Kuhana Nyilambu Kudi Yehova Nawumi Wejima

‘Yuma yejima yimunakwila, yilenu nawumi wejima neyi munakumukalakela Yehova.’—KOL 3:23.

1-3. (a) Komana kufwa kwaYesu hamutondu wakuyandishila kwatalishili mukwila nawu Yehova hatela kutambwila cheñi nyilambu yejima yitwahanañaku? Lumbululenu. (b) Lwihwinyi lutwatela kudihula kutalisha hanyilambu yitwahanaña makonu?

 MUYAAKA nkulakaji yakusambila C.E., Yehova wayilejeli antu jindi nindi mulambu waYesu wefutu danyiloña wunafumishuhu Nshimbi jamwinkeluwu Mosi. (Kol. 2:13, 14) Nyilambu yejima yahanineñawu aYudeya hadi yaaka yayivulu alekeli kuyihana nawa hiyadiña yalemaku. Nshimbi jakalakeli mudimu wayu neyi ‘nkuluñaña ndo-o nichenjiliyi Kristu.’—Ŋal. 3:24.

² Chumichi hichinatalishi mukwila nawu akwaKristu hiyahanaña nyilambuku. Kwambukaku, kapostolu Petulu wahosheli ‘hakulambula yimuna yakuketula yawuspiritu yakutiyisha nachu Nzambi kuwaha mudi Yesu Kristu.’ (1 Pet. 2:5) Hela chochu, kapostolu Pawulu wahosheli hatooka nindi chihandilu chamukwaKristu wadihana dikwila nawu yuma yejima yakoñañayi, anateli kuyitena nawu “mulambu.”—Rom. 12:1.

³ Dichi, mukwaKristu wahanaña nyilambu kudi Yehova, chili kuhitila mukumulambula yuma yimu hela kuleka yuma yimu. Kushindamena hayuma yitweluka kutalisha hayuma yakeñekeleña kudi aIsarela, tunateli kwiluka ñahi netu nyilambu yetu yejima yitwahanaña makonu ayitejaña kudi Yehova?

MUCHIHANDILU CHETU CHAMAFUKU EJIMA

4. Chumanyi chitwatela kwanuka hanyidimu yitwakalakalaña mafuku ejima?

⁴ Muchihandilu chetu chamafuku ejima, chinateli kumwekana kukala kwesekeja nyidimu yetu nakuhana nyilambu kudi Yehova. Nyidimu yahetala, nyidimu yakushikola, ninyidimu yakumujimba, kulanda yuma niyuma yikwawu yinateli kumwekana neyi hiyakundama nankashi kuyuma yakuspirituku. Hela chochu, neyi  mwadihana kudi Yehova indi kwiji munakufwila kudihana kumbidi, mwatela kwiluka chakuzata nayuma yakumujimba. Twekala akwaKristu mwaana niwufuku. Twatela kuzatishaña nshimbi jamuNsona munyidimu yejima yitwelaña mafuku ejima. Dihafumini Pawulu yatukonkomweni nindi: ‘Yuma yejima yimunakwila, yilenu nawumi wejima neyi munakumukalakela Yehova, bayi antuku.’—Tañenu Akolosi 3:18-24.

5, 6. Yumanyi yinateli kutukwasha kufuukulahu chiwahi hanvwalilu niyililu yetu yefuku niifuku?

⁵ Nyidimu yakalakalaña mukwaKristu ifuku niifuku hiyekala hakachi kanyidimu yindi yajilaku. Hela chochu, chineli Pawulu watukonkomwena kukalakala ‘nawumi wejima neyi tunakumukalakela Yehova,’ chatuleñelaña kutoñojoka hachihandilu chetu chejima. Dichi tunateli kuzatisha ñahi iku kukonkomwena? Komana twakoñaña yuma nikuvwala munjila yamwekeshaña kalemesha mpinji yejima? Indi neyi tunakukalakala nyidimu yetu yamafuku ejima, komana twatela kutiya nsonyi yakudilumbulula nawu tudi aYinsahu jaYehova, hamuloña wayililu yetu hela nvwalilu yetu? Hitwatela kwila mwenimuku! Antu jaYehova hiyatela kukoña chuma chidi chejima chinateli kutamisha ijina daNzambuku.—Isa. 43:10; 2 Kor. 6:3, 4, 9.

