Muloñadi Wutwatela Kulombolewa Naspiritu Yanzambi?

‘Yeyi Nzambi yami; spiritu yeyi yayiwahi, nlomboli mwituña dalumbuluka.’—MAS. 143:10.

1. Chumanyi chaleñelaña magineti kukoka chikuñu?

 KOMANA mwashahu dehi ndoñu kwakwihi namagineti? Magineti yakokaña ndoñu chakubula kuumba mpinji. Muloñadi? Muloña magineti yikweti ñovu yabulaña kumwekana yakokaña yikuñu. Hayaaka yayivulu yinahituhu antu amavulu azatishaña magineti hakukeñakeña yikuñu yanyanya.

2, 3. (a) Ñovwinyi yasweja yazatishiliyi Yehova kushankulu kwakweni? (b) Muloñadi wutwatela kukuhwelela ñovu yaNzambi yazatikaña yambulaña kumwekana kutulombola muchihandilu chetu makonu?

² Kwekala ñovu yikwawu yabulaña kumwekana yasweja kulema yatulombolaña. Hiñovwinyi yeniyi? Ayilumbulula mumavasi akutachikilahu amuBayibolu. Hakushimuna yuma yazatiliyi Yehova kushankulu kwakweni, mukanda waKutachika 1:1 wahosha nawu: “Hatachi Nzambi waleñeli nimawulu nimaseki.” Watemesheli ñovu yabadika hakuleña yumiyi, muloña mukanda waMasamu 33:6 wahosha nawu: “Mawulu ayilili nezu daYehova; niyileñaleña yawu yejima ayilili namuuya wamukanwa kindi.” Ñovwinyi yazatishiliyi? “Muuya” waNzambi, hela ñovu yaNzambi yazatikaña, hiñovu yaswejesha yazatishiliyi hakuleña yuma yejima. Tukweti wumi muloña Yehova wazatishili ñovu yindi hakuleña yuma yejima.—Yoba 33:4; Mas. 104:30.

³ Chineli tudi amomi, komana tunateli kukuhwelela netu ñovu yaNzambi yazatikaña yatela kutukwasha cheñi muchihandilu chetu? Mwana kaNzambi welukili nindi twatela kukuhwelela wukwashu weniwu. Yesu wahosheli nindi atumbanji twindi akayilombolaña nañovu yaNzambi yazatikaña. (Yow. 16:13) Muloñadi wutwakeñelaña kulombolewa nañovu yaNzambi yazatikaña?

Spiritu Yajila Chiyekala

4, 5. (a) Indi antu akuhwelela mudi anzambi asatu atoñojokaña mwaluwa nawu spiritu yajila hichumanyi? (b) Munateli kulumbulula ñahi chekala spiritu yajila?

⁴ Hadaha antu imwahanjekaña nawu mumudimu wakushimwina akuhwelela nhoshelu yatenawu muBayibolu yaLunda nawu Spiritu Wajila. Antu akuhwelela mudi anzambi asatu atoñojokaña mwaluwa nawu himuntu wakuspiritu wesekana naNzambi Tata.—1 Kor. 8:6.

⁵ Hanu dinu spiritu yajila yekala ñahi? Hela chakwila hitunateli kumona mpepelaku, twamonaña yuma yelaña mpepela. Chochimu spiritu yajila hiyamwekanañaku ilaña yinateli kuleñela yuma kwikalaku. Spiritu yajila himuntu wanyi, hiñovu yakufuma kudi Nzambi. Wayizatishaña hadi antu hela kuyuma kulonda yazati yuma yejima yinakukeñayi. Komana tunateli kujinoka netu ñovu yamuchidiwu hiyafumaña kuNsulu yajila, Nzambi Wabadikaku? Inehi!—Tañenu Isaya 40:12, 13.

6. Indi Davidi wamulombeli Yehova chumanyi?

⁶ Komana Yehova nateli kutwalekahu kuzatisha spiritu yindi kulonda yitulomboleña  muchihandilu chetu? Wamukanini ñimbi yamasamu Davidi nindi: “Nukukuleja maana, nukukuleja ninjila yeyi yiwukwenda.” (Mas. 32:8) Komana Davidi wakeñeleña yumiyi? Eñañi, muloña wamulombeli Yehova nindi: ‘Nleji kwila mwaya muchima weyi, muloña yeyi Nzambi yami; spiritu yeyi yayiwahi, yinlomboli.’ (Mas. 143:10) Anetu twatela kukeña kulombolewa naspiritu yaNzambi. Muloñadi? Shinshikenu nyiloña yiwana.

