Bayi Mwiteja Yikatu Yiyineñeshuku

FWIKIJENU nenu munahinduki nantetemena, dichi himukuditoñesha nenu chiña kwacha niwanyi. Ifuku denidi mukuumika cheñi yikatu yakumujimba nichikela. Munateli kutiya neyi chatiyiliyi Yoba wahosheli nindi: “Nateli kutondahu kufwa kubadika makabi ami ejima.” (Yoba 7:15; The New English Bible) Chumanyi chimwatela kwila neyi iku kukala kutwalekahu hayaaka yayivulu?

Dichamweniyi Mefwibosheti mwana kaJonatani ibwambu daMwanta Davidi. Hampinji yadiñayi Mefwibosheti nayaaka yitanu, ‘waholokeli nawa wekalili chifwayi.’ (2 Sam. 4:4) Chineli wadiña chifwayi watela watiyili chikela hakumutwambila nawu namufukejeli mwanta nawa wakabakeni muloña amutambwili yuma yejima. Hela chochu, watwalekeluhu kwimika chakutalilahu chachiwahi hakuumika nawufwayi, kumutwambila, kumutiyisha nsonyi nawa hetejeli yumiyi kumuneñeshaku.—2 Sam. 9:6-10; 16:1-4; 19:24-30.

Kapostolu Pawulu niyena wemika chakutalilahu. Mpinji yimu wasonekeli nindi wadiña ‘namwiña mumujimba’ womikileñayi. (2 Kor. 12:7) Mwiña wateneniyi watela wadiña wufwayi womikiliyi hampinji yayilehi indi kwiji antu adiña nakumudimbulula nawu hikapostolu wanyi. Hela chakwila womikili wufwayi chili antu amudimbulwileña kukala kwatwalekeluhu nawa womikili kweseka nichineñi chatiyileñayi hamuloña wakukala kweniku.—2 Kor. 12:9, 10.

Kuzeyazeya kwenzaña hamuloña wakuyekela nayikatu hela chikela chakumuchima chayandishaña ambuña aNzambi makonu. Henohu Magdalena wudi nayaaka 18, wakatili chikatu chaleñelaña tukiña mujimba kuzuñesha yidi yamumujimba chatenañawu nawu systemic lupus erythematosus. Wahosheli nindi: “Natiyili woma chikupu. Chimwahitili mpinji yikatu yami yaswejeleluku nawa anwanini nakukala kukwawu kwakubula kusuñunuka yakudya mwivumu, yilonda mukanwa, nichikatu chanshiñu.” Izabela niyena womikaña yikatu yakala kwiluka. Walumbulwili nindi: “Kufuma tuhu kuwansi nakabakanaña nachineñi. Chumichi chanleñelaña kutiya woma nankashi, kukañanya kwona nimusoñu wamwivumu. Iyi yikatu yanzeyesha chikupu.”

Itejenu Nenu Mwakata

Wufwayi niyikatu yinateli kuyineñesha muchihandilu. Neyi yumiyi yimwekana, chikuwaha neyi mukushakama hamaseki nakushinshika chihandilu chenu. Kwiteja kukala kumukweti hichuma chakala. Magdalena wahosheli nindi: “Musoñu wunukweti waswejelañaku ifuku nifuku. Kakavulu nazeyaña chakwila nakañanyaña nikuhinduka hakadidi. Chankalilaña kufuukwilahu chadimu yuma yakwila muloña musoñu wami wasañumukaña kala mpinji. Chuma chankatishaña kumuchima nankashi hikubula kuzata nañovu mumudimu waYehova neyi chinazatileña.”

 Zbigniew wahosheli nindi: “Mukuhita kwayaaka, chikatu chakunana manuñi chanzeyesha chikupu, chakisañana manuñi ejima. Mpinji yikwawu neyi manuñi anana chikupu, nakañanyaña kuzata ninyidimu yapela. Chumichi chantiyishaña kutama nankashi.”

Kunyima Barbara amuwanini nachikatu chakuwoñu chabulaña kumana. Wahosheli nindi, “Mujimba wami wunahimpiki chikupu. Nazeyaña, mutu wakataña mpinji yejima nawa nakañanyaña nikutoñojoka chiwahi. Muloña wakukala kunukweti, nateleleli kushinshika chikupu yuma yejima.”

Awa antu ejima hiyambuña aYehova adihana. Alemesha chikupu kwila mwaya muchima windi. Amukuhwelela Nzambi chikupu nawa wayikwashaña hama.—Yish. 3:5, 6.

Munjilanyi Mwakwashilañayi Yehova?

