Malwihu Kufuma Kudi Antañi

Natela kwila ñahi neyi nidi nalwihu kutalisha hansañu yinataña muBayibolu hela inakukeña wukwashu hakukala kunukweti?

Mukanda waYishimu 2:1-5 watukoleshaña wonsu wetu ‘kutwalekahu kukeñakeña’ kwiluka nikashinshi neyi chakeñañawu ‘yuma yalema yaswekawu.’ Chinatalishi mukwila nawu twatela kuzata nañovu hakukeñakeña ñakwilu yamalwihu itwehulaña amuBayibolu nihakuwana jinjila mwakumanishila kukala kutukweti. Tunateli kwila ñahi mwenimu?

Mukanda waNonkelenimo mu Masambililo ya Isukulu lya Butumikishi Ilya Bulesa, ifu 33 kushika hefu 38, hanakushimuna “Chitwatela Kusandujola” kuzatisha yozelu yatuloñeshelawu kudi ‘nduñu wamaana nikashinshi.’ (Mat. 24:45) Ifu 36 dinakushimuna chitwatela kuzatisha Watch Tower Publications Index, chibalu hichibalu anachanzañani muindekisi yanyitu nimuindekisi yansona. Chumichi chikutukwashaku kusandujola kuzatisha izu dadeni hela kuzatisha mavasi amuBayibolu, chakwila mukutwesha kuwana nyikanda yimunateli kutaña. Mwatela kuwundisha mumesu hampinji yimunakusandujola ñakwilu hela nsañu yimunakukeña. Mwatela kwanuka nenu munakukeña “yuma yalema yaswekawu,” dichi mwatela kwikala nampinji yeneni nikushaku muchima.

Hela chochu kudi nsañu yikwawu nijinsona jabula kulumbululawu jiika munyikanda yetu. Mpinji yikwawu, munyikanda yetu twahosheli havasi yamuBayibolu yimunakukeña, hadaha nsañu yitwahosheli hiyakula lwihu lumukwetuku. Cheñi, nsañu yikwawu yamuBayibolu hiyayilumbulula jiikaku, dichi tunateli kutachika kujinoka iyi nsañu yamuNsona. Dichi hitukutwesha kuwana ñakwilu yamalwihu ejima itukweti hayoyenoyu mpinjuku. Neyi tukweti lwihu lwamuchidiwu, bayi tutachika kuboka yuma yinabuli kwakulawu, nakudiñija muntadi ‘jaletaña kwakwihujola hohu, jabulaña kukwasha mudimu waya mukukuhwelela, watukunjikiluwu kudi Nzambuku.’ (1 Tim. 1:4; 2 Tim. 2:23; Tit. 3:9) Kasanji kamutayi hela chishina chamukaayi hichashinshikaña nikwakula malwihu ejima amuchidiwu abula kulumbululawu munyikanda yetuku. Twatela kwiluka netu Bayibolu yashimunaña nsañu yayivulu yinateli kutukwasha muchihandilu chetu chejima ilaña yashiyahu cheñi nsañu yikwawu kulonda tumukuhweleli chikupu Nzambi, Nsoneki yaBayibolu.—Talenu mafu 185 nakushika ku 187 amukanda waChibemba waPalameni Kuli Yehova.

Indi neyi muneseki chikupu kusandujola hansañu yinateli kuyikwasha ilaña himunawani ñakwilu yalumbulukaku? Mwatela kuhosha namukwenu mukwakwitiya wapama, hadaha munateli kuhosha naeluda wamuchipompelu chenu. Eluka chikupu nsañu yamuBayibolu nawa hiyakwaKristu aneluki yuma yayivulu. Neyi munakukeña nenu ayikwashi kutalisha hakukala kumukweti hela munakukeña kufuukulahu, anateli kuyikwasha chineli ayiluka nawa ashakamaña kwakwihi nakumwashakamaña nawa aneluki kukala kumukweti. Nawa bayi muvulamena kulomba kudi Yehova hakukala kumukwetuku, ilaña mulejenu kulonda yakiñi yitoñojoka yenu naspiritu yindi yajila, “muloña Yehova diyi wenkaña muntu maana . . . nikashinshi.”—Yish. 2:6; Luka 11:13.