Hitwatelela Kudiyuula Etu Awenuku

7, 8. (a) Muloñadi wutwakañenyaña kudiyuula etu aweni chakubula Nzambi? (b) Chakutalilahwinyi chinakumwekesha chitwakañenyaña kudiyuula etu aweni mukanu kaayi katama?

⁷ Chatachi, twatela kukeña kulombolewa naspiritu yaNzambi muloña hitwatelela kudiyuula etu awenuku. Izu dakwila nawu “kuyuula” dalumbuluka “kulombola muntu hela kumuleja njila yatela kulondelayi.” Hela chochu, Yehova hatuleñeli nawuswa wakudiyuula etu awenuku, sweje-e dinu hakwikala antu abula kuwanina. Kaprofwetu kaYehova Yeremiya wasonekeli nindi: ‘Eyi Yehova, neluki nami njila yamuntu hiyekala mudi yomwenuku, mudi muntu wendaña himwekala yakuyuula nyendu yinduku.’ (Yere. 10:23) Muloñanyi? Yeremiya watiyili chahosheliyi Nzambi muloña wutwakañenyaña kudiyuula etu aweni. Yehova wahosheli hamuntu wetu wamukachi nindi: “Muchima wasweja kudimbana, wadimbana chakubadika yuma yejima, wasweja nikukata, wukutwesha kuwiluka hinyi?”—Yere. 17:9; Mat. 15:19.

⁸ Muntu wudi halwendu lwakuya kwiluña dakubula kwiluka chidi neyi mwisaña, chikuwaha neyi wukuya namuntu welukamu hela kusenda maapu yatela kumulombola, neyi nehi wukwikala muwubanji. Nateli kusha wumi windi hakatoña neyi haneluki chatela kuhandayi mwisañaku hela neyi kwosi muntu welukamu watela kumukwasha. Chochimu namuntu wunakutoñojoka nindi nateli kudiyuula mukanu kaayi katama chakubula kwiteja Nzambi kumuleja njila yalala, wumi windi wukwikala muwubanji. Chuma chatela kutukwasha kwenda chiwahi mukanu kaayi kamakonu hikulomba neyi chalombeliyi Davidi kudi Yehova nindi: “Mahaji ami analamati munjila jeyi, nyendu yami hiyinaselumoki mwoku.” (Mas. 17:5; 23:3) Tunateli kulombolewa ñahi muniyi njila?

9. Kwesekeja nachinamwekeshuwu hefu 17, indi spiritu yaNzambi yatulombolaña ñahi?

⁹ Neyi twikala adizoza nikushindamena hadi Yehova nateli kutwinka spiritu yindi yajila kulonda yitulomboleña. Indi iyi ñovu yazatikaña yinateli kutukwasha ñahi? Yesu wayilumbulwilili atumbanji twindi nindi: ‘Nkwashi, diyi spiritu yajila, yakatemeshawu kudi Tata mwijina dami, diyi wakayileja yuma yejima, wakayanukisha yuma yejima yinayileji.’ (Yow. 14:26) Neyi tulombaña mpinji yejima nikudiza Izu daNzambi kushilahu niyuma yejima yatañishiliyi Kristu, spiritu yajila yikutukwasha kwiluka chikupu maana aYehova akunama,  kulonda twileña mwaya muchima windi. (1 Kor. 2:10) Kubombelahu neyi yuma yitwabula kukuhwelela yimwekana muchihandilu chetu, spiritu yinateli kutukwasha kwiluka mwakwilila. Yikutukwasha kwanuka nshimbi jamuBayibolu jitwadiza dehi nikutukwasha kwiluka chitwatela kujizatisha hakufuukulahu yuma yayiwahi.

Yesu Amulombweleña naSpiritu yaNzambi

10, 11. Mwana kaNzambi wasemuka kankawindi wakuhweleli nindi spiritu yajila yimwililidi, nawa yamukwashili munjilanyi?

¹⁰ Muloña wamuchiyedi wutwatela kukeñela kulombolewa naspiritu yajila wakwila nawu Nzambi wamulombweli Mwanindi naspiritu. Henohu kanda yenzi hamaseki, Mwana kaNzambi wasemuka kankawindi welukili iwu wuprofwetu wakwila nawu: ‘Spiritu yaYehova yakashakama hadi yena, spiritu yamaana niyakashinshi, spiritu yakuleja maana niñovu, spiritu yakwiluka chakutiya Yehova woma.’ (Isa. 11:2) Yesu wakeñeleña chikupu kutambwila wukwashu waspiritu yaNzambi hampinji yamweniyi yuma yakala hanu hamaseki.

