Mukuhwelelenu Yehova, “Nzambi Wakukundeja Kwejima”

“Amukiswili Nzambi yaMwanta wetu Yesu Kristu, yowu Tata yindi, diyi Tata wavulishaña luwi, Nzambi wakukundeja kwejima.”—2 KOR. 1:3.

1. Chumanyi chakeñañawu antu ejima?

 KUFUMA tuhu hakuvwalika kwetu, twakeñaña kutukundeja. Mukeki neyi nakukeña muntu wakumuleleja wadilaña. Hadaha nakukeña kumwakata hela natiyi nzala. Hela tuhu etu akulumpi, kakavulu twakeñaña wakutukundeja. Sweje-e neyi tunakuhita mumakabi.

2. Chikaninwinyi chakanayi Yehova antu amukuhwelela nawu wakayikundeja?

² Antu amuchisaka niamabwambu kakavulu anateli kutukundeja chikupu. Hela chochu, mpinji yikwawu, yuma yikwawu yatuletelaña kukala kwosi muntu wunateli kuyimanisha. Nzambi hohu diyi wunateli kutukundeja hakukala kudi kwejima kutunateli kumona. Izu dindi datukonkomwenaña nawu: “Yehova wudi kwakwihi nawantu ejima akumutambika, . . . wukutiya nawa chakubilelawu.” (Mas. 145:18, 19) Eñañi, “mesu aYehova atalaña antu aloña, nimatu indi atiyililaña chakutambikawu.” (Mas. 34:15) Hakwila nawu Nzambi yatukwashi nikutukundeja, twatela kumukuhwelela. Ñimbi yamasamu Davidi washimwini hatooka mukamina nindi: “Yehova wukwikala kaposhi kakalehi kakutemukila awa anachikuwu, kaposhi kahanyaka yakamonawu kukala. Awa eluka ijina deyi akakukuhweleleyi; muloña akukeñakeñañeyi, eyi Yehova hiwunayumbuku.”—Mas. 9:9, 10.

3. Indi Yesu wamwekesheli ñahi nindi Yehova wayikeña antu?

³ Akwakudifukula aYehova alema chikupu kumeswindi. Yesu walumbulwili chikuma chenichi hakuhosha nindi: “Tujila twanyanya tutanu hiyatulandaña natumali tuyeduku? Hela chochu, hikwekala hela kamu kavulamenañawu kudi Nzambuku. Hela nsuki jenu jajeni ajichinda dehi jejima. Dichi bayi mutiyaña womaku, kulema kwenu kwabadika kulema kwatujila twatuvulu.” (Luka 12:6, 7) Kuhitila mudi Kaprofwetu Yeremiya, Yehova walejeli antu Jindi akushankulu nindi: “Yehova wamwekeni kudami hanyaka nindi Nakukeñi nakukeña kwahaya nyaka; dichi nakukoki naluwi.”—Yere. 31:3.

4. Muloñadi chitwatela kukuhwelela muyikaninu yaYehova?

⁴ Kumukuhwelela Yehova nimukushikijewa kwayikaninu yindi kunateli kutukundeja neyi tunaholokeli muyihuñu. Dichi twatela kumukuhwelela Nzambi neyi chochamukuhweleleliyi Yoshuwa, wahosheli nindi: “Hikunakañanyi chuma chachiwahi nichimu chayiteneniyi Yehova Nzambi yenuku, yejima munayimoni, kwosi nichuma chinakañanyuku.” (Yosh. 23:14) Kubombelahu cheñi, tunateli kukuhwelela netu hela chakwila tukuholokela mukukala hakapinji kantesha, “Nzambi washinshika” nawa hamba kashiya ambuñindi ashinshikaku.—Tañenu 1 Akorinda 10:13.

