Dizilenu ‘Kuchikuku Chansañu Yalala’

‘Mukweti chikuku chakwiluka nichansañu yalala yidi muNshimbi.’—ROM. 2:20.

1. Muloñadi chitwatela kwikalila namuchima wakwiluka netu Nshimbi jamwinkeluwu Mosi jadiña jalema?

 NEYI nyikanda yonenewa yasonekeliyi kapostolu Pawulu nehi, mutenowu chadi kutukalila kwiluka netu yuma yayivulu yadiña muNshimbi jamwinkeluwu Mosi yalema. Chakutalilahu, mumukanda wayisonekeleliyi aHeberu, walumbulwili chadikuhanayi Yesu “kapristu muneni” ‘mulambu wefutu danyiloña’ kamu hohu bweñi kulonda antu akakuhwelela muniwu mulambu ‘akayikuli chahaya nyaka.’ (Heb. 2:17; 9:11, 12) Pawulu walumbulwili nindi tabanaka yadiña “mwevulu wayuma yamwiwulu” nawa nindi Yesu wekalili Ihaku ‘dachitiyañenu chabadika kuwaha’ kubadika wuhaku wachitiyañenu chaMosi. (Heb. 7:22; 8:1-5) Mumafuku aPawulu, iji Nshimbi jayikwashili akwaKristu, nikulelu jichidi kutukwasha. Jatukwashaña kwiluka chikupu netu yuma yatwinkayi Nzambi yalema.

2. Kukooleka kwamuchidinyi kwadiña nawakwaKristu aYudeya kwabuliluwu aJentili?

² Hampinji yayisonekeleliyi Pawulu akwaKristu muRoma, mazu amakwawu wayikunjikili kudi antu muchipompelu amuchisaka chawaYudeya nawa adizishiluwu Nshimbi jamwinkeluwu Mosi. Welukili nindi chineli antu amuchidiwu adiña eluka Nshimbi jaNzambi, adiña nachitachi chachiwahi chakwikala ‘nachikuku chakwiluka nichansañu yalala’ yaYehova ninshimbi jindi jaloña. Chineli elukili ‘chikuku chansañu yalala’ nikuchilemesha nankashi chayikwashili akwaKristu aYudeya kwikala neyi aYudeya ashinshika akushankulu nikwikala namudimu wakulombola, kutañisha nikukwasha antu abulili kwiluka Nshimbi jaheniyi Yehova kudi antu jindi.—Tañenu Aroma 2:17-20.

 YAHENEÑA MWEVULU WAMULAMBU WAYESU

3. Twahetelañamu ñahi mukudiza hanyilambu yahanineñawu aYudeya akushankulu?

³ Chikuku chansañu yalala chateneniyi Pawulu chinateli kutukwasha ninetu kwiluka nkeñelu yaYehova. Yuma yadizileñawu antu muNshimbi jamwinkeluwu Mosi jichidi jalema nikulelu. Dichi, tutalenu hachuma chimu chashimwinuwu muNshimbi chinakumwekesha nyilambu yashiyashana chayikwashili aYudeya kumwiluka Kristu nikwiluka yuma yakeñeleñayi Nzambi nindi akoñeña. Chineli nshimbi jenkañayi Yehova antu jindi hijahimpañaku, tukuhanjeka cheñi hanshimbi jaNzambi jayinkeliyi aIsarela kutalisha hanyilambu chijinateli kutukwasha kulonda tudishinshiki neyi twamukalakelaña namuchima wumu.—Mal. 3:6.

4, 5. (a) Indi Nshimbi yamwinkeluwu Mosi yayanukishileñadi antu jaNzambi? (b) Indi nshimbi yaNzambi yanyilambu yemeneneñaku chumanyi?

