Dizishenu Amana Kwetu Kulonda Azateña Muchipompelu

“Muntu himuntu neyi nadizi dehi, wukwesekana kwanankuluñaña yindi hohu.”—LUKA 6:40.

1. Indi Yesu walili ñahi chikuku chakola chachipompelu cheneni?

 HAKUKUNKULULA nsañu yindi yayiwahi, kapostolu Yowanu wasonekeli nindi: “Kudi niyuma yayivulu yikwawu yeliliyi Yesu, yenoyu nayitoñojoki nami neyi ayisoneka yejima, mpata yamunu mwishina hiyadi kumona hakutenteka nyikanda yadi kusonekawuku.” (Yow. 21:25) Hakachi kayuma yakoñeliyi Yesu hakapinji kantesha kazatiliyi mudimu weneni wakushimwina yadiña yakuwana antu, nikuyidizisha, nikutonda antu akashilayi mudimu wakulombola neyi nakumishi dehi mudimu windi hamaseki. Chafuntiliyi mwiwulu mu 33 C.E., Yesu washili nali chikuku chakola chachipompelu chadi kutoha nakushika kumakombakanji hakapinji kantesha.—Yil. 2:41, 42; 4:4; 6:7.

2, 3. (a) Muloñadi amayala apapatishewa chatela kuzatilawu nañovu kulonda ashiki hakukalakala? (b) Yumanyi yitukuhanjekahu muchinu chibaaba?

² Makonu, mukaayi kejima mudi akwakushimwina aWanta adikita kubadika hayihita yitanu nayiyedi muyipompelu yakubadika ha 100,000, nawa amayala atela kulombola muniyi yipompelu anakukeñeka nankashi. Chakutalilahu, aeluda akwaKristu anakukeñeka nankashi. Twatela kuyisakilila awa amana kwetu anakufwila kukalakala iwu mudimu muloña ‘akeña mudimu wawuwahi.’—1 Tim. 3:1.

³ Hela chochu kudi yuma yatela kwilawu awa amayala hakwila nawu atweshi kukalakala muchipompelu. Shikola yakumujimba hela yuma yelukawu muchihandilu hiyinateli kuyikwasha kuzata iwu mudimuku. Hakwila nawu yazati  chiwahi iwu mudimu, mana kwetu watela kupama kuspiritu. Hela chakwila kudi yuma yelukayi, chiña yekala nayililu yakuspiritu nankashi. Indi amayala muchipompelu anateli kuyikwasha ñahi kulonda ashiki hakukalakala nyidimu? Yesu wahosheli nindi: ‘Muntu himuntu neyi anamudizishi chiwahi, wukwesekana nankuluñaña yindi.’ (Luka 6:40) Muchinu chibaaba, tukuhanjeka hanjila jazatishiliyi Ntañishi Muneni, Yesu Kristu, jakwashili atumbanji twindi kukalakala mudimu weneni, nawa tukumona yuma yitwatela kudizila kuyuma yakoñeliyi.

“Nayiteni Dehi Nami Mudi Amabwambu”

4. Indi Yesu wadimwekesheli ñahi nindi wadiña ibwambu dawatumbanji twindi chikupu?

⁴ Yesu wayiteneneña atumbanji twindi nindi amabwambu jindi bayi neyi antu amukunkulwayuku. Wahanjikileña nawu, nikuyikuhwelela ‘nikuyileja yuma yejima yatiyiliyi kudi Tata yindi.’ (Tañenu Yowanu 15:15) Toñojokenu hamuzañalu watiyiluwu chelili Yesu yaakuli lwihu lwamwihwiluwu nawu: ‘Chinjikijilwinyi chakwiluka nachu hiwamba kenzeyi, nihamba kakuma nyaka yamakonu?’ (Mat. 24:3, 4) Wayilejeleña cheñi atumbanji twindi nsañu yakujinda. Chakutalilahu, hawufuku wamufutukililuwu, Yesu wayili naPetulu niYakoba niYowanu mwitempa daÑesemani nakulomba chikupu hakukala kwamuholokeleli. Hela chakwila apostolu asatu hiyatiyili yuma yalombeliyi Yesuku, atela elukili nawu naneñi nankashi. (Maku 14:33-38) Toñojokenu hamuzañalu watiyiluwu apostolu asatu hakusambila chamwenuwu Yesu nabalumuki mwacheñi. (Maku 9:2-8; 2 Pet. 1:16-18) Wubwambu wakola wakwatiliyi Yesu nawatumbanji twindi wayikwashili nankashi hampinji yakalakeleñawu mudimu weneni wayinkeliyi.

