‘Tudi Akwakwenda Mwambala’ Mudinu Ituña Datama
‘Tudi Akwakwenda Mwambala’ Mudinu Ituña Datama
“Wenawa ejima afwili mukukuhwelela . . . hiyakwiteja nawu tudi enyi niakwakwenda mwambala hanu hamaseki.”—HEB. 11:13.
1. Indi Yesu wahosheli nindidi hañimenu yawatumbanji twindi kutalisha kudinu ituña?
YESU wahosheli hadi atumbanji twindi nindi: “Adi mumpata yamunu mwishina.” Walumbulwili nindi: “Chanabuluwu kwikala ampata yamunu mwishina, neyi chineli ami nawa hinidi wampata yamunu mwishinaku.” (Yow. 17:11, 14) Yesu walumbulwili hatooka ñimenu yawatumbanji twindi alala kutalisha ‘kumpata yamakonu,’ yikweti nzambi yachu Satana. (2 Kor. 4:4) Hela chakwila ashakamineña mwituña datama, ilaña hiyadiña ampata yamunu mwishinaku. Chihandilu chawu munidi ituña chadi kwikala neyi ‘chawenyi niakwakwenda mwambala.’—1 Pet. 2:11.
Ashakamini Neyi “Akwakwenda Mwambala”
2, 3. Muloñadi chitukuhoshela netu aEnoki, Nowa, Abarahama niSara ashakamineña neyi ‘enyi niakwakwenda mwambala’?
2 Kufuma tuhu kumashiita, ambuña Yehova ashinshika adiña ambukaku nawantu adiñi mwituña datama mwashakamineñawu. Henohu Dibaji kanda dinzi, Enoki niNowa ‘endeleña naNzambi walala.’ (Kutach. 5:22-24; 6:9) Wonsu wawu ashimwineña mazu awunsompeshi waYehova wakujilumuna ituña datama daSatana chakadi woma. (Tañenu 2 Petulu 2:5; Yuda 14, 15.) Hamuloña wakwenda naNzambi mwituña datama, Enoki “wamutiyishilaña Nzambi kuwaha,” Nowa niyena “wadiñi muntu waloña, muntu walala hadi akwawu antu.”—Heb. 11:5; Kutach. 6:9.
3 Chelili ayileji kudi Nzambi, Abarahama niSara ashili musumba wamaheta waUri wamudi aKaladeya nakwiteja chihandilu chakala chakwendujola mwituña dambala. (Kutach. 11:27, 28; 12:1) Kapostolu Pawulu wasonekeli nindi: “Nakukuhwelela Abarahama, chamutambikiluwu hakwovwahila, hakufuma mwadiñiyi nakuya kwakukeña kutambwilayi wuswana; hakufuma mwadiñiyi chakadi kwiluka kwakuyayi. Nakukuhwelela hakwikala mwenyi mwituña damukaninuwu, neyi mwambala hohu, nakushakama mumatenti naIsaka naYakoba, aswana akuswana nindi chikaninu chochimu.” (Heb. 11:8, 9) Pawulu wahosheli hadi awa ambuña Yehova ashinshika nindi: “Wenawa ejima afwili mukukuhwelela chakadi kutambula yikaninu, akuminini dakuyimwena maaya, nakuyisambilila iku yichidi kwakulehi, hiyakwiteja nawu tudi enyi niakwakwenda mwambala hanu hamaseki.”—Heb. 11:13.
