Nsañu Yamunkalaña Jetu

Tunakukeña Kuhemba Yuma Yalema Yakunyima

ANTU jaYehova akweti wuswana wawuwahi nankashi wakuspiritu. Iyi nsañu yawuswana yakuzañalesha hitwayiwanaña munyikanda hohuku, ilaña twayiwanaña cheñi munyevulu, munyikanda yakudisonekela, muyileji nimuyuma yakundama kukudifukula kwetu, mumudimu wetu wakushimwina ninsañu yakunyima. Hanu dinu, tukuhetelamu ñahi mukuhemba yumiyi nakutala hayuma yamwekeni kunyima? Nyitu yayisaka muIsarela wakushankulu ayinkeli mudimu wakuleja anyanawu nshimbi ninyidimu yaYehova yakuhayamisha ‘kulonda amukuhweleli Nzambi.’—Mas. 78:1-7.

Nsañu yidi munkalaña yitwasandujoleli yinazati mudimu weneni hadi yaaka yayivulu nawa yinatukwashi kwila nkeñelu yaYehova. Chakutalilahu, chelili akwakukañesha eseki kulekesha mudimu hatembeli muYerusalema, aheni lushimbi lwakukeña nyikanda munkalaña jamumusumba weneni wawaMediya waAkimeta mwawenuwu mukanda wasonekeluwu kudi Mwanta Kirusi mwetejeliyi nindi atuñululi tembeli. (Ezera 6:1-4, 12) Eñañi, tembeli ayituñulwili kwesekeja nankeñelu yaNzambi. Nyikanda yamunkalaña ayizatishili cheñi kudi nsoneki waNsañu Yayiwahi Luka, ‘washinshikili mwaya nsañu yejima hachuma hachuma, kufumisha hatachikili nsañu.’—Luka 1:1-4.

Izaza Dalombolaña dinakukeña nawu twiluki nankashi yuma yamukuloñesha kwetu yamwekeni kunyima. Membala wumu Wamwizaza Dalombolaña wahosheli hansañu yakuhemba nsañu yawuswana wetu wakuspiritu, kuyisoneka nikulejaku ana kwetu nindi, “Hakwila  nawu twiluki kutunakuya, chiña tusambila kwiluka kutunafumi.” Dihanafumi twikali nadipatimenti yatenañawu nawu Nkalaña Yawansoneki yatachika katataka hachishina chamukaayi kejima muBrooklyn, New York, nawa yidi mumakasa aKomiti Yawansoneki.

“MUKANDA WANYEVULU YACHISAKA” CHETU ‘NIYUMA YAWUSWANA’

Mukuhita kwampinji, tunateli kujimbala nsañu yamwekeni kunyima, nawa tukutachika kuditoñesha netu kachi twahembeli nsañu yakundama kuchisaka chetu. MuNkalaña Yawansoneki, amana kwetu anakuzata mudimu weneni wakuhemba nikusoneka nsañu yayuma yayiwahi yawuswana yinakuvulilaku. Nyevulu yatulawu chiwahi muNkalaña jetu niyena ayimonaña nawu ‘yidi mumukanda wanyevulu yachisaka’ chetu. Nyikanda yetu yatachi kusoneka, yileji yayiwahi yawamana kwetu niyozelu yalema niyena yidi hakachi kayuma yalema yitwatula muNkalaña. “Yuma yawuswana” yatukwashaña kwiluka yuma yayivulu yawuswana wetu wamukuloñesha nawa tunakuhweleli netu chisaka chetu chakuspiritu chikatwalekahu kuhanda chiwahi.

Tutalenu ntahi mudimu wazataña Nkalaña Yawansoneki kuhitila mukusandujola chibaaba chachiha chinakuhosha nawu “Nsañu yamuNkalaña Jetu.” Chikumwekanaña muKaposhi Kakutalila kakudizamu hampinji hampinji. Chakutalilahu, mukaposhi kakalondelahu, tunakufwila kushamu mwevulu wukatukwasha kwakula awa malwihu: Indi Dawn Mobile hichumanyi? Anyi ayizatishileña? Mpinjinyi yayizatishileñawu, nawa ayizatishileña kumudimwinyi?

