Muloñadi Chitwatela Kwikalila ‘Atona’?

‘CHINJIKIJILWINYI chakwiluka nachu hiwamba kenzeyi, nihamba kakuma nyaka yamakonu?’ (Mat. 24:3) Hakwakula ilu lwihu, Yesu wayilejeli atumbanji twindi chinjikijilu chakwila chachimonawu akashikena kuchiluka chikupu, chasonekawu hamukanda waMatewu kapetulu 24, Maku kapetulu 13, nihaLuka kapetulu 21. Wahosheli cheñi nindi: “Tonenu.”—Mat. 24:42.

Neyi chinjikijilu chayilejeliyi chatiyakeni, muloñadi chayikonkomweneniyi cheñi? Toñojokenu haniyi yuma yiyedi. Chatachi, kuhuwankana kunateli kukojeja antu amakwawu kudiwula chinjikijilu, chinateli kuluwañesha wuspiritu nikwikala atona. Chamuchiyedi, mukwaKristu nateli kwiluka yuma yinakumwekesha chinjikijilu, ilaña hamuloña wayuma yinakumwekana muchihandilu wukukañanya kwiluka nindi watela kwikala wasoñama. Nateli kutoñojoka nindi “lukadi lwasweja,” nikukuma kwawuprofwetu waYesu, kuchidi kwakulehi nawa hidiyi mpinji ‘yakwikala atonaku.’—Mat. 24:21.

‘Hiyachilukiluku’

Yesu wayanukishili atumbanji twindi hadi antu ashakamineña mumafuku aNowa. Mudimu wazatileñayi Nowa wakushimwina, kutuña watu weneni, nindombu yadiñaku hayina mpinji hiyadiña yakuyambaku. Hela chochu, antu amavulu ‘hiyachilukiluku.’ (Mat. 24:37-39) Dichinakumwekana nikulelu, antu anakudiwula mazu akusoñamisha. Chakutalilahu, antu amavulu hiyalondelaña yinjikijilu yamwekeshaña hatela kukumina lufuchi lwanyotoka hamukwakwaku. Ichi chaleñelaña akwanshimbi kukimbakesha nyihaña munyikwakwa yamujimbaka kulonda añendeshi endeña chovu. Chochimu, mukwaKristu nateli kwiluka yinjikijilu yinakumwekesha nawu tudi mumafuku akukuminina, ilaña nateli kudiñija muyuma yikumukañesha kwikala watona. Ichi dichamumwekeneni Arielle, kansi wakuWest Africa.

Arielle watiyileña kuwaha kutala ngunja yawambanda yakumakasa hachisanji chanyivwimbimbi. Chelili shikola hatañilileñayi yitondi izanvu dakuya nakuhema ngunja, watiyili kuwaha chakwila wakañenyi nikwiluka wubanji wunateli kuluwañesha wuspiritu windi. Wetejeli kwikala mukwakukwata ngunja. Chumanyi chamwekeni? Walumbulwili nindi: “Akwetu amakwawu mutwayilili nakuhema ngunja adiña nawatujila twawu azatisheleña yitumbu yashetana nikunwa makanya. Atachikili kunseha hamuloña wakubula kudiñija muyuma yamuchidiwu, ilaña natoñojokeli nami nukuumika. Chakadi kwiluka, ngunja yatachikili kuluwañesha wuspiritu wami. Ngunja yakumakasa diyadiña nshima yami. Hakupompa kwetu kwawakwaKristu, yitoñojoka yami hiyadiña Mwitala daWantaku, yadiña mwibulu dangunja. Niyililu yami yawakwaKristu yatachikili kujiya. Kukeña kuhema ngunja kwanleñeleli nikali namuchima wakukeña kushiyamu akwetu. Nadishileñaku chikupu kulonda nikaleña nayililu yakudibecha. Natachikili kuneña. Nalekeli kudikunda nawamabwambu jami hamuloña wangunja.

 “Yuma yahimpikili chelili akwetu ayinki penoti. Nafundwameni nami nikwati ngunja. Neyi mukulabula kwadisu, nalombeli kudi Yehova kulonda yankwashi niyikwati! Chumichi chanleñeleli kwiluka nami wuspiritu wami wunazeyi. Hanu dinu natwesheli ñahi kukolesha cheñi wuspiritu wami?

“Haniyi mpinji nadiña natala dehi DVD yaYoung People Ask—What Will I Do With My Life? * Nafuukwiluhu kuyitala cheñi nawa haniyi mpinji nashiluku kanañachima chikupu. Muloña kukala kwamweni mukwenzi weyala André muchimwenu, dikunamweneña ninami. Nashili maana kuchuma chamulejeluwu André kudi eluda nawu—yatañi nikutoñojoka hamukanda waAfwilipi 3:8. Chankwashili nankashi. Nalekeli kuhema ngunja.

“Chumichi chankwashili chikupu! Yililu yami yakukeña kudibecha nichineñi yamanini. Nekalili namuzañalu nawa natachikili cheñi kudikunda nawamabwambu jami akwaKristu. Natachikili kukalakala chikupu nyidimu yakuspiritu. Natachikili kusha maana kunsañu yatañishileñawu hakupompa nikudiluñisha. Natachikili kudikita mumudimu wakushimwina. Chayinu mpinji navulaña kuzata wupayiniya wakukwasha.”