Bayi tutoñojoka netu kukala kutwamonaña kwamwekeshaña nawu hitukweti wuselewa waNzambuku. (Mukeŋa 3:33) Toñojokenu kukala kwamweniyi Yoba hela chakwila wadiña muntu ‘walala nawa waloña.’ (Yoba 1:8) Nzambi hesekaña muntu nayuma yatamaku. (Yak. 1:13) Yikatu yejima kushilahu niyikatu yitwayekelaña nayu nichikela hiyuma yatama yatuletelawu anvwali jetu atachi, Adama naEvu.—Rom. 5:12.

Hela chochu, Yehova niYesu hiyashiyaña muntu waloña chakubula kumukwashaku. (Mas. 34:15) Sweje-e hampinji yitwamonaña kukala muchihandilu chetu, twelukaña netu Nzambi diyi ‘chiswamu chetu, diyi mpwembu yetu.’ (Mas. 91:2) Hampinji yimunakuumika kukala kwabulaña kumana, chumanyi chikuyikwasha kwikala namuzañalu?

Kulomba: Kuhitila mukwimbujola chakutalilahu chawambuña aNzambi ashinshika akunyaka, munateli kumbila chiteli chenu hadi Tata yetu wamwiwulu mukulomba. (Mas. 55:22) Neyi mwila mwenimu mukwikala ‘nakuwunda kwaNzambi kwabadika maana ejima.’ Kuwunda kweniku “kwakahemba nyichima yenu niyitoñojoka yenu.” (Fwi. 4:6, 7) Magdalena washindamenaña hadi Nzambi mukulomba, chumichi chamukwashaña kuumika yikatu yindi yamuzeyeshaña. Wahosheli nindi: “Kulomba kudi Yehova kwanwundishaña muchima  nawa kwanzañaleshaña. Ichi dinu neluki chalumbuluka kumukuhwelela Nzambi mafuku ejima.”—2 Kor. 1:3, 4.

Yehova nateli kwakula kulomba kwenu kuhitila mukuyinka ñovu naspiritu yindi yajila, Izu dindi, niamana kwetu akwaKristu. Himwatela kukuhwelela Nzambi kuyuuka muchihayamishaku. Ilaña mwatela kukuhwelela nenu wukuyinka maana niñovu yakeñekaña hakwila nawu muumiki kukala kwejima kumwamonaña. (Yish. 2:7) Nateli kuyikolesha, nikuyinka “ñovu jabadika nankashi.”—2 Kor. 4:7.

Chisaka: Neyi amuchisaka ayikeña nikuyitiyila luwi, chumichi chinateli kuyikwasha kuumika yikatu. Mwatela kwiluka nenu antaña jenu niwena akabakanaña. Atiyaña kutama neyi chimwatiyaña. Ilaña ayikwashaña nimumpinji yakala. Kulombela hamu kukuyikwasha kuwundisha muchima.—Yish. 14:30.

Barbara wahosheli kutalisha hadi anyanindi awambanda niahela amakwawu atwansi muchipompelu nindi: “Ankwashaña mumudimu wakushimwina. Anzañaleshaña muloña adikitaña chikupu.” Zbigniew watiyaña kuwaha chikupu hawukwashu wamukwashañayi iñodindi. Wahosheli nindi, “Wazataña nyidimu yejima yamwitala. Wankwashaña cheñi hakuvwala nawa kakavulu wansendelaña fuuba yanyikanda hakuya kukupompa kwawakwaKristu nimumudimu wamwiha.”

Akwetu akwakwitiya: Neyi tudi hamu nawakwetu akwakwitiya atukoleshaña nikutukundeja. Chumanyi chimukwila neyi himukutwesha kuya nakupompaku muloña wakuyekela nayikatu? Magdalena wahosheli nindi: “Chipompelu chankwashaña nankashi kuhetela mumpanji jahakupompa kuhitila mukukwata mazu hamatepu. Akwetu akwakwitiya antemeshelaña nshiña kulonda eluki yuma yatela kunkwasha. Antemeshelaña cheñi nyikanda yakunkolesha. Kwiluka nami añanukaña nawa añakamenaña chankwashaña kuumika.”

Izabela wayekelaña nachineñi wahosheli nindi: “Nekala nawatata jami niamama jami amavulu muchipompelu, awa antu antiyililaña nawa eluka chinatiyaña. Muchipompelu dimu mwekala chisaka chami nawa dimu nawanaña kuwunda nimuzañalu.”

