Spiritu Yanzambi Yalombweli Antu Muyaaka Nkulakaji Yatachi Nikulelu

‘Yamukunkulu yejimiyi ayikalakeshaña naspiritu yoyimu.’—1 KOR. 12:11.

1. Muchinu chibaaba tukudiza yikumanyi?

 PENTEKOSTA. Idi izu datwanukishaña yuma yatuzañaleshaña. (Yil. 2:1-4) Didu ifuku dechililiyi Nzambi spiritu yindi yajila muyaaka nkulakaji yakusambila hadi antu jindi nawa watachikili kuyilombola munjila yambukaku. Muchibaaba chinafumuhu twadizili spiritu yaNzambi chiyakwashili antu ashinshika akunyaka kukalakala nyidimu yakala. Chaambwinyi chekala hakachi kanjila spiritu yaNzambi chiyalombweli ambuña Nzambi adiña henohu chipompelu chawakwaKristu kanda chikaluku nichiyayilombweli muyaaka nkulakaji yakusambila? Indi akwaKristu ahetelañamu ñahi muwunlomboli waspiritu yajila yaNzambi makonu? Tutalenu chiyahetelañamu.

 ‘Tala Ami Kambuñambala kaYehova waMumbanda’

2. Indi Mariya wamweni ñahi spiritu yajila chiyazatikaña?

² Mariya wadiña mukapeka kahewulu muYerusalema hampinji yechililuwu spiritu yajila yakaninuwu. (Yil. 1:13, 14) Hela chochu, henohu chumichi kanda chimwekani mwahitili yaaka kubadika makumi asatu kufuma hampinji yamweni spiritu yaYehova chiyazatikaña munjila yekomwesha. Yehova watuntulwili wumi waMwanindi kufuma mwiwulu nakwinza hamaseki, nakuleñela Mariya kubaaba ivumu henohu kanda yokameñahu dehi neyala. ‘Spiritu yajila’ diyamuleñeleli kubaaba ivumu.—Mat. 1:20.

3, 4. Mariya wamwekesheli chililwinyi, nawa tunateli kumwimbujola ñahi?

³ Muloñadi Yehova chamutondeleliyi Mariya? Chelili kañelu yamulumbulwili Mariya nindi wukavwala Mwana kaNzambi, wahosheli nindi: ‘Tala ami kambuñambala kaYehova wamumbanda; mwonsu muwunahoshi mumwekani kudami. Kañelu hakufuma kudi yena.’ (Luka 1:38) Hakuhosha muniyi njila Mariya wamwekesheli chililu chamweniyi Nzambi mumuchima windi. Chanyakeliyi kwiteja chamwekeshaña nawu wadiloñesheli kwila mwakeñayi Nzambi. Hajinokeli hachuma chatela kuhoshawu antu amuchituñilu kutalisha hevumu dindi hela wulunda windi chiwukwikala neyala wakeñeleña kumusumbulaku. Mariya wamwekesheli nindi wamukuhweleleli Yehova chikupu neyi Mwanta windi hakuditena nindi hiñamba wakehelamu.

⁴ Komana mwatoñojokahu dehi mpinji yikwawu nenu mukweti kukala kweneni hela nyidimu yayivulu mumudimu waNzambi? Wejima wetu twatela kudihula netu, ‘Komana namukuhwelela Yehova chikupu nami wukwila yuma kwesekeja namwaya muchima windi? Komana nekala namuchima wakudihana chikupu?’ Ilukenu chikupu nenu Nzambi wenkaña spiritu yindi antu amukuhwelela nanyichima yawu yejima nikumwovwahila nawu diyi nyuuli.—Yil. 5:32.

Spiritu Yajila Yamukwashili Petulu

5. Petulu wamweni ñahi spiritu yajila yaNzambi chiyazatikaña henohu ifuku daPentekosta 33 C.E. kanda dishiki?

⁵ Kufwana Mariya, kapostolu Petulu wamweni spiritu yajila yaNzambi chiyazatikaña henohu ifuku daPentekosta 33 C.E. kanda dishiki. Yesu wamwinkeli Petulu niapostolu amakwawu ñovu yakufumisha andemoni. (Maku 3:14-16) Hela chakwila Nyikanda yajila hiyatuleja nsañu yayivuluku, chakadi nikujina Petulu wazatishili iyi ñovu. Spiritu yajila yaNzambi yamukwashili cheñi Petulu kwenda hewulu damenji haKaluñalwiji kaÑaliliya hampinji yamutambikiliyi Yesu nindi ayi kudi yena. (Tañenu Matewu 14:25-29.) Chalala Petulu washindameneni haspiritu yajila hakwila nawu yokoñi yihayamisha. Iyi spiritu yamukwashili Petulu niakwawu atumbanji munjila yacheñi.

