Kufumba kwakuwahi Hansañu Yawujiki Nimaluwi

“Chinahoshi ichi . . . nalondi kuyileja yuma yayiwahi, kulonda mukalakelaña Mwanta chakadi kuyiluwañesha.”—1 KOR. 7:35.

1, 2. Muloñadi muntu chatela kusandujolayi hakufumba kwamuBayibolu kwahoshaña hawujiki nihamaluwi?

 KUDI yuma yantesha yatuzañaleshaña nankashi, yatuneñeshaña hela kwakamena kubadika kudikunda namuntu weyala hela wamumbanda. Chineli yuma yejimiyi yatushikenaña, twatela kulomba kudi Nzambi kulonda yatulomboleña, ilaña kudi yuma yikwawu yatuleñela kwila mwenimu. MukwaKristu wunakukeña kushakama wujiki nateli kutoñojoka nindi antaña jindi hela amabwambu jindi anakumukanjikija nawu yasumbuli hela yasumbuki. Mukwawu niyena nakukeña kusumbula hela kusumbuka ilaña kanda yawani muntu walumbuluka. Amakwawu akeñaña muntu wakuyileja nyidimu yatela kuzatayi iyala hela mumbanda. Nawa akwaKristu ejima adi mumaluwi niajiki aholokelaña mukweseka kwakwila wuvumbi.

² Kweseka kwamuchidiwu hikwatuneñeshaña hohuku, ilaña kwatamishaña niwubwambu wetu naYehova Nzambi. Mukapetulu 7 kamukanda windi watachi watemesheleliyi Akorinda, Pawulu wayifumbili hansañu yawujiki nimaluwi. Wafwilileña kukolesha antañi jindi kulonda ‘ayileji yuma yayiwahi, kulonda amukalakelaña Mwanta chakadi kuyiluwañesha.’ (1 Kor. 7:35) Chimukudizaña haniku kufumba kunakuhosha haniyi nsañu yalema, esekenu kushinshika hachihandilu chenu, chili mudi ajiki hela mudi mumaluwi, neyi diyi njila yimwatela kumukalakelamu Yehova chikupu.

Muntu Watela Kufuukulahu Yomweni

3, 4. (a) Indi kukala kwenzaña ñahi neyi antu asweja kwakamena ibwambu dawu mujiki hela ntaña? (b) Indi kufumba kwaPawulu kunateli kukwasha ñahi muntu kwikala nayitoñojoka yayiwahi hansañu yamaluwi?

³ Neyi chichadiña kudi aYudeya amuyaaka nkulakaji yakusambila, antu amavulu makonu amonaña maluwi nawu alema nankashi. Neyi mukwenzi hela kansi wamumbanda yahitakana hachipimu chakadi kwiñila mumaluwi, amabwambu jindi niantaña atachikaña kumuleja mwakwilila. Hampinji yinakuhanjekawu, anateli kumuleja nawu yatachiki kukeña muntu watela kwikala mwini kwindi. Anateli kumwinyikila muntu watelela. Anateli nikukwata kafuta kulonda mwayedi wawu akahumañani. Kwila yuma muniyi njila mpinji yikwawu kwatiyishaña antu nsonyi, kwamanishaña wubwambu nikudihela.

⁴ Pawulu hakanjikijileña antu nindi eñili mumaluwi hela ashakami wujikiku. (1 Kor. 7:7) Yena watiyileña kuwaha kumukalakela Yehova chakadi mumbanda, ilaña walemesheli mwafuukwileña akwawu akeñeleña kusumbula. AkwaKristu hamuntu hamuntu makonu niwena akweti wuswa wakudifuukwila neyi anakukeña kwiñila mumaluwi hela kushakama wujiki. Antu amakwawu hiyatela kuyikanjikija kwiñila mumaluwi hela kushakama wujikiku.

Munateli Kutwesha Hela Chakwila Mudi Ajiki

5, 6. Muloñadi Pawulu chahamekeleliyi wujiki?

