Endenu Mwaya Spiritu Kulonda Mumoni Wumi Nikuwunda

‘Bayi mwenda mwaya mujimbaku, ilaña mwaya spiritu.’—ROM. 8:4.

1, 2. (a) Yumanyi yomisha mbaña yamonañayi muntu wunahuwankani henohu nakwendesha? (b) Wubanjinyi wunateli kufumamu neyi muntu yahuwankana kuspiritu?

 “YUMA yahuwañeshaña añendeshi yinakuvulilaku nankashi hachaaka hachaaka.” Imu dimwahosheliyi nsoneki wakwituña da U.S. watalaña hañendelu. Maselufoni adi hakachi kayuma yinakuluwañesha añendeshi kubula kusha maana kumudimu wawu wakwendesha. Antu amavulu ehujoleluwu ashimwini nawu ayihumini hela akeñeleña kuyihuma kudi motoka muloña ñendeshi wahosheleña haselufoni iku nakwendesha. Antu atoñojokaña nawu akuhemba mpinji kuhitila mukutemesha nshiña, komana dinu anakudokwela makala akesi.

² Niwubwambu wetu naNzambi wunateli kwikala muwumbanji. Neyi chochakañanyañayi ñendeshi wunahuwankani kumona yinjikijilu yawubanji, muntu wunahuwankani kuspiritu nateli kumona jomisha  mbaña. Neyi tukudiñija mukwila yuma yikutusenuna munjila yetu yawakwaKristu nikunyidimu yaNzambi, chikufumamu chikuhwelelu chetu chikuzeya. (1 Tim. 1:18, 19) Kapostolu Pawulu wasoñamishili haniwu wubanji hampinji yakonkomweneniyi akwawu akwaKristu muRoma nindi: ‘Yitoñojoka yachisemwa chakumujimba hikufwa, ilaña yitoñojoka yaspiritu hiwumi nikuwunda.’ (Rom. 8:6) Indi Pawulu watalishili mudihi? Tunateli kutondolwela ñahi ‘yitoñojoka yachisemwa chakumujimba nakufwila yitoñojoka yaspiritu’?

‘Hiyayihishaña Namuloñaku’

3, 4. (a) Kukalanyi kwamweniyi Pawulu kwasonekeliyi? (b) Muloñadi chitwatela kutoñojokela hakukala kwamweniyi Pawulu?

³ Mumukanda wasonekeleliyi aRoma, Pawulu wasonekeli hakukala kwamweneñayi, walwishileña nayuma yakumujimba niyitoñojoka. (Tañenu Aroma 7:21-23.) Pawulu hadiña nakudihakwila hela kuditiyila yomweni wushonaku, neyi kwiji welileña chikupu nshidi chakwila wakañenyi nikudikwasha yomweni. Wadiña wapama nawa mukwaKristu wawayishewa naspiritu, nawa amutondeli kwikala ‘kapostolu kaweni matuña.’ (Rom. 1:1; 11:13) Hanu dinu, muloñadi Pawulu chasonekeleliyi hakukala kwamweniyi?

⁴ Pawulu waditejeleli nindi hadiña nawuswa wakwila nkeñelu yaNzambi kushika hakumina ñovu jinduku. Muloñadi? Wahosheli nindi: “Antu ejima anavulumuni, anakañanyi kushika mwashikila kulema kwaNzambi.” (Rom. 3:23) Hakwikala mwana kaAdama, Pawulu wamweneña yinzeñeli hamuloña wanshidi yakuzañesheleña mujimba windi wabula kuwanina. Tuneluki kukala kwamweneñayi muloña wonsu wetu twawanina wanyi nawa twamonaña yinzeñeli hefuku hefuku. Cheñi, kudi yuma yayivulu yinateli kutuhuwañesha nakutusenuna ‘munjila yanyanya yaya kuwumi.’ (Mat. 7:14) Hela chochu, Pawulu womikili, anetu nawa tunateli kuumika.

5. Indi Pawulu wawanini kudihi wukwashu?

⁵ Pawulu wasonekeli nindi: ‘Wukuñamwina . . . hinyi? Namusakilili Nzambi nami Yesu Kristu Mwanta wetu diyi natweshi.’ (Rom. 7:24, 25) Kuhiñahu, walejeli “antu ekala mudi Kristu Yesu,” akwaKristu awayishewa. (Tañenu Aroma 8:1, 2.) Naspiritu yindi yajila, Yehova wayilisha kwikala anyanindi, wayitambika kwikala “akuswana chimu naKristu.” (Rom. 8:14-17) Spiritu yaNzambi nikukuhwelela mumulambu wefutu danyiloña daKristu, kwayikwashaña kushinda kukala kwateneniyi Pawulu nawa ‘hiyayihishaña namuloñaku.’ Anayamwini dehi “kulushimbi lwanshidi nikufwa.”