5. Indi aeluda akwaKristu anateli kukwasha ñahi akwawu?

⁵ Kufwana Yesu, aeluda akwaKristu niwena akwataña wubwambu nawantu nikuyikwasha. Amwekeshaña kukeña nikudikunda nawakwawu akakwitiya kuhitila mukwikala nampinji yakuhanjika nawu. Hela chakwila aeluda eluka nawu atela kwikala nakajindilu, ahanjikaña nawakwawu. Aeluda akuhwelelaña amana kwawu nawa ahanjikaña nawu nsañu yamuNsona yinadizuwu. Aeluda hiyamonaña nkoñi mukwakuzatila wuchidi kansi nawu wamukunkulwayuku. Ilaña amumonaña nawu himana kwawu wapama kuspiritu wunakudikita nyidimu yalema yamuchipompelu.

“Nayileji Chuma Chakwimbujola”

6, 7. Shimunenu chakutalilahu chayishililiyi Yesu atumbanji twindi niyuma yafuminumu.

⁶ Hela chakwila atumbanji twaYesu ahamekeleña yuma yakuspiritu, yitoñojoka yawu yaluwankeneña nayitachi niyisemwa yawu. (Mat. 19:9, 10; Luka 9:46-48; Yow. 4:27) Hela chochu, Yesu hakeñeleña yiluwa mudi atumbanji twindi hela kuyichinishaku. Hayilejeleña nindi eleña yuma yakala hela kuyila nindi akoñi chuma chabulileñayi yena kwilaku. Ilaña Yesu wayidizishileña atumbanji twindi nachakutalilahu chindi.—Tañenu Yowanu 13:15.

⁷ Yesu wayishilili atumbanji twindi chakutalilahu chamuchidinyi? (1 Pet. 2:21) Wadiña nachihandilu chapela kulonda ekali nampinji yakukalakela antu. (Luka 9:58) Yesu wadiña wadikehesha nawa yuma yatañishileñayi yashindameneneña haNsona. (Yow. 5:19; 17:14, 17) Wadiña wakasunuka nawa wadiña naluwi. Kukeña dikwamusañumwineña kwila yuma yejima yakoñeliyi. (Mat. 19:13-15; Yow. 15:12) Chakutalilahu chaYesu chayikwashili apostolu hama. Chakutalilahu, Yakoba hachinini kufwaku, ilaña wamuzatilili Nzambi nakashinshi kushika nimpinji yamujahiluwu. (Yil. 12:1, 2) Yowanu walondeli mumahaji aYesu nakashinshi kubadika hadi yaaka 60.—Chim. 1:1, 2, 9.

8. Indi aeluda ekalaña ñahi akutalilahu kudi atwansi niantu amakwawu?

⁸ Aeluda adihana, adizoza nawa akweti kukeña ekalaña akutalilahu kudi anyikwenzi. (1 Pet. 5:2, 3) Cheñi, aeluda akweti chakutalilahu chachiwahi muchikuhwelelu, muntañishilu, muchihandilu chawuKristu nikwiluka  chakukalakala mumudimu wakushimwina azañalalaña hakwiluka nawu akwawu anateli kwimbujola chakutalilahu chawu.—Heb. 13:7.