Neyi kudi chuma chinakuyileñela mudiwuli chinjikijilu chatulejeliyi Yesu, shenuku maana, neyi cheliliyi Arielle. Munateli kulondela iyi njila. Sandujolenu muWatch Tower Publications Index, yatenañawu nawu mapu yalombolaña antu kumaheta aswekawu. Munateli kuwana nyikanda yashimunaña kufumba kwakuwahi niyileji yawantu anahiti mukweseka. Hetelenu mukupompa kwawakwaKristu kuhitila mukuloñesha chachiwahi nikusoneka yikuma. Antu amakwawu chayikwashaña neyi ashakamina kumbidi. Neyi himpinji yakwakulahu izaza, ikalenu atachi kwakulahu. Cheñi, ikalenu atona kuspiritu kuhitila mukwesekeja nsañu yinakumwekana katataka mwituña nayinjikijilu niyililu ‘yamumafuku akukuminina.’—2 Tim. 3:1-5; 2 Pet. 3:3, 4; Chim. 6:1-8.

‘Diloñeshenu’

Chinjikijilu chamafuku akukuminina chinakumwekana kwejima, dikwila nawu “mwahita matuña ejima mwashakamawu antu.” (Mat. 24:7, 14) Antu amavulu ashakamaña mumaluña mudi yipupu, nzala, nyitentanshi, niyuma yikwawu yinakumwekana yashimwinuwu. Ilaña, antu amakwawu amavulu anakushakama kumatu kwamwena zo-o. Neyi kanda mumoneñahu dehi iyi yinjikijilu, komana mwatela kutoñojoka nenu lukadi lwasweja luchidi kwakulehi? Bayi mutoñojoka mwenimuku.

Chakutalilahu, toñojokenu hachuma chashimwiniyi Yesu nindi kwakekala ‘nzala, niyipupu.’ (Luka 21:11) Chatachi, Yesu hahosheli nindi yumiyi yakaholokela kumatuña ejima hampinji yoyimu nikutoha kwokumuku. Ilaña, wahosheli nindi yikamwekena “kwacheñi nakwacheñi.” Dichi hitunateli kukuhwelela netu yuma yoyimu yinateli kumwekana kumaluña ejima hampinji yoyimuku. Chamuchiyedi, chakumishiliyi kuhosha hanzala, Yesu wahosheli nindi atumbanji twindi amakwawu akekali asoñama kulonda akabuli kusweja kudya nindi: “Babalenu enu aweni, nyichima yenu yakenda kasweja kwikuta.” (Luka 21:34) Dichi, bayi tukuhwelela netu akwaKristu ejima akamona yinjikijilu yejimaku. Ilaña, Yesu wahosheli nindi: “Chimwakamona yumiyi hiyikumwekana, kelukenu nenu wanta waNzambi keña wushiki.” (Luka 21:31) Yozelu yinakutuñawu  makonu yakutiyañenamu yinakutukwasha kumona yinjikijilu yejima, hela chakwila kwiluña kutwashakamaña tunakumona yuma yacheñi.

Anukenu nenu, Yehova watoñola dehi ‘itañwa nimpinji’ yikatachika lukadi lwasweja. (Mat. 24:36) Kulondashana kwayuma yinakumwekana hamaseki hikunateli kuhimpa idi ifukuku.

Yesu wakonkomweneni akwaKristu akumatuña ejima nindi: “Babalenu.” (Mat. 24:44) Mpinji yejima twatela kwikala ababala. Ilaña, hichinayi mukwila nawu twatela kuhumisha itañwa nakukalakala nyidimu yaNzambi mafuku ejimaku. Kubombelahu, kwosi weluka yuma yitukelaña hampinji yikatachika lukadi lweneni. Amakwawu akadimaña mumaha hela kuzata nyidimu yahetala. (Mat. 24:40, 41) Chumanyi chitwatela kwila kulonda twikali atona?

Emmanuel, Victorine, nianyanawu awambanda atanu nawumu ashakamaña mwituña dimu damuAfrica nawa hiyamonaña yuma yinakumwekana yashimwinuwu nawu diyi yikamwekesha chinjikijiluku. Dichi afuukwiluhu kuhanjeka nsañu yakuspiritu ifuku niifuku kulonda chiyikwasheñaku kwikala ababala. Emmanuel washimwini nindi: “Chadiña nakutukalila hakuwana mpinji yitwatela kushakama hamu wejima wetu. Nkumininaku twatondeluhu chibalu chaora, hakachi ka 06:00 ni 06:30 nantetemena. Hanyima yakuhanjeka hansona yefuku, twaloñeshaña maparakalafu antesha mumukanda wutukudiza hakupompa kwachipompelu munowu mulungu.” Komana iyi progiramu yinayikwashi kwikala atona? Eña! Emmanuel diyi nloñeshi wezanvu dawaeluda muchipompelu. Victorine kakavulu wazatañaku wupayiniya wakukwasha nawa nakwashi antu amavulu kudiza chalala. Anyanawu awambanda wejima wawu anakukulilaku kuspiritu.

Yesu watukonkomweneni nindi: “Babalenu, tonenu.” (Maku 13:33) Bayi mwiteja yuma yahuwañeshaña yiyikañeshi kwikala atona kuspirituku. Ilaña, tiyililenu kufumba kwakuwahi kwekala munyikanda yetu nikwatufumbañawu kuchipompelu, neyi chelili Arielle. Kufwana chisaka chaEmmanuel, ifuku niifuku ilenuña yuma yikuyileñela mwikali adiloñesha ‘nikwikala atona.’

[Tumazu twaheshina]

[Mwevulu wudi hefu 4]

Kuhanjeka hayuma yakuspiritu ifuku niifuku kunamukwashi Emmanuel nichisaka chindi ‘kwikala adiloñesha’