Akwakristu Alala Alemeshaña Izu Danzambi

“Mazu eyi hinsañu yalala.”—YOW. 17:17.

1. Kwesekeja nachimweluka, tenenu chuma chimu cheneni chinakumwekesha nawu aYinsahu jaYehova ambukaku nansakililu jikwawu?

 TOÑOJOKENU hampinji yatachi yimwahanjekeli nsañu yayitiyishili kuwaha naChinsahu chaYehova. Yumanyi yimunakwanuka? Amavulu akuhosha nawu, ‘Nazañaleli muloña Chinsahu wazatishileña Bayibolu hakwakula malwihu ejima inamwihwileña.’ Wenowu muzañalu wutwatiyili hakwiluka nkeñelu yaNzambi kutalisha kudinu iseki, chuma chamwekanaña neyi tunafwi nichuma chakamwekena antaña jetu afwa dehi!

2. Yumanyi yayileñeleli enu kutachika kulemesha Bayibolu?

² Chitwatwalekeluhu nakudiza, twelukili netu Bayibolu yakula malwihu itwehulaña hansañu yachihandilu, kufwa niyuma yakamwekana kumbidi nawa yahosha cheñi hayuma yayivulu. Twelukili netu Bayibolu hohu diwu mukanda wukweti nsañu yatela kutukwasha kubadika nyikanda yejima. Kufumba kwekalamu kwahaya nyaka nawa antu ovwahilaña muyahoshaña ahetelañamu nawa azañalalaña. (Tañenu Masamu 1:1-3.) AkwaKristu alala akuhwelela nawu Bayibolu, ‘hinsañu yawantuku, ilaña chochiyekala, hiizu daNzambi chalala.’ (1 Tesa. 2:13) Tushinshikenu hayuma yamwekeni kunyima yikutukwasha kumona chaambu chidi hadi antu alemesha Izu daNzambi nankashi niabula kudilemesha.

KUKALA KWENENI ANAKUMANISHI

3. Kukalanyi kwaleteli wufwinda muchipompelu chamunkulakaji yakusambila chawakwaKristu, nawa kwakalili ñahi?

³ Chimwahitili yaaka 13 kufuma hawayishiluwu kaJentili watachi chizuzu, Konelisu, kwamwekeni kukala kwaleteli wufwinda muchipompelu chawakwaKristu. A Jentili amavulu atachikili kwikala akwaKristu. Antu atachikili kudihula nawu, Komana amayala atela  kuyalamisha kwesekeja nakashidikilu kawaYudeya henohu kanda ayipapatishi? Ilu lwihu lwayikoleleli aYudeya. A Yudeya ovwahilileña Nshimbi akaanineña kwiñila mumatala awaJentili, nawa hiyadikundileña nawuku. A Yudeya akwaKristu adiña ayikandamisha dehi kumutondu wanyiña hamuloña wakuleka nsakililu yawu. Neyi atachikili kudikunda nawaJentili ayizuzu, dikwila nawu akwaKristu adi kwikala mwiyena nawa hakachi kawakwaKristu nawantu amunsakililu yawaYudeya hadi kwikala chaambu cheneni.—Ŋal. 2:11-14.

4. Anyi atambikiluwu kwinza nakumanisha iku kukala, nawa antu atela adihwileña malwihwinyi?

⁴ Mu 49 C.E., apostolu nawakulumpi muYerusalema, adiña aYudeya alamishiluwu, ‘apompeli hamu nakutoñojoka haniyi nsañu.’ (Yil. 15:6) Hampinji yapompeluwu, hiyahanjekeleña nakaneñawudi hayuma yamukunkulwayi yamunsakililuku ilaña ahanjikileña namuzañalu hanshimbi yakundama kukudifukula. Wonsu wawu ahanjekeli chikupu haniyi nsañu yejima. Komana adi kumanisha iku kukala neyi ashindameneni hayuma yayizañalesheleña hamuntu hamuntu hela kwikala nachaambu? Komana akulumpi adi kutula iyi nsañu nakutalila mpinji yikamana wufwinda wadiña muchipompelu muIsarela? Tahindi adi kwiteja chiteja chamakenyi hachuma chabulili kwilukawu nankashi nawu chalala nakuditeja kulonda iyi nsañu ayimanishi?