‘Yesu Chayilejeliyi Nshimbi, Hakuyitemesha’

9. Tuneluki ñahi netu Yesu wadizishili atumbanji twindi kwiluka chakushimwina?

⁹ Hanyima yakukalakala chikupu mumudimu wakushimwina hadi yaaka yiyedi, Yesu watohesheli mudimu wakushimwina kuhitila mukutemesha apostolu indi 12 kulonda ayi nakushimwina. Wasambilili kuyileja nshimbi. (Mat. 10:5-14) Hampinji yakeñeleñayi kudiisha antu amavulu yakudya muchihayamisha, Yesu walejeli atumbanji twindi chakupompesha antu nichakuyinka yakudya. (Luka 9:12-17) Eñañi, Yesu wayidizishili atumbanji twindi kuhitila mukuyileja chikupu mwakwilila. Hamuloña wakuyidizisha muniyi njila, kushilahu tuhu niwukwashu wañovu yaspiritu yajila, kwaleñeleli apostolu kudikita chikupu mumudimu wakushimwina watachikili muchaaka cha 33 C.E. nawa watwalekeluhu.

10, 11. Munjilanyi mwatela kuyidizishilawu amana kwetu amaha nakutwalekahu?

¹⁰ Makonu, kufumba kwakuspiritu kwatachikaña neyi iyala yeteja kudiza Bayibolu. Twatela kumukwasha kulonda yeluki kutaña chachiwahi. Tukutwalekahu kumukwasha hampinji yitunakudiza nindi Bayibolu. Neyi natachiki kwinza kukupompa kwawakwaKristu mpinji yejima, wukupaminaku kuspiritu neyi yasonekesha muShikola yaMudimu waTeokalatiki, yekala mukwakushimwina wabula kupapatishewa nikwila yuma yikwawu. Neyi napapatishewi dehi, akumudizisha nyidimu yidi neyi kuwahisha Itala daWanta. Chimwahita mpinji, iwu mana kwetu anateli kumukwasha kulonda yeluki yuma yatela kukoñayi kulonda yatweshi kwikala nkoñi mukwakuzatila.

¹¹ Neyi hiyakumwinka mana kwetu wapapatishewa mudimu, eluda watela kumulumbulwila chatela kuzatayi mudimu wunamwinkuwu nikumukwasha chikupu. Mana kwetu anakudizishawu watela kwiluka yuma yikwilañayi. Neyi mudimu wumukalila, eluda wukweti kukeña hashikenaña dakuhosha nindi nakañanyiku. Ilaña eluda wukumulumbulwila hanakuluwañeshayi nichatela kuzatayi. Aeluda azañalalaña hakumona amana kwetu anakwashuwu anatachiki kuzata nyidimu yawu chiwahi nawa anakuzañalala hakukwasha ana kwawu niahela.—Yil. 20:35.

“Muntu Wukweti Maana Watiyililaña Mwamulejañawu”

12. Muloñadi kufumba kwaYesu chikwasoñeleña nyikabu?

¹² Yesu wadizishili atumbanji twindi kuhitila mukuyifumba kwesekeja nakukala kukwetiyi kambanji. Chakutalilahu, wayizuwilili aYakoba niYowanu hakutambika kesi nawu kaholoki mwiwulu kulonda kayochi aSamariya amukaanini Yesu. (Luka 9:52-55) Chelili mama yaYakoba niYowanu yenzi kudi Yesu nakuyilombelaku anyanindi nindi ayinki chifulu cheneni muWanta, Yesu wayikwashili ana kwindi chakadi kuhita mumbadi nindi: “Hakwila kushakama kuchikasa chami chachidiilu, hela kuchikasa chachimunswa, hichuma chakuhana amuku, chambala chawaloñeshelawu dehi kudi Tata yami.” (Mat. 20:20-23) Mpinji yejima, Yesu wayifumbileña munjila yayiwahi, yatela kuyikwasha kushindamena hanshimbi jaNzambi. Wayilejeli atumbanji twindi kutoñojoka hanshimbi jamuchidiwu. (Mat. 17:24-27) Yesu welukili cheñi kuzeyazeya kwawatumbanji twindi nawa welukili nindi yuma yikwawu akukañanya kuyila. Wayifumbileña hamuloña wakuyikeña.—Yow. 13:1.

13, 14. (a) Hinyi atela kufumbawu? (b) Shimunenu yakutalilahu yatela kuzatishayi eluda hakufumba muntu wunakubula kupama kuspiritu?