A Isarela Ayisoñamishili
4. Mazwinyi akusoñamisha ayilejeluwu aIsarela henohu kanda ayinki ituña?
4 Anyana kaAbarahama, aIsarela, avulili nankashi nawa ekalili muza nawa ayinkeli nshimbi niituña. (Kutach. 48:4; Kuhit. 6:1) Antu amuIsarela adi kutwalekahu nakwanuka nawu Yehova diyi Yomweni ituña dawu. (Lev. 25:23) Wena adiña neyi akakusonkela ovwahilaña nshimbi jaYomweni ituña. Cheñi, ateleli kwanuka nawu “muntu hahandaña nayakudya hohuku”; hiyateleli kumufutalela Yehova hansañu yamaheta akumujimbaku. (Kuhit. 8:1-3) Henohu kanda ayinki ituña, aIsarela ayisoñamishili nawu: “Chakakwiñijayi Yehova Nzambi yeyi mwituña dasanyikililiyi ankakulula jeyi Abarahama, naIsaka, naYakoba, nindi akwinkidu; chiwakatambula nyikala yamaneni yayiwahi yiwabulili kutuñeyi, nimatala enzala to-o nayuma yayiwahi yejima yiwabulili kushamu eyi, nimashima akupunda dehi iwabulili kupundeyi, nimatempa anyivinyu nanyiolive iwabulili kudimeyi, hiwakadyaña hiwakekutaña; henohu wakababalaña kuchina kuvulamena Yehova.”—Kuhit. 6:10-12.
5. Muloñadi Yehova chayikaaniniyi aIsarela, nawa muzanyi wawuha watachikili kukiswilayi?
5 Ilu lushimbi lwadiñi lwaluwahi. Mumafuku aNehemiya, izanvu dawaLevi datiyili nsonyi hakwanuka yuma yamwekeni chelili aIsarela aswani Ituña daChikaninu. Chelili antu amuIsarela atachiki kuluña namatala amawahi niyakudya yayivulu nivinyu, “hiyakudya, hiyakwikuta, hiyakutoha.” Adikañili naNzambi, hiyakujaha niatuprofwetu atemesheleñayi nakuyisoñamisha. Yehova hakuyihana mumakasa ayilumbu jawu. (Tañenu Nehemiya 9:25-27; Hos. 13:6-9) Nkumininaku, muchiyuulu chawaRoma, aYudeya abulili chikuhwelelu amujahili Mesiya wakaninuwu! Yehova niyena wayikaanini nawa watachikili kukiswila muza wawuha, Isarela wakuspiritu.—Mat. 21:43; Yil. 7:51, 52; Ŋal. 6:16.
‘Hiyadiña Ampata Yamunu Mwishinaku’
6, 7. (a) Munateli kulumbulula ñahi mazu ahosheliyi Yesu hañimenu yawatumbanji twindi kutalisha kudinu ituña? (b) Muloñadi akwaKristu alala chiyabulilaña kwikalilawu kukabadi ketuña daSatana?
6 Neyi chitwashimuna dehi muchinu chibaaba, Mutu wachipompelu chawakwaKristu, Yesu Kristu, walumbulwili hatooka nindi atumbanji twindi hiyakadikundaña nadinu ituña datama daSatanaku. Henohu kunashali kwanti nakufwa, Yesu walejeli atumbanji twindi nindi: “Neyi enu mwadiñi ampata yamunu mwishina, akwampata yamunu mwishina adi kukeña antu awu. Enu himudi ampata yamunu mwishinaku, ilaña ami nayitondeli mukachi kawantu ampata yamunu mwishina; dihu hanafumi kuyihela kudi antu ampata yamunu mwishina.”—Yow. 15:19.
7 Chelili wuKristu wunatachiki kutanda, komana akwaKristu ateleli kudikunda netuña, nikwikala nayililu yawantu amudinu ituña nakudiñijamu mutu? Inehi. Kwonsu kwashakamineñawu, ateleli kudambula netuña daSatana. Chimwahitili yaaka 30 kufuma hafwiliyi Kristu, kapostolu Petulu wayisonekeleli akwaKristu ashakamineña mwituña dejima daRoma nindi: “Enu akwetu twakeña, nayilembeleli chimuneli enyi niakwakwenda mwambala, nami lekenu kufwila kwachisemwa chaheseki kwatama, kwalwishaña nawumi. . . . shakamenu chalumbuluka mukachi kawu.”—1 Pet. 1:1; 2:11, 12.
