Komana Yuma Yimwelaña Hampinji Yakunooka Yayiheteshaña?

‘Twalekenuhu nakushinshika yuma yamutiyishaña Mwanta kuwaha.’—EFWES. 5:9.

1, 2. (a) Indi Izu daNzambi damwekeshaña ñahi nawu Yehova wakeñaña nindi tudiluñisheña muchihandilu? (b) Neyi tukumonaña mpinji yakuhema netu “hichamukunkulu chakudi Nzambi” kukutuleñela etu kwiladi?

 MUBAYIBOLU yejima, twawanañamu mazu amwekeshaña nawu Yehova wakeñaña nindi tutwalekuhu nakuhanda nikudiluñisha muchihandilu. Chakutalilahu, mukanda waMasamu 104:14, 15 wahosha nawu Yehova diyi wasoñeshaña ‘yakudya mumaseki, nivinyu yakuluñisha nachu muchima wamuntu, nimanji akulezumwisha nachu mesu indi, niyakudya yaluñishaña muntu mumuchima.’ Eñañi, Yehova wakulishaña yisakola kulonda yisoñi mbutu, manji itwadyaña, nivinyu yitwanwaña. Ilaña vinyu ‘yaluñishaña cheñi muchima.’ Yabadika hakuhemba wumi nawa yatuzañaleshaña. (Mukwa. 9:7; 10:19) Mwalala, Yehova wakeñaña nindi tuzañalaleña, nyichima yetu yinzaleña ‘nakuluña.’—Yil. 14:16, 17.

² Dichi, hitwatela kuneña neyi mukuhita kwampinji tuwana mpinji ‘yakushinshika chachiwahi atujila ahaluzwizu’ ‘niwuluya wamwisaña’ hela kudiluñisha nanyidimu yikwawu yatuzañaleshaña nikuleñela wumi wetu wikali wawuwahuku. (Mat. 6:26, 28; Mas. 8:3, 4) Kwikala namuzañalu muchihandilu “hichamukunkulu chakudi Nzambi.” (Mukwa. 3:12, 13) Dichi neyi tukumonaña mpinji yakunooka netu niyena yidi hakachi kayawana yatwinkawu chikutuleñela tuyizatisheña munjila yayiwahi yikuzañaleshaña Mukwakuhana. *

Kudiluñisha Yuma Yamboka-mboka niMwakukumina

3. Muloñadi antu chatondelañawu yuma yamboka-mboka kutalisha hayuma yelañawu hampinji yakunooka?

³ Antu atoñojokaña nawu mpinji yakunooka yatama wanyi adiluñishaña yuma yayivulu ilaña elukaña cheñi mwakukumina. Muloñadi? Hakwila nawu twakuli, tusambilenu kwesekeja yisela nayakudya. Antu mumatuña amboka-mboka adyaña yakudya yashiyashana. Yakudya yakeñawu antu mwituña dimu mwituña dikwawu ayikeña wanyi. Munjila yoyimu, yuma yelañawu akwaKristu ekala mumatuña acheñi hampinji yakunooka yamonañawu nawu yayiwahi, akwaKristu kumaluña amakwawu hiyanateli kuyikeñaku. Hela tuhu akwaKristu ashakamaña mwiluña dimu, chuma chikumonayi muntu wumu nindi watela kuchila hampinji yakunooka (chidi neyi kutaña mukanda mudi nsañu yayiwahi), mukwawu wukutoñojoka nindi kwaletaña wuudi; mukwawu niyena wukutoñojoka nindi wukuzañalala (neyi yaya nakunyeñumoka nakaluwasha nakutala maluña amawahi), mukwawu wukutoñojoka nindi wukuzeya. Hela chochu, tuneluki netu munsañu jayakudya niyuma yitwelaña hakunooka, kudi yuma yayivulu yinateli kwilayi muntu nawa nateli kuditondela yomweni.—Rom. 14:2-4

4. Muloñadi chitwatela kwilukila mwakukumina kutalisha hayuma yitwatondaña yitwatela kwila hampinji yakunooka? Lumbululenu.