¹³ Hela chochu, kwakekala mpinji yakatambwilayi mana kwetu wunakukeña kukalakala muchipompelu chawakwaKristu kufumba kwamuNsona. HaYishimu 12:15 hahosha nawu: “Muntu wukweti maana watiyililaña mwamulejañawu akwawu.” Mana kwetu wakansi wumu wahosheli nindi: “Yiluwa yinakoñeleña diyamwesheleña kalula. Ilaña eluda wumu wanlejeli  nindi hela chakwila hinawaninaku nateli kumukalakela Nzambi.”

¹⁴ Neyi aeluda eluka nawu mana kwetu hanakupama kuspirituku muloña wayililu yaheña yikwetiyi, awanaña njila yakumukwashilamu naspiritu yakudizoza. (Ŋal. 6:1) Mpinji yikwawu, anateli kumufumba kulonda yahimpi yililu yindi. Chakutalilahu, neyi mana kwetu nakudinkaku wanyi, eluda nateli kumuleja nindi Yesu wadiña mukwakushimwina Wanta wadikita nawa walejeli atumbanji twindi kwilisha atumbanji. (Mat. 28:19, 20; Luka 8:1) Neyi mana kwetu nakudinyamuna, eluda watela kumuleja chakwashiliyi Yesu atumbanji twindi kwiluka wubanji wekala mukudinka wanta. (Luka 22:24-27) Indi neyi mana kwetu wekala nachaaku chakubula kwanakena akwawu? Chishimu chanduñu wakaanini kwanakena mukwawu wadiña nakamukudi kanyanya henohu yena amwanakeneni mukudi weneni nankashi chikumukwasha hama. (Mat. 18:21-35) Neyi kudi muntu anakukeña kufumbawu, atela kumufumba swayi.—Tañenu Yishimu 27:9.

‘Didizishenuña Enu Aweni’

15. Indi chisaka chamana kwetu chinateli kumukwasha ñahi kulonda yakalakeli akwawu?

¹⁵ Aeluda alombolaña hakudizisha amana kwetu kulonda atweshi kukalakala, amakwawu niwena atela kuyikwashaku. Chakutalilahu, mutu wachisaka watela kukwasha mana kwetu wamuchidiwu. Nawa neyi hieluda, wukuzañalala neyi ñodindi wukweti kukeña yamukwasha kushilahu tuhu nianyanindi. Neyi amukwasha kulonda yatwelekuhu kukalakala nyidimu yamuchipompelu, nateli kutwalekahu nakuzata mudimu windi. Kudihana kwawu namuchima wumu kukumuzañalesha nawa akwawu niwena akumuhameka nankashi.—Yish. 15:20; 31:10, 23.

16. (a) Hinyi watela kuzata nañovu hakwila yashiki hakukalakala? (b) Yumanyi yatela kwilayi mana kwetu hakwila yashiki hakukalakala nyidimu yamuchipompelu?

¹⁶ Hela chakwila akwawu anateli kumukwasha, mana kwetu yomweni diyi watela kudikita nankashi kulonda yashiki hakukalakala. (Tañenu Aŋalija 6:5.) Hela chochu, hichinayi mukwila nawu mana kwetu watela kwikala nkoñi mukwakuzatila hela eluda hakwila nawu yakwashi akwawu nikudikita mumudimu wakushimwinaku. Hakwila nawu mutachiki kuzata nyidimu yamuchipompelu mwatela kuzata nañovu kulonda muwanishi yuma yakeñekaña yashimunawu muNsona. (1 Tim. 3:1-13; Tit. 1:5-9; 1 Pet. 5:1-3) Neyi mana kwetu nakukeña kwikala nkoñi mukwakuzatila hela eluda ilaña kanda amutondi, watela kutala hayuma yinakumukañesha kulonda yapaminuku kuspiritu. Watela kwikala nachaaku chakutaña Bayibolu mpinji yejima, kudiza nkawindi, kutoñojoka hayuma yinadiziyi, kulomba, nikudikita mumudimu wetu wawakwaKristu  wakushimwina. Neyi yela mwenimu, wukuzatisha mazu amufumbiluwu Timotewu kudi Pawulu nindi: “Dikoleshaña wushiki mukwakama Nzambi.”—1 Tim. 4:7.