5. Tunateli kukundeja ñahi akwetu?

⁵ Kapostolu Pawulu wamuteneni Yehova nindi ‘hiNzambi wakukundeja kwejima.’ Izu dakwila nawu “kukundeja” datalisha mukwila nawu kuwundisha muntu wudi muyihuñu hela wunakudila. Tunateli kuwundisha muntu kuhitila mukumwilila chuma chikumuletela kuwunda nakumanisha chineñi. Ichi dichelañayi Yehova. (Tañenu 2 Akorinda 1:3, 4.) Tata yetu wamwiwulu hakaankilaña chuma hela muntuku, nateli kuzatisha chuma chidi chejima  kulonda yakundeji nachu antu amukeña. Anetu nawa, twakundejaña akwetu akakwitiya adi ‘mulukadi lwashiyashana.’ Twelaña mwenimu kuhitila ‘mukukundeja kwanatukundejuwu nachu kudi Nzambi.’ Awa mazu amwekeshaña nawu Yehova wukweti ñovu jasweja jakukundejelamu antu jindi adi muyihuñu.

Kuumika Nayuma Yaletaña Chineñi

6. Shimunenu yuma yinateli kuleta yihuñu.

⁶ Twakeñaña muntu wakutukundeja muyuma yayivulu yatumwekenaña muchihandilu. Chuma cheneni chatuletelaña wushona nankashi hikufwisha muntu itwakeña nankashi, sweje-e, mwinikwetu itwakeña hela mwana. Tunateli cheñi kukundeja muntu neyi muntu anakumukabisha hela anamuheli hamuloña wachaambu chekowa hela idimi. Yikatu, wushinakaji, wuzweñi, kukala kwamumaluwi niyuma yikwawu yatama yinakumwekana mukaayi yaleñelaña muntu wamuchidiwu kukeña wakumukundeja.

7. (a) Muyihuñu yasweja, chumanyi chitwakeñaña? (b) Chumanyi chinateli kwilayi Yehova hakukuswisha muchima ‘wachikeka dehi puchi nakudishona’?

⁷ Neyi kukala kunatuholokeli, twakeñaña kukundeja nikuwundisha muchima wetu, yitoñojoka, nikubula woma, nichihandilu chetu chakumujimba nichakuspiritu. Chakutalilahu, toñojokenu hamuchima. Izu daNzambi dahoshaña nawu muchima wetu ‘wachikeka dehi puchi nakudishona.’ (Mas. 51:17) Yehova natweshi kumanisha kukala kwamuchidiwu, muloña “wakuswishaña abaluka nyichima; wakasaña hayilonda yawu.” (Mas. 147:3) Hela chakwila tukuholokela mukukala kweneni, Nzambi nateli kukundeja muchima wunabaluki neyi tumulomba nachikuhwelelu nikulondela nshimbi jindi.—Tañenu 1 Yowanu 3:19-22; 5:14, 15.

8. Neyi kudi yuma yinakutukabisha muyitoñojoka, Yehova nateli kutukwasha ñahi?

⁸ Hamuloña wakwila twamonaña kukala kwamboka-mboka, yitoñojoka yetu kakavulu yakeñekaña kuyikundeja. Hitukutwesha kuumika iyi yuma yesekaña chikuhwelelu chetu nañovu jetuku. Hela chochu, ñimbi yamasamu wembili nindi: “Chimwekalaña yitoñojoka yayivulu mumuchima wami, kukundeja kundeja kuwankundejaña kwatiyishaña muchima wami kuwaha nankashi.” (Mas. 94:19) Kubombelahu, Pawulu wasonekeli nindi: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu niyitoñojoka yenu mudi Kristu Yesu.” (Fwi. 4:6, 7) Dichi neyi tukutañaña Nsona nikutoñojokahu chikupu chikutukwasha kuumika yuma yinakutukabisha muyitoñojoka.—2 Tim. 3:15-17.

