“Nidi Nawufwayi Chayinu Mpinji Ilaña Wahaya Nyaka Wanyi!”

Washimwini Sara van der Monde

Antu avula kunleja nawu, “Sara wasehaña chiwahi nankashi. Muloñadi chiwazañalelaña mpinji yejima?” Nayilejaña nami kudi chuma chachiwahi nankashi chinatalilaña. Kuchiñeja kwami nateli kukulumbulula nanawa mazu, “Nidi nawufwayi chayinu mpinji ilaña wahaya nyaka wanyi!”

NASEMUKILI mu 1974 mumusumba waParis, muFrance. Hadiña kukala hakuvwalika kwami, nkumininaku ankwatili nachikatu chakuwoñu chatenañawu nawu cerebral palsy. Kwenda kwankalilileña, antu akañenyeña kutiya chinahosheleña. Nakatili cheñi chikonya nawa nakatileña nyisoñu yayivulu.

Chinashikijili yaaka yiyedi anvwali jami abuukilili kumusumba waMelbourne, muAustralia. Chimwahitili yaaka yiyedi, aTata ayihayikili aMama ninami. Iyi diyadiña mpinji yatachi kukundama nankashi kudi Nzambi. Amama adiña aChinsahu chaYehova, asendeleña kukupompa kwetu kwawakwaKristu, kunelukili nami Nzambi wankeña nawa wañakamenaña. Yuma yinadizili nichankeñeluwu aMama nimazu ahosheleñawu akunkolesha, ankwashili chikupu, hela chakwila chihandilu chetu chahimpikili.

Amama andizishili cheñi chinatela kulomba kudi Yehova. Nawa, nachiwani neyi kulomba kwaswayi kubadika kuhosha. Hakulomba, hinakabakanaña hakutena mazuku, muloña mazu inakukeña kuhosha “nayilukaña” chikupu. Chineli nakabakanaña hakuhosha, nazañalalaña hakwiluka nami Yehova watiyaña yuma yejima yinalombaña, hela chakwila nahoshaña wumweneni hela idimi dadikasaña hakuhosha.—Mas. 65:2.

Kuumika Nayikatu

Chinashikijili yaaka yitanu, chikatu chami chakuwoñu chaswejeli chakwila nyendu yami ayishili muyikuñu hakwila nawu nendeña. Hela chakwila anshili muniyi yikuñu, nendeleña nakutedañila! Chinashikijili yaaka 11, ñovu jakwenda jamanini. Nkumininaku, nakañenyeña kukandama hakadidi hela kuhinduka, chiña ikina dinyamuna nakuñusha muchitwamu chikweti injini, chinendeshaña nakachikuñu.

Eña, mpinji jikwawu naneñaña nawufwayi wami. Ilaña nanukaña mazu itwahoshaña muchisaka chami: “Bayi wuneña nayuma yiwukubula kutwesha kwilaku. Twalekakuhu nakwila yuma yiwunateli kwila.” Awa mazu ankwashaña kwendela hakawalu, mumbopolu, kuvuwa watu, kuya kumaluña amawahi nakukaminaku nikwendesha motoka mukajila! Nakeña kuzata nyidimu yidi neyi kupenta, kuchima, kuchima jakudibuta, kuchimina hayakuvwala tuyuma twatuwahi nikwema yuma yamawumba.

 Hamuloña wakusweja wufwayi, antu amakwawu ajinokaña nawu hinukutwesha kumukalakela Nzambuku. Chinashikijili yaaka 18, ntañishi yami wanlejeli nindi “nitemuki” hetala kulonda nileki kuya kuchipompelu chawamama. Wanlejeli nindi wukunkeñela itala. Ilaña, namulejeli nami kwila nileka yuma yinakuhwelelaku nawa kwila nifuma hetalaku chiña neyi nakuli dehi.

Hashimbwili wanyi kufuma hinahanjekeli nantañishi yami, ampapatishili nakwikala Chinsahu chaYehova. Chimwahitili yaaka yiyedi, natachikili kudishakamina mukaditala kanyanya. Ichi nidi namuzañalu muloña ankwashaña nawa nakasunuki nankashi.

Chuma Chinabulili Kukuhwelela

Yaaka yejimiyi, nahiti mukweseka kwakuvulu. Ifuku dimu nahayamini nankashi chelili mukwetu mukashikola, niyena hichifwayi, yenzi nakuñila nindi yansumbuli. Hakusambila, natiyili kuwaha nankashi. Anami nawa nafwilaña kusumbuka neyi chakeñaña atunkaña amavulu. Ilaña, chineli wonsu wetu tudi ayifwayi hichinayi mukwila nawu twakazañalalaña mumaluwuku. Cheñi, iwu mukwenzi hadiña Chinsahuku. Yuma yinakuhwelela niyinafwilaña yambukili chikupu nayindi. Hanu dinu nateli kushakama ñahi namuntu wamuchidiwu? Ami nadiña namuchima wakwovwahila lushimbi lwaNzambi lwakusumbuka hohu namukwetu mukakwitiya. (1 Kor. 7:39) Dichi, namulejeli mukwenzi nami kwila nisumbuka nindi nehi.

Hela chayinu mpinji, neluka nami nafuukwili chachiwahi. Nawa neluka chikupu nami mwituña dadiha dakanayi Nzambi nakazañalala. (Mas. 145:16; 2 Pet. 3:13) Chayinu mpinji, nadikasi chikupu nami nukumwovwahilaña Yehova nikuzañalala kwesekeja nachihandilu chami.

Natalilaña ifuku dinakalotoka muchitwamu chami nakutemuka chikupu. Nawa nakabidika nami, “Nadiña chifwayi, ilañichi nakoli dehi, haya nyaka!”