6. Muloñadi ambuña Nzambi chatela kutoñojokelawu hamazu aPawulu?

⁶ Hela chakwila mazu ahosheliyi Pawulu akundama kudi akwaKristu awayishewa, mazu ahosheliyi kutalisha hadi spiritu yaNzambi nihamulambu wefutu danyiloña daKristu anateli kukwasha ambuña Yehova chili akweti kuchiñeja kwamwiwulu hela hamaseki. Hela chakwila Pawulu amoneneni kufumba akwaKristu awayishewa, chikuwaha neyi ambuña Nzambi ejima akwiluka mazu asonekeliyi nikufwila kuyizatisha.

Nzambi ‘Chatanyishiliyi Nshidi Yamujimba’

7, 8. (a) Munjilanyi ‘mwazeyeleli Nshimbi mumujimba’? (b) Yumanyi yakoñayi Nzambi kuhitila mudi spiritu yindi niifutu danyiloña?

⁷ Mukapetulu 7 kamukanda waAroma, Pawulu wetejeli nindi nshidi yayimakena antu abula kuwanina. Mukapetulu 8, wahosheli nindi spiritu yajila yikweti ñovu. Kapostolu walumbulwili spiritu yaNzambi chiyinateli kukwasha akwaKristu anakulwisha nanshidi kulonda atwalekuhu kwila nkeñelu yaYehova nikwikala nawuselewa windi. Pawulu washimwini nindi nawukwashu waspiritu yaNzambi nimulambu wefutu danyiloña daMwanindi, Nzambi wakoña chuma chakañenyi kwila Nshimbi yamwinkeluwu Mosi kudi Nzambi.

 ⁸ Nshimbi yahishileña akwanshidi muloña antu akañenyeña kwovwahila nshimbi jejima. Cheñi, atupristu abadika amuIsarela alombweleñawu naniyi Nshimbi hiyadiña awaninaku nawa hiyahanineña mulambu watelela wakubuta nachu nshiduku. Dihafumini Nshimbi ‘kuzeya mumujimba.’ Ilaña ‘chatemesheliyi Mwanindi yomweni muchifwikija chamujimba wanshidi’ nakumuhana ekali mulambu, Nzambi ‘watanyishili nshidi yamujimba,’ dikwila nawu washindili ‘Nshimbi jakañenyi.’ Dihafuma akwaKristu awayishewa kuyitena nawu aloña hamuloña wakukuhwelela mumulambu wefutu danyiloña daYesu. Ayikonkomwenaña nawu ‘endeña, bayi mwaya mujimbaku, ilaña mwaya spiritu.’ (Tañenu Aroma 8:3, 4.) Eñañi, atela kwila mwenimu nakashinshi nichakamanishawu mudimu wawu hamaseki kulonda akayinki “chibaaba chawumi.”—Chim. 2:10.

9. Indi izu dakwila nawu “lushimbi” didi haAroma 8:2 datalisha mudihi?

⁹ Kubombela ‘haNshimbi,’ Pawulu wateneni ‘nshimbi yaspiritu’ ‘ninshimbi yanshidi nikufwa.’ (Rom. 8:2) Hinshimbinyi jeniji? Izu dakwila nawu “nshimbi” dinazatishuwu hanu hidinatalishi kunshimbi jikwawu, chidi neyi Nshimbi jamwinkeluwu Mosi kudi Nzambuku. Mukanda wumu wahosha nawu: “Izu dachiGiriki dabalumunawu nawu nshimbi dalumbuluka nawu lushimbi lwekala munyichima yawantu lwakwila yuma, hela yayiwahi hela yatama, nawa lwayiyuulaña neyi lushimbi. Idi izu datalisha cheñi kunshimbi jazatishañayi muntu mukuhanda kwindi.”