⁴ Hela chakwila kudi yuma yayivulu yitwatela kwila hampinji yakunooka hichinayi mukwila nawu tunateli kwila yuma yejimaku. Toñojokenu  cheñi hachakutalilahu chayakudya. Hela chakwila tunateli kudya yakudya yashiyashana, ilaña hitukutwesha kudya yakudya yatokaku. Muntu walumbuluka hanateli kudya yakudya yamuchidiwuku muloña yikumuletela yikatu. Munjila yoyimu, hela chakwila tunateli kutonda yisela yayiwahi yashiyashana, hitunateli kwila yisela yatama, yamadombu nawa yikuluwañesha chihandilu chetuku. Kuhema yisela yamuchidiwu kukutuleñela kufumpa nshimbi jamuBayibolu nawa yikuluwañesha chihandilu chetu chakumujimba nikuspiritu. Hakwila nawu twiluki mwakukumina, twatela kwilukila chadimu yuma yitwatela kwila hampinji yakunooka yinateli kutukwasha hela nehi. (Efwes. 5:10) Tunateli kwiluka ñahi?

5. Tunateli kwiluka ñahi netu yuma yitunatondi yinakwendela hamu nanshimbi jaNzambi?

⁵ Hakwila nawu yuma yitwatondaña yimuzañalesheña Yehova, yatela kwendela hamu nanshimbi yekala Mwizu daNzambi. (Mas. 86:11) Hakwila mwiluki neyi yuma yimunakukeña kwila yinakwendela hamu nanshimbi jaNzambi, mwatela kuzatisha kachikasha kanyanya mumwatela kukwabula. Ichi chikasha chikweti malwihu asatu anakuhosha nawu yumanyi, mpinjinyi nawa nawanyi. Tutalenu hanawa malwihu.

Yumanyi Yimukwila Hampinji Yakunooka?

6. Yisela yamuchidinyi yitwatela kukaana nawa muloñadi?

⁶ Henohu kanda mutondi chisela, mwatela kudihula lwihu lwatachi nenu, Yumanyi?—dikwila nawu, ‘Chisela chamuchidinyi chinnakukeña kutonda?’ Chimukufwilaña kwiluka ñakwilu, chikuyikwasha neyi mwanuka nenu kudi nyichidi yiyedi yayisela. Chisela chatachi, tunateli kuchikaana; chamuchiyedi, tunateli kujinoka. Indi chisela chatachi hichisela chamuchidinyi? Mukanu kaayi katama, yisela yayivulu yenzala nayuma yafumpaña chikupu nshimbi jamuBayibolu hela nshimbi jaNzambi. (1 Yow. 5:19) AkwaKristu alala akaanaña chikupu yisela yamuchidiwu. Yisela yamwekeshaña antu anakuyandisha akwawu, andemoni, wutumwa, kutala nyevulu yanzekesi hela madombu hela yisela yamwekeshaña yuma yikwawu yatama niyililu yazonda. (1 Kor. 6:9, 10; tañenu Chimwekeshu 21:8.) Hichikweti muloña neluña kutuduku, tukumwekesha kudi Yehova netu ‘twahela yuma yatama’ neyi tukaana kwila yisela yamuchidiwu.—Rom. 12:9; 1 Yow. 1:5, 6.

7, 8. Tunateli kwiluka ñahi netu chisela chitunatondi chachiwahi? Lumbululenu.