⁴ Yuma yayivulu yadiña muNshimbi jamwinkeluwu Mosi jakwashileña aYudeya akushankulu kwiluka nawu adiña akwanshidi. Chakutalilahu, neyi muntu yakwata mufu chiña yaditookesha. Hakwila yaditookeshi, ajahileña ñombi wakadi ihuji wuchinana nakumwocha. Mawuti ayihembeleña kulonda akayishi ‘mumenji akutookesha nachu,’ kufumahu amusansileña muntu anakukosawu hefuku damuchisatu nidamuchitanu nachiyedi neyi najiloli dehi. (Kuch. 19:1-13) Nawa ayilejeli nawu antu ejima avwalikaña nakubula kuwanina ninshidi, dichi mumbanda wunafumi hakusampuluka amulejeleña kushakama namajilu, kufumahu dinu hakuhana mulambu wakubuta nachu nshidi yindi.—Lev. 12:1-8.

⁵ Nyilambu yawanyama ayizatishileña cheñi neyi muntu navulumuni nyiloña yikwawu kulonda yabuti nachu nshidi. Hela elukili hela elukili wanyi, iyi nyilambu ninyilambu yahanineñawu muyaaka yalondeleluhu hatembeli yaYehova, yadiña “mwevulu” wamulambu waYesu wawanina.—Heb. 10:1-10.

CHUMA CHALETESHELEÑA MUNTU KUHANA MULAMBU

6, 7. (a) Yumanyi yayikwashileña aIsarela hakusakula nyilambu yakuhana, nawa yemeneneñaku chumanyi? (b) Malwihwinyi itwatela kudihula?

⁶ Yehova waheni lushimbi nindi neyi muntu nakukeña kuhana mulambu wakanyama chiña yahana kanyama ‘wamuwahi chikupu,’ bayi waputa mesu, wakotoka, wabalakataña hela wakataku. (Lev. 22:20-22) A Isarela hakuhana nyikabu hela tidiku kudi Yehova, ahanineña “yakahila,” ‘yasweja kuwaha’ yamwiha dawu. (Kuch. 18:12, 29) Yehova hetejeleña nyilambu yabula kushikilamuku. Lushimbi lwaheniyi Yehova kutalisha hanyilambu yawanyama lwamwekesheleña nawu mulambu waYesu hiwakekala nehuji hela hiwataminaku nawa nawu Yehova wakahana mulambu wawuwahi, wakeñayi nankashi wakukuula nachu antu.—1 Pet. 1:18, 19.

⁷ Neyi muntu wunakuhana mulambu wudi namuchima wakumuhameka Yehova hayuma yayiwahi yamukoñelañayi, komana kwila yahana mulambu wawuwahi wukwetiyi nehi? Muntu yomweni diyi wafuukwileña kuhana mulambu wunakukeñayi. Hela chochu, welukileña nindi Nzambi wukuneña neyi yamwinka mulambu wabula kushikilamu muloña wukumwekesha nindi kuhana mulambu kwalema wanyi hela hichiteli. (Tañenu Malaki 1:6-8, 13.) Chumichi chikutukwasha ninetu kutoñojoka hanyidimu yitwamuzatilaña Nzambi:  ‘Muloñadi chinamuzatilaña Yehova? Komana natela kushinshika hanyidimu yinamuzatilaña kulonda nimoni neyi yayiwahi nihayuma yaleñelaña nimuzatileña?’

8, 9. Muloñadi chitwatela kutoñojokela hayililu yamwekesheleñawu aIsarela hakuhana nyilambu yawu?