8. Indi mukwakusoneka nsañu janyaka wumu wahosheli nindidi hadi akwaKristu akusambila kutalisha hakudikunda netuña?
8 Hakwiteja nindi akwaKristu akusambila ashakaminena neyi ‘enyi nawa akwakwenda mwambala’ mwituña daRoma, mukwakusoneka nsañu yanyaka Kenneth Scott Latourette wasonekeli nindi: “Antu amavulu kunyima elukili nawu akwaKristu amunkulakaji jisatu jakusambila ayikabishileña nankashi . . . Ayitwikileña nyiloña yashiyashana. Hamuloña wakukaana kwanakana yidika yawasenji akwaKristu ayiteneneña nawu amwiluka Nzambi wanyi. Hakubula kwila yuma yelileñawu akwawu ejima—yidika yawusenji, yisela yamweneñawu akwaKristu nawu mwenzala yaaku yansakililu yakutwamba, niwuvumbi—ayiteneneña nawu ahela antu.”
Bayi Tukwata Chikupu Kuyuma Yadinu Ituñaku
9. Hakwikala akwaKristu alala, twamwekeshaña ñahi netu ‘hitwahela antuku’?
9 Yuma yidi ñahi makonu? Kutalisha ‘kudinu ituña damakonu datama,’ twatela kwikala nayililu neyi yawakwaKristu akusambila. (Ŋal. 1:4) Hamuloña wakwikala nayililu yamuchidiwu, antu amavulu atujinokaña, amakwawu atuhela. Ilañetu kwetu, ‘twahela antu wanyi.’ Hamuloña wakukeña akwetu antu, twayaña kwitala nikwitala, twesekaña chikupu kuleja antu ejima hamatala ‘nsañu yayiwahi yaWanta waNzambi.’ (Mat. 22:39; 24:14) Twelaña mwenimu muloña tuneluki chikupu netu nfulumendi yaWanta waYehova yidi mumakasa aKristu yakafumishahu chiyuulu chawantu abula kuwanina, nakuhiñishahu chiyuulu chaloña.—Dan. 2:44; 2 Pet. 3:13.
10, 11. (a) Indi akwaKristu azatishaña ñahi ituña chantesha? (b) Munjilanyi mwabulilañawu akwaKristu kuzatisha ituña chikupu?
10 Chineli kukuma kwadinu ituña kudi kwakwihi, etu ambuña aYehova tweluka netu yinu hidiyi mpinji yakudiluñisha nayuma yadinu ituña didi kwakwihi nakujilumukaku. Twalondelaña mazu akapostolu Pawulu akwila nawu: ‘Enu ana kwetu, mpinji yinashaluku yinakehi dehi; dichi kufuma hanu . . . alandaña ekali neyi hiyakweti yumaku; akwataña kuyuma yamunu mwishina ekali neyi abulaña kukwataku chikupu. Muloña yuma yampata yinu chiyidichi, yahitaña.’ (1 Kor. 7:29-31) Indi akwaKristu amakonu azatishaña ñahi yuma yamwituña? Elaña mwenimu kuhitila mukuzatisha yozelu yinakutuñawu makonu ninjila yakutiyañenamu kulonda atiyakeshi nsañu yamuBayibolu kwejima mumadimi amavulu. Azatishaña ituña chantesha kulonda awani mwakuhandila. Alandaña yuma yatuñañawu mudinu ituña nikuzata nyidimu. Hela chochu, hiyeñijaña mutu mudinu ituñaku muloña hiyaswejaña kulemesha yuma yamudinu ituña ninyidimu yawuku.—Tañenu 1 Timotewu 6:9, 10.