⁵ Mazu alema ahosheliyi Pawulu kudi Akorinda amwekeshaña nawu wamweneña nindi wujiki wawuwahi. (Tañenu 1 Akorinda 7:8.) Hela chakwila Pawulu hasumbwiluku, hadiña nakudeta hebwaambu nindi wabadika akwawu asumbwili neyi chadetañawu hebwaambu akulumpi amuKristendomuku. Ilaña, Pawulu washimwini yuma yayiwahi yadiluñishañawu ankoñi amavulu ansañu yayiwahi ajiki. Wateneni yumanyi?

 ⁶ MukwaKristu mujiki wetejaña nyidimu yakumukalakela Yehova yikukañanya kwilayi muntu wasumbula. Pawulu watambwilili mudimu wadimena wakwikala ‘kapostolu kawenimatuña.’ (Rom. 11:13) Tañenu Yililu kapetulu 13 kushika kukapetulu 20, nawa mulondelenu niakwawu amishonali kulonda mumoni chikutachikawu maluña akushimwina nikutuña yipompelu mumaluña amavulu. Hakuzata mudimu windi, Pawulu womikili makabi amavulu anakumonawu antu antesha makonu. (2 Kor. 11:23-27, 32, 33) Ilaña, hakwikala namuzañalu wakukwasha antu amavulu kulonda ekali atumbanji kwamuleñeleli kuumika kukala kwamweneñayi. (1 Tesa. 1:2-7, 9; 2:19) Komana wadi kuzata nyidimu yejimiyi neyi chakwila wadiña namumbanda hela nanyana? Hadaha hadi kutweshaku.

7. Hanenu chakutalilahu chawaYinsahu ajiki anazatishi mpinji yawu yawujiki nakutwala Wanta hambidi.

⁷ AkwaKristu amavulu ajiki azatishaña iyi mpinji hakukalakala chikupu mumudimu waWanta. Sara naLimbania, apayiniya ajiki akuBolivia, ayili nakushimwina kumukala wumu kwadiña antu abulahu dehi kutiya nsañu yayiwahi hadi yaaka yayivulu. Komana aneñeli hamuloña wakubula kesi kawuneñu mumatala? Ahosheli nawu: “Kudinu iluña kwosi chisanji hela TV, ilaña, antu anakutwalekahu kwila yuma yelañawu hampinji yakunooka, chidi neyi kutaña.” Akwanyikala amakwawu ayilejeleña awa apayiniya nyikanda yawaYinsahu jaYehova yatañileñawu ilaña aleka dehi kuyipulinta. Chineli ahela awanineña antu akweti mpwila yakudiza hamatala ejima hayileñawu, akwenu antu chayikalileña kufunta nakudiza nawantu amwekesheli mpwila. Kashinakaji wumu wamumbanda wayilejeli nindi: “Kukuma kwadinu ituña kudi kwakwihi muloña aYinsahu jaYehova anatushimwini.” Antu amakwawu amuniwu mukala atachikili kupompa.

8, 9. (a) Chumanyi chatoñojokeleñayi Pawulu hampinji yahosheliyi hakuwaha kwekala muwujiki? (b) Kukoolekanyi kukwetuwu akwaKristu ajiki?

⁸ Hela chochu, akwaKristu adi mumaluwi niwena ahetelañamu hakushimwina nsañu yayiwahi mumaluña mwekala antu akalisha. Ilaña nyidimu yikwawu yatambwilañawu apayiniya ajiki yinateli kuyikalila antu adi mumaluwi hela akweti anyana. Dichi, Pawulu welukili nindi kwachidiña nyidimu yayivulu yakutiyakesha nsañu yayiwahi kuyipompelu yamudina iluña. Wakeñeleña antu ejima kwikala namuzañalu  neyi chazañaleleñayi yena. Dihafumini Pawulu kuhosha nindi kumukalakela Yehova muwujiki hichuma chachiwahi nankashi.