⁸ Neyi kaIsarela yahana mulambu namuchima wumu hamuloña wakusweja kumusakilila Yehova, neyi chichadiña hakuhana mulambu wakushiita, indi kwiji nakukeña nindi Yehova yamukiswili, chikwikala chaswayi kunona kanyama wamuwahi nakuhana. Mukwakudifukula wukuzañalala hakumwinka Yehova mulambu wawuwahi nankashi. AkwaKristu makonu hiyahanaña nyilambu yashimunawu muNshimbi yamwinkeluwu Mosuku; ilaña ahanaña nyilambu kuhitila mukuzatisha mpinji yawu, ñovu, nimaheta hakumuzatila Yehova. Kapostolu Pawulu wahosheli hansañu yakuchiñeja yawakwaKristu ‘yetejañawu hatooka’ ‘nikwila yuma yayiwahi nikudyañana’ nindi niyena hinyilambu yamuzañaleshaña Nzambi. (Heb. 13:15, 16) Yililu yamwekeshañawu antu jaYehova hakukalakala iyi nyidimu yamwekeshaña nawu ahamekaña hayuma yejima yayikoñelayi Nzambi. Dichi hosi chaambu hakachi kayililu yikwetuwu antu anakuzata mumudimu wawakwaKristu makonu nayililu yawantu akushankulu alambwileña nyilambu namuchima wumu.

⁹ Mpinji yikwawu, muNshimbi yamwinkeluwu Mosi yahosheleña nawu muntu watela kuhana mulambu wanshidi yakoñeliyi kunyima. Chineli lushimbi lwahosheleña nawu watela kuhana mulambu, komana chadi kumukalila muntu wamuchidiwu kuhana mulambu namuchima wumu? Tahindi ayihanineña nakuhilashana? (Lev. 4:27, 28) Neyi muntu wunavulumuni nakukeña kwikala nawubwambu wawuwahi naYehova hanateli kwila mwenimuku.

10. “Nyilambu” yamuchidinyi yatela kuhanawu akwaKristu neyi anadivulumuni?

¹⁰ Nikulelu, tunateli kuvulumuna mana kwetu munhoshelu, chakadi kwiluka indi kwiji twalusuka mukuhosha. Chinleji chenu chikuyileja nawu munavulumuni. Muntu wunakukeña kumuzatila Yehova chikupu wukuzata nañovu kulonda yaleti kuwunda, netuku? Watela kulomba kwanakena kudi muntu anavulumuniyi, neyi navulumuni chikupu, wukulomba nindi amukwashi kuspiritu kudi ankoñi akwaKristu akweti kukeña. (Mat. 5:23, 24; Yak. 5:14, 15) Komana twatela kuzata nañovu hakwila tumanishi kukala kutunavulumuni mana kwetu hela Nzambi yomweni. Hela chochu, neyi tuhana “nyilambu” yamuchidiwu, tukwikala cheñi nawubwambu wawuwahi naYehova niana kwetu nawa tukwikala nachinleji chitooka. Chitwela mwenimu, tukwiluka netu njila jaYehova dijabadika.

11, 12. (a) Chumanyi chadiña nakwimenaku nyilambu yakuwunda? (b) Indi nyilambu yakuwunda yinakundami ñahi kukudifukula kwalala kwamakonu?

¹¹ Nyilambu yikwawu yashimwinuwu  muNshimbi yamwinkeluwu Mosi yadiña nyilambu yakuwunda. Yamwekesheleña nawu muntu wunahani wadiña nakuwunda naYehova. Muntu wahanineña iwu mulambu nichisaka chindi adiileña mbiji yakanyama wunalambuluwu, hadaha ayidiilileña mukapeka kamu kakudyila kamutembeli. Kapristu walambwileña kanyama amwinkeleña chipeha chambiji, niatupristu amakwawu azatilileña hatembeli. (Lev. 3:1; 7:31-33) Mukwakudifukula wahanineña mulambu kulonda yekali nawubwambu wawuwahi naNzambi. Chadiña neyi mukwakudifukula, chisaka chindi, atupristu niYehova yomweni ashakamineña nakudiila hamu yakudya namuzañalu nikuwunda.

