‘Natela Kushimwina Ñahi?’

Mukaayi kejima, tudi nayakutalilahu yayiwahi yawamana kwetu niahela akalakalaña mudimu wakushimwina nakashinshi hela chakwila anakuyekela natunkati. Talenu chakutalilahu chaDalia, washakamineña muVilnius, musumba weneni wakuLithuania.

Dalia himuhela wudi nayaaka yakubadika ha 30. Kufuma tuhu hakuvwalika, wakabakanaña nachikatu chakalepa chakuwoñu. Ichi chikatu chamushiya nawulepa nawa wakabakanaña nankashi hakuhosha. Antaña jindi hohu diwu atweshaña kutiya nsañu yinakuhoshayi. Dalia washakamaña nawamama yindi aGalina nawa diwu amuhembaña. Hela chakwila Dalia wamonaña yinzeñeli, ilaña wekala wamuzañalu. Chumanyi chamukwashaña?

Galina walumbulwili nindi: “Mu 1999, musonyami wamumbanda Apolonija wenjili nakututala. Chenjiliyi, twamweni netu Apolonija, wadiña Chinsahu chaYehova, welukili nsañu yamuBayibolu, Dalia yatachika nikumupopa malwihu amavulu. Hashimbwili wanyi, Dalia watachikili kudiza Bayibolu. Mpinji jikwawu, nashakamineñahu neyi anakudiza nakulumbulula jahosheleñayi Dalia. Namweni nami yuma yejima yamudizishileñawu yamushikileña hamuchima chikupu. Hashimbwili wanyi, anami nalombeli nami inakukeña kudiza Bayibolu.”

Chelili Dalia yatachiki kwiluka chalala chamuBayibolu, kudi lwihu lwamukabishileña nankashi. Ifuku dimu, wenzulwili kukanwa nakumwihula Apolonija nindi: “Indi muntu wudi neyi ami, chifwayi chamuntu, nateli kushimwina ñahi?” (Mat. 28:19, 20) Apolonija wamulejeli mumesu awunda nindi: “Bayi wutiya womaku. Yehova wukukukwasha.” Mwalala, Yehova wakwashanaña.

Hanu dinu, Dalia washimwinaña ñahi? Wazatishaña njila jajivulu. Ahela akwaKristu amukwashañaku kusoneka nyikanda hadi nsañu yamuBayibolu. Chatachi, Dalia wayilejaña ahela nsañu yinakukeñayi kushimwina. Kuhiñahu, asonekaña nsañu yinashimuniyi hamukanda. Dalia washimwinaña cheñi kuhitila mukutemesha mazu hanshiña yindi. Neyi kunachi chiwahi, amana kwetu muchipompelu amwidishaña hanji nakushimwina kudi antu hamaluña akunookela nimumukwakwa.

Dalia nawamama yindi anakupaminaku kuspiritu. Wejima wawu adihanini kudi Yehova nawa ayipapatishili muNovember 2004. MuSeptember 2008, mumusumba Vilnius mwekalili izanvu dawamana kwetu ahosheleña chiPolish. Chineli izanvu dawakwakushimwina aWanta munidi idimi akeheli, Dalia nawamama yindi adibombeli hanidi izanvu. Dalia wahosheli nindi: “Mutukweji tukwawu naneñaña neyi nikañanya kuya nakushimwina. Chinalomba kudi Yehova, wukukasumuka muntu nenzi nindi tuyi chimu nakushimwina.” Indi muheletu wakeñewa Dalia watiyaña ñahi nayinzeñeli yinakumonayi? Wahosheli nindi: “Yikatu yanshiya wulepa, ilaña yitoñojoka yami yinakuzatika chiwahi. Nazañalalaña nankashi hakuleja antu amakwawu kulonda amwiluki Yehova!”