Neyi chochekala mukanda wanyevulu yachisaka, nsañu yitwashaña muNkalaña yatukwashaña kudiluka etu aweni niwuspiritu wawankakulula jetu, yatulejaña hachikuhwelelu nikuhamuka kwamwekesheluwu ana kwetu akusambila, nihamuzañalu nilamba damwenuwu hakuzatila Tata yetu wamwiwulu wukweti kukeña nichalombolañayi Nzambi nikukwasha antu jindi. (Kuhit. 33:27) Tunakuhweleli netu Yehova wukukiswila nyidimu yitukudikitaña hakufwila kuhemba nsañu yakunyima yamukuloñesha kwetu kulonda tutwalekuhu kwikala anuñañana nikwikala namuchima wakwila nkeñelu yindi.

[Chikasha/Mwevulu wudi hefu 31]

Tutalenu Chiyazataña

Hakuloñesha nyikanda yetu yawakwaKristu, maDVD ninyikanda yikwawu yashindamena haBayibolu, ansoneki jetu, akwakufunjeka, akwakusandujola nsañu niana kwetu amakwawu azatishaña yuma yidi munkalaña. AkwaNkalaña Yawansoneki ashañaku muchima nawa anakulondela njila yayiwahi yakukeñelamu nikuhemba nsañu yayivulu yakunyima kufuma kutusanji twanyitayi, madipatimenti ahaBeteli, yipompelu, antu ninyitayi yakwituña. Talenu chelañawu hakuzata iwu mudimu.

Kuwana Nsañu niKuyisandujola: Munkalaña anakupompeshelamu nsañu yashiyashana mpinji yejima. Nsañu jajivulu atwinkaña hela twatambulaña kudi antaña jawamana kwetu niahela anamukalakeli Yehova nakashinshi hadi yaaka yayivulu. Chitwawana nsañu yamuchidiwu, twayitalaña nikuyesekeja nawa yatukwashañaku kwiluka nsañu yamwekeni kunyima niantu adiñaku hayina mpinji.

Kuyitanjika: MuNkalaña Yawansoneki mwekala nsañu yayivulu nankashi, yikwawu yinashimbulumu kubadika yaaka nkulakaji. Yenzaña munyitapu yashiyashana, kutoha niyuma yikwawu yadambujola, yuma yejimiyi atela kuyitanjika chiwahi kulonda akayizatishi kumbidi.

Kuyiwahisha niKuyihemba: Nyikanda yataboka niyuma yawuswana ayiwahishaña nakuyihemba kuzatisha njila jajiwahi nankashi. Nsañu, nyevulu, yikunku yansañu yawakayikuzulemba, jifwilimu nimazu akukwatila hajitepu ajishaña hakompyuta. Neyi hiyakukeña kuzatisha iyi nsañu hela yuma yikwawu yakunyaka, anateli kuyiwana hakompyuta chatela asandujoleña hayipapilu.

Kutula Munkalaña niKuyizatisha: Nsañu yashañawu muNkalaña ayitulaña nikuyihemba chiwahi kuchina yakenda kakisika nachejeji nichinyanji-nyanji. Progiramu yahakompyuta anakuyitohesha kulonda yikwashaneña hakusandujola nsañu nikuzatisha cheñi iyi nsañu yalema yinakumwekesha nyidimu yetu yakunyima.

[Nyevulu yidi hefu 32]

1. Makaadi “aPhoto-Drama of Creation.” 2. Yipapilu hakusonekeshela magazini. 3. Motoka yayihoshelu. 4. Hewulu daKaposhi Kakutalila kaApril 15, 1912. 5. Kamukanda kakumulejelahu J. F. Rutherford nawu akumukasa. 6. Yihoshelu yaWBBR. 7. Phonograph. 8. Chikasha chanyikanda. 9. Nsañu yasonekeleñayi muntu. 10. Telegiramu yamutemesheleluwu J. F. Rutherford.