⁷ Muchidi wamuchiyedi wayisela yitwatela kuhema hampinji yakunooka hiyisela yabula kukaanishawu chikupu Mwizu daNzambi. Dichi, henohu kanda mutondi yisela yamuchidiwu, mwatela kuyesekeja nayuma yamonañayi Yehova nindi yayiwahi, kwesekeja nachahosha nshimbi jamuBayibolu. (Yish. 4:10, 11) Kufumahu, twatela kufuukulahu kwila chuma chikutukwashaku kwikala nachinleji chitooka. (Ŋal. 6:5; 1 Tim. 1:19) Tunateli kufuukula ñahi? Toñojokenu hansañu yayakudya: Henohu kanda tudyi yakudya yitwabulahu dehi kudya, twatela kwiluka yuma yinazatishuwu hakuyitelaka. Munjila yoyimu, henohu kanda tutondi yuma yitukwila hampinji yakunooka, twatela kwiluka chiyidi.—Efwes. 5:17.

⁸ Chakutalilahu, hadaha mwakeña yisela, nawa antu amavulu akeña yisela. Yisela yazañaleshaña antu. Komana mwakeña yisela hamuloña wakwila munoyu yisela anhemi aswejaña kudibecha, yafwana nankashi indi kwiji anhemi aswejaña kudikatisha, kuzañalala nakuleta mapumba, kuhameka ituña hela “yuma” yikwawu? Hanyima yakumona yuma yidimu, mukutoñojoka nenu yisela yeniyi hiyinakwendela hamu nayitoñojoka yaYehova ninsañu yakuwunda nikukeña yitwashimwinaña kudi antuku. (Isa. 61:1; Ŋal. 5:19-21) Ilaña neyi yisela yimunakukeña kwila hampinji yakunooka yayiwahi kumesu aYehova, dikwila nawu yumoyu yayiwahi nankashi nawa yinateli kuyizañalesha.—Ŋal. 5:22, 23; tañenu Afwilipi 4:8.

 Mpinjinyi Yinatela Kuyila?

9. Yumanyi yitunadizili kunilu lwihu, ‘Mpinjinyi yinatela kwila yumiyi?’

⁹ Mwatela kudihula lwihu lwamuchiyedi nenu, Mpinjinyi?—dikwila nawu, ‘Mpinjinyi yinatela kwila yumiyi? Nukuyila hadi maora añahi?’ Ñakwilu yalwihu lwamuchiyedi yikumwekesha chekala yitoñojoka yetu, yuma yitwamonaña netu yayiwahi niyabula kutelela. Hela chochu, ñakwilu yalwihu lwakwila nawu mpinjinyi? yinakumwekesha yuma yitwalemesha, dikwila nawu yuma yitwamonaña netu yalema niyabula kulema. Hanu dinu, chumanyi chikutukwashaku kwiluka netu yisela yalema muchihandilu chetu?

10, 11. Mazu ahosheliyi Yesu asonekawu haMatewu 6:33 atukwashaña ñahi kwiluka mpinji yitwatela kuzatisha hakuhema yisela?

¹⁰ Yesu Kristu walejeli atumbanji twindi nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima, nañovu jeyi jejima.” (Maku 12:30) Dichi, twatela kusambila kumukeña Yehova muchihandilu chetu. Twamwekeshaña netu twamukeña Yehova kuhitila mukulondela kusoñamisha kwaYesu kwakwila nawu: “Sambilenu kukeña wanta windi nikuloña kwindi, niyuma yejimiyi akayishilaku.” (Mat. 6:33) Indi awa mazu anateli kutukwasha ñahi kwiluka  netu yisela yalema nimpinji yitwatela kuzatisha?

¹¹ Talenu hanichi chikuma: Yesu watusoñamishili nindi ‘tusambili kukeña wanta.’ Hatulejeli nindi ‘tukeñeña hohu wantaku.’ Yesu welukili nindi hitukakeñaña hohu Wanta muchihandilu chetuku, ilaña kudi niyuma yayivulu yitwakeñaña. Twakeñaña hakukama, yakudya, yakuvwala, shikola, nyidimu, kuhema niyuma yikwawu. Hela chochu, hakachi kayuma yejima yitunakukeña, twatela kutwamijaku chuma chimu hohu, kukeña Wanta. (1 Kor. 7:29-31) Neyi twiluka chuma chitwatela kutwamijaku, tukusha yisela ninyidimu yikwawu hanyima nawa tukutwamijaku mudimu wetu walema wakusambila kukeña Wanta. Neyi twila mwenimu, kuhema yisela mumpinji mumpinji kunateli kutuzañalesha.