5. Indi kubulakana kwadiña muYerusalema mu 49 C.E. kunambuki ñahi nakubulakana kwawakulumpi jansakililu makonu?

⁵ Makonu, akulumpi jansakililu neyi anabulakani etejaña chiteja chamakenyi kulonda amanishi nsañu yinamwekani. Ilaña, hakubulakana kwadiña muYerusalema, kwosi muntu wetejeli nsañu yabulili kwilukayi hela kukanjikija akwawu kulonda eteji yitoñojoka yindi. Wonsu wawu aditejeli namuchima wumu. Atwesheli ñahi? Hela chakwila, atoñojokeleña munjila yambokamboka, ilaña wonsu wawu alemesheli Izu daNzambi, nawa azatishili nyikanda yajila kulonda amanishi iku kukala.—Tañenu Masamu 119:97-101.

6, 7. Indi Nsona ayizatishili ñahi hakumanisha nsañu yakwalama?

⁶ Nsañu yidi hamukanda waAmosi 9:11, 12 diyayikwashili kumanisha iku kukala. Neyi chayisonekawu haYililu 15:16, 17, nawu: ‘Nakafunta, nakatuñulula cheñi tabanaka yaDavidi yinashiwuki; nakajikajika munahumoki, nakayimika cheñi; kulonda antu anashali akakeñakeñi Yehova, niantu akunyuza yejima, antu anatumbuwu ijina dami, dimwanahoshiyi Yehova.’

⁷ Ilaña muntu nateli kuhosha nindi, ‘iyi nsona hiyinakuhosha nawu aJentili ekalili akakwitiya ateleli kuyalamishaku.’ Eña, ilaña, aYudeya akwaKristu atiyili mwatalishili iyi nsona. A Yudeya akwaKristu amweneña aJentili alamishiluwu nawu hiyana kwawu bayi neyi ‘antu amunyuzaku.’ (Kwid. 12:48, 49) Chakutalilahu, kwesekeja naBayibolu yaBagster’s version of the Septuagint, mukanda waEsita 8:17 wahosha nawu: “A Jentili amavulu ayalamishili, nawa ekalili aYudeya.” Dichi antu atiyili nsañu yashimwinuwu muNsona yakwila nawu antu ejima anashali mwitala daIsarela (dikwila nawu aYudeya niantu alamishiluwu abalumukili kwikala aYudeya) hamu ‘nawantu ejima amunyuza’ (aJentili ayizuzu) akekala antu anatumbuwu ijina daNzambi. Dichi, aJentili akeñeleña kwikala akwaKristu hiyateleleli kuyalamishaku.

8. Indi kubula woma kwayikwashili ñahi kufuukula haniyi nsañu?

⁸ Izu daNzambi nispiritu yindi yayikwashili awa akwaKristu alala ‘kutiyañana namuchima wumu.’ (Yil. 15:25) Hela chakwila nsañu yafuukwiluwu yaleñeleli akwaKristu aYudeya asweji kuyikabisha, antu ashinshika ahamekeli nankashi nsañu yafuukwiluwu yashindameneni haBayibolu.—Yil. 16:4, 5.

 CHAAMBU CHAMWEKENI CHIKUPU

9. Chumanyi chacheni chaluwañesheli kudifukula kwalala, nawa ntañishilu yamuchidinyi yatachikili?

⁹ Kapostolu Pawulu washimwini nindi chakafwawu apostolu, chikuhwelelu chawakwaKristu chakaluwankana nantañishilu yakutwamba. (Tañenu 2 Atesalonika 2:3, 7.) Akulumpi amuchipompelu adiñi hakachi kawantu ‘alekeli kuleja kwalala.’ (2 Tim. 4:3) Dihafumini Pawulu kusoñamisha aeluda hayina mpinji nindi: ‘Mukachi kenwenu aweni mwakanyamuka antu akahoshaña yuma yaheña, akadikokela atumbanji awenawu.’ (Yil. 20:30) The New Encyclopædia Britannica yashimuna chuma chacheni chakojejeli antu kwikala naniyi yitoñojoka nawu: “AkwaKristu adizishiluwu maana awaGriki atachikili kutoñojoka nawu atela kulumbulula yuma yakuhweleleluwu kushindamena hamaanawu, kulonda aditiyisheña aweni kuwaha namaanawu nikukwasha asenji ataña kulonda etiyi.” Ntañishilu yaluwañesheli asenji yakundamini hansañu yakumwiluka Yesu Kristu. Bayibolu yamutenaña nawu hiMwana kaNzambi; ilaña antu adiña namaana awaGriki ahosheleña nawu hiNzambi.

