Atupristu Awanta Akahetesha Antu Ejima

‘Enu mumunza watondewa, muwupristu wawanta, mumuchidi wajila, mumunza wambala waNzambi.’—1 PET. 2:9.

1. Muloñadi ‘kudya kwaMwanta kwaMelela’ chakwitenenañawu cheñi nawu Chanukishu nawa kukweti nkeñelwinyi?

 NAMPINJI yamelela hefuku daNisani 14 muchaaka cha 33 C.E., Yesu Kristu niapostolu indi 12 adiña nakwanakana Paseka yawaYudeya ifuku dakukumishaku. Hanyima yakuhaña nfukeji Yudasi Isakaroti, Yesu watachikili chidika chambukaku chatenañawu nawu ‘kudya kwaMwanta kwaMelela.’ (1 Kor. 11:20) Yesu wahosheli kapampa kayedi nindi: ‘Ilenuña mwenimu muñanukaña nachu.’ Ichi chidika achitenaña cheñi nawu Chanukishu, kwanuka kufwa kwaKristu. (1 Kor. 11:24, 25) A Yinsahu jaYehova mukaayi kejima anakanaña Chanukishu hachaaka hachaaka muloña ovwahilaña ilu lushimbi. Muchaaka cha 2012 Nisani 14 yikekala haChiwana, haApril 5 yikatachika hakuhuma kwetañwa kwesekeja nakalenda yamuBayibolu.

2. Indi Yesu wahosheli nindidi hayifwikija yazatishiliyi?

² Kambanji Luka washimuna yuma yeliliyi Yesu niyahosheliyi hadina ifuku mumavasi ayedi nindi: “Hakunona dinkendi, chanasakililiyi hakudihumuna, hakuyinka, nindi, Weniwu diwu mujimba wami wanahanuwu hanyijimba yenwenu; ilenuña mwenimu muñanakanaña nachu. Mwomumu nawa, cheliluwu anadyi dehi, hakunona lupasa nindi, Lupasilu dichi chitiyañenu chachiha chamumashi ami, awa akuyipwekela.” (Luka 22:19, 20) Indi apostolu ayitiyilili mudihi awa mazu?

3. Indi apostolu elukili ñahi chalumbuluka yifwikija?

³ Chineli adiña aYudeya, apostolu elukili nyilambu yawanyama yalambwileñawu atupristu kudi Nzambi hatembeli muYerusalema. Alambwileña nyilambu yeniyi kulonda ekali nawuselewa naYehova nawa nyilambu yayivulu yadiña yakubuta nachu nshidi. (Lev. 1:4; 22:17-29) Dichi apostolu elukili nawu Yesu chahosheliyi nindi ‘wukahana mujimba windi nikupwekesha mashi  indi hanyijimba yawu,’ watalishili mukwila nindi wukuhana wumi windi wawanina neyi mulambu. Wadiña mulambu walema chikupu kubadika wawanyama.

4. Indi Yesu watalishili mudihi chahosheliyi nindi: “Lupasilu dichi chitiyañenu chachiha chamumashi ami”?

⁴ Indi mazu aYesu akwila nawu “lupasilu dichi chitiyañenu chachiha chamumashi ami” ayitiyilili mudihi? Apostolu elukili wuprofwetu wachitiyañenu chachiha wasonekawu haYeremiya 31:31-33. (Tañenu.) Mazu aYesu amwekesheli nawu watachikili ichi chitiyañenu chachiha chahiñili hachitiyañenu chaNshimbi jayinkeluwu aIsarela kudi Yehova kuhitila mudi Mosi. Komana iyi yitiyañenu yiyedi yadiña yadifwana?

