Tuzañalelenu Hamu!

MAKONU, antu hiyakweti muzañaluku. Antu amavulu, akañanyaña kuhosha mazu akuhameka akwawu. Chihandilu chamakonu, sweje-e chamunyisumba yamaneni, chinakojeji antu kudikeña aweni nakudambula kudi akwawu.

Nkuluñaña Wadiza Chatoñojokañawu Antu, Alberto Oliverio, wahosheli nindi: “Antu amavulu atiyaña nankashi wuudi nawa chihandilu chawantu mumaluña mwekala matala amavulu chakudambula kudi akwawu. Kakavulu, chatuleñelaña kubula kutala mukwetu mutwazatilaña, wamuchituñilu hela muntu wazatilaña hachisankanu.” Muntu neyi nakudambula kudi akwawu waneñaña.

Ilaña, chihandilu chawakwetu akwaKristu chambuka, niyililu yawu neyi yambuka. Kapostolu Pawulu wasonekeli nindi: “Zañalalenu mafuku ejima.” (1 Tesa. 5:16) Kudi yuma yayivulu yatuletelaña muzañalu nikuzañalela hamu nawakwetu. Twadifukulaña kudi Nzambi Wasweja Kubadika, Yehova; tweluka nsañu yalala yekala muBayibolu; twachiñejaña netu twakapuluka nikwikala nawumi wahaya nyaka; nawa  tunateli kukwasha cheñi akwetu kwikala nakukooleka neyi kutukweti.—Mas. 106:4, 5; Yere. 15: 16; Rom. 12:12.

Kwikala namuzañalu nikuzañalela hamu nawakwetu diyililu yamwekeshañawu akwaKristu alala. Komana hichikutuhayamishaku hakumona Pawulu chasonekeleliyi Afwilipi nindi: “Nukutiya kuwaha nakuzañalala hamu nanenu ejima. Mwomumu ninenu mukutiya kuwaha nakuzañalala hamu nanami nawa.” (Fwi. 2:17, 18) Kuzatisha mazu antesha hohu, Pawulu wahosheli mapampa kayedi hansañu yakutiya kuwaha nikuzañalela hamu.

Hela chochu, akwaKristu atela kubabala kuchina kudambula kudi akwawu. Kwosi muntu wadambulaña hadi akwawu wunateli kuzañalela hamu nawakwawu akakwitiyaku. Hanu dinu, tunateli kulondela ñahi kufumba kwaPawulu ‘kwakutwalekahu kuzañalala mudi Mwanta’ hamu nawana kwetu?—Fwi. 3:1.

Zañalalenu Hamu Nawakwenu Akakwitiya

Hampinji yayisonekeleleluwu Afwilipi mukanda kudi Pawulu, hadaha wadiña mukaleya muRoma kukola mudimu wakushimwina. (Fwi. 1:7; 4:22) Hela chakwila amukasili, halekeli kwikala neyena dakushimwinaku. Ilaña, watiyileña kuwaha hakumukalakela Yehova nañovu jindi jejima nawa wekalili “neyi mulambu wakuhuñununa.” (Fwi. 2:17) Chuma cheliliyi Pawulu chamwekeshaña nawu muntu hanateli kwikala hohu namuzañalu neyi yuma yinakumwendela chiwahuku. Hela chakwila amukasili, Pawulu wahosheli nindi: “Dimu nakazañalela nawa.”—Fwi. 1:18.

Pawulu watuñili chipompelu muFwilipi nawa waswejeli kuyikeña ana kwindi amuwuna musumba. Welukili nindi kumwekesha muzañalu watiyileñayi hakumukalakela Yehova wadi kukolesha ana kwindi. Dihafumini hakusoneka nindi: “Enu ana kwetu, nakeñi nami mwiluki nenu yuma yinamonami yinabalumuki kwikala yakutwala nachu nsañu yayiwahi kumbidi; chakwila chinidi munyonji hansañu yaKristu chinatiyakani kudi mashidika ejima ekala mwibulu dawakwakuhemba antu, nikudi antu acheñi.” (Fwi. 1:12, 13) Njila yimu mwamwekesheleliyi Pawulu nindi watiyileña kuwaha nimuzañalu, yadiña yakuleja ana kwindi iyi nsañu yakukolesha. AkwaFwilipi niwena, atela azañaleli hamu naPawulu. Hela chochu, hiyateleleli kuneña hamuloña wakukala kwahitileñamu Pawuluku. Ilaña, ateleleli kumwimbujola. (Fwi. 1:14; 3:17) Cheñi nawa, akwaFwilipi ateleli kutwalekahu kumusha Pawulu mukulomba kwawu nikumukwasha mwejima mwatwesheluwu kumukwasha.—Fwi. 1:19; 4:14-16.