10. Indi lushimbi lwanshidi nikufwa lwatuyuulaña ñahi?

¹⁰ Kapostolu Pawulu wasonekeli nindi: “Kudi iyala wumu nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” (Rom. 5:12) Chineli tudi anyana kaAdama, wejima wetu tudi muwunduñu walushimbi lwanshidi nikufwa. Nyijimba yetu yanshidi yatulejaña kwila yuma yamuneñeshaña Nzambi, nawa kufwa katuyuulaña. Mumukanda wasonekeleliyi Aŋalija, Pawulu wateneni yililu niyaaku yamuchidiwu nindi ‘hinyidimu yamujimba.’ Watwalekeluhu nindi: “Antu akwila mwenimu hiyamba kaswana wanta waNzambuku.” (Ŋal. 5:19-21) Antu amuchidiwu adi neyi antu endaña mwaya mujimba. (Rom. 8:4) “Lushimbi lwekala munyichima yawu” ‘ninshimbi jazatishañawu mukuhanda kwawu’ yakundama chikupu kuyuma yakumujimba. Komana antu elaña wuvumbi, wusenji, apeshaña hela akosomonaña yuma  yomisha mbaña diwu endaña hohu mwaya mujimba? Inehi, muloña munyidimu yakumujimba mwekala cheñi yililu yaheña yidi neyi ichima, madombu, kukokwela kwenu nilwisu. Hinyi wukukaana nindi kanda yendeñahu dehi mwaya mujimba?

11, 12. Yumanyi yatwinkayi Yehova kulonda yitukwashi kushinda lushimbi lwanshidi nikufwa, nawa chumanyi chitwatela kwila kulonda twikali nawuselewa waNzambi?

¹¹ Twatela kuzañalala hakwiluka netu Yehova natukwashi kushinda lushimbi lwanshidi nikufwa! Yesu wahosheli nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” Neyi twiteja kukeña kwaNzambi nikukuhwelela mumulambu wefutu damuloña daYesu Kristu, hiyakutuhisha namuloña wanshidi yitwaswanaku. (Yow. 3:16-18) Dichi tunateli kuhosha neyi chahosheliyi Pawulu nindi: ‘Namusakilili Nzambi nami Yesu Kristu Mwanta wetu diyi natweshi.’

¹² Kukala kutunakumona kudi neyi anakutuuka chikatu chafwana. Neyi tunakukeña kukola chikupu, twatela kwila munakutulejayi ndotolu. Hela chakwila kukuhwelela mwifutu danyiloña kunateli kutukuula kulushimbi lwanshidi nikufwa, tuchidi abula kuwanina nawa akwanshidi. Kudi yuma yikwawu yitwatela kukoña hakwila nawu twikali akola kuspiritu nikutambwila wuselewa waNzambi ninkisu. Kutalisha hakushikijewa ‘kwayuma yaloña yakeñekaña muNshimbi,’ Pawulu wahosheli cheñi hansañu yakwenda mwaya spiritu.

Tunateli Kwenda Ñahi Mwaya Spiritu?

13. Indi kwenda mwaya spiritu kwatalisha mudihi?

¹³ Neyi tunakwenda, dikwila nawu tunakuya chovu-chovu nakushika kumufunda. Dichi, neyi tunakukeña kwenda mwaya spiritu, twatela kupama nankashi kuspiritu, bayi neyi kwikala aloña kuspirituku. (1 Tim. 4:15) Hefuku hefuku nawa kushika hakumina ñovu jetu, tufwilenu kwenda hela kushakama kwesekeja namwatulombolaña spiritu. Neyi ‘tukwendaña mwaya spiritu’ tukwikala nawuselewa waNzambi.—Ŋal. 5:16.

14. Yumanyi yatoñojokañawu antu ‘endeña mwaya mujimba’?

¹⁴ Mumukanda wayisonekeleliyi Aroma, Pawulu wahosheli hadi antu ayedi akweti yitoñojoka yashiyashana. (Tañenu Aroma 8:5.) Izu dinazatishuwu dakwila nawu mujimba hidinatalishi kumujimba wetu  wawuntuku. MuBayibolu izu dakwila nawu ‘mujimba’ mpinji yikwawu datalisha kunshidi nikubula kuwanina kwekala munyijimba yetu. Yumiyi diyazuñishaña mujimba niyitoñojoka yateneniyi Pawulu hakusambila. Kwambukaku naPawulu, antu ‘endaña mwaya mujimba’ akañanyaña kuleka yililu yawu yatama. Chatela atoñojokeña hayuma yakeñañayi Nzambi nindi eleña nikutambwila wukwashu wunayinkiyi, wena kwawu ‘atoñojokaña hohu hayuma yakumujimba.’ Afwilaña hohu kudizañalesha namaheta akumujimba niyuma yikwawu. Ilaña, antu ‘endaña mwaya spiritu’ atoñojokaña hohu ‘hayuma yaspiritu,’ dikwila nawu hayuma yakuspiritu yatuloñeshelañawu.