5. Chitiyañenu chaNshimbi chaletesheli aIsarela kwikala nakukoolekanyi?

⁵ Eñañi, nkeñelu yaniyi yitiyañenu yadiña yadifwana chikupu. Hampinji yatachikiliyi chitiyañenu chaNshimbi, Yehova walejeli munza waIsarela nindi: ‘Neyi chalala mukwovwahilaña izu dami, neyi mukuhembaña chitiyañenu chami, mukwikala chuma chalema, chamami aweni chakwambula munyunza yejima yawantu; muloña iseki dejima damami; mukwikala wanta wami wawatupristu, nimunza wajila.’ (Kwid. 19:5, 6) Indi awa mazu aIsarela ayitiyilili mudihi?

CHIKANINU CHAWATUPRISTU AWANTA

6. Indi chitiyañenu chaNshimbi chashikijileña chikaninwinyi?

⁶ A Isarela elukili mwalumbulukila izu ‘dachitiyañenu,’ muloña Yehova watiyañeni yitiyañenu yalema yamuchidiwu nawankakulula jawu Nowa niAbarahama. (Kutach. 6:18; 9:8-17; 15:18; 17:1-9) Hakutiyañana naAbarahama chitiyañenu, Yehova wamukanini nindi: ‘Kudi anyaneyi nyunza yejima yahamaseki yakawenaku kukooleka.’ (Kutach. 22:18) Chitiyañenu chaNshimbi chashikijileña ichi chikaninu. A Isarela adi kwikala ‘chuma chalema, chakwambula munyunza yejima yawantu’ chaYehova kushindamena hanichi chitiyañenu. Akazata mudimwinyi? ‘Akekali wanta waYehova wawatupristu.’

7. Indi nhoshelu yakwila nawu ‘wanta wawatupristu’ yatalishili mudihi?

⁷ A Isarela adiña eluka anyanta niatupristu, ilaña Melekizedeki hohu diyi muntu wakushankulu etejeluwu kudi Yehova kwikala mwanta nikapristu. (Kutach. 14:18) Ichi dinu Yehova wenkeli munza kukooleka kwakwikala ‘wanta wawatupristu.’ Neyi chamwekesheluwu munyikanda yonenawu chimwahitili yaaka, chumichi chaletesheli kwikala nakukooleka kwakwikala atupristu awanta, anyanta adi kukalakala cheñi neyi atupristu.—1 Pet. 2:9.

8. Nyidimwinyi yazatañawu atupristu atondawu kudi Nzambi?

⁸ Mwanta wayuulaña. Indi kapristu wazataña mudimwinyi? Mukanda waAheberu 5:1 walumbulula nawu: “Atupristu amaneni ejima atondañawu mukachi kawantu, ayikunjikaña mudimu wakukoñela antu muyuma yaNzambi, kulonda akalambuli yamukunkulu, nakuketula yimuna yahanyiloña.” Dichi kapristu atondeluwu kudi Yehova wemeneneñaku akwanshidi kumesu aNzambi kuhitila mukuhana nyilambu, nikuyilembelelaku kudi Nzambi. Kapristu wamwimenañaku cheñi Yehova kumesu awantu nakuyileja nshimbi jaNzambi. (Lev. 10:8-11; Mal. 2:7) Dikwila nawu, kapristu atondawu kudi Nzambi wakwashaña antu kukundama cheñi kudi Nzambi.

9. (a) Chumanyi chadi kuletesha aIsarela kushikija chikaninu chakwikala ‘wanta wawatupristu’? (b) Muloñadi Yehova chatondeleliyi atupristu mukachi kawaIsarela? (c) Chumanyi chakañesheli aIsarela kwikala ‘wanta wawatupristu’ muchitiyañenu chaNshimbi?