11 AkwaKristu asoñama hiyazatishaña ituña chikupu kutalisha hansañu jakutaña mashikola ahewuluku. Antu amavulu mudinu ituña atoñojoka nawu chiwataña shikola yahewulu wukutuumbakana nankashi nikwikala nachihandilu chachiwahi. Ilaña etu akwaKristu tudi neyi “akwakwenda mwambala” nawa twafwilaña yuma yacheñi. Hitwafwilaña ‘yuma yalemaku.’ (Rom. 12:16; Yere. 45:5) Chineli tudi atumbanji twaYesu, twatela kutiyilila kusoñamisha kwindi: “Babalenu, dihembenu muleki lwisu lwejima, muloña wumi wamuntu hiwekalaña kukuvula kwamahetinduku.” (Luka 12:15) Dichi, akwaKristu atwansi ayikoleshaña kufwila yikonkwanyi yakuspiritu, nikudiza hohu yuma yinateli kuyikwasha muchihandilu chawu nakudiloñesha kulonda amukalakeleña Yehova ‘namuchima wawu wejima, nawumi wawu, nañovu jawu, nimaanawu ejima.’ (Luka 10:27) Chelawu mwenimu, dikwila nawu, akwikala ‘aheta kumesu aNzambi.’—Luka 12:21; tañenu Matewu 6:19-21.
Bayi Mwakamena Yuma Yakumujimbaku
12, 13. Indi kwovwahila mazu aYesu asonekawu haMatewu 6:31-33 kwatukwashaña ñahi kwikala ambuka nawantu mudinu ituña?
12 Ambuña Yehova ambuka chikupu nawantu akwituña muyitoñojoka kutalisha hayuma yakumujimba. Dihafumini Yesu kuleja atumbanji twindi nindi: ‘Bayi mwakama nenu, Tukudyadi? Tukunwadi? Hela nenu, Tukuvwaladi? Muloña yuma yejimiyi diyi yakeñañawu akamatuña; Tata yenu wamwiwulu neluki chimunakaankili yuma yejimiyi. Ilaña sambilenu kukeña wanta windi nikuloña kwindi, niyuma yejimiyi akayishilaku.’ (Mat. 6:31-33) Akwetu akakwitiya amavulu anadimweni chikupu nawu Tata yetu wamwiwulu wayinkaña yuma yinakaankiluwu.
13 ‘Kumwakama Nzambi nikutiya kuwaha, hiheta dadeni.’ (1 Tim. 6:6) Ilaña antu amudinu ituña dichatoñojokañawu wanyi. Chakutalilahu, neyi atwansi anadisumbuli, antu amavulu akeñaña nawu ekali nayuma yejima hayoyenoyu mpinji, itala dadiwahi mudi yuma yejima, motoka yayiwahi, niyuma yayiha yazatikaña nakesi kawuneñu. Ilaña akwaKristu adi neyi akwakwenda mwambala hiyalandaña yuma yinabadiki hayuma yinakukeñawuku. Eñañi, twatela kuyisakilila amana kwetu amavulu ashiyaña yuma yakumujimba kulonda ekali nampinji yeneni yakuzata chikupu mumudimu waYehova neyi akwakukalakala aWanta adikita. Amakwawu hiyapayiniya, ankoñi ahaBeteli, mumudimu wakwenda hela wumishonali. Wejima wetu twahamekaña nankashi nyidimu yakalakalañawu akwetu akwakudifukula aYehova namuchima wejima!
14. Chumanyi chitukudizila kuchishimu chaYesu chamukwakukuwa mbutu?
14 Muchishimu chindi chamukwakukuwa mbutu, Yesu wahosheli nindi “kwakama kwamakonu nikudimbana kwamaheta” kunateli kuvumbisha izu daNzambi munyichima yetu nawa kwatukañeshaña kusoña nyikabu. (Mat. 13:22) Dichi neyi tukushakama nakuzañalala natuyuma tutukweti neyi akwakwenda mwambala mudinu ituña chikutukwashaku kubula kufwa muniwu muhetu. Ilaña chikutukwasha kwikala nadisu ‘datala mumu ho-o’ hela kushinshika nikutala hanjila yimu yaWanta waNzambi nikuwutwamijaku muchihandilu chetu.—Mat. 6:22.