10. Indi nsañu yakumwiluka Kristu adi kuyimanisha ñahi?

¹⁰ Iyi ntañishilu ayitaadikileña hakubulakana kwakuvulu kwawakulumpi jamachechi. Iyi nsañu kachi ayimanishileña swayi neyi antu apompeleña ashindameneneña haNsona, ilaña amavulu ashileñaku maana wanyi. Amavulu afuukwilileña chadimu henohu kanda abulakani, nawa kwosi watwesheleña kuhimpa yitoñojoka yawu. Nshimbi niyuma yafuukwileñawu neyi anabulakani hiyashindameneneña haNsonaku.

11. Kalemesha kamuchidinyi kayinkeleñawu antu atenañawu nawu Atata jawantu mumaChechi, nawa muloñadi?

¹¹ Muloñadi chabulileñawu kuzatisha Nsona chikupu? Nkuluñaña Charles Freeman wahosheli nindi antu akuhweleleli nawu Yesu hiNzambi “chayikalilileña kwiteja nsañu yayivulu yahosheliyi Yesu yakwila nawu Nzambi Tata wamubadika.” Chafuminumu, atachikili kulemesha yitoñojoka nitushidikilu twawakulumpi jamuchechi nakudiwula Nsañu Yayiwahi. Nikulelu, akulumpi jansakililu alemeshaña nankashi nsañu yahoshañawu antu atenañawu nawu aTata jawu amuChechi kubadika Izu daNzambi! Neyi mwahanjikahu dehi nsañu Yawanzambi Asatu nakadizi wamuchechi, hadaha mwamweni chadeteleñayi hebwaambu.

12. Yumanyi yatama yakoñeliyi mwanta?

¹² Anyanta amuRoma diwu aswejeleña kuluwañesha neyi akulumpi jamachechi anabulakani. Nkuluñaña Richard E. Rubenstein wasonekeli nsañu yamwekeni hakubulakana kwamaChechi muNicaea nindi: “Constantine wayihakwililuku [amabishopu] nawa wayinkeli yikumba yayivulu nankashi. Nichaaka kumana nehi, iwu mwanta wamuha wafuntishili hela watuñulwili machechi awu ejima, wayifuntishili hanyidimu nikuyinka yifulu yayitambwiluwu . . . Wayinkeli akulumpi jawakwaKristu yuma yenkeleñawu atupristu asenji.” Dichi, “Constantine wekalili nawuswa wakuluwañesha—hela tuhu kukanjikija antu—kwila yuma yakeñeleñayi muNicaea.” Charles Freeman wetejeli nindi: “Kufuma hayina mpinji yabulakenuwu iwu mwanta watachikili kuluwañesha nsañu jamuChechi nintañishilu.”—Tañenu Yakoba 4:4.

13. Yumanyi yakojejeli anlomboli amuchechi amuyaaka yalondeleluhu kukaana ntañishilu yalala yamuBayibolu?

¹³ Hela chakwila chayikalileña akulumpi jamuchechi kumwiluka Yesu Kristu, ilaña antu amavulu amwilukili. Chineli wena hiyadiña namuchima wakufwila maheta amwanta hela kwikala nayifulu yamuchechuku, amweneña nikwiteja yuma yadizileñawu muNsona. Nawa elileña mwahosheleña nsona chikupu. Mukulumpi  wansakililu, Gregory wakuNyssa, wayisupishili kutalisha hadi awa antu nindi: “Akwakulandisha yakuvwala, akwakuhimpa mali, niakwakulandisha mumasitolu wejima wawu hiyakwansakililu. Chimwayihula nenu ayileji chalemena mali imukweti, akwamaana akuhosha nawu Mwana wambuka chikupu naTata yindi. Neyi muyihula wuseya wadinkedi, akwakula nawu Tata wamubadika Mwana. Neyi muyihula kulonda mwiluki neyi ayiloñeshela dehi menji akuwela, akuyileja nawu kwosi chuma chazatishiluwu hakuleña Mwana.” Eñañi, kwambukaku nawakulumpi amachechi, antu amavulu ahakwilileñaku chalala kuzatisha Izu daNzambi. Gregory nialundanindi ateleleli kutiyilila mwahosheleñawu!