¹¹ Mazu aYehova ashikijeweli. Nsañu Yayiwahi yashimunaña yuma yamwekeni chelili Yesu napapatishewi dehi nawu: ‘Yesu hakufuma kuYodana kwayiliyi, wenzala spiritu yajila, hiyakumulombola naspiritu muchinkalampata.’ (Luka 4:1) Henohu Yesu nakujiñujoka nanzala, kulombela nikutoñojoka chikupu, chakadi nikujina Yehova wadiña nakumudizisha Mwanindi yuma yakamonayi kumbidi. Ñovu yaNzambi yazatikaña yamukwashileña Yesu chikupu kutoñojoka nawa yamulombweleña chakufuukulahu. Chumichi chamukwashili Yesu kwiluka chakwila nakukala kudi kwejima kwamweneñayi nawa welili yuma yakeñeleñayi Tata yindi.

12. Muloñadi chichakeñekelaña kulomba spiritu yaNzambi kulonda yitulomboleña?

¹² Muloña Yesu welukili spiritu yaNzambi chiyamukwashili chikupu muchihandilu chindi, wayidizishili atumbanji twindi kulema kwakulomba spiritu yajila nikulombolewa naspiritu yajila. (Tañenu Luka 11:9-13.) Muloñadi wutwatela kulomba spiritu yajila kulonda yitulomboleña? Muloña yinateli kuhimpa yitoñojoka yetu kulonda yesekani nayaKristu. (Rom. 12:2; 1 Kor. 2:16) Neyi twiteja spiritu yaNzambi kutulombola muchihandilu chetu, tukutoñojokaña neyi Kristu nawa tukwimbujola chakutalilahu chindi.—1 Pet. 2:21.

Spiritu Yampata Yahanu Hamaseki Yinateli Kutuhuñumuna

13. Indi spiritu yampata yahanu hamaseki hichumanyi, nawa yaleñelaña antu kwiladi?

¹³ Muloña wamuchisatu wutwatela kukeñela kutulombola naspiritu yaNzambi wakwila nawu chakubula spiritu tunateli kuhuñumuka naspiritu yampata yahanu hamaseki yaluwañeshaña antu makonu. Mpata yahanu hamaseki yikweti ñovu, yaleñelaña antu  kwila yuma yambukaku chikupu nayuma yatukwashaña spiritu yajila kwila. Chatela yikwasheña antu kwikala nayitoñojoka yaKristu, spiritu yampata yahanu hamaseki yaleñelaña antu kutoñojoka nikwila yuma neyi nyuuli wampata yahanu hamaseki, Satana. (Tañenu Aefwesesa 2:1-3; Titusa 3:3.) Neyi muntu yalondelaña spiritu yampata yahanu hamaseki nikukoña nyidimu yamujimba, mwafumaña yuma yatama nawa yikumukañesha kuswana Wanta waNzambi.—Ŋal. 5:19-21.

14, 15. Tunateli kudikaña ñahi naspiritu yampata yahanu hamaseki?

¹⁴ Yehova watwinka chuma chatukwashaña kushinda spiritu yampata yahanu hamaseki. Kapostolu Pawulu wahosheli nindi “ikalenu akwañovu mudi Mwanta, nimuñovu jindi jasweja nankashi . . . kulonda mutweshi kwimana mwifuku datama.” (Efwes. 6:10, 13) Kuhitila mudi spiritu yindi, Yehova watukoleshaña kulonda Satana yabuli kutudimba. (Chim. 12:9) Spiritu yampata yahanu hamaseki yikweti ñovu nawa hitunateli kuyitondolwela chikupuku. Hela chochu, bayi yituluwañeshaku. Spiritu yajila yasweja ñovu nawa yikutukwasha.

¹⁵ Kapostolu Petulu wahosheli hadi antu alekeli wuKristu muyaaka nkulakaji yakusambila nindi: “Anashiyi njila yaloña, anapwapuki.” (2 Pet. 2:15) Twasakililaña chikupu muloña hitwatambwila ‘spiritu yamunu mwishinaku, tunatambuli spiritu yakudi Nzambi.’ (1 Kor. 2:12) Kuhitila muwukwashu waspiritu nikuzatisha yuma yejima yatuloñeshelayi Yehova kulonda twikali nawulunda wawuwahi nayena, tunateli kudikaña naspiritu yaSatana yampata yahanu hamaseki yatama.—Ŋal. 5:16.