15, 16. (a) Indi kutoñojoka hachuma kunateli kuluwañesha ñahi yitoñojoka yamuntu? (b) Yumanyi yinasweji kukeñawu antu amavulu makonu?

¹⁵ Tañenu Aroma 8:6. Hakwila nawu muntu yakoñi chuma chachiwahi hela chatama, chiña yasambila kutoñojokahu. Antu atoñojokaña hayuma yakumujimba anyakalaña kwikala nayitoñojoka hela yililu yakufwila nankashi yuma yakumujimba. Yumiyi yatachikaña kutanda munyichima yawu nimunhoshelu nawa ayikeñaña.

¹⁶ Yumanyi yinasweji kukeñawu antu amavulu makonu? Kapostolu Yowanu wasonekeli nindi: “Muloña yuma yampata yamunu mwishina yejima, kufwila kwachisemwa chaheseki, nikufwila kwamesu, nikudisamba kwamukunkulwayi kwawumi wunu, hiyakudi Tataku, yamumpata yamunu mwishina.” (1 Yow. 2:16) Antu afwilaña yuma yidi neyi wunyakalwalu, kutiyakana mpuhu nimaheta. Yumiyi yinenzali munyikanda, mumagazini, muyipapilu yansañu, hamaprogiramu ahaTV nihaIntaneti, muloña diyuma yatoñojokañawu antu amavulu nawa diyakeñañawu. Hela chochu, ‘yitoñojoka yakumujimba hikufwa,’ dikwila nawu, kufwa kuspiritu chayinu mpinji, kumbidi twakafwa kumujimba. Muloñadi? ‘Muloña yitoñojoka yakumujimba yekala nawulumbu naNzambi; hiyovwahilaña nshimbi jaNzambuku, hela kutweshamu nehi. Antu achisemwa chakumujimba hiyakutwesha kutiyisha Nzambi kuwahaku.’—Rom. 8:7, 8.

17, 18. Tunateli kwikala ñahi nayitoñojoka yaspiritu, nawa chumanyi chinateli kufumamu?

¹⁷ Ilaña, ‘yitoñojoka yaspiritu hiwumi nikuwunda,’ dikwila nawu, tukaheta wumi wahaya nyaka kumbidi nikuwunda munyichima nikuwunda naNzambi chayinu mpinji. Tunateli kwikala ñahi ‘nayitoñojoka yaspiritu’? Kuhitila mukutoñojoka hayuma yakuspiritu mpinji yejima nikufwila kwikala nayililu yakuspiritu. Neyi twila mwenimu, yitoñojoka yetu ‘yikwovwahilaña nshimbi jaNzambi’ nawa ‘yikwendelaña hamu’ nayitoñojoka yindi. Neyi tuholokela mukweseka, tukunyakala kwiluka njila yitwatela kulondela. Tukufuukulahu chuma chachiwahi, chuma chikwesekana nayitoñojoka yaspiritu.

¹⁸ Dichi chikuwaha neyi tukutoñojokaña hayuma yakuspiritu. Tunateli kwila mwenimu kuhitila ‘mudikwatisha munyichima yetu nakuzata nyidimu,’ nikusha maana kuyuma yakuspiritu muchihandilu chetu yidi neyi kulomba mpinji yejima, kutaña Bayibolu nikudiza, kupompa nikushimwina mudimu wetu wawakwaKristu. (1 Pet. 1:13) Chatela twiteji yuma yakumujimba yituluwañeshi, twatela kutoñojoka hayuma yakuspiritu. Neyi twila mwenimu chikutukwashaku kwenda mwaya spiritu. Nawa twakatambwila nkisu, muloña yitoñojoka yaspiritu hiwumi nikuwunda.—Ŋal. 6:7, 8.

Munateli Kulumbulula?

• Indi ‘nshimbi jakañenyi’ ñahi, nawa Nzambi wayimanishili ñahi?

• Indi ‘lushimbi lwanshidi nikufwa’ hichumanyi nawa tunateli kukulika ñahi?

• Chumanyi chitwatela kwila kulonda ‘twikali nayitoñojoka yaspiritu’?

[Malwihu aKuzatisha haKudiza]

[Nyevulu yidi hefu 12, 13]

Komana mwendaña mwaya mujimba tahindi mwaya spiritu?