6. Indi spiritu yaNzambi yamukwashili Petulu kwila chumanyi henohu Pentekosta 33 C.E. kanda yishiki nihanyima yaPentekosta?

⁶ Petulu niakwawu ayinkeli ñovu muchihayamisha yakuhosha madimi atiyileña antu enjili nakuhempula hakapinji kantesha muYerusalema haChawija chaPentekosta 33 C.E. Kuhiñahu Petulu wahosheli nawantu apompeli. (Yil. 2:14-36) Eña, iwu muntu mpinji yikwawu welileña yuma chakadi kutoñojoka nawa watiyileña woma amwinkeli ñovu yakuhosha chakadi woma hela chakwila amutiyishileña woma nikumukabisha. (Yil. 4:18-20, 31) Nzambi wamwinkeli maana. (Yil. 5:8, 9) Nawa amwinkeli ñovu yakusañula afu.—Yil. 9:40.

7. Petulu watiyishishili ntañishilwinyi yaYesu chelili yopapatishewi naspiritu yajila?

⁷ Henohu Pentekosta kanda yishiki, Petulu watiyishili nsañu yalala yayivulu yatañishileñayi Yesu. (Mat. 16:16, 17; Yow. 6:68) Ilaña kudi yuma yikwawu yatañishileñayi Yesu yabulili kutiyishishayi Petulu henohu Pentekosta kanda yishiki. Chakutalilahu, Petulu welukili wanyi nindi Kristu akamusañula namujimba wakuspiritu hefuku damuchisatu nawa Petulu helukili Wanta wakekala mwiwuluku. (Yow. 20:6-10; Yil. 1:6) Petulu helukili  nindi antu anateli kwikala yileñaleña yakuspiritu nikuyuula muWanta wamwiwuluku. Chelili yopapatishewi naspiritu yajila nikwikala nakuchiñeja kwakuya mwiwulu, watiyishishili ntañishilu yaYesu haniyi nsañu.

8. Awayishewa ‘nianyikoku acheñi’ eluka yumanyi?

⁸ Yuma yabulili kwilukawu atumbanji twaYesu ayilukili hanyima yakuyichila spiritu yajila. Ansoneki aNyikanda yajila yawakwaKristu yachiGriki ayoneneni kulumbulula yuma yekomwesha kutalisha hayuma yafuukulayi Yehova kulonda tuhetelumu. (Efwes. 3:8-11, 18) Makonu, awayishewa ‘nianyikoku acheñi’ adizaña nikutiyishisha nsañu yalala yoyimu. (Yow. 10:16) Komana mwasakililaña spiritu yajila chiyayikwashaña kuheta maana nikutiyishisha yuma yaMwizu daNzambi?

Pawulu ‘Wenzeli Spiritu Yajila’

9. Indi spiritu yajila yamukwashili Pawulu kwila yumanyi?

⁹ Chimwahitili chaaka hela yaaka hanyima yaPentekosta 33 C.E., muntu mukwawu watambwilili chawaana chaNzambi chaspiritu yajila. Wadiñi Sawulu wekalili Pawulu. Spiritu yamwinkeli wuswa wakwila yuma yatukwashaña makonu. Kapostolu Pawulu amoneneni kusoneka nyikanda 14 yamuBayibolu. Spiritu yaNzambi yamukwashili Pawulu kutiyishisha nikusoneka yuma yatiyakana kutalisha hakuchiñeja kwakwikala nawumi wakabulaña kufwa hela kutoka mwiwulu neyi chiyamukwashili Petulu. Spiritu yajila yamukwashili Pawulu kuuka yikatu, kufumisha andemoni nikusañula afu. Hela chochu, ñovu yatambwililiyi naspiritu yajila yadiña yakuzata nachu nyidimu yalema. Antu jaNzambi makonu atambwilaña spiritu yoyimu hela chakwila hiyayitambwilaña muchihayamishaku.

10. Indi spiritu yajila yamwinkeli ñahi Pawulu wuswa wakuhosha?

¹⁰ Pawulu ‘wenzeli spiritu yajila’ wahosheli chakubula woma nakatepa. Mwanta wakuKipirosi watiyilileña iyi nsañu watiyili kuwaha nankashi. Mwanta wamukala wetejeli nsañu yalala, ‘wahayamini ntañishilu yaYehova.’ (Yil. 13:8-12) Chalala, Pawulu welukili chikupu kulema kwaspiritu yajila yaNzambi hakuhosha nsañu yalala. (Mat. 10:20) Nkumininaku walejeli chipompelu chamuEfwesesa kumulembelelaku kulonda amwinki ‘wuswa wakuhosha.’—Efwes. 6:18-20.

