‘Kundejenu Antu Ejima anakudila’

“Yehova nanwayishi dehi manji . . . nikundeji antu ejima akudila.”—ISA. 61:1, 2.

1. Chumanyi Yesu chayikoñeleliyi antu adilileña, nawa muloñadi?

 YESU KRISTU wahosheli nindi: “Kudya kwami yowu kwila muchima wayena wantemesheli, nakamanishi mudimu windi.” (Yow. 4:34) Hakukalakala mudimu wamwinkeluwu kudi Nzambi, Yesu wamwekesheli yililu yayiwahi yikwetiyi Tata yindi. Hakachi kaniyi yililu yaYehova hadi kukeña kwasweja kukeñayi antu. (1 Yow. 4:7-10) Kapostolu Pawulu welukili njila yimu mwamwekeshelañayi iku kukeña hampinji yamuteneniyi Yehova nindi “Nzambi wakukundeja kwejima.” (2 Kor. 1:3) Yesu wamwekesheli kukeña kwamuchidiwu hampinji yakoñeliyi chuma chashimwinuwu muwuprofwetu waIsaya. (Tañenu Isaya 61:1, 2.) Yesu watañilili iwu wuprofwetu musinagogi kuNazareta nawa wakunjikili awa mazu kudi yomwenindi. (Luka 4:16-21) Muchihandilu chindi chejima, Yesu wayikundejeleña chachiwahi antu adiña nakudila, chumichi chayikolesheleña nikuwundisha nyichima yawu.

2, 3. Muloñadi atumbanji twaKristu chatelawu kumwimbujola hakukundeja akwawu?

² Atumbanji twaYesu ejima atela kumwimbujola kuhitila mukukundeja antu anakudila.  (1 Kor. 11:1) Pawulu wahosheli nindi: “Dikundejenu wejima wenu nakudikolesha wumu namukwawu.” (1 Tesa. 5:11) Twatela kukundeja akwetu, muloña antu makonu anakushakama ‘munyaka yakala.’ (2 Tim. 3:1) Antu amavulu, adi nanyichima yayiwahi mukaayi kejima anakuyiyandisha kudi antu ahoshaña nikwila yuma yaneñeshaña, nawa yakatishaña kumuchima.

³ Kwesekeja nachashimwini wuprofwetu wamuBayibolu, munanu mafuku akukuminina akanu kaayi katama, antu amavulu anekali “akwakudikeña, akwakufwila mali, akwakudisamba, akwakudinka wanta, akwakutukana; akekala antu abulaña kwovwahila anvwali jawu, abulaña kusakilila, abula kujila. Abulaña kukeñañana mwasemwakenawu, oma muchima, akakutuñula akwawu, abulaña kudihemba, asweja kuzuwa, abulaña kukeña yayiwahi, anfukeji, akwakuchinchika, akwakuditohesha, antu akeñaña yakuditiyisha aweni kuwaha, kukeña Nzambi nehi.” Yililu yamuchidiwu yinasweji nankashi makonu, muloña ‘antu atama niakwakutwamba anasweji.’—2 Tim. 3:2-4, 13.

4. Chumanyi chinakumwekana kuyuma yamukaayi makonu?

⁴ Yuma yejima hiyatela kutuhayamishaku, muloña Izu daNzambi dalumbulula chikupu nawu “mpata yamunu mwishina yashakamaña mudi owu watama.” (1 Yow. 5:19) ‘Mumpata yamunu mwishina’ mudi nsañu jamapolitiki, jansakililu, ninsañu jakulanda nakulandulula, kushilahu ninjila jakutandishilamu nsañu jakutwamba. Chakadi nikujina, Satana Diyabolu amulumbulula chachiwahi nawu diyi “mwanta wayulaña mpata yamunu mwishina” nawa diyi “nzambi yampata yamakonu.” (Yow. 14:30; 2 Kor. 4:4) Yuma yinakumwekana heseki dejima yinakutaminaku hohu muloña chayinu mpinji Satana wudi nandombu yeneni, chanelukiyi nindi nashali dehi nampinji yantesha hohu nakumufumishahu kudi Yehova. (Chim. 12:12) Chatukundejaña chikupu hakwiluka netu mpinji yamwitejawu Satana kudi Nzambi kwikala mwanta nituña dindi datama keña ayijilumuni, cheñi nawa muloña wavulumwiniyi Satana kutalisha hachiyuulu chaYehova keña awumanishi.—Kutach., kape. 3; Yoba, kape. 2.