⁹ Muhela wumu wamujiki nawa payiniya wakwituña daUnited States wasonekeli nindi: “Antu amakwawu atoñojokaña nawu mujiki hanateli kwikala namuzañaluku. Ilaña nachimoni neyi kwikala namuzañalu waweni chashindamena hawubwambu wukwetiyi muntu naYehova. Hela chakwila muntu watela kudihana hakwila yashakami wujiki, hichawana chachiwahi nankashi neyi muntu yachizatisha chachiwahi.” Kutalisha hakwikala namuzañalu, wasonekeli nindi: “Wujiki hiwakañeshaña muntu kubula kwikala namuzañaluku, ilaña diyi mpinji yayiwahi yakwikala namuzañalu. Neluki nami Yehova wamwekeshaña kukeña kudi antu ejima, ajiki niadi mumaluwi.” Chayinu mpinji iwu muhela nakuzatila mwituña mudi kukaankila kwawakwakushimwina aWanta. Neyi mudi ajiki, komana kwila muzatisha iyi mpinji kulonda mutañisheña antu nsañu yalala nehi? Anenu nawa mukumona nenu wujiki hichawana chalema nankashi chakufuma kudi Yehova.

Ajiki Anakukeña Kwiñila Mumaluwi

10, 11. Indi Yehova wakwashaña ñahi antu anakukeña kwiñila mumaluwi ilaña achidi kanda awani muntu watelela?

¹⁰ Hanyima yakushakama wujiki hadi mpinji yeneni, ambuña aYehova amavulu ashinshika afuukulañahu kukeña muntu wakudisumbula nindi. Hamuloña wakukeña wunlomboli, amulombaña Yehova nawu yayikwashi kulonda awani muntu walumbuluka.—Tañenu 1 Akorinda 7:36.

¹¹ Neyi munakukeña kudisumbula namuntu wakeñaña kumukalakela Yehova namuchima wejima neyi enu, mwatela kumulejamu Yehova mukulomba. (Fwi. 4:6, 7) Hela chakwila mukutalila hadi yaaka yayivulu, bayi muzeyaku. Mukuhwelelenu Nzambi yetu wukweti kukeña kulonda Ayikwashi, nawa wukuyinka ñovu yakuumika kukala kumukweti.—Heb. 13:6.

12. Muloñadi mukwaKristu chatela kushinshikilayi muntu wunamukeñi nindi yadisumbuli nindi?

¹² MukwaKristu wunakukeña kwiñila mumaluwi anateli kumukeña kudi muntu wabula kupama kuspiritu hela tuhu kudi muntu wabula kwitiya. Neyi chuma chamuchidiwu chiyimwekena, mwatela kwanuka nenu yihuñu yamonañayi muntu neyi yafuukula chatama hansañu yakutonda muntu wakudisumbula nindi yabadika chineñi chatiyañayi mujiki wunakutalila muntu wakudisumbula nindi. Chimwadisumbula tuhu, hela maluwi enu akuwaha hela ayihuñu, enu kwenu mukukakela hohu kudi mwinikwenu muchihandilu chenu chejima. (1 Kor. 7:27) Dichi wundishenu mumesu kuchina mwakenda keñila mumaluwi hamuloña wachineñi nakudiletela jomisha mbaña.—Tañenu 1 Akorinda 7:39.

Diloñeshenu Kumona Yuma Yamwekanaña Mumaluwi

13-15. Yumanyi yinateli kuleta kukala mumaluwi yatela kuhanjekawu anakukeña kudisumbula hampinji yakudiluka?

¹³ Hela chakwila Pawulu wahosheli hansañu yakumukalakela Yehova muwujiki, hasekesheli antu afuukwileña nsañu jakusumbula hela kusumbukaku. Ilaña, kufumba kwindi kwonenewa kwakwashaña eyala namumbanda kwiluka yuma yamwekanaña mumaluwi nikukolesha mpanda yawu yamaluwi.

¹⁴ Anakukeña kudisumbula atela kuhimpa yitoñojoka yawu kutalisha hachakekala maluwi awu. Hampinji yakudiluka, awa eyala namumbanda atoñojokaña nawu kukeña kwawu kwabadika chikupu nawa akazañalalaña hohu mumaluwi awu. Eñilaña mumaluwi nayitoñojoka yamuchidiwu nakukuhwelela nawu kwosi chuma chakayiletela chineñi hakachi kawu. Yitoñojoka yamuchidiwu yakutwamba. Yuma yamwekeshañawu antu anakukeña kudisumbula yazañaleshaña, ilaña yumiyi hidiyi hohu yinateli kukwasha ansumbuli nansumbuki kumanisha yihuñu yamwekanaña mumaluwuku.—Tañenu 1 Akorinda 7:28. *