17, 18. Chumanyi chikwilayi mana kwetu wapapatishewa wunakutoñojoka nindi nashikilumu wanyi kukalakela akwawu hela hakweti mpwilaku?

¹⁷ Indi neyi mana kwetu nakutoñojoka nindi yena nashikilumu wanyi kwikala nkoñi mukwakuzatila hela eluda? Watela kutoñojoka chatukwashañawu kudi Yehova Nzambi niYesu Kristu. Eñañi, Yehova ‘diyi watusendelaña chiteli chetu hefuku hefuku.’ (Mas. 68:19) Tata yetu wamwiwulu nateli kumukwasha mana kwetu kukalakala nyidimu yamuchipompelu. Mana kwetu wunakubula kukalakala neyi nkoñi mukwakuzatila hela eluda watela kutoñojoka nindi amana kwetu apama atela kukalakala mukuloñesha kwaNzambi anakukeñeka chikupu. Neyi yatoñojoka hayumiyi chikumukwasha mana kwetu kuzata nañovu kulonda yabuleña kutoñojoka muniyi njila. Watela kulomba spiritu yajila, muloña yikumukwasha kwikala nakuwunda nikudihemba nawa wukuleka kutoñojoka nindi hashikila mwokuku. (Luka 11:13; Ŋal. 5:22, 23) Twatela kukuhwelela chikupu netu Yehova wakiswilaña amana kwetu adihanaña nakukalakela akwawu.

¹⁸ Komana iwu mana kwetu wunakubula kushikahu nakukañanya muloña kwosi anakumusañumuna? Chumanyi chikumukwasha mana kwetu wunabuli mpwila yakukalakala? Kapostolu Pawulu wasonekeli nindi: “Nzambi diyi wakoñaña mudenu nimuchima wakukeña kwila, nikwila kwakweni, mwakutiyayi yena kuwaha.” (Fwi. 2:13) Nzambi diyi wamwinkaña muntu mpwila yakukalakela akwawu nawa spiritu yaYehova yinateli kumukolesha hakuzata mudimu wajila. (Fwi. 4:13) Cheñi, mukwaKristu nateli kulomba nindi Nzambi yamukwashi kwila yuma yaloña.—Mas. 25:4, 5.

19. Indi kunyamuka ‘kwawatubiña atanu nayedi, niatulamba atanu nasatu’ kwatalisha mudihi?

¹⁹ Yehova wakiswilaña aeluda adikitaña hakudizisha akwawu. Amana kwetu etejaña mwayifumbañawu nawa ashikaña hakukalakala nyidimu yamuchipompelu niwena atambwilaña nkisu yindi. Nsona yatukana nawu hakachi kawantu jaNzambi hakanyamuka “atubiña atanu nayedi, niatulamba atanu nasatu,” dikwila nawu, naambala yawamayala ashikahu, akalombolaña mukuloñesha kwaYehova. (Mika 5:5) Yenoyu nkisu kuvula hakumona akwaKristu awamayala amavulu anakuyidizisha nawa anakwiteja kukooleka kwakukalakala nyidimu yamutuumbakeshaña Yehova!

Mukwakula Nenudi?

• Indi Yesu wakwashili ñahi atumbanji twindi kulonda ashiki hakukalakala mudimu weneni?

• Indi aeluda anateli kumwimbujola ñahi Yesu neyi hiyakukwasha ana kwetu muchipompelu kulonda atachiki kulombola akwawu?

• Indi chisaka chamana kwetu chinateli kumukwasha ñahi hakwila nawu yashiki hakukalakala?

• Chumanyi chatela kwilayi iyala kulonda yashiki hakukalakala?

[Malwihu aKuzatisha haKudiza]

[Nyevulu yidi hefu 31]

Yumanyi yimunateli kudizisha kadizi wenu waBayibolu kulonda yapaminuku?

[Mwevulu wudi hefu 32]

Indi amayala anateli kumwekesha ñahi nawu anakufwila kukalakala?