Nsañu Yayiwahi Anakuyishimwina Mwahita Iseki Dejima

5. Indi wuprofwetu wahosha hamudimu wakushimwina wunakushikijewa ñahi munanu mafuku akukuminina?

⁵ Muyinu nyaka yakala mukuhanda kwawantu, yuma yashimwiniyi Yesu yinakushikijewa. Wahosheli nindi: “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.” (Mat. 24:14) Iwu mudimu wakushimuna wunsahu kutalisha haWanta waNzambi mukaayi kejima anakuwuzata nankashi kudi antu amavulu. Makonu, aYinsahu jaYehova akubadika ha 7,500,000, ekala muyipompelu yakubadika ha 107,000 mwahita iseki  dejima, anakushimwina haWanta waNzambi, nawa diwadiña mutu washimwinineñayi Yesu nikutañisha. (Mat. 4:17) Hamuloña wamudimu wetu wakushimwina makonu, antu anakudila anakuyikundeja chikupu. Muyaaka yiyedi hohu yinahituhu, antu 570,601 ayipapatishili nakwikala aYinsahu jaYehova.

6. Yumanyi yinakuleñela mudimu wetu wakushimwina kutohelaku?

⁶ Tunateli kwiluka netu aYinsahu jaYehova anakuzata mudimu weneni wakushimwina kuhitila mukushinshika hamudimu wakubalumuna nikuhana nyikanda yashindamena haBayibolu mumadimi akubadika ha 500. Iwu mudimu kanda tuwuzateñahu dehi nakushika hanichi chipimu! Ntachikilu, nimudimu nikutohelaku kwakuloñesha kwaYehova kwahamaseki kwatuhayamishaña chikupu. Chakadi wunlomboli niwukwashu waspiritu yaNzambi yajila yabadika ñovu, hitwadi kutwesha kuzata nyidimu yejimiyi mukanu kaayi kanakuyuulewa naSatanaku. Muloña wakwila nsañu yayiwahi anakuyishimwañena mumatuña ejima mwashakama antu, akwetu akakwitiya hidiwu hohu anakukundejawu nansañu yamuNsonaku, ilaña niantu anakudila etejaña nsañu yaWanta.

Kukundeja Akwetu Akwakudifukula

7. (a) Muloñadi chitukubula kukuhwelela netu Yehova nateli kufumishahu yihuñu yejima makonu? (b) Tuneluki ñahi netu tunateli kuumika makabisha nilukadi?

⁷ Mukanu kaayi munenzali yuma yatama nimakabi, twakaholokela mukukala kwakatuletela yihuñu. Nzambi hanateli kufumishahu yuma yejima yatuneñeshaña hela wushonaku sampu adinu ituña anadikisañani. Chayinu mpinji, chitukumonaña makabisha amavulu ashimwinuwu dehi, nawa chineli tudi antu anakuhakwilaku wanta windi wakuleña kwejima, chinakutukalila hakwila twikali ashinshika kumesu aYehova. (2 Tim. 3:12) Hela chochu, chineli Tata yetu wamwiwulu watukwashaña nikutukundeja, tunateli kwikala neyi akwaKristu awayishewa amuTesalonika wakushankulu, omikili makabisha nilukadi nachikuhwelelu.—Tañenu 2 Atesalonika 1:3-5.

8. Wunsahwinyi wamuNsona wamwekeshaña nawu Yehova wakundejaña ambuñindi?

⁸ Tuneluki chikupu netu Yehova wakundejaña nankashi ambuñindi. Chakutalilahu, hampinji yamutiyishiluwu woma kaprofwetu Elija kudi Mwanta Wamumbanda watama Yezebeli, iwu kaprofwetu wafwili mutentu nawa watemukili, wahosheli nindi wakeñeleña kufwa. Chatela yamuhosholi Elija, Yehova wamukundejeli nawa wamwinkeli ñovu yakutwalekahu namudimu windi neyi kaprofwetu. (1 Anya. 19:1-21) Tunateli kwiluka cheñi netu Yehova wakundejaña antu jindi kuhitila mukushinshika hachuma chamwekeni muchipompelu chawakwaKristu muyaaka nkulakaji yakusambila. Chakutalilahu, twatañaña hampinji yelili “[mu]Yudeya mwejima nimuÑaliliya nimuSamariya, chipompelu hichikumona kuwunda, hichikudituña.” Cheñi, ‘hichikwenda nawoma waMwanta Yehova, nikuyikundeja kudi spiritu yajila, hichikusemwañana.’ (Yil. 9:31) Wenowu muzañalu wutukweti hakwiluka netu ‘atukundejaña naspiritu yajila’!