“TIDIKU” ‘NIMATAHU’ JIKULILAÑA HAMU

14. Muloñadi chitukuhoshela netu kufuma muyaaka nkulakaji yakusambila nakutwalekahu, akwaKristu awayishewa anatwalekuhu kushakama hamaseki?

¹⁴ Muchishimu chindi, Yesu nindi kufuma muyaaka nkulakaji yakusambila nakutwalekahu, hamaseki hakekalaña akwaKristu alala awayishewa. Wayesekejeli ‘natidiku’ yakulilileña hamu ‘namatahu.’ (Mat. 13:30) Hela chakwila hitukutwesha kwiluka antu hela izaza dawantu amwizanvu dawawayishewa datidikuku, ilaña tuneluki chikupu netu mpinji yejima kwekalaña antu amakwawu ahakwilañaku Izu daNzambi chakadi woma nikufuñununa ntañishilu yakutwamba yamumachechi. Tutalenu yakutalilahu yantesha.

15, 16. Tenenu antu alemesheli Izu daNzambi.

¹⁵ Mukulumpi wamabishopu Agobard wakuLyon, France (wadiñaku mu 779-840 C.E.), wahishili antu kupesha ankishi, kudibuka kudi antu alemeshañawu muchechi, nikubula kwila yuma yabula kwitejewa munsona yalemeshañawu muchechi. Ibwambu dindi wumu, Bishopu Claudius, niyena wakaanini tushidikilu twamuchechi nawa wahishili antu nindi aleki kudifukula kudi antu alemeshañawu nikuyiwumbeka. Muyaaka nkulakaji yamu 11, Archdeacon Berengarius, wakuTours, France, amuhañili muchechi hamuloña wakukaana ntañishilu yawaKatolika yakwila nawu dinkendi nivinyu yabalumukaña mujimba nimashi aKristu muchihayamisha. Wahosheli cheñi nindi Bayibolu yikweti ñovu kubadika tushidikilu twamuchechi.

¹⁶ Peter wakuBruys niHenry wakuLausanne, adiñaku munkulakaji yayaaka yamu 12, akeñeli chalala chamuBayibolu. Peter walekeli mudimu windi wawupristu muloña wakaanini ntañishilu yawaKatolika yabulili kwikala muNsona yidi neyi, kupapatisha anyana anyanya, kubalumuka kwamankendi nivinyu muchihayamisha kulonda ekali mujimba nimashi aKristu, kulombela afu nikudifukula kukulusu.  Muchaaka cha 1140, Peter amujahili kukoola yuma yakuhweleleliyi. Henry, membala wamuchechi, wahosheli chakadi woma hayuma yatama yakoñeleñawu muchechi nikudifukula munjila yatama. Amukasili mu 1148 nawa wafwilili mukaleya.