11. Indi Pawulu amulombweli ñahi naspiritu yaNzambi?

¹¹ Bayi neyi spiritu yajila yamukwashileña Pawulu kuhosha hohuku, ilaña mpinji yikwawu yamukaanishileña kuhosha kumaluña amakwawu. Pawulu amulombweleña naspiritu yajila yaNzambi chayileñayi halwendu lwindi lwawumishonali. (Yil. 13:2; tañenu Yililu 16:6-10.) Yehova wuchidi kulombola mudimu wakushimwina naspiritu yajila. Kufwana Pawulu, antu jaYehova ejima ovwahila afwilaña kushimwina nsañu yalala neyena nawa chakadi woma. Hela chakwila Nzambi hanakulombola antu jindi neyi chayilombweleñayi mumafuku aPawuluku, tunateli kukuhwelela netu Yehova nakuzatisha spiritu yindi yajila kulonda antu atelela atiyi nsañu yalala.—Yow. 6:44.

‘Kukalakala Kwacheñi naKwacheñi’

12-14. Komana spiritu yaNzambi yazatikaña munjila yoyimu hadi ambuñindi ejima? Lumbululenu.

¹² Komana nsañu yakwila nawu Yehova wakiswilili chipompelu chamuyaaka nkulakaji  yakusambila chawakwaKristu awayishewa yakoleshaña chikupu antu jaNzambi adihana makonu? Eña. Anukenu nsañu yaPawulu yonenawu yasonekeleliyi chipompelu chamuKorinda kutalisha hayamukunkulu yahaninuwu muchihayamisha naspiritu mumafuku indi nindi: ‘Kudi yamukunkulu yacheñi nayacheñi, ilaña spiritu yoyimu. Kudi nyidimu yacheñi nayacheñi, ilaña Mwanta yowumu. Kudi kukalakala kwacheñi nakwacheñi, ilaña Nzambi yowumu wakalakalaña yuma yejima mudi ejima.’ (1 Kor. 12:4-6, 11) Eña, spiritu yajila yakalakalaña munjila yashiyashana hadi ambuña Nzambi amboka-mboka hakuzata chuma chinakukeñeka. Mwamweni, spiritu yajila yakwashaña “kamukanka kawanyikoku kantesha” kaKristu ‘nianyikoku indi acheñi.’ (Luka 12:32; Yow. 10:16) Ilaña hiyakalakalaña munjila yoyimu mpinji yejima hadi antu ejima amuchipompeluku.

¹³ Chakutalilahu, eluda ayitondaña naspiritu yajila. (Yil. 20:28) Hela chochu, bayi neyi ejima awayishewa naspiritu akalakalaña neyi aeluda muchipompeluku. Chumanyi chitukudizilaku? Spiritu yaNzambi yazatikaña munjila jashiyashana hadi antu amuchipompelu.

¹⁴ Spiritu yayilejaña awayishewa, “spiritu yakwikala anyana” hela kwiluka nawu hiyanyana kaNzambi, diyi spiritu yoyimu yazatishiliyi Yehova hakusañula Mwanindi wasemuka kankawindi mudi afu nakumwinka wumi wakabulaña kufwa mwiwulu. (Tañenu Aroma 8:11, 15.) Diyi spiritu yazatishiliyi Yehova hakuleña yuma yejima yamumawulu niyahamaseki. (Kutach. 1:1-3) Kuhitila muniyi spiritu, Yehova wamukwashili Bezaleli kushikahu kukalakala mudimu wadimena hatabanaka, yamwinkeli Samisoni ñovu yakwila yuma yakeñekeleña kwikala nañovu yabadika nawa yamukwashili Petulu kwenda hewulu damenji. Dichi hekala chaambu hakachi kakwikala naspiritu yajila nakuwayishewa naspiritu yaNzambi, muloña kuwayishewa naspiritu yaNzambi hinjila yambukaku yakalakelañamu spiritu. Nzambi diyi watondaña antu awayishañayi naspiritu.

15. Komana kupapatisha naspiritu yajila kukatwalekahu haya nyaka? Lumbululenu.

¹⁵ Spiritu yajila yaNzambi yakwashaña antu jindi ashinshika munjila jashiyashana mpinji yejima, yinayikwashi hayaaka yayivulu henohu Nzambi kanda yatachiki kuwayisha antu naspiritu. Yatachikili kuzata munjila yayiha yakuwayisha antu haPentekosta 33 C.E., ilaña yikatwalekahu haya nyaka wanyi. Kupapatishewa naspiritu kukamana, ilaña spiritu yajila yikatwalekahu kuzatika hadi antu jaNzambi kulonda eleña mwaya muchima windi haya nyaka.