¹² Iku kwadiña kukooleka kweneni chikupu kwakumutambika Yehova muchifwikija nakudiila hamu yakudya niyena yeteja. Muntu neyi natambiki mwenyi wamudiishaña mwenyi walemeshayi yakudya yayiwahi nankashi. Ntanjikilu yanyilambu yakuwunda, dikwila nawu, chibalu chachikuku chaNshimbi yalala, chahosheleña hachuma chimu chakwila nawu kuhitila mumulambu wabadika waYesu, antu ejima anakufwila kwikala nawubwambu wawuwahi nankashi nikuwunda naNleñi yawu atela kuhana nyilambu yayiwahi nankashi. Makonu, tunateli kwikala nawubwambu wawuwahi naYehova nikudikunda nindi neyi twikala namuchima wakuhana yuma yitukweti nikuzata nañovu mumudimu windi.

NYILAMBU YAKAANINEÑAYI NZAMBI

13, 14. Muloñadi Yehova chakaanininiyi mulambu waMwanta Sawulu?

¹³ Hakwila ayiteji kudi Yehova, nyilambu yashimwinuwu muNshimbi yamwinkeluwu Mosi antu ayihanineña ateleleli kuyihana namuchima wumu. MuBayibolu mudi yakutalilahu yanyilambu yakaaninuwu kudi Nzambi. Muloñadi chayikaaniniyi? Tutalenu yakutalilahu yiyedi.

¹⁴ Kaprofwetu Samweli wamulejeli Mwanta Sawulu nindi mpinji yinashiki dehi yakujilumuna Amaleka. Dichi Sawulu wateleli kujilumuna iwu muza niayimuna ejima. Chashindiliyi, Sawulu walejeli amashidika indi nindi amupulwishi Agagi, mwanta wawaAmaleka. Cheñi, Sawulu hakisañeni ayimuna amawahuku, wahosheli nindi akuhana mulambu kudi Yehova. (1 Sam. 15:2, 3, 21) Indi Yehova welilidi? Wamukaanini Sawulu hamuloña wakubula kwovwahila. (Tañenu 1 Samweli 15:22, 23.) Chumanyi chitukudizilaku? Hakwila nawu Nzambi yeteji mulambu, chiña muntu wunakuhana mulambu yovwahila nshimbi jindi.

15. Yililu yatama yawaIsarela amakwawu ahanineña nyilambu mumpinji yaIsaya yamwekesheli nawu adiña antu amuchidinyi?

¹⁵ Mumukanda waIsaya mwekala chakutalilahu  chamuchidiwu. Mumafuku aIsaya, aIsarela akeñeleña kumulambula Yehova kulonda ayanakeni. Ilaña, hamuloña wakwikala nayililu yatama, nyilambu yawu yadiña yamukunkulwayi. Yehova wayilili nindi: “Indi iyi yimuna yayivulu yimudi nakunketwila yanka? Ami nekuti dehi nyilambu yakushita yayizamba yanyikoku nimanji ayimuna yakudiisha; hinatiyi kwami kuwaha namashi amayoña añombi amayala hela anyana kanyikoku hela ayizamba yampembuku. . . . Bayi muleta cheñi nawa nyilambu yakuhemeshaku; insensi nayimoni dehi hichishimashima hohu.” Kukala kwafumini hanka? Nzambi wayilejeli nindi: “Hela mukuvulisha kulomba hinukutiyaku; makasenu anenzali mbe namashi. Welenu ditookeshenu; fumishenu kumesu ami kutama kwayuma yimwelaña; lekenu kwila chatama.”—Isa. 1:11-16.

16. Chumanyi chaleteshaña mulambu kuwiteja kudi Nzambi?

¹⁶ Yehova hetejeleña nyilambu yahanineñawu akwanshidi atuvukaku. Ilaña, wetejeleña kulomba ninyilambu yawantu afwilileña kulondela nshimbi jaNzambi muchihandilu chawu. Chikuku chaNshimbi chayidizishili awantu nawu adiña akwanshidi nawa ateleli kulomba kwanakena. (Ŋal 3:19) Atachikili kubalumuka munyichima muloña elukili nawu adiña akwanshidi. Anetu nawa, twatela kwiluka netu mulambu waKristu walema, muloña wabutaña chikupu hanshidi jetu. Neyi twiluka nikwikala namuchima wakusakilila, Yehova ‘wukutiya kuwaha’ nanyilambu yejima yitwamulambulaña munyidimu yetu yitwamuzatilaña.—Tañenu Masamu 51:17, 19.