⁶ Tushinshikenu hamuchima wakufwila kukalakela ‘nawumi wejima neyi tunakumukalakela Yehova’ chiwakundama kuyuma yashiyashana yitwelaña muchihandilu chetu. Chitukwilaña mwenimu, twatela kwiluka netu nyilambu yejima yalambwileñawu aIsarela kudi Yehova yadiña yayiwahi chikupu.—Kwid. 23:19.

CHIHANDILU CHENU CHICHABOMBELAMU

7. Yumanyi yabombela mukudihana kwawakwaKristu?

⁷ Hampinji yimwadihanini kudi Yehova, mwafuukwiluhu chakadi kujinoka, hidimuku? Dikwila nawu mwatalishili mukwila nenu muchihandilu chenu chejima mukutwamijañaku Yehova. (Tañenu Aheberu 10:7.) Mwafuukwili mwamuwahi. Chakadi nikujina, munamoni nenu, neyi musambila kwila yuma yakeñañayi Yehova muyuma yidi yejima nikuzata nañovu kwesekeja nachakeñañayi, mwafumaña yuma yayiwahi. (Isa. 48:17, 18) Antu jaNzambi ajila nawa ekala amuzañalu muloña amwekeshaña yililu yaMuntu wayidizishaña.—Lev. 11:44; 1 Tim. 1:11.

8. Muloñadi chichalemena kwanuka netu Yehova wamweneña nyilambu yahanineñawu kunyaka nindi yajila?

⁸ Nyilambu yahanineñawu aIsarela kudi Yehova yadiña yajila. (Lev. 6:25; 7:1) Izu dachiHeberu dabalumunawu nawu ‘kujila’ datalisha mukwila nawu kwambukaku chikupu hela kwikala wajila kudi Nzambi. Hakwila nawu Yehova yetejeña nyilambu yetu, yatela kwikala yambukaku nawa yakadi kutamishewa nayuma yamukaayi. Hitwatela kukeña chuma chidi chejima chahelayi Yehovaku.  (Tañenu 1 Yowanu 2:15-17.) Chakadi nikujina, chumichi chaya mukwila nawu twatela kutondolwela kudikunda kudi kwejima hela kudiñija muyuma yinateli kutwitamisha kumesa aNzambi. (Isa. 2:4; Chim. 18:4) Cheñi chaya mukwila nawu hitwatela kwiteja mesu etu kutalaña yuma yamajilu hela yuma yatama indi kwiji kwiteja yitoñojoka yetu kufwikija yuma yamuchidiwuku.—Kol. 3:5, 6.

9. Indi kwilila antu kakawahi kwalema ñahi kudi akwaKristu, nawa muloñadi?

⁹ Pawulu wakonkomweneni akwawu akwakwitiya nindi: ‘Kwila yuma yayiwahi nikudyañana bayi muchivulamenaku; muloña Nzambi watiyaña kuwaha nanyilambu yidi chochochu.’ (Heb. 13:16) Dichi, kwikala antu amawahi nikuyilila antu kakawahi muchihandilu chetu hiyuma yamonañayi Yehova nindi hinyilambu yayiwahi. Kwakamena antu amakwawu hichinjikijilu chaambulaña akwaKristu alala.—Yow. 13:34, 35; Kol. 1:10.

NYILAMBU YITWAHANAÑA MUKUDIFUKULA

10, 11. Indi Yehova wamonaña ñahi mudimu wetu wakushimwina nikudifukula, nawa chumichi chatela kutwileñela twilidi?

