Malwihu Kufuma Kudi Antañi

Komana tunateli kwiluka mpinji yayeni yamupopeluwu Yesu Kristu hamutondu?

Ilu lwihu alwihulaña muloña wachaambu chantesha chidi hansañu yonenawu yakufwa kwaYesu muNsañu Yayiwahi yasonekeluwu kudi nsoneki Maku nikudi kapostolu Yowanu. Maku wasonekeli nindi: ‘Hamupopeleluwu amashidika hamutondu wakuyandishila hadiñi haora yamuchisatu.’ (Maku 15:25) Ilaña Yowanu wasonekeli nindi, “hadiña neyi kwiji ora yamuchitanu nayimu” hampinji yelili Pilatu yamuhani Yesu kudi aYudeya nawu amupopeli hamutondu. (Yow. 19:14-16) Akwakuhosha nsañu yamuBayibolu alumbulula iyi nsañu yamwekanaña kudikasa munjila jashiyashana hakufwila kuyolola. Hela chochu, hitukweti wunsahu walumbwa wamuNsona washimuna chaambu chidi haniji nsona jiyeduku. Ilaña, neyi tukushinshika chapimineñawu antu kunyima mpinji kunateli kutukwasha.

Muyaaka nkulakaji yatachi C.E. aYudeya ambwili chibalu chamwaana mumaora 12, dikwila nawu kufuma hakutuntuka kwetañwa. (Yow. 11:9) “Ora yamuchisatu” yatachikileña na 8 koloku kushika nampinji ya 9 koloku yabudidi nawa ‘ora yamuchitanu nayimu’ yamanineña nampinji yachayili. Hela chochu, twatela kwanuka netu itañwa datuntukileña nikuhuma hampinji yashiyashana muchaaka. Dichi, kuleha kwampinji yamwaana kwambukileña kwesekeja nachilaaka. Cheñi, antu elukileña mpinji kwesekeja nahanashiki itañwa. Dichi, hakutena mpinji afwikijileña hohu. Nyikanda yawakwaKristu yachiGriki yashimunaña yuma yamwekeneña haora yamuchisatu, yamuchitanu nayimu, hela yamuchitanu nachiwana, kakavulu yahosheleña hanawa maora. (Mat. 20:3, 5; Yil. 10:3, 9, 30) Hakutena mpinji yayeni, chidi neyi ‘ora yamwikumi’ hela “ora yamuchitanu nachiyedi,” ayiteneneña hohu neyi kudi chuma chinamwekani hanoyu mpinji.—Yow. 1:39; 4:52.

Nsañu Yayiwahi yashimunaña mpinji yoyimu hayuma yamumwekeneni Yesu hefuku dakukumishaku hanu hamaseki. Nyikanda yejima yiwana yashimunaña nawu atupristu niakulumpi abulakeni hanyima yakuhuma kwetañwa nawa amutwalili Yesu kudi Ñuvulu wawaRoma Pontusi Pilatu. (Mat. 27:1; Maku 15:1; Luka 22:66; Yow. 18:28) Matewu, Maku, niLuka wejima wawu ashimuna nawu kufuma haora yamuchitanu nayimu, Yesu adiña amupopela dehi hamutondu nawa mwituña dejima mwashishitili mwidima kushika “nikuora yamuchitanu nachiwana.”—Mat. 27:45, 46; Maku 15:33, 34; Luka 23:44.

Chuma chimu chaleñeleli akañanyi kwiluka jiika mpinji yamupopeluwu Yesu hamutondu dichenichi: Henohu muntu kanda amupopeli hamutondu asambilileña kumweta tubama. Mpinji yikwawu muntu wafwileña hamuloña wakusweja kumweta tubama. Dichi Yesu aswejeli kumweta tubama dichaleñeleli akwati muntu wacheñi nawu amusendeluku mutondu wakuyandishila hanyima yakwila Yesu wasendaku dehi yomweni. (Luka 23:26; Yow. 19:17) Neyi muntu anakupopelawu hamutondu asambilileña kumweta tubama, dikwila nawu hatela hahitili mpinji hakwila nawu Yesu amupopeli hamutondu. Antu amboka-mboka anateli kushimuna mpinji yashiyashana yamupopeluwu, kwesekeja nahatachikililiyi muntu kuchinda mpinji.

Kapostolu Yowanu wasonekeli iyi nsañu henohu munahiti dehi yaaka yayivulu kufuma hasonekeluwu akwawu ansoneki aNsañu Yayiwahi. Welukili nsañu yasonekeluwu. Eña, Yowanu washimuna nsañu yambukaku nayashimwiniyi Maku. Dichi iwu wunsahu wunakumwekesha nawu Yowanu hakumininini dakusoneka nsañu yasonekeliyi Makuku. Wonsu wawu, aYowanu niMaku ayoneneni kudi Nzambi. Hela chakwila Nsona hiyalumbulula wunsahu wawuvulu wamwekeshaña chaambu chidihuku, twatela kukuhwelela nsañu yidi munyikanda yaNsañu Yayiwahi.