KUHWELELENU MUMULAMBU WAYESU

17-19. (a) Tunateli kumuhameka ñahi Yehova hakutwinka mulambu wefutu danyiloña daYesu? (b) Chumanyi chitukahanjekahu muchibaaba chinahiñuhu?

¹⁷ Antu jaNzambi adiñaku henohu wuKristu kanda amweneña hohu “mwevulu” wankeñelu yaNzambi, ilañetu tunayibadiki muloña tunadimweni namesu kapu. (Heb. 10:1) Nshimbi jahosheleña hanyilambu jakolesheleña aYudeya kwikala nayililu yayiwahi yadi kuyikwasha kwikala nawubwambu wawuwahi naNzambi, yililu yidi neyi kwikala namuchima wakuhameka, kumulambula mulambu wawuwahi nikwanuka nawu atela kuyanakena nyiloña yawu. Hamuloña wakwila Nyikanda yawakwaKristu yachiGiriki yalumbulula chiwahi, chinatukwashi kwiluka netu kuzatisha ifutu danyiloña, Yehova wakafumishahu yuma yejima yinakutumwesha kalula hamuloña wanshidi nawa chayinu mpinji watwiteja kwikala nachinleji chitooka kumesu indi. Komana mulambu waYesu wefutu danyiloña hichawaana chabadika kuwaha!—Ŋal. 3:13; Heb. 9:9, 14.

¹⁸ Hakwila tuheteli mumulambu wefutu danyiloña, kudi yuma yayivulu yitwatela kwila yinabadiki hakuwiluka hohu. Kapostolu Pawulu wasonekeli nindi: ‘Nshimbi diyi nkuluñaña yetu ndo nichenjiliyi Kristu, kulonda tubalumuki kwikala aloña nakukuhwelela.’ (Ŋal. 3:24) Twatela kumwekesha chikuhwelelu chetu nanyidimu. (Yak. 2:26) Dihafumini Pawulu kukolesha akwaKristu amuyaaka nkulakaji yakusambila adiña nachikuku chakwiluka chashimwinuwu muNshimbi yamwinkeluwu Mosi kuzatisha yuma yelukiluwu. Chumichi chadi kuyikwasha kwesekeja yililu yawu nanshimbi jaNzambi jadizishileñawu antu.—Tañenu Aroma 2:21-23.

¹⁹ Hela chakwila akwaKristu makonu hiyahanaña nyilambu yashimunawu muNshimbi yamwinkeluwu Mosuku, atela kuhana nyilambu yinateli kwitejayi Yehova. Muchibaaba chinahiñuhu chikutukwasha kwiluka chitwatela kuhana nyilambu yetejañayi Yehova.

WANENU ÑAKWILU YANAWA MALWIHU:

․․․․․

Indi nyilambu yashimwinuwu muNshimbi yamwinkeluwu Mosi yemeneneñaku chumanyi?

․․․․․

Indi nyilambu yahanañawu akwaKristu makonu yinesekani ñahi nanyilambu yikwawu yahanineñawu aIsarela?

․․․․․

Yumanyi yaleteshaña mulambu awiteji hela awukaani kudi Yehova?

[Malwihu aKuzatisha haKudiza]

[Mazu ekoku adi hefu 17]

Nshimbi jaYehova jalema jenkañayi ambuñindi hijahimpañaku

[Mwevulu wudi hefu 18]

Kanyama wamuchidinyi imwadi kumulambula Yehova?

[Mwevulu wudi hefu 19]

Antu ahanaña nyilambu yetejañayi Yehova wayikiswilaña