¹⁰ Njila yimu yalema chikupu mutwelilaña yuma yayiwahi kudi antu etu akwaKristu hikuhitila ‘mukutiyakesha hatooka kuchiñeja kwetu.’ Komana mwazatishaña mpinji yidi yejima yimunakoolekeli hakushimwina wunsahu? Pawulu wateneni iwu mudimu walema wawakwaKristu nindi “mulambu wakumuhameka . . . yowu nyikabu yakunyivumbu yakwiteja ijina [daNzambi].” (Heb. 10:23; 13:15; Hos. 14:2) Chikuwaha neyi tutoñojoka hakutoha kwampinji yitwazatishaña kukushimwina nsañu yayiwahi nichitwatela kuwahishilaku ntañishilu yetu. Mpanji jajivulu jaKupompa kwaMudimu jatukwashaña kutoñojoka chikupu haniyi nsañu. Hela chochu, twatela kwanuka netu mudimu wetu wamwiha nikushimwina kwakukoolekela jekala ‘himulambu wakuhameka,’ hikudifukula, dichi mulambu wetu watela kwikala wawuwahi chikupu. Kafwampi, yuma yitwamonaña yashiyashana, mpinji yitwazatishaña hakushimwina nsañu yayiwahi kakavulu yamwekeshaña nawu twahamekaña yuma yakuspiritu.

¹¹ AkwaKristu mafuku ejima adifukulaña kudi Yehova chili hetala chili muchipompelu. Yehova wakeñaña nindi twileña mwenimu. Hela chakwila hitwalondelaña nshimbi yaSabata hela kuyaña kuYerusalema kuyawijaku, tunateli kudizila kuniji nshimbi. Nzambi wakeñaña nindi tubuleña kuzata nyidimu yamukunkulwayi kulonda tudizeña Izu dindi, kulomba nikuya  kukupompa kwawakwaKristu. Nawa mutu wachisaka chawakwaKristu wukweti mudimu wakudiza Bayibolu nachisaka chindi. (1 Tesa. 5:17; Heb. 10:24, 25) Kutalisha hanyidimu yetu yakuspiritu, twatela kudihula netu, ‘Komana natela kuyilaku hambidi mukudifukula kwami?’

12. (a) Kufutumuna insensi kwadiña mukudifukula kwakushankulu anateli kukwesekeja nankahi makonu? (b) Indi kulomba kwetu kunateli kwikala ñahi neyi insensi?

¹² Mwanta Davidi wamwimbilili Yehova nindi: “Kulomba kwami kushiki kudeyi neyi insensi.” (Mas. 141:2) Chachiwahi kutoñojoka hakuvula kwamapampa itwalombaña kudi Nzambi nihayuma yitwalombaña. Mukanda waChimwekeshu wafwanisha “kulomba kwawakwakujila” nainsensi nawu kulomba kwetejañayi Yehova kwashikaña kudi yena neyi ivumba dadiwahi. (Chim. 5:8) MuIsarela wakushankulu, insensi yafutumwinineñawu hakameña kaYehova adiñi nakuyiloñesha chachiwahi. Yehova wayitejeleña hohu neyi chakwila ayifutumwina kwesekeja nanshimbi jayilejeliyi. (Kwid. 30:34-37; Lev. 10:1, 2) Neyi kulomba kwetu kufuma hamuchima, dichi tunateli kukuhwelela netu kulomba kwetu kukushika kudi Yehova.

KUHANA NIKUTAMBWILA

13, 14. (a) Mudimwinyi wamuzatililuwu Pawulu kudi Epafwaditu nichipompelu chawaAfwilipi, nawa kapostolu watiyili ñahi hachuma chenichi? (b) Tunateli kwimbujola ñahi Epafwaditu niAfwilipi?