⁹ Chitiyañenu chaNshimbi chayinkeli  aIsarela kukooleka kwakwikala atupristu awanta adi kuhetesha ‘antu ejima.’ Hela chochu, ateleleli kwila chuma chimu hakwila ekali naniku kukooleka kwakuwahi: “Neyi chalala mukwovwahilaña izu dami, neyi mukuhembaña chitiyañenu chami.” Komana aIsarela ‘ovwahililili chikupu izu daYehova’? Eña, adinkeleñaku. Komana ovwahilileña nankashi? Inehi. (Rom. 3:19, 20) Dichaletesheli Yehova kutonda atupristu hayina mpinji mukachi kawaIsarela, ambukaku nawanyanta kulonda alambuleña nyilambu yawanyama hanshidi yakoñeleñawu aIsarela. (Lev. 4:1–6:7) Kushilahu ninshidi jakoñeleña atupristu. (Heb. 5:1-3; 8:3) Yehova wetejeleña nyilambu yeniyi, ilaña hiyamanishileña nshidi jawu chikupuku. Atupristu amuchitiyañenu chaNshimbi hiyatwesheleña kukundamisha aIsarela ashinshika kudi Nzambi chikupuku. Kapostolu Pawulu wahosheli nindi: ‘Mashi ayizamba yañombi niawampembi hiyanatweshi kufumisha nyiloña hela hantuku.’ (Heb. 10:1-4) Muloña wakufumpa Nshimbi, aIsarela ayishiñili. (Ŋal. 3:10) Hiyatwesheli kukalakela antu neyi atupristu awanta hakwikala ashiñewaku.

10. Indi chitiyañenu chaNshimbi chazatili mudimwinyi?

¹⁰ Komana chikaninu chaYehova chakwila nawu aIsarela anateli kwikala ‘wanta wawatupristu’ chayili mumenji? Inehi. Neyi ovwahilili chakufuma hamuchima, adi kwikala naniku kukooleka, hanu dinu bayi muchitiyañenu chaNshimbuku. Muloñadi? (Tañenu Aŋalija 3:19-25.) Nshimbi yakwashileña aIsarela adiña nakwovwahila chakufuma hamuchima muloña hiyadifukwileña kudi akishuku. Yayikwashili aYudeya kwiluka nawu hiyakwanshidi nawa nawu akeñeleña mulambu weneni kubadika yalambwileña kapristu wawu muneni. Nshimbi yadiña nkuluñaña wakuyilombola kudi Kristu hela Mesiya, nkumbu yalumbuluka nawu ‘Wawayishewa.’ Hela chochu, chenjiliyi Mesiya wadi kutachika chitiyañenu chachiha chashimwineñahu dehi kudi Yeremiya. Amwitejeli Kristu ekalili muchitiyañenu chachiha nawa akekala ‘wanta wawatupristu.’ Tutalenu chichadiña.

ANTU AMUCHITIYAÑENU CHACHIHA ANEKALI ATUPRISTU AWANTA

11. Indi Yesu wekalili ñahi chikuku chawatupristu awanta?

¹¹ Mu 29 C.E., Yesu wakuNazareta wekalili Mesiya. Chashikijiliyi yaaka 30 wadiheni kulonda azati mudimu waYehova wadimena, welili mwenimu kuhitila mukupapatishewa mumenji. Yehova wamwitejeli nindi “Mwanami nakeña,” wamuwayishili bayi namanjuku, ilaña naspiritu yajila. (Mat. 3:13-17; Yil. 10:38) Amuwayishili yekali Kapristu Muneni nawa Mwanta wakumbidi kulonda antu ejima akumukuhwelela akahetelumu. (Heb. 1:8, 9; 5:5, 6) Diyi walilili amakwawu chikuku chakwikala atupristu aweni awanta.

12. Indi mulambu waYesu wukaleta nkiswinyi?

¹² Hakwikala Kapristu Muneni, mulambwinyi wadi kulambulayi Yesu kulonda wubuti chikupu nshidi yaswanini antu akumukuhwelela? Neyi chahosheliyi hampinji yakutachika Chanukishu chakufwa kwindi, wumi windi wawanina dimulambu. (Tañenu Aheberu 9:11, 12.) Kufuma mpinji yapapatisheweliyi Yesu mu 29 C.E., hakwikala Kapristu Muneni, wadihanini kulonda amweseki nikumudizisha sampu nichafwiliyi. (Heb. 4:15; 5:7-10) Chamusañwiluwu wayili mwiwulu nakuhana mulambu windi walema kudi Yehova. (Heb. 9:24) Dichi Yesu watela kuyilembelela antu akukuhwelela mulambu windi kudi Yehova nikuyikwasha kulonda amuzatileña Nzambi nakuchiñeja wumi wahaya nyaka. (Heb. 7: 25) Mulambu windi waletesheli chitiyañenu chachiha chikali chalema.—Heb. 8:6; 9:15.

