Ashimwinini Izu daNzambi Chakadi Woma!

Kuhamuka nikubula woma mumpinji yekañesha. Iyi yililu ayimwekeshaña kudi akwaKristu alala. Kufwana akwetu akakwitiya amuyaaka nkulakaji yakusambila, twamulombaña Yehova kulonda yatwinki spiritu yindi nikutukwasha kuhosha izu dindi chakadi woma.—Yil. 4:23-31.

Kuhosha hamudimu wetu wakushimwina mumpinji yanjita yakaayi yatachi, mana kwetu wumu wasonekeli nindi: “Ambuña aNzambi adikitileña chikupu hakuhana mukanda waStudies in the Scriptures volume 7, wadiña namutu wahosheleña nawu The Finished Mystery. Mukanda weniwu awuhanini kudi antu amavulu chikupu kubadika nyikanda yikwawu. Mu 1918, edishili tilakiti yahosheleña nawu Kingdom News Na. 1. Kuhiñahu edishili tilakiti yaKingdom News Na. 2, yalumbulwili muloña waletesheli akwanfulumendi alekeshi kuhana mukanda waThe Finished Mystery. Kuhiñahu edishili cheñi tilakiti yaKingdom News Na. 3. Awa matilakiti ayihanini mumatuña amavulu nankashi kudi izanvu dawawayishewa ashinshika. Chakeñekeleña kwikala nachikuhwelelu nikuhamuka hakuhana iyi tilakiti yaKingdom News.”

Makonu, akwakushimwina amaha aWanta ayidizishaña mpinji yejima chakushimwina mumudimu wamwiha, ilaña kunyima hichadiña mwenimuku. Kuhosha hampinji yatachi kuya mumudimu wamwiha mu 1922, mana kwetu wumu wakwituña daPoland muUnited States wasonekeli nindi: “Nayili nakudondomwena kuchisu chakasanji kandotolu nkawami nawa hinelukili chakutachika kushimwina hakuhana mukandaku, nawa nahosheleña Chizungu chabula kuha. Nansi wenzulwili kuchisu. Hinamba kajimbala chuma chamwekenuku, muloña nazañaleli nawa natiyileña woma. Chinelili nami nishinkuli ipakumuna dami, nyikanda yejima yadiñamu yashikeneni dakuholokela kunyendu yanansi. Neluki wanyi chinahosheli, ilaña namwinkeli mukanda. Chinelili nami niyeña, woma wamanini nawa Yehova wankiswilili. Nahanini tunyikanda twatuvulu hanidi ifuku mumukwakwa weniwu mwadiña antu chikupu.”

Muhela wumu wahosheli nindi “kukamwihi nachaaka cha 1933, amana kwetu amavulu azatishileña nyotoka yadiña nayisanji hakushimwina chikupu nsañu yaWanta.” Hampinji yimu, muhela yeniwu niaYinsahu adisumbula adiña nakushimwina mwiluña damapidi daCalifornia, U.S.A. Muhela wahosheli nindi “mana kwetu wayili namotoka yadiña nachisanji hewulu damapidi nawa etu twashalili mwishina mumbaka. Chatachikiliyi kuvumisha nsañu yakukwata hachisanji, yatiyakeneña neyi kwiji yinakufumina mwiwulu. Antu amumbaka esekeli kumukeñakeña mana kwetu ilaña akañenyi kumuwana. Nsañu yakukwatila hachisanji chiyamanini kuvuma, twayili kudi antu nakutachika kuyishimwina. Nazatishili nyotoka yiyedi yayisanji nawa kushimuna hohu mwalala antu akeñeleña wanyi kutiyilila kunsañu. Hela chochu, hichayikwashiluku, atiyilileña mpanji chachiwahi mumatala awu. Mpinji yejima Yehova wahanineña njila yayiwahi kulonda  kuyizatisha hampinji yatelela. Kushimwina muniyi njila kwakeñekeleña kwikala wahamuka chikupu, hela chochu yakoñeleña mudimu wayu, nawa ijina daYehova adilemesheleña.”

Muma 1930 ndo-o nikumatachikilu amuma 1940, twazatishileña yisanji yamaseleti nimpanji jaBayibolu jakukwatila hayisanji mumudimu wetu wakushimwina. Mumbanda wumu mukwaKristu wanukili nindi: “Muhela wakansi wazatileña mumudimu wakushimwina kwiitala nikwiitala kuzatisha chisanji chamaseleti. Chatachikiliyi kuvumisha chisanji hetala dimu, mwiniitala weyala wahilili chikupu chakwila wadatili chisanji chamaseleti hohana hachisu. Kwosi iseleti nidimu dabalukiluku. Amayala asatu adilileña yakudya yahachayili mumotoka amweni chuma chamwekeni, amutambikili muhela kulonda yayivumishili iseleti nawa atambwili nyikanda. Chumichi chaletesheli yawundishuku muchima hachuma chatama chamwililuwu.” Chakeñekeleña kwikala wahamuka hakuumika kweseka.

Muhela yeniwu wahosheli cheñi nindi: “Inakwanuka mpinji yitwatachikili mudimu wakuhana magazini mumukwakwa mu 1940. Hakusambila, twashimwinineña munyisululu. Amana kwetu niahela endeleleña kunsa yamukwakwa mumusululu wumu iku anasendi yipapilu hakusoneka nawu ‘Religion Is a Snare and a Racket’ ni ‘Serve God and Christ the King.’ Hampinji yoyimu, adiña nakuhana matilakiti kudi antu. Chakeñekeleña kwikala wahamuka hakushimwina muniji njila, hela chochu njila jeniji jakalakeli nkeñelu yakuhemba ijina daYehova niantu indi kumesu awantu.”

Muhela mukwawu wahosheli nindi, “Kuhana magazini mumakenu mujimbaka janyanya wadiñi mudimu wakola. Haniyi mpinji dihaswejeli kuyikaanishawu aYinsahu. . . . Chakeñekeleña kwikala wahamuka chikupu hakwimana mwihombu iku wunakwati magazini nikuhosha mazu itwafuukwiluhu. Hela chochu, hitwavulileña kujiña Hamposuku. Mpinji jikwawu, antu amwekesheleña chisambu. Mpinji jikwawu mazanvu awantu adiña nandulu atukuñileña, nawa mpinji jikwawu twawombolokeleña kuchina kutwila katama kudi mazanvu wenawa.”

Hela chakwila aYinsahu jaYehova amweni makabi Munjita yaKaayi kejima yamuchiyedi, atwalekeluhu kushimwina chakadi woma. Mumafuku 43 akampeni yatachikili haDecember 1, 1940 nakushika haJanuary 12, 1941, akwakushimwina akushika ku 50,000 muUnited States, ahanini tunyikanda twakushika kwakwihi na 8 miliyoni.

Atushinakaji amavulu amukuloñesha kwaNzambi anukaña chikupu kukala kwamwenuwu kunyima kwayileñeleleli ekali ahamuka. Amakwawu anukaña nawu hayaaka yayivulu, ahosheleña hachuma chochimu chamwekesheleña chililu chawu chakuhamuka nawu, Tutwalekuhu kushimwina ndo-o nikunsa. Nsañwinyi yatwinkayi Nzambi yatela kuzatika henohu kukuma kwadinu ituña kanda kushiki? Hela chochu, hamuloña wakutukwasha kudi Nzambi, tukutwalekahu kushimwina izu daYehova nachikuhwelelu nikuhamuka.

[Mazu ekoku adi hefu 9]

Chililu chakuhamuka chakeñekaña mpinji yejima hakuzata mudimu wakushimwina Wanta