9. Tunateli kuumika ñahi nayuma yatutiyishaña woma?

⁹ Mpinji jikwawu, twaswejaña kuneña chakwila tunateli kudiñija muwubanji wakusweja kutiya woma. Hadaha tunakutoñojoka netu hitukutwesha kuzata nyidimu yashimunawu muNsona hela kukooleka kunatwinkuwuku. Nimukukala kwamuchidiwu, Yehova nateli kutukundeja nikutukwasha. Chakutalilahu: Yoshuwa chamwinkeluwu mudimu wakulombola aIsarela hakuya nakwasa njita nanyuza yawayilumbu jawu yaswejeli ñovu, Mosi walejeli antu nindi: “Kadikwatishaña, wakomikaña chacheni, bayi wakatiyaña womaku, bayi wakayakamañaku; muloña Yehova Nzambi yeyi diyi wukuya nindi; hakakañanyaku, hakakuumbaku.” (Kuhit. 31:6) Nawukwashu waYehova, Yoshuwa watwesheli kulombola antu jaNzambi nakuyiñija Mwituña Dachikaninu nawa ashindili ayilumbu jawu ejima. Hakusambila hampinji yazambukileñawu Kaluñalwiji Kachinana, Mosi amukwashili cheñi kudi Nzambi.—Kwid. 14:13, 14, 29-31.

10. Neyi tunakati hamuloña wayihuñu yinatuholokeli, chumanyi chinateli kutukwasha?

¹⁰ Yuma yatama yamwekanaña yinateli kutuletela yikatu kumujimba. Hela chochu, kudya yakudya yayiwahi, kwikala nampinji yakunooka nikukolesha mujimba, nikwikala awunyonji kunateli kutukwasha. Kutoñojoka hayuma yakumbidi yashimunawu muBayibolu kunateli kutukwasha kumujimba. Dichi, hampinji  yitunakuhita muyihuñu chikutukwasha neyi tukutoñojokaña hayuma yamweniyi Pawulu nihamazu atukolesheliyi nindi: “Atukabishaña mbadi jejima, kutukañesha nehi; twenda tujinoka, kutukuma nehi; enda atuhaña, kutushiya kanka wetu nehi; anatubuli dehi hamaseki, etu kunoña nehi.”—2 Kor. 4:8, 9.

11. Tunateli kumanisha ñahi yikatu yakuspiritu?

¹¹ Kweseka kunateli kuluwañesha chihandilu chetu chakuspiritu. Nimukukala kwamuchidiwu Yehova nateli kutukwasha. Izu dindi datukana nawu: “Yehova wayikwataña chachiwahi ejima adimbukaña, wayihindwishaña wejima wawu anoñamaña.” (Mas. 145:14) Twatela kuleja aeluda akwaKristu kulonda atukwashi nakukala kutukweti kwakuspiritu. (Yak. 5:14, 15) Chitwatwalekahu nakutoñojoka hakuchiñeja kwamuNsona kwakushakama hamaseki haya nyaka kunateli kutukwasha neyi chikuhwelelu chetu chidi mukweseka.—Yow. 17:3.

Yakutalilahu Yawantu Akundejeluwu Kudi Nzambi

12. Lumbululenu Yehova chamwekesheliyi muchima wakukundeja Abarahama.

¹² Ñimbi yamasamu wonenenuwu wahosheli nindi: “Anukaku izu diwañila ami kambuñeyi, diwanleja dehi [eyi Yehova] neyi nishuku muchima nidichiñeji. Namoni chakunkundeja nachu muyihuñu yami muloña izu diwahosha dinanhizumwishi.” (Mas. 119:49, 50) Makonu, tukweti Izu daYehova dasonekawu, mwekala yakutalilahu yawantu amavulu akundejeluwu kudi Nzambi. Chakutalilahu, Abarahama watela waneñeli chikupu chatiyiliyi nindi Yehova wakajilumuna Sodoma naGomora. Iwu nkakulula washinshika wamwihwili Nzambi nindi: “Antu aloña wukuyijilumuna hamu nanawa atama, tahindi?” Yehova wamukundejeli Abarahama kuhitila mukumukana nindi neyi mukwikala hohu antu aloña 50, hakujilumuna Sodomaku. Abarahama wamwihwili cheñi Yehova mapampa katanu nindi: Indi neyi mudi antu aloña 45 hohu? 40? 30? 20? 10? Mapampa ejimawa, Yehova wamukanini Abarahama mukuwunda nawa naluwi nindi hakajilumuna Sodomaku. Hela chakwila himwadiña antu ikumi aloñaku, Yehova wamupulwishili Loti nianyanindi awambanda.—Kutach. 18:22-32; 19:15, 16, 26.

