila tunakutemuka lufuchi nawa twiluka netu akwakutemuka lufuchi akuluka yitembi anakututala nikutukolesha nawu tutwalekuhu nakutemuka, tunateli kudinkaku chikupu kulonda tushiki kumufunda. Dichi Aheberu akwaKristu ateleleli kutoñojoka hachakutalilahu chawambuña aYehova akunyima. Chakutalilahu chawu chayileñeleli ekali nawulobu nikwiluka nawu niwena anateli ‘kutemuka lufuchi nakuumika’ nakushika nikumufunda. Anetu nawa tunateli kutwesha.

12. Yumanyi yitukudizila kudi antu adiña nachikuhwelelu ateneniyi Pawulu?

¹² Antu amavulu ashinshika ateneniyi Pawulu amweneña kukala neyi kutunakumona makonu. Chakutalilahu, Nowa washakamini mumpinji yakwila kaayi kadiña kwakwihi nakujilumuka naDibaji. Tunakushakama kwakwihi nakujilumuka kwakanu kaayi katama. Abarahama niSara ayilejeli kushiya mukala wawu nakukakela kukudifukula kwalala nakuhembelela kushikijewa kukana kwaYehova. Anakutukonkomwena nawu twatela kudibonda kulonda twikali nawuselewa waYehova tukatambwili nkisu jinatuhembeluwu. Mosi wendeli muchinkalampata mwafwana, nakuya Mwituña daChikaninu. Anetu tudi munjila yakuhita mukanu kaayi kanakuya nukujilumuka, tunakuya nakwiñila mwituña dadiha. Chikuwaha neyi tukutoñojoka hachihandilu chanawa antu ashinshika. Tunateli kwimbujola yuma yakoñeluwu hakumuzañalesha Yehova nikudizila kuyuma yakoñeluwu yabulili kumuzañalesha.—Rom. 15:4; 1 Kor. 10:11.

Chumanyi Chayikwashili Kutemuka Nakushika niKumufunda?

13. Kukalanyi kwamweniyi Nowa, nawa chumanyi chamukwashili kuumika?

¹³ Chumanyi chakwashili awa ambuña aYehova kuumika nikutemuka lufuchi nakushika nikunsa? Talenu nsañu yasonekeliyi Pawulu hadi Nowa. (Tañenu Aheberu 11:7.) ‘Dibaji damenji hamaseki, dakajilumuna mwishina dewulu akwanyijimba ejima’ hichuma ‘chadiña kanda chimwekaneñahu dehi’ chabulili kwilukayi Nowa. (Kutach. 6:17) Dibaji dadiña kanda dimwekaneñahu dehi. Ilaña, Nowa welukili nindi Dibaji dakenza. Muloñadi? Muloña wakuhweleleli nindi Yehova washikijaña yuma yejima yashimunayi. Dichi Nowa hatoñojokeli nindi chuma chamulejeluwu kwila chadiña chakalaku. Ilaña, “mwamulejeliyi Nzambi dimu mweliliyi.” (Kutach. 6:22) Kutoñojoka hayuma yejima yateleleli kwilayi Nowa, kutuña watu, kuleta atunyama, kupompesha yakudya yawantu nikwiñija atunyama muwatu, kushimwina nsañu yakusoñamisha, kukwasha chisaka chindi kulonda chikali chakola kuspiritu hiwadiña mudimu wapelaku. Ilaña, chikuhwelelu chaNowa nikuumika kwamuleñeleli yapuluki nichisaka chindi nawa ayikiswilili.

14. Kwesekanyi kwomikiliyi Abarahama niSara, nawa chumanyi chitukudizilaku?

¹⁴ Kuhiñahu Pawulu wateneni Abarahama niSara nindi niwena ekala hanidi ‘ivu dawayinsahu datunyeñumuka.’ Chihandilu chawu chahimpikili chelili Nzambi yayileji kushiya mukala wawu waUri. Adiña nachikuhwelelu chakola nawa ovwahilili nimumpinji yakukala. Kwesekeja nayuma yejima yakoñeliyi Abarahama nichadihaniniyi kulonda yatiyakeshi kudifukula kwalala, dihafumini hiyakumutena nawu “nkakulula yawakwakukuhwelela ejima.” (Rom. 4:11) Pawulu washimwini hohu yuma yakoñeluwu yamwekesheli chikuhwelelu, muloña antañi jindi adiña eluka dehi chihandilu chaAbarahama chejima. Hela chochu, Pawulu wahosheli hadi wena nindi: “Wenawa ejima [kushilahu Abarahama nichisaka chindi] afwili mukukuhwelela chakadi kutambula yikaninu,  akuminini dakuyimwena maaya, nakuyisambilila iku yichidi kwakulehi, hiyakwiteja nawu tudi enyi niakwakwenda mwambala hanu hamaseki.” (Heb. 11:13) Eñañi, chikuhwelelu chawu mudi Nzambi niwubwambu wawu nayena kwayikwashili kutemuka lufuchi nakumika.