9. Indi kudiza hadi Yesu kunateli kutukundeja ñahi?

⁹ Hakwikala akwaKristu, atukundejaña hakudiza hadi Yesu Kristu nikwenda mumahaji indi. Yesu wahosheli nindi: “Inzenu kudami enu ejima mudi nakukabakana, mwasenda yalema, ami nukuyinookesha. Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu. Muloña mpanda yami yaswayi, nichisenda chami chapepela.” (Mat. 11:28-30) Kwiluka njila yayiwahi mwakolesheleleñayi Yesu antu nikulondela chakutalilahu chindi chachiwahi chinateli kutukwasha chikupu kumanisha chineñi chitwatiyaña.

10, 11. Anyi atela kukundeja amakwawu muchipompelu?

¹⁰ Akwetu akwaKristu niwena anateli kutukundeja. Chakutalilahu, talenu aeluda muchipompelu chakwashañawu antu ananeñi. Kambanji Yakoba wasonekeli nindi: “Omu mukachi  kenu mudi wakata [kuspiritu], tahindi? Atambiki akulumpi achipompelu, amulombeli.” Chumanyi chikufumamu? “Kulomba kwakukuhwelela kukuhandisha wakata, niMwanta wukumukolesha; neyi navulumuni akumwanakena.” (Yak. 5:14, 15) Antu amakwawu amuchipompelu niwena anateli kukundeja akwawu.

¹¹ Ambanda kakavulu chayipelelaña kuhosha nawakwawu awambanda hakukala kukwetuwu. Sweje-e akulumpi awambanda, ahela apama atela kuleja maana ahela achidi atwansi. Awa ambanda, akwaKristu apama atela ahita mukukala kwakuvulu muchihandilu chawu neyi kumunakumona. Wushona wamwekeshañawu niyililu yawu yayiwahi yinateli kuyikwasha chikupu. (Tañenu Titusa 2:3-5.) Hela chochu, aeluda niantu amakwawu atela ‘kukundeja ananeñi’ mukachi ketu. (1 Tesa. 5:14, 15) Nawa twatela kwiluka netu Nzambi “watukundejaña mulukadi lwetu lwejima, kulonda tutweshi kukundeja akwetu adi mulukadi.”—2 Kor. 1:4.

12. Muloñadi chichalemena kuya kukupompa kwawakwaKristu?

¹² Njila yimu yalema nankashi yakutukundejelamu yidi yakuya kukupompa kwawakwaKristu, kutwahanjekaña nsañu yamuBayibolu yatukoleshaña. Twatañaña netu aYuda niSilasi “hiyakukundeja ana kwawu namazu amavulu, ayikolesha nikuyikolesha.” (Yil. 15:32) Henohu kupompa kanda kutachiki nihanyima yakupompa, antu amuchipompelu ahanjekaña nakudikolesha. Hela neyi tunakumona ikezeñi hamuloña wayuma yaneñeshaña yinakutumwekena, bayi tudambula kwakanka wetuku, muloña hichikutukwashaku. (Yish. 18:1) Dichi, twatela kulondela kufumba kwakapostolu Pawulu kwonenewa kwakwila nawu: “Tuditoñojokenu muntu himuntu, kulonda tusañumuni akwetu kukeñañana nakwila nyidimu yayiwahi. Bayi tuleka kupompa neyi chelañawu amakwawuku, chiña kudilejaleja, chisweji nankashi nanichi chimunamoni ifuku odu hidikwinza nakuswila kwakwihi.”—Heb. 10:24, 25.

Wanenu Kukundeja Mwizu daNzambi

13, 14. Lumbululenu Nsona chiyatela kutukundeja.

¹³ Neyi tudi akwaKristu apapatishewa hela dihitunatachiki kudiza hadi Nzambi nihakufuukula kwindi, Izu daNzambi dasonekawu dinateli kutukundeja. Pawulu wasonekeli nindi: “Yuma yejima yasonekeluwu hashankulu, ayisonekeli kulonda kutuleja nachu maana, kulonda nakutatakena, nikukukundeja kwanyikanda yajila, tumwenuku kuchiñeja.” (Rom. 15:4) Nyikanda Yajila yinateli kutukundeja nikutuleñela ‘tuwanini chikupu, tuwahili nyidimu yayiwahi yejima.’ (2 Tim. 3:16, 17) Kwiluka chalala kutalisha hakufuukula kwaNzambi nikuchiñeja nankashi mpinji yakumbidi kunateli kutukundeja nankashi. Dichi, twatela kutaña nankashi Izu daNzambi ninyikanda yashindamena haBayibolu yinateli kutukundeja nikutuhetesha munjila jajivulu.