16. Indi spiritu yayikwashaña antu jaNzambi kwiladi makonu?

¹⁶ Indi spiritu jaYehova yajila yinakukwasha antu kwiladi makonu? Mukanda waChimwekeshu 22:17 wahosha nawu: ‘Nispiritu ninsumbuki hiyakwila nawu, Inzaña. Muntu wukutiya niyena eli nindi, Inzaña. Muntu wudi nampwila enzi, yowu wukukeña kutambula, atambuli menji awumi chakadi kulanda.’ Spiritu yaNzambi yasañumunaña akwaKristu makonu kuleja antu nawu Yehova nakuyitambika kulonda ‘muntu wukukeña’ yeteji menji awumi. AkwaKristu awayishewa anakulombola iwu mudimu. Ilaña, anyikoku acheñi niwena azatañaku iwu mudimu wakutambika antu. Mazaza ejima ayedi ayilombolaña naspiritu yajila hakuzata iwu mudimu. Mazaza ejima ayedi amwekesha nawu adihana kudi Yehova kuhitila mukupapatishewa ‘mwijina daTata, nidaMwana, nidaspiritu yajila.’ (Mat. 28:19) Nawa wejima wawu ovwahilaña wunlomboli waspiritu yaNzambi muchihandilu chawu kulonda asoñeña mukabu waspiritu. (Ŋal. 5:22, 23) Kufwana awayishewa, anyikoku acheñi niwena etejaña spiritu yaNzambi kuyikwasha. Muloña wawukwashu waspiritu, azataña nañovu kulonda ovwahileña nshimbi jaYehova jajila.—2 Kor. 7:1; Chim. 7:9, 14.

Twalekenuhu Kulomba Spiritu Yajila

17. Tunateli kumwekesha ñahi netu tukweti spiritu yaNzambi?

¹⁷ Hela chakwila Nzambi wayinka kuchiñeja kwawumi wahaya nyaka mwiwulu hela  hamaseki, Yehova nateli kuyinka “ñovu jabadika” kulonda mutwalekuhu kwikala ashinshika nawa mwakatambwila wuloku. (2 Kor. 4:7) Chimunakutwalekahu kushimwina nsañu yayiwahi yaWanta anateli kuyisekesha. Hela chochu, ilukenu nenu ‘neyi akuyisawula hansañu yejina daKristu, munakooleki; muloña spiritu yaNzambi yakulema yekala hadenu.’—1 Pet. 4:14.

18, 19. Indi Yehova nateli kuyikwasha ñahi naspiritu yindi yajila, nawa chumanyi chimunakufwila kwila haniyi nsañu?

¹⁸ Nzambi wayinkaña chawaana antu alombaña spiritu yajila chakufuma hamuchima. Yinateli kuyikwasha kwikala nawuswa nimpwila yakuzata chiwahi mudimu waNzambi. “Nzambi diyi wakoñaña mudenu nimuchima wakukeña kwila, nikwila kwakweni, mwakutiyayi yena kuwaha.” Chawaana chalema chaspiritu yajila kushila nichitwafwilaña kudikita kulonda ‘tukwati izu dawumi,’ yumiyi yikutukwasha ‘kukalakela wamwinu wetu etu aweni nawoma nikuzaala.’—Fwi. 2:12, 13, 16.

¹⁹ Kuhwelelenu spiritu yaNzambi chikupu nawa zatenuña namuchima wumu mudimu wejima, elukenu chikupu mudimu wayinkayi nawa mulombenu Yehova kulonda yayikwashi. (Yak. 1:5) Wukuyinka yuma yakeñekaña kulonda mutiyishi Izu dindi, kuumika kukala kwamuchihandilu nikushimwina nsañu yayiwahi. Yesu wahosheli nindi, ‘Lombenuña akuyinka; keñakeñenuña mukuwana; dondomwenenuña akuyenzulwila,’ yumiyi yabombelamu nikutambwila spiritu yajila. (Luka 11:9, 13) Eña, twalekenuhu kumulembelela Yehova kulonda mwikali neyi antu ashinshika akunyaka alombweleñawu naspiritu yajila yaNzambi niamakonu.

Munateli Kulumbulula?

• Kufwana Mariya, tunateli kumwekesha chililwinyi chinateli kutuletela nkisu?

• Indi Pawulu amulombweli naspiritu yaNzambi munjilanyi?

• Indi antu jaNzambi ayilombolaña ñahi naspiritu yaNzambi makonu?

[Malwihu aKuzatisha haKudiza]

[Mwevulu wudi hefu 24]

Spiritu yaNzambi yamukwashili Pawulu kushinda spiritu yatama

[Mwevulu wudi hefu 26]

Makonu spiritu yajila yayikwashaña akwaKristu hichikweti muloña nakuchiñeja kukwetiwuku