 Antu akweti kukala kwamboka-mboka hiyatela ‘kudambula nkawawuku.’ Ilaña atela kudikunda nawakwawu muchipompelu. (Yish. 18:1) Antu wenawa akoleshaña akwawu hama. Hakusambila munateli kushintajala kuleja amana kwenu niahela kukala kumukweti. Ana kwenu akutiya kuwaha neyi muyileja jiika. Chikuyikwasha kumwekesha ‘kukeña kwakadi kudimbana.’ (1 Pet. 1:22) Komana kwila muyileja nenu munakukeña ayitwali kukupompa, kuzata nawu mumudimu wakushimwina hela kuhanjeka nawu chakufuma kumuchima nehi? Hanu dinu bayi tuyikanjikijañaku, ilaña twatela kuyisakilila neyi anatukwashi.

Hoshenuña yuma yayiwahi: Chuma chikuyikwasha kuumika yikatu yimwayekelaña nayu chakubula kuneña kakavulu chashindamena handenu aweni. Neyi musweja kudihomba mukwikala nayitoñojoka yatama. Bayibolu yahosha nawu: “Muchima wamuntu wamukwashaña kudikañejaku nawufwayi windi, ilaña muchima wabaluka dehi wukuwutwesha hinyi?”—Yish. 18:14.

Magdalena wahosheli nindi: “Nazataña nañovu kulonda nibuleña kutoñojoka chikupu hakukala kwami. Nafwilaña kwila yuma yanzañaleshaña mafuku inatiyañaku chiwahi. Kutaña nsañu yahosha hayihandilu yawantu atwalekahu kwikala ashinshika hela chakwila ayekelaña nayikatu kwankoleshaña.” Muloña wakwila Izabela weluka nindi Yehova wamukeña nawa wamulemesha, chumichi chamukoleshaña. Wahosheli nindi: “Natoñojokaña nami wankeña, nawa nikweti muntu inatela kushindamena. Nawa nachiñejaña yuma yayiwahi yakumbidi.”

Zbigniew wahosheli nindi: “Yikatu yami yinandizishi kudizoza nikwovwahila. Yinandizishi kashinshi nikufuukulahu chiwahi nikwanakena akwetu chakufuma kumuchima. Nadizi kumukalakela Yehova namuzañalu chakubula kuditiyila luwi. Kafwampi nakoleshewi kutwalekahu kumukalakela Yehova.”

Ilukenu nenu Yehova wamonaña chimomikaña. Wayitiyilaña luwi chimwakabakanaña nawa wayakamenaña. Hamba “kavulamena mudimu wenu hela kukeña kumwakeñeli ijina dinduku.” (Heb. 6:10) Anukenuña ichi chikaninu chakaniniyi ejima amwakamaña nindi: “Hinamba kakulekaku, hela kukushiya hinakakushiyaku.”—Heb. 13:5.

Mpinji yikwawu neyi munaneñi, toñojokenu hakuchiñeja kwakuwahi kwakushakama mwituña dadiha. Mpinji yinakuswila kwakwihi chikupu yimwakamona namesu kapu nkisu yikaleta Wanta waNzambi hamaseki.

[Chikasha/Nyevulu yidi hefu 28, 29]

Ashimwinaña Hela Chakwila Ayekelaña naYikatu

“Hinatweshaña kwenda nkawamuku, dichi nayaña mumudimu wakushimwina nañodami hela amana kwami amakwawu niahela. Nahembela kumutu nsañu yakuhanjeka nawantu ninsona jamuBayibolu.”—Jerzy, mputamesu.

“Bayi neyi nashimwinaña hanshiña hohuku, ilaña nasonekaña nyikanda nikuyitemeshela antu antesha amwekeshaña mpwila. Neyi anantenteki muchipatela, natulaña Bayibolu ninyikanda kwakwihi nakadidi kami. Chumichi chankwashaña kutachika kuhanjeka nawantu.”—Magdalena, wakata chikatu chatenañawu nawu systemic lupus erythematosus.

“Nakeña kushimwina kwitala nikwitala, ilaña neyi hinakutiya chiwahuku, nashimwinaña hanshiña.”—Izabela, wakabakanaña nachineñi chabulaña kumana.

“Natiyaña kuwaha kufuntila kudi antu itwashimwinini nikukwasha anakulombola atudizi aBayibolu. Neyi natiyuku chiwahi, nakeñaña kushimwina kwitala nikwitala.”—Barbara, wakata chikatu chakuwoñu.

“Nasendaña fuuba yamagazini yapepela. Nashimwinaña mumudimu wamwiha neyi mumanuñi munakukata wanyi.”—Zbigniew, wakata chikatu chakunana manuñi.

[Mwevulu wudi hefu 30]

Atwansi niakulumpi anateli kukolesha akata