 ¹⁴ Yesu watwimikila chakutalilahu chachiwahi kuhitila mukuzatisha Nsona hakutañisha nihakukundeja akwetu. Chakutalilahu, chasañukiliyi Yesu wamwekeni kudi atumbanji twindi ayedi, nawa ‘wayilumbulwilili Nyikanda yajila.’ Hampinji yahosheleñayi nawatumbanji twindi, nsañu yayilejeleñayi yayishikili hanyichima. (Luka 24:32) Kapostolu Pawulu wembujoleli chakutalilahu chachiwahi chaYesu nawa wazatishili ‘Nsona hakuhanjeka nawantu.’ MuBereya, antu adiña nakumutiyilila “anyakeli kutambula mazu; hiyakutalatala munyikanda yajila hefuku hefuku.” (Yil. 17:2, 10, 11) Dichi tutañeña Bayibolu ifuku niifuku kulonda tuhetelumu nimunyikanda yawakwaKristu yasonekawu kulonda yitukundejeña nikwikala nakuchiñeja muyinu mpinji yakala.

Njila Jikwawu Mutwatela Kukundejela Akwetu

15, 16. Yumanyi yitwatela kwila kulonda tukwashi nachu akwetu akwaKristu nikuyikundeja?

¹⁵ Tunateli kukwasha nikukundeja akwetu akwaKristu munjila jamboka-mboka. Chakutalilahu, tunateli kuya nakuyilandilaku atushinakaji niakwetu akakwitiya akata yuma yinakukeñawu kumasitolu. Tunateli kumwekesha kukeña kudi akwetu, kuhitila mukuyizatilaku nyidimu yahetala. (Fwi. 2:4) Hadaha tunateli kuhameka akwetu akwakudifukula hayililu yawu yayiwahi yikwetuwu, yidi neyi kukeña, kwiluka chakumanisha kukala, wulobu nichikuhwelelu.

¹⁶ Hampinji yitunakukeña kukundeja chikupu atushinakaji, twatela kuyihempula nikutiyilila neyi anakutuleja yuma yamonawu muchihandilu ninkisu jinatambwiluwu mumudimu waYehova. Muloña ichi chinateli kutukolesha nikutukundeja. Tunateli kutaña Bayibolu hela nyikanda yashindamena haBayibolu nawantu itunayi nakuhempula. Hadaha tunateli kutañila hamu yibaaba Yakudiza muKaposhi Kakutalila mulungu nimulungu hela nsañu yitwakahanjeka haKudiza Bayibolu haChipompelu munowu mulungu. Tunateli cheñi kutalila hamu nawu DVD yinakuhosha hamutu wunafumi muNsona. Cheñi tunateli kutañila hamu hela kuyileja yakutalilahu yayiwahi yasonekañawu munyikanda yetu.

17, 18. Chineli tudi ambuña aYehova ashinshika, muloñadi chitwatela kukuhwelela netu wakatukwasha nikutukundeja?

¹⁷ Neyi twiluka netu mukwetu mukwakudifukula waYehova nakukeñeka kumukundeja, twatela kumulombelaku kwakankawetu. (Rom. 15:30; Kol. 4:12) Hampinji yitunakuumika nakukala nikufwila kukundeja antu amakwawu, tunateli kwikala nachikuhwelelu neyi chadiña nañimbi yamasamu wembili nindi: “Umbilaku chiteli cheyi hadi Yehova, yena wukukukwashaku; hamba kamwitija mukwakuloña kukosomokaku.” (Mas. 55:22) Eñañi, Yehova wakatukundejaña nikutukwasha chineli tudi ambuñindi ashinshika.

¹⁸ Nzambi walejeli akwakudifukula indi akushankulu nindi: “Ami, chalala yami, nayikundejaña.” (Isa. 51:12) Anetu nawa Yehova wakatukundeja nikutukiswila hanyidimu yetu nihamazu amawahi itwahoshaña hakukundeja antu anakudila. Hela chakwila tukweti kuchiñeja kwakuya mwiwulu hela kushakama hamaseki, wejima wetu twatela kukundejewa namazu aPawulu alejeliyi akwawu akwaKristu awayishewa naspiritu nindi: “Yomweni Mwanta wetu Yesu Kristu, niNzambi, Tata yetu, watukeñeli, watwinkeli kukundeja kwahaya nyaka, nikuchiñeja kwakuwahi naluwi, ayikundeji munyichima yenu, ayikoleshi munyidimu yayiwahi nimumazu amawahi ejima.”—2 Tesa. 2:16, 17.

Munakwanuka?

• Indi mudimu wetu wakukundeja antu anakudila wunatohi ñahi?

• Yumanyi yitwatela kwila hakukundeja antu amakwawu?

• Wunsahwinyi wamuNsona wunakumwekesha nawu Yehova wakundejaña antu jindi?

[Malwihu aKuzatisha haKudiza]

[Mwevulu wudi hefu 28]

Komana ninenu mwakundejaña antu anakudila?

[Mwevulu wudi hefu 30]

Atwansi niakulumpi anateli kukolesha akwawu