15. Chumanyi chamuleñeleli Mosi kwikala nachihandilu chakubula kufwila maheta?

¹⁵ Mosi niyena hikambuña aYehova wemika chakutalilahu chachiwahi wekala hakachi kanidi ‘ivu dawayinsahu.’ Mosi washili maheta, nichifulu nawa ‘watondeli kumona ihuñu chimu nawantu aNzambi.’ Chumanyi chaleñeleli yakoñi muniyi njila? Pawulu wakwili nindi: “Chatalililiyi masomu amba kamusomonawu. . . . Chadiñi nakumonayi wakamonewaña hakutatakena.” (Tañenu Aheberu 11:24-27.) Mosi haluwankeni ‘nakuluña kwampinji yantesha nachiseki chanshiduku.’ Mosi wakuhweleleli chikupu yikaninu yaNzambi nawa wamwekesheli wulobu nikuumika. Wazatili nañovu chikupu hakulombola aIsarela kufuma kuEjipitu nakuya Mwituña daChikaninu.

16. Muloñadi Mosi chabulililiyi kuneña hampinji yamulejeluwu nawu hakwiñila Mwituña daChikaninu?

¹⁶ Abarahama niMosi afwili henohu Nzambi kanda yashikiji yikaninu yayikaniniyi. Henohu aIsarela kanda eñili Mwituña daChikaninu, Nzambi wamulejeli Mosi nindi: “Ituña wakakumina dakudimona kwanamesu hohu, eyi kwiñila mwituña dinukuyinka anyana kaIsarela nehi.” Muloña hakusambila Mosi niAroni ayihilishili kudi antu adikañili nawa ‘amumotokeleli Nzambi hiyadiñi nawanyana kaIsarela kumenji andombu kuKadeshi.’ (Kuhit. 32:51, 52) Komana Mosi waneñeli hela kuhemba nkunyi? Inehi. Wayikiswilili antu nawa wakunkulwili namazu akwila nindi: “Eyi Isarela, O chiwamona kuwaha! Wudi neyi eyi hinyi? Muza wakwamwina kudi Yehova nkebu yeyi yakukwashaña, diyi mpoku yeyi yakabali yawanta weyi.”—Kuhit. 33:29.

 Yuma Yitwatela Kudizilaku

17, 18. (a) Yumanyi yitunateli kudizila ‘kwivu dawayinsahu’? (b) Yumanyi yitwakahanjekahu muchibaaba chinahiñuhu?

¹⁷ Kwesekeja nansañu yitunahitulukumu yachihandilu chawantu ekala ‘mwivu dawayinsahu datunyeñumuka,’ yinatukwashi kwiluka netu hakwila nawu tutemuki lufuchi lwanatupiminuwu nakushika kumufunda, twatela kumukuhwelela Nzambi chikupu niyikaninu yindi. (Heb. 11:6) Chihandilu chetu chatela kushindamena hayuma yitwakuhwelela. Tweluka netu Yehova watukana chihandilu chachiwahi. Tunakumona “Wakamonewaña” nawa tunakutemuka lufuchi lwanatupiminuwu nakuumika.—2 Kor. 5:7.

¹⁸ Lufuchi lwatemukañawu akwaKristu lwakala. Hela chochu, tunateli kutwesha kutemuka lufuchi nakushika kumufunda. Muchibaaba chinalondeluhu, twakahanjeka hayuma yikwawu yitukweti yinateli kutukwasha.

Munateli Kulumbulula?

• Muloñadi Pawulu chasonekeleliyi hanyidimu yachikuhwelelu yakoñeluwu ayinsahu ashinshika akunyaka?

• Indi kutoñojoka ‘hevu dawayinsahu datunyeñumuka’ kunateli kutukolesha ñahi kutemuka lufuchi nakuumika?

• Yumanyi yimunadizili kudawa ayinsahu ashinshika adi neyi Nowa, Abarahama, Sara niMosi?

[Malwihu aKuzatisha haKudiza]

[Mwevulu wudi hefu 19]

Abarahama niSara adihanini kushiya mahetawu muUri