Spiritu Yajila Yasoñaña Mukabu Wawuwahi

16. Indi spiritu yajila yatuleñelaña kusoña mukabwinyi?

¹⁶ Muloña wamuchiwana wutwatela kukeñela kutulombola naspiritu yaNzambi wakwila nawu yasoñaña mukabu wawuwahi muchihandilu chawantu alombolañawu naspiritu. (Tañenu Aŋalija 5:22, 23) Hinyi hakachi ketu wabulaña kufwila kukeña akwawu chikupu, kwikala namuzañalu nikuwunda? Hakachi ketu haduhu muntu wabulaña kukeña kusweja kudiwunjika, luwi nikuwaha? Hinyi hadi etu wabulaña kuhetela mukwikala nachikuhwelelu chikupu, kwovwaha nikudihemba? Spiritu yaNzambi yatuleñelaña kwikala nayililu yayiwahi yatukwashaña niantu itwashakamaña nawu niantu itwakalakalaña nawu. Twatela kutwalekahu kuzata nañovu hakwila nawu tusoñeña iwu mukabu, muloña kusoña mukabu waspiritu wutwakeñaña hikwekala nahakukuminaku.

17. Tunateli kwikala ñahi nachililu chamukabu waspiritu chikupu?

¹⁷ Chikusweja kuwaha neyi tudishinshika kulonda twiluki neyi mazu itwahoshaña niyuma yitwelaña yamwekeshaña nawu twalombolewaña naspiritu yajila nawa tunakusoña mukabu waspiritu. (2 Kor. 13:5a; Ŋal. 5:25) Neyi twiluka netu twatelela kwikala nayililu yikwawu yamukabu waspiritu, twatela kwovwahila chikupu spiritu yajila kulonda twikali nayililu yamuchidiwu. Twatela kwila chumichi kuhitila mukudiza yililu yejima neyi chiyekala muBayibolu nichayishimunawu munyikanda yetu yawakwaKristu. Chumichi chikutukwasha kwiluka chitwatela kumwekesha mukabu waspiritu muwumi wetu, kuhiñahu tukuzata nañovu kulonda twikali namukabu waspiritu chikupu. * Chitwamona yuma yafumañamu hamuloña wakwikala naspiritu yaNzambi muchihandilu chetu nichawakwetu akwaKristu, twelukaña chikupu muloña wutwatela kulombolewa naspiritu.

 Komana Mwitejaña Spiritu yaNzambi Kuyilombola?

18. Indi Yesu watwimikila chakutalilahwinyi kutalisha hakwovwahila spiritu yaNzambi?

¹⁸ Bayibolu yatulejaña nawu hadiñiyi hamaseki, ñovu yabadika, spiritu yaNzambi yajila yamukwashili Yesu chikupu muchihandilu chindi. Wetejeli spiritu kumukwasha nawa wovwahilileña yuma yejima yamulejeleña spiritu. (Maku 1:12, 13; Luka 4:14) Komana ninenu dichimwelaña?

19. Yumanyi yitwatela kwila kulonda spiritu yajila yitulomboleña muwumi wetu?

¹⁹ Ñovu yaNzambi yazatikaña yichidi kukwasha antu akeñaña kulombolewa naspiritu. Hanu dinu, munateli kwiteja ñahi spiritu kuyilombola munjila yayiwahi? Lombenuña kudi Yehova mpinji yejima hakwila yayinki spiritu yindi nikuyikwasha kulonda mwovwahileña spiritu yindi. (Tañenu Aefwesesa 3:14-16) Zatenu kwesekeja nayuma yimunalombi kuhitila mukusandujola kufumba kwekala Mwizu daNzambi, Bayibolu yonenawu naspiritu yajila. (2 Tim. 3:16, 17) Ovwahilenu nshimbi jajiwahi jekalamu nawa tiyililenu spiritu yajila chiyinakuyilombola. Mukuhwelelenu Yehova nenu wukuyilombola chiwahi muwumi wenu muyinu mpata yahanu hamaseki yatama.

[Tumazu twaheshina]

Munakwanuka Yikuma Yamaneni?

• Indi spiritu yajila yinateli kutukwasha ñahi muchihandilu chetu?

• Nyiloñanyi yiwana yitwatela kukeñela kulombolewa naspiritu yaNzambi?

• Tunateli kwiladi hakwila nawu tuheteli muwunlomboli waspiritu yajila?

[Malwihu aKuzatisha haKudiza]

[Mwevulu wudi hefu 15]

Spiritu yaNzambi diyi ñovu yamulombweleña Yesu muchihandilu chindi

[Mwevulu wudi hefu 17]

Spiritu yaNzambi yakwashaña antu akeñaña kuyilombola