13. Indi Hana wamwekesheli ñahi nindi wamukuhweleleli Yehova?

¹³ Ñoda Elekana Hana wakeñeleña chikupu kwikala namwana. Ilaña wadiña nshinta, nawa chumichi chamuneñesheli hama. Walombeli kudi Yehova nindi wakeñeleña mwana, nawa Kapristu Muneni Eli wamulejeli nindi: “Nzambi yaIsarela akwinki chuma chiwunamulombi.” Ichi chamukundejeli Hana, “nikuneña nawa cheñi kumesu indi nehi.” (1 Sam.  1:8, 17, 18) Hana wamukuhweleleli Yehova, nakushiya yuma yejima mumakasindi. Hela chakwila helukili yuma yakamwekanaku, mumuchima waHana mwenzeli kuwunda. Mukuhita kwampinji, Yehova wakwili kulomba kwindi. Wabaabili ivumu nawa wavweli mwana weyala, wamutumbili nindi Samweli.—1 Sam. 1:20.

14. Muloñadi Davidi chakeñeleñayi kumukundeja, nawa hinyi wamukundejeli?

¹⁴ Mwanta Davidi wamuIsarela wakushankulu niyena himuntu mukwawu wudi hakachi kawantu akundejeluwu kudi Nzambi. Chineli Yehova ‘watalaña mumuchima,’ hampinji yamutondeliyi Davidi nindi yakekala mwanta muIsarela, welukili nindi Davidi wadiña washinshika nawa washili muchima kukudifukula kwalala. (1 Sam. 16:7; 2 Sam. 5:10) Chimwahitili mpinji, Davidi welili wuvumbi naBatisheba nawa wakeñeleña kubuta nshidi yakoñeliyi kuhitila mukujaha nfumwindi. Davidi chelukiliyi kutoha kwanshidi yakoñeliyi, walombeli kudi Yehova nindi: “Jimaku nyiloña yami mwomweseka wushona weyi wawuvulu. Nweleshi chachiwahi nitooki chikupu munaluwi, ntookeshi nshidi yami. Muloña ami neluki nyiloña yami, ninshidi yami yidi kunukutala mesu ami mwaana wejima.” (Mas. 51:1-3) Davidi wabalumukili chikupu mumuchima, nawa Yehova wamwanakeneni. Ilaña, Davidi wamweni kukala kwafumini muyiluwa yakoñeliyi. (2 Sam. 12:9-12) Hela chochu, luwi lwaYehova dilwamukundejeli kambuñindi wadizoza.

15. Yehova wamukwashili ñahi Yesu henohu kanda yafwi?

¹⁵ Henohu wuchidi hamaseki, Yesu wahitili mukweseka kwakuvulu. Nzambi wetejeli chikuhwelelu chindi acheseki, nawa Yesu wahembeli kashinshi kindi hakwikala iyala wawanina wakuhweleleña mudi Yehova nikuhakwilaku chiyuulu Chindi. Chelili mpinji yakumufukejela nikumujaha hiyikushika kwakwihi, Yesu walombeli kudi Yehova nindi: “Bayi ela munakeñamuku, chiña muwunakeñeyi.” Kuhiñahu hikukumwekana kañelu kudi Yesu nakumukolesha. (Luka 22:42, 43) Nzambi wamukundejeli Yesu, wamukolesheli, nikumukwasha hayina mpinji.

16. Chumanyi chakelayi Nzambi neyi tufwa hamuloña wayihuñu yitwatela kumona kukoola kashinshi ketu?

¹⁶ Hela neyi tufwa hamuloña wakwikala nachikuhwelelu chakola neyi akwaKristu, Yehova nateli nawa wukatukwasha kuhemba kashinshi ketu kumesu indi. Kubombelahu, kuchiñeja kwakusañuka kwatukundejaña. Nawa tunakutalila chikupu chikashika mpinji ‘yakanoñeshawu’ chilumbu wakukumishaku, kufwa! (1 Kor. 15:26) Ambuña aNzambi ashinshika afwa dehi, niantu amakwawu cheñi, adi muyitoñojoka yaYehova akayisañula. (Yow. 5:28, 29; Yil. 24:15) Kukuhwelela muchikaninu chaYehova chakusañula afu chatukundejaña nawa dikuchiñeja kwatukoleshaña neyi anakutukabisha.