12. Indi lushimbi ludi haLuka 14:28 tunateli kuluzatisha ñahi kuyisela?

¹² Dichi, neyi hitukutala hampinji yitukuzatisha hakuhema yisela, twatela kwilukila chadimu mali itukuzatisha. (Luka 14:28) Twatela kwiluka mpinji yitukumanisha hakwila ochu chisela. Kuhiñahu, twatela kufuukulahu mpinji yitwatela kuzatisha kunichi chisela. Neyi ochu chisela chikutudiila mpinji yakwila yuma yalema yidi neyi kudiza Bayibolu nkawetu, kudifukula kwachisaka, kuya nakupompa kwawakwaKristu hela kushimwina nsañu yaWanta, hitukuchitondaku. (Maku 8:36) Neyi chisela chitwelaña mumpinji mumpinji chatwinkaña ñovu yakutwalekahu kukeña Wanta, twatela kwiluka netu mpinji yitwazatishaña kunichi chisela niyena yalema.

Anyi Inadikundaña Nawu?

13. Muloñadi chitwatela kutoñojokela chikupu hadi antu itwadikundaña nawu hakwila yuma yitwelaña hampinji yakunooka?

¹³ Mwatela kudihula lwihu lwamuchisatu nenu, Anyi?—dikwila nawu, ‘Anyi inatela kuhema nawu yisela?’ Twatela kwiluka antu itukuhema nawu. Muloñadi? Muloña yisela yitwahemaña yinateli kuwaha hela kutama kwesekeja nachidi amabwambu jetu. Neyi chochawahaña yakudya neyi tunakudya nawamabwambu jetu amawahi, kuhema yisela kwawahaña neyi tuyihemaña nawamabwambu akweti yililu yayiwahi. Dihafumaña antu amavulu, sweje-e atwansi, kudiluñisha chikupu neyi anakuhema hamu nawakwawu. Hela chochu, hakwila nawu twiluki netu chuma chitukwila hampinji yakunooka chikutukwasha, twatela kwilukila chadimu antu itukutambika niitukubula kutambika.—2 Kushi. 19:2; tañenu Yishimu 13:20; Yak. 4:4.

14, 15. (a) Indi Yesu wemikili chakutalilahu chamuchidinyi hakutonda amabwambu amawahi? (b) Twatela kudihula malwihu amuchidinyi kutalisha hadi amabwambu?

 ¹⁴ Tukuhetelamu nankashi neyi tulondela chakutalilahu chaYesu hansañu yakutonda amabwambu. Kufuma hatachikili kuleñawu yuma, Yesu wakeñeli antu. (Yish. 8:31) Hampinji yadiñayi hamaseki, Yesu wadiña nakutoñojokelaku antu ejima nikuyikeña. (Mat. 15:29-37) Hela chochu, Yesu welukili chaambu chadiña hakuseha nawantu nihakudikunda nankashi nawantu. Hela chakwila waseheleña nawantu ejima, ilaña wadikundileña hohu nawantu alondejeleña nshimbi. Hakuhosha nawapostolu indi ashinshika 11, Yesu wahosheli nindi: ‘Neyi mukwila munukuyileja mukwikala amabwambu jami.’ (Yow. 15:14; talenu cheñi Yowanu 13:27, 30.) Yesu watondeli hohu antu amulondeleleña nawa amukalakeleleña Yehova kwikala amabwambu jindi.