13. Chumanyi chayimwekenaña antu amuchitiyañenu chachiha?

¹³ Antu ekala muchitiyañenu chachiha ayiwayisha naspiritu yajila. (2 Kor. 1:21) A Yudeya niaJentili ashinshika ekalili muchitiyañenu chachiha. (Efwes. 3:5, 6) Chumanyi chayimwekenaña antu amuchitiyañenu chachiha? Ayanakenaña chikupu nshidi jawu. Yehova wakanini nindi: “Ami nakayanakena kuluwa kwawu, ninshidi yawu hinakayanuka nawa cheñuku.” (Yere. 31:34) Chineli ayanakena nshidi jawu ekala nakukooleka kwakwikala ‘wanta wawatupristu.’ Petulu wasonekeli nakuleja akwaKristu awayishewa nindi: ‘Enu mumunza watondewa, muwupristu wawanta, mumuchidi wajila, mumunza wambala waNzambi; kulonda mutiyakeshaña kashinshi kakeni kayena wayitambikili nindi mufumi mumwidima, mwiñili muchejeji chindi chakuhayama.’ (1 Pet. 2:9) Petulu hanu wazatishili mazu ahosheliyi Yehova nawaIsarela hampinji yayinkeleñayi Nshimbi nawa wayikunjikili kudi akwaKristu amuchitiyañenu chachiha.—Kwid. 19:5, 6.

ATUPRISTU AWANTA AKAHETESHA ANTU EJIMA

14. Atupristu awanta akakalakelaña kudihi?

¹⁴ Indi antu amuchitiyañenu chachiha amba kakalakela kudihi? Hamu neyi izaza akalakelaña hamaseki neyi atupristu, nakumwimenaku Yehova kudi antu kuhitila ‘mukutiyakesha kashinshi kindi’ nikuloñesha yakudya yakuspiritu. (Mat. 24:45; 1 Pet. 2:4, 5) Chafwawu, ayisañulaña kulonda akalakeleña hamu naKristu mwiwulu neyi anyanta niatupristu, azataña nyidimu yejima. (Luka 22:29; 1 Pet. 1:3-5; Chim. 1:6) Kapostolu Yowanu wamweni muchimwenu yileñaleña yakuspiritu yayivulu yinemani kwakwihi netanda daYehova mwiwulu. ‘Mukamina kakaha’ kamwimbililuwu ‘Mwana kaMukoku’ embili nawu: ‘Wunamukuulili Nzambi antu akunyichidi yejima, akumadimi ejima, akumatuña ejima, akunyunza yejima, namashi eyi. Anekali dehi wanta waNzambi niatupristu; hiyakuyuula hamaseki.’ (Chim. 5:8-10) Muchimwenu chikwawu,  Yowanu wahosheli hadi awa anyuuli nindi: ‘Akekala atupristu ambala aNzambi niaKristu, akayuulila hamu nindi ikombakaji danyaka.’ (Chim. 20:6) Ekala atupristu awanta akaletela antu nkisu hamu naKristu.

15, 16. Atupristu awanta akaletela antu nkiswinyi?