17. Indi Yehova nateli kutukundeja ñahi neyi tufwisha muntu itwakeña?

¹⁷ Chatukundejaña chikupu hakwiluka netu antaña jetu anakami mumajamu adi nakuchiñeja kwakwikala nawumi cheñi mwituña dadiwahi dadiha mwakabula yuma yaletaña yihuñu yitunakumona makonu. O kukooleka kukwetuwu ambuña aYehova ‘amwizaza deneni’ akapuluka hakukuma kwadinu ituña datama akekala namudimu wakutambwila nikudizisha antu akasañuka nakwikala hamaseki!—Chim. 7:9, 10.

Makasa aNzambi Ahaya Nyaka Akuma Kwishina

18, 19. Indi ambuña aNzambi ayikundejaña ñahi hampinji yayikabishañawu?

¹⁸ Mosi wayikanini antu amuIsarela namazu amukamina añovu nawa akuzañalesha nindi: “Nzambi wakunyaka dihu hawushakaminu  weyi, makasa ahaya nyaka akuma kwishina.” (Kuhit. 33:27) Kuhiñahu kaprofwetu Samweli wayilejeli aIsarela nindi: “Bayi musenuka mukulondela Yehovaku, chiña mumukalakelaña Yehova nanyichima yenu yejima. . . . Yehova hakayishiya antu induku, nanochu chatoha ijina dindi.” (1 Sam. 12:20-22) Dichi neyi tukutwalekahu kukolela kudi Yehova mukudifukula kwalala, hakatushiyaku. Mpinji yejima Nzambi wakatukwashaña.

¹⁹ Nzambi nakukwasha chikupu antu jindi nikuyikundeja munanu mafuku akala akukuminina. Kubadika hadi yaaka nkulakaji, akwetu akakwitiya amavulu mukaayi kejima anayikabishi nikuyikasa hamuloña wakumukalakela Yehova. Kukala kwamwenuwu kwamwekeshaña nawu hampinji yamuchidiwu, Yehova wakundejaña ambuñindi. Chakutalilahu, mana kwetu wumu wamwituña dateneneñawu nawu Soviet Union amukasili hadi yaaka 23 mukaleya hamuloña wachikuhwelelu chindi. Hela chochu, kwadiña njila yakumwinkelamu yakudya yakuspiritu kulonda yimukolesheña nikumukundeja. Wahosheli nindi: “Hayaaka yejima yinadiña mukaleya, nadizili kumukuhwelela Yehova nikutambwila wukwashu windi.”—Tañenu 1 Petulu 5:6, 7.

20. Muloñadi chitukukuhwelela netu Yehova hakatuumbaku?

²⁰ Hichikweti muloña nayuma yitukukeña kumonaku, twatela kwanuka mazu añimbi yamasamu akwila nawu: “Yehova wukuumba antu indi wanyi.” (Mas. 94:14) Hela chakwila twakeñaña kutukundeja hamuntu hamuntu, anetu nawa tukweti kukooleka kweneni kwakukundeja akwetu. Neyi chitwakadiza muchibaaba chinahiñuhu, ninetu tunateli kukundeja anakudila mukanu kaayi munenzali makabi.

Mukwakula Nenudi?

• Yumanyi yinateli kutuletela yihuñu?

• Indi Yehova wakundejaña ñahi ambuñindi?

• Neyi wumi wetu wudi muwubanji, chumanyi chinateli kutukundeja?

[Malwihu aKuzatisha haKudiza]

[Chikasha/Nyevulu yidi hefu 25]

CHITWATELA KUUMIKA NAYUMA YINATELI . . .

▪ kuluwañesha muchima Mas. 147:3; 1 Yow. 3:19-22; 5:14, 15

▪ kuluwañesha yitoñojoka Mas. 94:19; Fwi. 4:6, 7

▪ kututiyisha woma Kwid. 14:13, 14; Kuhit. 31:6

▪ kutuzeyesha kumujimba 2 Kor. 4:8, 9

▪ kutuzeyesha kuspiritu Mas. 145:14; Yak. 5:14, 15