¹⁵ Antu amavulu anafumi hakudisumbula ahayamaña, nikuneña hakumona mwinikwawu hakukaana kwiteja nsañu yalema  yinakuhanjekawu. Mwayedi wawu akutachika kuditadikisha neyi hiyakuhosha hansañu yamali niyuma yatela kwilawu hampinji yakunooka, kwakushakama nimapampa atela kuhempulawu atuwuku twawu. Wejima wawu akweti tuyiluwa twatela kuhilisha mukwawu. Hampinji yakudiluka, antu adiwulaña kuhosha haniyi yuma yalema, ilaña yinateli kuyiletela kukala kweneni mumaluwi. Antu anakukeña kudisumbula atela kuhosha hayumiyi henohu kanda adisumbuli.

16. Muloñadi adisumbula chatela kuditejelawu hansañu yakumanishilamu kukala kwamumaluwi?

¹⁶ Hakwila nawu akekala nachihandilu chamuzañalu, adisumbula atela kuzatila hamu hakumanisha kukala. Atela kuditeja chatela kufumbawu anyanawu nichakuhemba anvwali jawu ashinakaja dehi. Adisumbula hiyatela kwambuka hamuloña wehuñu dinakumonawu muchisakaku. Neyi azatisha kufumba kwamuBayibolu, anateli kumanisha kukala kwakuvulu, kuumika kukala kukwawu, nikutwalekahu kushakama hamu namuzañalu.—1 Kor. 7:10, 11.

17. Adisumbula ‘akaamaña yumanyi yamunu mwishina’?

¹⁷ Pawulu wahosheli cheñi hachuma chikwawu chamwekanaña mumaluwi ha 1 Akorinda 7:32-34. (Tañenu.) Adisumbula avula ‘kwaakama yuma yamunu mwishina,’ chidi neyi yakudya, yakuvwala, niyuma yabula kukundama kuyuma yakuspiritu. Muloñadi? Henohu wuchidi mujiki, mana kwetu wadikitileña nankashi mumudimu wakushimwina. Chasumbulayi, hakutoñojoka nindi watela kwikala nampinji nikuzata nañovu kulonda yahembi ñodindi nakumutiyisha kuwaha. Nimumbanda niyena dichamwilañayi nfumwindi. Yehova niyena dichelukayi. Weluka nindi hakwila nawu maluwi awahi eyala namumbanda atela kuzatisha mpinji niñovu yazatishileñawu mumudimu Windi henohu achidi ajiki.

18. Yumanyi yatela kuhimpawu kutalisha hayisela hanyima yakwiñila mumaluwi?

¹⁸ Hela chochu, kudi yuma yikwawu yitukudizilaku. Neyi adisumbula akwambula mpinji nikuzatisha ñovu yatela kuzatishawu kumudimu  waNzambi nakudakamena, komana kwila ela chuma chamuchidiwu kutalisha hakuzatisha mali azatishileñawu kunyima nakulanda yuma yakudizañalesha nachu hadiñiwu ajikuku? Indi mumbanda wukutiya ñahi neyi iyala wukutwalekahu chikupu kuhema muyisela nawamabwambu jindi? Indi iyala niyena wukutiya ñahi neyi mumbanda natwalekuhu kwila yuma yelileñayi nawakwawu? Owu akushiyawu chisayikila wukutachika kudihomba, nikuneña nakutoñojoka nindi mwinikwindi wamuhela. Neyi adisumbula akuzatila hamu nakukolesha mpanda yawu neyi eyala namumbanda, yumiyi hiyikumwekanaku.—Efwes. 5:31.

Yehova Wakeñaña Nindi Twikali Nayililu Yayiwahi

19, 20. (a) Muloñadi chitukuhoshela netu adisumbula niwena anateli kuholokela mukweseka kwakwila wuvumbi? (b) Wubanjinyi wukumwekana neyi adisumbula adambula hadi mpinji yeneni?