 Anetu nawa, komana twazañalalaña neyi chazañaleleñayi Pawulu? Komana twafwilaña kumonamu yayiwahi mukukala kwatuholokelaña nimumudimu wetu wawakwaKristu? Neyi tunakuhanjeka nawana kwetu, twatela kuzañalala hakuhosha nsañu yamudimu wakushimwina. Hitukutalila hohu netu chiña atuleja nsañu yayiwahi nankashi yamwekeni mwiha mwaka dinu tuzañalaluku. Hadaha twatwesheli kusañumuna mpwila yamuntu kulonda yakeñi nsañu yaWanta kuhitila mukuzatisha ntachikilu yayiwahi hela kuhanjeka. Indi kwiji twahanjekeli chachiwahi namwiniitala hamavasi amuBayibolu. Hela hampinji yitwazatileña mwiluña dakushimwina antu atwilukili nawu tudi aYinsahu jaYehova, nawa chumichi chahanini wunsahu wawuwahi. Neyi tulejaku akwetu nsañu yamuchidiwu tukuzañalela hamu nawu.

Antu jaYehova amavulu adihana nawa achidi kudihana kulonda akalakali mudimu wakushimwina. Apayiniya, ankoñi endaña, akaBeteli, amishonali, niankoñi akumatuña acheñi adikitaña chikupu mumudimu wampinji yejima nawa azañalalaña hakuzata iyi nyidimu. Komana twatiyaña kuwaha nakuzañalela hamu? Twatela kumwekesha kusakilila kudi awa ‘akwetu mutwakalakelaña hamu mudimu wawanta waNzambi.’ (Kol. 4:11) Hampinji yitwekalaña hamu hakupompa kwachipompelu hela hakupompa kweneni kwawakwaKristu, twatela kuyikolesha chikupu. Tunateli cheñi kwimbujola chakutalilahu chawu chakwikala adikita. Tunateli kuwana ‘hakwilila’ kulonda tutiyilili kuyuma yamwekeni yamwenuwu nikuyileja mazu akukolesha kuhitila mukuyimwekeshela chisambu, hadaha nikudyila hamu nawu yakudya.—Fwi. 4:10.

Zañalelenu Hamu Nawantu Anaholokeli Mukweseka

Kuumika makabisha nikushinda kweseka kwamukolesheli Pawulu kwikala washinshika kudi Yehova. (Kol. 1:24; Yak. 1:2, 3) Chelukiliyi nindi amana kwetu muFwilipi akumona kweseka kwokumu nawa kuumika kwindi kunateli kuyikolesha, chamutiyishili kuwaha nikuzañalela nawu hamu. Dichi wasonekeli nindi: “Anayiteji hansañu yaKristu, bayi kukumina dakumukuhwelela hohuku, chiña nikumumwena ihuñu nawa. Muloña mwalwishaña kulwisha kumwamweni mudami, nihanu mwatiyaña nawu kudi kwoku.”—Fwi. 1:29, 30.

Chochimu nimakonu, akwaKristu ayidimbululaña hamuloña wakushimwina. Mpinji yikwawu iku kudimbulula kwekalaña kwandombu, ilaña kakavulu kwenjilaña munjila yakala kwiluka. Kunateli kwinjila munyiloña yakutwamba yatutwikañawu kudi antu akweti kasekesha, nkunyi yafumaña kudi antu amuchisaka, kasekesha kafumaña kudi amabwambu hela akwetu akashikola. Yesu wasoñamishili nindi iku kweseka hikwatela kutuhayamisha hela kutuzeyeshaku. Ilaña, yumiyi yatela kutuzañalesha. Wahosheli nindi: “Neyi akayihosha chatama, nakuyikabisha, nakuyituñula mazu atama ejima, nikuyitwambila hansañu yamami, munakooleki. Zañalalenu, luñenu chacheni, muloña akayisomona masomu amaneni mwiwulu.”—Mat. 5:11, 12.

Hitwatela kutiya woma hela kufwa mutentu chitwatiya netu amana kwetu mumatuña amakwawu anakuyimwesha ihuñuku. Ilaña, twatela kuzañalala hamuloña wakutatakena kwawu. Tunateli kuyilombelaku, nakumulomba Yehova yakoleshi chikuhwelelu chawu nikuyikwasha kulonda omiki. (Fwi. 1:3, 4) Hela chakwila kwosi yuma yayivulu yitwatela kuyilila awa amana kwetu, tunateli kukwasha adi muchipompelu chetu anakuhita mukweseka. Twatela kuyisha maana nikuyikwasha. Twatela kuwana mpinji yakuzañalela hamu nawu kuhitila mukuyitambika mumpinji mumpinji Kukudifukula kwaChisaka kwamelela, kuzata nawu mumudimu wakushimwina, nikwikala nampinji yakuhemena hamu.

Kudi yuma yayivulu yatela kutuleñela tuzañaleleña hamu! Tukaanenu yililu yamudinu ituña yakudambula nawa tutwalekuhu kuzañalela hamu nawamana kwetu. Neyi twila mwenimu, tukusweja kudikeña nawa tukwikala anuñañana muchipompelu, nawa tukudiluñishaña chikupu nawamana kwetu akwaKristu. (Fwi. 2:1, 2) Eñañi, “zañalalenu mudi Mwanta mafuku ejima,” muloña Pawulu watukonkomweneni nindi: “Nukwila cheñi nami zañalalenu.”—Fwi. 4:4.

[Mazu aKusakilila eniMwevulu wudi hefu 6]

Kaayi: Courtesy of Replogle Globes