¹³ Mali itwahanaña hakukwasha mudimu wakushimwina mukaayi kejima adi neyi mulambu, chili tuhana mali amavulu chili antesha. (Maku 12:41-44) Muyaaka nkulakaji yakusambila, chipompelu chakuFwilipi chamutemesheli Epafwaditu kuRoma kulonda kumwakamena Pawulu muyuma yakumujimba. Ntemesha yeniwu wafumini kuFwilipi wamusendeleli niyawaana yamali yafumini kuchipompelu. Iyi bayi neyi diyi mpinji yatachi yamumwekesheleluwu Pawulu chisambu kudi Afwilipuku. Hamuloña waluwi lwawu hiyakeñeleña Pawulu yatoñojokeña hansañu jamaluku, ilaña akeñeleña yamanishileña mpinji yeneni mumudimu wakushimwina. Indi Pawulu watiyili ñahi hayawana yeniyi? Wayiteneni nindi “hiivumba dadiwahi, chidi neyi chimuna chakuketula, chatela kutambula, chakumutiyisha Nzambi kuwaha.” (Tañenu Afwilipi 4:15-19.) Pawulu wahamekeli chikupu hachisambu chamwekesheluwu kudi Afwilipi nawa Yehova watiyili mwomumu.

¹⁴ Hohamu nimakonu, Yehova wahamekaña chikupu yawana yetu yitwahanaña kumudimu wamukaayi kejima. Hela chochu, watushiika nindi neyi tutwalekahu kusambila kukeña Wanta muwumi wetu wakatwakamena muyuma yejima yitwakeñaña, yakuspiritu niyakumujimba.—Mat. 6:33; Luka 6:38.

MWEKESHENU KUHAMEKA

15. Yumanyi yayileñelaña mumuhamekeña Yehova?

¹⁵ Tukweti yuma yayivulu yinateli kutuleñela kumuhameka Yehova. Komana hitwatela kumuhamekaña ifuku niifuku hachawana chawumi watwinkayuku? Watwinkaña yuma yejima yitwakeñaña hakwila tutwalekuhu kuhanda, chidi neyi yakudya, yakuvwala, nihakukama kubombelahu mpepela yitwoonaña. Kubombelahu, chikuhwelelu chetu chashindamena hakwiluka nsañu yalala, chatwinkaña kuchiñeja. Chachiwahi kudifukulaña kudi Yehova nikuhana mulambu wakumuhameka nachu, hamuloña wawuntu windi nawa hayuma yatwikoñelayi.—Tañenu Chimwekeshu 4:11.

16. Munjilanyi mutunateli kuhamekela mulambu wefutu danyiloña daKristu?

¹⁶ Neyi chitwadizili muchibaaba chinafumuhu, chawaana chabadika chenkayi Nzambi antu himulambu wefutu danyiloña daKristu. Iku hikukeña kwambukaku chikupu kwatumwekesheleliyi Nzambi hatooka. (1 Yow. 4:10) Njilanyi yayiwahi yakumuhamekelamu? Pawulu wahosheli nindi:  “Kukeña kwaKristu kwatukakejaña; muloña tuneluki chalala netu wumu chafwililiyi antu ejima, . . . Wafwilili ejima kulonda antu akuhanda abuli kudihandila cheñi awenawu, amuhandilaña yena wayifwilili, wasañukili mudi afu.” (2 Kor. 5:14, 15) Dichi Pawulu wahosheleña nindi neyi twahamekaña luwi lwabadika lwatumwekeshelayi Nzambi, tukuzatisha wumi wetu kulonda Tumulemesheña hamu niMwanindi. Twamwekeshaña kukeña nikumuhameka Nzambi niKristu kuhitila mukumwovwahila nimpwila yitukweti yakushimwina nikwilisha atumbanji.—1 Tim. 2:3, 4; 1 Yow. 5:3.

17, 18. Antu amakwawu anayiluku ñahi hambidi mukuhana mulambu wakumuhameka nachu Yehova? Shimunenu chakutalilahu.