¹⁵ Neyi himukutonda muntu watela kwikala ibwambu denu chikupu hela nehi, mwatela kutoñojoka hamazu ahosheliyi Yesu. Mwatela kudihula nenu: ‘Komana iwu muntu wamwekeshaña munhoshelu nimuyililu yindi nindi wovwahilaña nshimbi jaYehova nijaYesu? Komana walemesha nshimbi yashimunawu muBayibolu nikwikala nayililu yayiwahi neyi yami? Chinatachika kudikunda nindi chikunkwasha kutwamijaku Wanta muchihandilu chami nikwikala kambuña aYehova washinshika?’ Neyi awa malwihu anayikwashi kumona owu muntu nenu nashikilumu, dikwila nawu munawani ibwambu denu wamuwahi imwatela kudiluñisha nindi hampinji yakunooka.—Tañenu Masamu 119:63; 2 Kor. 6:14; 2 Tim. 2:22.

Komana Yuma Yitwelaña Hampinji Yakunooka Yayiwahi?

16. Yumanyi yitwatela kwiluka kutalisha hayuma yitwelaña hampinji yakunooka?

¹⁶ Tunahanjeki mukwihihisha hamalwihu asatu kutalisha hayisela, dikwila nawu, yumanyi, mpinjinyi nawa anyi. Hakwila nawu yuma yitwelaña hampinji yakunooka yituzañalesheña, yatela kwendela hamu nanshimbi jamuBayibolu nankashi. Dichi henohu kanda twili yuma yidi yejima hampinji yakunooka, twatela kuyishinshika chikupu. Neyi hitukutala hayuma yeniyi, twatela kudihula netu: ‘Yumanyi yidi muniyi yisela? Yayiwahi tahindi yatama?’ (Yish. 4:20-27) Kutalisha hampinji, twatela kudihula netu: ‘Nukuhema maora añahi? Komana nateli kuzatisha mpinji yejimiyi nakuhema ichi chisela tahindi nehi?’ (1 Tim. 4:8) Kutalisha kudi amabwambu, twatela kudihula netu: ‘Anyi inukutambika? Komana antu inukutambika akweti yililu yayiwahi tahindi yatama?’—Mukwa. 9:18; 1 Kor. 15:33

17, 18. (a) Tunateli kwiluka ñahi netu yuma yitwelaña hampinji yakunooka yinesekani nanshimbi jamuBayibolu? (b) Chumanyi chimunadikasi mumuchima wenu kwila kutalisha hakutonda yisela?

¹⁷ Neyi yuma yitunakukeña kwila hampinji yakunooka hiyinesekani nanshimbi jamuBayiboluku munawa malwihu asatu, dikwila nawu hiyinateleluku. Ilaña, neyi yuma yitunatondi yinakwendela hamu nanshimbi jamuBayibolu munawa malwihu asatu, dikwila nawu yumiyi yikumulemesha Yehova nawa yikutuzañalesha.—Mas. 119:33-35.

¹⁸ Dichi, neyi hitukutonda yuma yakwila hampinji yakunooka, twatela kwila chuma chachiwahi hampinji yatelela nawa nawantu alumbuluka. Eñañi, wonsu wetu twikalenu namuchima wakulondeja kufumba kwamuBayibolu kwakwila nawu: ‘Hela munakudya hela munakunwa, mumwelaña mwejima, ilenu kulonda kulemesha Nzambi.’—1 Kor. 10:31.

[Tumazu twaheshina]

Munateli Kulumbulula?

Kutalisha hampinji yakunooka, munateli kuzatisha ñahi nshimbi jidi ha . . .

• Afwilipi 4:8?

• Matewu 6:33?

• Yishimu 13:20?

[Malwihu aKuzatisha haKudiza]

[Dayagiramu yidi hefu 9]

(Neyi munakukeña kumona ntanjikilu yejima talenu mumukanda)

✔Yumanyi

[Dayagiramu yidi hefu 10]

(Neyi munakukeña kumona ntanjikilu yejima talenu mumukanda)

✔Mpinjinyi

[Dayagiramu yidi hefu 12]

(Neyi munakukeña kumona ntanjikilu yejima talenu mumukanda)

✔Anyi

[Mwevulu wudi hefu 10]

Tunateli kumwimbujola ñahi Yesu hansañu yakutonda amabwambu niyuma yakwila hampinji yakunooka?