¹⁵ Nkiswinyi yakaletawu a 144,000 hamaseki? Mumukanda waChimwekeshu kapetulu 21 ayilumbulula neyi ñanda yamwiwulu, Yerusalema Yayiha, yatenañawu nawu ‘iñodaMwana kaMukoku.’ (Chim. 21:9) Vasi 2 nakushika ku 4 yahosha nawu: “Hinukumona ñanda yajila, yowu Yerusalema yayiha, yidi nakusuluka kudi Nzambi kwiwulu, ayiloñesha dehi neyi nsumbuki anawahishuwu kulonda asumbuki nanfumwindi. Hinukutiya izu datiyakana dikufuma mwitanda dawanta nindi, Tiya, tabanaka yaNzambi hiyidi nawantu; yena wakashakama nawu, niwena akekala antu indi; Nzambi yomweni wakekala nawu, wakekala Nzambi yawu. Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” Iyi nkisu yayiwahi chikupu. Kufwa kwaleñelaña antu kudila, kuneña nikukata akakwifumishahu. Antu ashinshika akekala awanina, akayikundamisha chikupu kudi Nzambi.

¹⁶ Mukanda waChimwekeshu 22:1, 2 watwalekahu kulumbulula nkisu yikaleta atupristu awanta nawu: ‘Hakunleja kaloña kamenji awumi, kakekema neyi ilola dakejima, kadi nakufuma mwitanda daNzambi dawanta, dodaMwana kaMukoku. Mukachi kamukwakwa wayu [waYerusalema Yayiha], niishinadi niishinadi dakaloña, hadi mutondu wawumi, wasoñaña nyikabu ikumi nayiyedi; wasoñaña nyikabu yindi hakakweji hakakweji. Mafu anowu mutondu akuuka nachu nyunza.’ Ichi chimwenu chatulejaña chakokawu chikupu ‘nyunza,’ hela mazanvu awantu nshidi yaswaninuwu kudi Adama. Chalala ‘yuma yakusambila yikahita.’

ATUPRISTU AWANTA ANAMANISHI MUDIMU WAWU

17. Mudimwinyi wukazatawu atupristu awanta?

¹⁷ Yaaka 1,000 yakukalakela antu chiyakamana, atupristu awanta akakwasha antu kwikala awanina. Chineli hiKapristu Muneni nawa Mwanta, Kristu wukahana antu awanini kudi Yehova. (Tañenu 1 Akorinda 15:22-26.) Atupristu awanta akamanisha chikupu mudimu wawu.

18. Neyi atupristu awanta anamanishi dehi mudimu wawu, Yehova wakayinka mudimwinyi alunda jaKristu?

¹⁸ Indi Yehova wakayinka mudimwinyi awa alunda jaKristu alemeshayi chikamana yaaka ikombakaji? Kwesekeja naChimwekeshu 22:5, ‘akayuulaña neyi anyanta haya nyaka nanyaka.’ Akayuulañanyi? Bayibolu hiyashimunaku. Hamuloña wakukwasha antu abula kuwanina nikwikala nawumi wabulaña kufwa nikutoka, chumichi chikayikwasha kwikala alema kumesu aYehova haya nyaka.

19. Indi antu akapompa kuChanukishu akayanukisha chumanyi?

¹⁹ Chitwakapompa nakwanakana Chanukishu chakufwa kwaYesu haChiwana, April 5, 2012, tukanukaña iyi nsañu yamuBayibolu. AkwaKristu awayishewa ashalahu achidi hamaseki akadya yifwikija yamankendi akadi iluñi nikunwa vinyu yichinana, chumichi chamwekeshaña nawu ekala muchitiyañenu chachiha. Iyi yifwikija yamulambu waKristu yakayanukisha nyidimu yayiwahi yikwetuwu muyuma yafuukulayi Nzambi yahaya nyaka. Wejima wetu tukapompa tunakukeña kuhameka chikupu atupristu awanta atondayi Yehova Nzambi akaleta nkisu hadi antu ejima.

MUNATELI KULUMBULULA?

․․․․․

Mpinjinyi yakanini Yehova katachi nindi kukekala atupristu awanta?

․․․․․

Indi antu amuchitiyañenu chachiha ekalaña ñahi atupristu awanta?

․․․․․

Atupristu awanta akaletela antu nkiswinyi?

[Malwihu aKuzatisha haKudiza]

[Mwevulu wudi hefu 29]

Atupristu awanta akaleta nkisu hadi antu haya nyaka