Komana Mwazañalalaña ‘Hakukooleka Kumukweti Kwakuhana Yawaana’?

AKWAKRISTU akusambila amuFwilipi ayilukili nawu adiña nanyichima yakuhana yawana yakukwasha nachu kudifukula kwalala. Mumukanda wonenewa wayisonekeleliyi, kapostolu Pawulu wasonekeli nindi: “Chinaanukaña nsañu jenu jejima nasakililaña Nzambi yami. Mafuku ejima chinayilembelelaña wejima wenu, nayilembelelaña namuzañalu, nanochu chimwankwashaña kutwala nsañu yayiwahi kumbidi, kufumisha kwifuku datachi nilelu.” (Fwi. 1:3-5) Pawulu wanukili chelili Lidiya nichisaka chindi ayipapatishi nawa wayilembeleli aPawulu niamabwambu jindi mwakalakeleleñawu mudimu wakushimwina nindi ashakami mwitala dindi.—Yil. 16:14, 15.

Hashimbwili wanyi, chipompelu chatuñiluwu muFwilipi chamutemesheleli Pawulu yakudya hampinji yashakaminiyi nyilungu yayivulu  nawakwawu akakwitiya muTesalonika, musumba hadiña jikilomita 160. (Fwi. 4:15, 16) Chimwahitili yaaka yantesha, chelili amana kwindi amuFwilipi niakuMasidoniya atachiki kumona kukala ‘nikusweja wuzweñi,’ atiyili nawu akwaKristu muYerusalema akabishileñawu niwena adiña mukukaankila nawa akeñeleña kuyikwasha. Pawulu wahosheli nindi ahanini ‘chakubadika mwatwesheleluwu.’ Wasonekeli nindi: ‘Hiyakutulembelela nakulembelela kwakweni nawu ayiteji kukundañana nawu nakukwashana.’—2 Kor. 8:1-4; Rom. 15:26.

Chimwahitili yaaka ikumi kufuma hetejeluwu Afwilipi wuKristu, atwalekeluhu namuchima wakuhana. Chatiyiluwu nawu Pawulu amushili mukaleya muRoma, atemesheli Epafwaditu wendeli makilomita 1,287 hamaseki nihakaluñalwiji iku nasendi yakudya yakapostolu. Mwalala, aFwilipi akeñeleña kumukwasha Pawulu kulonda yatwalekuhu kukwasha ana kwindi nikushimwina, nihampinji yadiñayi mukaleya.—Fwi. 1:12-14; 2:25-30; 4:18.

Nikulelu, akwaKristu atiyaña kuwaha hakukwasha mudimu wakushimwina Wanta nikwilisha atumbanji. (Mat. 28:19, 20) Atwalaña Wanta hambidi kuhitila mukuzatisha mpinji, ñovu nikuhana mali. Chikasha chinamwekeshuwu chinakushimuna jinjila jimwatela kuzatisha hakuhana mali akukwasha nachu mudimu watwinkayi Nzambi.

[Chikasha chidi mafu 22, 23]

NJILA MWAHANINAÑAWU AMAKWAWU

YAWAANA YAKUKWASHA MUDIMU WAMUKAAYI KEJIMA

Antu amavulu ahembaña, hela afuukulaña, mali ashañawu muchikasha mwakusha yawaana hakusoneka nawu “Mudimu waMukaayi Kejima.”

Kakweji nikakweji, yipompelu yatemeshaña awa mali kukasanji kawaYinsahu jaYehova kamwituña dawu. Yawaana yamali akuhana mukudikeñela mwatela cheñi kuyitemesha enu aweni kuWatch Tower Society, Attention Treasurer, P. O. Box 33459, Lusaka 10101, hela kukasanji kamutayi kawaYinsahu jaYehova kamwituña denu. (Yawana yakuhana mukudikeñela yinashimuniwu heshina niyena mwatela kuyitemesha kukasanji kamutayi kawaYinsahu jaYehova kamwituña denu.) Macheki imukutemesha kuzatisha keyala yidi hewulu atela kuyifweta kudi “aWatch Tower Society.” Yingelingeli hela yuma yikwawu yawuseya niyena mwatela kuhana. Mwatela kusoneka mukanda wawihi mumukulumbulula nenu munahani iyi yawaana.

NJILA YAKUHANINAMU MALI AKUSONDAMISHA

Mwatela kuhana mali kudi aWatch Tower Bible and Tract Society of Pennsylvania kulonda ayizatishi kumudimu wamukaayi kejima. Hela chochu, neyi himukukeña mali enu akuyifuntishila.

KUFUUKWILA CHADIMU KUHANA WUKWASHU

Kubombela hayawaana yamali imwatela kuhana, kudi njila jikwawu mutwatela kukwashila mudimu waWanta wamukaayi kejima. Njila jikwawu dijeniji:

Inshuwalansi: Mwatela kusoneka nenu aWatch Tower Bible and Tract Society of Pennsylvania diwu atela kutambula mali akukiñilamu wumi wenu hela apeshoni.

Mali Akunyambawulu: Mali akunyambawulu, yipapilu yimwaswekejelañahu mali, hela mali apeshoni mwatela kuyihana kudi aWatch Tower Bible and Tract Society of Pennsylvania neyi enu mwiluña mwosi, kwesekeja nanshimbi yanyambawulu yamwituña denu.

Mali Asompokañamu: Antu amakwawu ekela namakampani nawa mali asompokañamu ayihanaña chawaana kuWatch Tower Bible and Tract Society of Pennsylvania hela anateli kusoneka nawu neyi wena mwiluña mwosi aWatch Tower Bible and Tract Society of Pennsylvania diwu akatambula mali.

Mpata Hela Matala: Mwatela kuhana itala hela mpata yatela kulandishawu neyi chawaana, neyi mudi netala, mwatela kusonekesha nenu mukashila aWatch Tower Society of Pennsylvania, enu aweni mukutwalekahu nakushakamamu.

Chawaana Chahachaaka: Iyi hinjila yimu yakuhaninamu mali hela njila yikwawu yakuhembelamu mali kumutayi wazatishañawu aYinsahu jaYehova. Mukwakuhana niyena hela muntu mukwawu anenkuwu iwu mudimu kudi mukwakuhana, wukutambulaña nfwetu hachaaka hachaaka muchihandilu chindi.

Mawilu niYikumba: Yikumba hela mali mwatela kusonekesha nenu yikashali mumakasa aWatch Tower Bible and Tract Society of Pennsylvania kuhitila mukusoneka wilu, munateli kusoneka nenu aWatch Tower Bible and Tract Society of Pennsylvania diwu akatambula yikumba. Neyi muhana yikumba yenu kulonda yikwasheña mutayi wansakililu yikuyileñela mubuleña kufweta nyisoku.

Kwesekeja namwatalisha mazu akwila nawu “kufuukwila chadimu kuhana wukwashu,” iyi yawaana yakeñekaña wunakuhana kufuukwila chadimu. Ihulenu kasanji kamutayi kamwituña denu henohu kanda musonekeshi nenu diwu wumwakashila neyi munafwi hela njila yikwawu yaCharitable Planning Arrangements.