¹⁹ Ambuña aYehova atela kutwalekahu kwikala nayililu yayiwahi. Amakwawu afuukulañahu kusumbula hela kusumbuka nawu kuchina akenda kavulumuna. Ilaña, neyi antu anadisumbuli, hichinayi mukwila nawu hiyakaholokela mukweseka kwakwila wuvumbuku. Kunyima, musumba wukweti mpwembu jakola wakiñileña antu neyi chakwila antu akubatama mukachi kampwembu. Neyi muntu yedika hanji hampinji yinenzi amakombi niayilumbu afwana nakupupa mukala, owu muntu akumwiyila hela kumujaha. Munjila yoyimu, adisumbula atela kukiñewa kunsañu jawuvumbi hohu neyi eluka mwakukumina nikwovwahila nshimbi jayinkawu kudi Ntachiki yamaluwi.

²⁰ Pawulu washimwini nshimbi jeniji ha 1 Akorinda 7:2-5. Mumbanda watela kukama hohu nanfumwindi muloña diyi wukweti wuswa; iyala niyena watela kukama hohu nañodindi. Wonsu wawu atela kudinka “mwatela,” hela kumwinka mwinikwindi chuma chinakukeñayi. Ilaña, adisumbula amakwawu ashakamaña mpinji yeneni iwu kwacheñi iwu kwacheñi, hela kuya hayilaji yakunooka hamuntu hamuntu indi kwiji kushiya mwinikwawu nakuya nakuzatila kwacheñi, nakumubonda mukwawu yuma ‘yatela’ kumwinkayi. Toñojokenu hawubanji wukufumamu neyi muntu ‘wukubula kudihemba,’ nawa yeteja Satana kumwiñilila nakwila wuvumbi. Yehova wakiswilaña nyitu yayisaka yakwashaña yisaka yawu chakadi kusha maluwi awu hakatoña.—Mas. 37:25.

Nkisu Yafumaña Mukwovwahila Kufumba KwamuBayibolu

21. (a) Muloñadi chichakalila kufuukula hansañu yawujiki nimaluwi? (b) Muloñadi kufumba kwekala mumukanda wa 1 Akorinda kapetulu 7 chikwalemena?

²¹ Kufuukula hansañu yakwikala mujiki hela kwiñila mumaluwi hichuma chakala nankashi. Kubula kuwanina diyi nsulu yaletaña kukala muchihandilu chawantu ejima. Hela tuhu antu akeñawu nawa akiswilawu kudi Yehova mpinji jikwawu aneñaña, chili ajiki chili adisumbula. Dichi neyi mukuzatisha kufumba kwakuwahi kwekala mumukanda wa 1 Akorinda kapetulu 7, munateli kukeheshaku kukala kukwawu. Kumesu aYehova munateli ‘kwila chachiwahi,’ chili mudi ajiki hela mwasumbula hela mwasumbuka. (Tañenu 1 Akorinda 7:37, 38.) Chuma cheneni chimukufwila yowu kwikala nawuselewa waNzambi. Chimwekala nankisu yindi, mukutwalekahu kwenda munjila yikayilombola kuwumi mwituña dadiha. Mwituña dadiha, amayala nawambanda akashakamaña chachiwahi chakadi kukala kunakumonawu makonu.

[Tumazu twaheshina]

Mukwakula Nenudi?

• Muloñadi chitukubulila kukanjikija muntu netu yeñili mumaluwi?

• Hakwikala nkoñi waYehova wuchidi mujiki, munateli kuzatisha ñahi mpinji yenu chachiwahi?

• Antu anakukeña kudisumbula anateli kudiloñesha ñahi kulonda akashindi kukala kwekalaña mumaluwi?

• Muloñadi maluwi chiyabulilaña kukiña muntu kubula kuholokela mukweseka kwakwila wuvumbi?

[Malwihu aKuzatisha haKudiza]

[Nyevulu yidi hefu 14]

AkwaKristu ajiki awanaña muzañalu hakuzatisha mpinji yawu nakutwala mudimu wakushimwina hambidi

[Mwevulu wudi hefu 16]

Yumanyi yatela kuhimpawu antu amakwawu hanyima yakwiñila mumaluwi?