¹⁷ Komana kwila muyilaku hambidi mukuhana mulambu wakuhameka nachu Nzambi nehi? Hanyima yakutoñojoka hayuma yayiwahi yinakoñeliyi Yehova antu, chinaleñeli antu amavulu kwikalaku nampinji nikuloñesha nyidimu yawu chiwahi kulonda akalakaleña chikupu mumudimu wakushimwina Wanta hela nyidimu yikwawu yateokalatiki. Amakwawu akalakalañaku mudimu wawupayiniya wakukwasha kakweji kamu hela twatuvulu hachaaka nichaaka, hakwila amakwawu akalakalaña mudimu wawupayiniya wampinji yejima. Amakwawu akalakalaña mudimu wakutuña matala azatishañawu hakumukalakela Yehova. Komana iji, hinjila jajiwahi jakumuhamekelamu nehi? Neyi tukalakala nyidimu yeniyi namuchima wumu, kumuhameka, Nzambi wetejaña nyidimu yitwamuzatilaña.

¹⁸ AkwaKristu amavulu anakufwila kumuhameka Yehova. Muntu wumu watiyili mwenimu hiMorena. Wakulilili muKatolika nawa wadiña namalwihu amavulu kutalisha hadi Nzambi. Wasandujoleli hañakwilu yamalwihu adiñayi nawu muchaachi yaKatolika nimaana akwituña daAsia. Ilaña hawanini ñakwilu yamuzañalesheluku. Mpwila yindi yakuspiritu yenjili nakumana helili yatachiki kudiza Bayibolu nawaYinsahu jaYehova. Morena watiyili kuwaha chikupu hakumwakula malwihu indi ejima adiñayi nawu kuhitila mukuzatisha Nsona nawa ñakwilu yeniyi yakolesheli chihandilu chakwila wakeñeleña kumuhameka Yehova kuhitila mukuzata nañovu jindi jejima mumudimu windi. Cheliliyi yapapatishewi watachikili kukalakalaku mudimu wawupayiniya wakukwasha mumpinji mumpinji, nawa chapelesheliyi chihandilu chindi, watachikili wupayiniya wampinji yejima. Munahiti dehi yaaka 30, nawa Morena wuchidi mumudimu wampinji yejima.

19. Munateli kuyilaku ñahi hambidi hakumulambula Yehova?

¹⁹ Hela chochu, kudi ambuña Yehova ashinshika amavulu akweti chihandilu chayikañeshaña kuzataku mudimu wawupayiniya. Wejima wetu tunateli kumwinka nyilambu yakuspiritu yayiwahi kuhitila mumudimu wudi wejima wutunateli kukalakala mumudimu waYehova. Twatela kulondela chikupu nshimbi jaloña nakwanuka netu twamwimenañaku Yehova mpinji yejima kuhitila muyililu yetu. Twakuhwelelaña chikupu netu Nzambi wakazata kwesekeja nankeñelu yindi kuhitila muchikuhwelelu. Twakwashaña mudimu wakutiyakesha nsañu yayiwahi kuhitila munyidimu yayiwahi. Kwila mwenimu twamwekeshaña netu twahamekaña hayuma yejima yatukoñelayi Yehova. Dichi tutwalekenuhu kumwinka Yehova nyilambu nawumi wejima.

TALENU NEYI MUNATELI KWAKULA:

․․․․․

Tunateli kumulemesha ñahi Yehova nanyidimu yetu yefuku niifuku?

․․․․․

Nyilambwinyi yitwahanaña mukudifukula kwetu kudi Nzambi?

․․․․․

Tunateli kuhana ñahi yuma yetu yakumujimba kudi Yehova?

[Malwihu aKuzatisha haKudiza]

[Mazu ekoku adi hefu 25]

Komana kuwaha kwaYehova kwayileñelaña muyiluku hambidi mukuhana nyilambu yenu yakumuhameka nachu?

[Mwevulu wudi hefu 23]

Komana mwazatishaña mpinji yidi yejima yimunakoolekeli hakushimwina wunsahu?