‘Mpata Yamunu Mwishina Yinakuhita’
15. Mazwinyi ahosheli kapostolu Yowanu atukwashaña kwiluka yililu niyitoñojoka yikwetuwu akwaKristu alala kutalisha kudinu ituña?
15 Muloña weneni watuleñelaña etu akwaKristu kushakama neyi ‘enyi akwakwenda mwambala’ mudimu ituña wunashindameni hakwiluka netu adinu ituña keña adijilumuni. (1 Pet. 2:11; 2 Pet. 3:7) Chumichi, chatukwashaña kwiluka yuma yitwafuukulaña, niyitwafwilaña niyitwakeñesha. Kapostolu Yowanu wafumbili akwawu akwakwitiya nindi bayi akeña yuma yampata yamunu mwishinaku muloña “mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.”—1 Yow. 2:15-17.
16. Tunateli kumwekesha ñahi netu twambukaku netuña daSatana?
16 A Isarela ayilejeli nawu neyi amwovwahilili Yehova, kachi ekalili ‘chuma chindi chalema, munyuza yejima yawantu.’ (Kwid. 19:5) Hampinji yadiñawu ashinshika, aIsarela ambukili nanyuza yejima mukudifukula nimukuhanda kwawu. Nikulelu, Yehova wadambwila antu jindi adambula chikupu netuña daSatana. Atulejaña nawu: “Tuleki kusekesha Nzambi, nikufwila yatama yampata yamunu mwishina, tushakami nakuwundisha mumesu, nikuloña nikwakama Nzambi; nakutalila kuchiñeja kwatiyishaña kuwaha, nichakamwekana lubanji lwakulema kwaNzambi yetu muneni, Chamwinu chetu Yesu Kristu; yowu wadiheni hadetu kulonda atukuuli kukuluwa kwejima, aditookesheli antu akudihetela, akuta nyichima hanyidimu yayiwahi.” (Tit. 2:11-14) Awa “antu” hiyakwaKristu awayishewa niyihita ‘yawanyikoku acheñi’ aYesu, ayikwashañaku.—Yow. 10:16.
17. Muloñadi awayishewa nialunda nawu chakabula kuditoñeshelawu hakushakama neyi akwakwenda mwambala mudinu ituña datama?
17 Awayishewa atalilaña ‘kuchiñeja kwakuwahi’ kwakuyuula chimu naKristu mwiwulu. (Chim. 5:10) Neyi kuchiñeja kwatalilañawu anyikoku yacheñi kwakutambwila wumi wahaya nyaka hamaseki kunashikijewi dehi, hiyakekala cheñi akwakwenda mwambala mudinu ituña datamaku. Akekala namatala amawahi niyakudya yayivulu nawa akanwaña yimpwita yayivulu. (Mas. 37:10, 11; Isa. 25:6; 65:21, 22) Hiyakekala neyi aIsarela avulameneni nawu yuma yejimiyi yambala yaYehova, ‘Nzambi weseki dejimaku.’ (Isa. 54:5) Awayishewa hela anyikoku yacheñi hiyakaditoñesha hakushakama neyi akwakwenda mwambala mudinu ituña datamaku.
Mukwakula Nenudi?
• Indi antu ashinshika akunyima ashakamineña ñahi neyi akwakwenda mwambala?
• Indi akwaKristu akusambila adihembeli ñahi kutalisha kuyililu yetuña?
• Indi akwaKristu alala abulaña ñahi kuzatisha ituña chikupu?
• Muloñadi chitwakabulila kuditoñesha hakushakama neyi akwakwenda mwambala mudinu ituña datama?
[Malwihu aKuzatisha haKudiza]
[Mwevulu wudi hefu 18]
AkwaKristu akusambila aheleli ndombu hela yisela yatama