17. Yumanyi yalema yeliliyi Waldo niantu jindi?

¹⁷ Kwakwihi nampinji yamocheluwu Peter wakuBruys wamumi hamuloña wakutadikisha ntañishilu yamuchechi, diyi mpinji yavwalikili muntu wumu wazatili mudimu weneni wakutandisha chalala chamuBayibolu. Ijina dindi dikwawu wadiña Valdès, hela Waldo. * Kwambukaku naPeter wakuBruys niHenry wakuLausanne, Valdès hadizili yuma yamunsakililuku, ilaña walemesheli Izu daNzambi chakwila walekeli kuzata mudimu wakumujimba nakusha muchima hakubalumuna nyikanda yikwawu yaBayibolu mwidimi datela kutiyawu antu amavulu amuchipakasu chamusela waFrance nakabeta kambwela. Amavulu ahizumukili hakutiya nsañu yamuBayibolu mwidimi dawu chakwila ashili nyidimu yawu nakusha muchima hakuleja antu chalala chamuBayibolu. Chumichi chayitapili akulumpi jachechi kunyichima. Mu 1184, awa amayala niambanda adikita, ateneneñawu nawu akwaWaldenses, ayihañili muchechi kudi papa nawa bishopu wayihañili mumatalawu. Chumichi chaletesheli nsañu yamuBayibolu kushika kumaluña amakwawu. Mukuhita kwamafuku, antu jaWaldo, Peter wakuBruys niHenry wakuLausanne niantu amakwawu afumini mumachechi apalañeneni mumatuña amavulu amuEurope. Antu amakwawu ahakwililuku chalala chamuBayibolu muyaaka yalondeleluhu diwu awe: John Wycliffe (wadiñaku mu 1330-1384), William Tyndale (wadiñaku mu 1494-1536), Henry Grew (wadiñaku mu 1781-1862) niGeorge Storrs (wadiñaku mu 1796-1879).

“MAZU ANZAMBI HIYAYIKASAÑAKU”

18. Shimunenu njila yazatishileñawu atudizi aBayibolu ashinshika hakudiza Bayibolu muyaaka nkulakaji ya 19 nichiyazatikili chiwahi.

¹⁸ Ayilumbu jachalala chamuBayibolu aneseki chikupu kukañesha chalala kubula kutanda, ilaña anakañanyi. Mukanda wa 2 Timotewu 2:9 nawu: “Mazu aNzambi hiyayikasañaku.” Mu 1870, izanvu dawatudizi aBayibolu ashinshika datachikili kukeñakeña chalala. Adizileña ñahi? Elileña ñane, muntu wumu wukwihula lwihu. Atachika kuhanjeka hanolu lwihu. Atalileña nsona yejima yinakuhosha hanochu chikuma, neyi aditeja nawu munahoshi nsona dimu, akukumakeja nsañu yejima nakuyisoneka. Twazañalala nankashi hakwiluka netu awa amayala ashinshika, akufwana apostolu niakulumpi amuyaaka nkulakaji yakusambila, ‘ankakulula jetu akuspiritu’ adiñaku kukumana kwayaaka yamuma 1800, adikasili munyichima yawu kukakela Kwizu daNzambi.

19. Indi nsona yachaaka cha 2012 yinakuhosha nawudi nawa yinateleli ñahi?

¹⁹ Yuma yitwakuhwelela yashindamena haBayibolu. Dihanafumi Izaza Dalombolaña dawaYinsahu jaYehova kutonda nsona yachaaka cha 2012 yinakukonkomwena mazu ahosheliyi Yesu nindi: ‘Izu deyi hinsañu yalala.’ (Yow. 17:17) Chineli antu ejima afwilaña kutambwila nkisu yaNzambi atela kwenda muchalala, wonsu wetu tutwalekuhu kulombolewa Nezu daNzambi.

[Tumazu twaheshina]

AKULENU AWA MALWIHU:

․․․․․

Indi kubulakana kwadiñuku muYerusalema mu 49 C.E. kwambukili ñahi nakubulakana kwalondeleluhu kwawakulumpi jamachechi?

․․․․․

Anyi ahakwililuku Izu daNzambi hanyima yakufwa kwawapostolu?

․․․․․

Njilanyi jazatishileñawu akwaKristu ashinshika hakudiza Bayibolu kukumana kwayaaka yamuma 1800 nawa muloñadi chiyazatikilili chiwahi?

[Malwihu aKuzatisha haKudiza]

[Mazu ekoku adi hefu 8]

Nsona yetu yachaaka cha 2012 yinakuhosha nawu: ‘Izu deyi hinsañu yalala.’—Yowanu 17:17

[Mwevulu wudi hefu 7]

Waldo

[Mwevulu wudi hefu 7]

Wycliffe

[Mwevulu wudi hefu 7]

Tyndale

[Mwevulu wudi hefu 7]

Grew

[Mwevulu wudi hefu 7]

Storrs