‘Ikalenu Ahamuka Nawa Kolenu Nankashi’
‘Ikalenu Ahamuka Nawa Kolenu Nankashi’
‘Chiña wikali wahamuka nawa wakola nankashi . . . Yehova Nzambi yeyi wudi naneyi.’—YOSH. 1:7-9.
MUKWAKULA NENUDI?
․․․․․
Munjilanyi mwamwekesheleluwu aEnoki niNowa kuhamuka?
․․․․․
Indi ambanda amakwawu akushankulu amwekesheli ñahi chikuhwelelu nikuhamuka?
․․․․․
Yakutalilahwinyi yawatwansi ahamuka yinayizañaleshi?
1, 2. (a) Chumanyi chitwatela kwila kulonda twileña yuma yaloña muchihandilu? (b) Yumanyi yitukuhanjekahu?
MUNTU wahamuka hakweti womaku, hazalañaku nawa hafwaña mutentuku. Tunateli kuhosha netu muntu wahamuka wakola nawa hakweti womaku. Mpinji yikwawu, twatela kwikala ahamuka kulonda tutwalekuhu kwila yuma yaloña mpinji yejima.
2 Antu amakwawu atenawu muBayibolu hiyadiña nawoma hampinji yadiñuwu mukukala kwenenuku. Amakwawu amwekesheli muchima wakuhamuka hampinji yadiñuwu mukukala kwamonañawu ambuña aYehova onsu. Yumanyi yitukudizila kudi antu atenawu muBayibolu ahamuka? Tunateli kwikala ñahi ahamuka?
AYINSAHU AHAMUKA ADIÑA MWITUÑA DATAMA
3. Yumanyi yashimwiniyi Enoki yakaholokela atama?
3 Antu amumafuku aNowa henohu Dibaji kanda dinzi adiña atama nawa hakwila wikali chinsahu chaYehova chiña wikala wahamuka. Ilaña, Enoki, “wamuchitanu nachiyedi wakufumisha kudi Adama,” washimwini nsañu yawuprofwetu chakadi woma, nindi: “Tiyenu, Yehova wenjili namakumi amakombakaji awantu indi ajila, nakwila mudimu wakusompesha nakukonkolola ejima asekeshaña Nzambi, nanyidimu yawu yakusekesha Nzambi yakoñeluwu chakusekesha Nzambi, nayuma yakala yejima yamuhosheluwu akwanshidi asekeshaña Nzambi.” (Yuda 14, 15) Enoki wahosheli neyi kwiji yumiyi yamwekeni dehi muloña iwu wuprofwetu wadiña kwakwihi nakushikijewa. Antu atama afwili nadibaji deneni!
4. Kukalanyi kwamweniyi Nowa ‘hakwenda naNzambi’?
4 Dibaji denjili mu 2370 B.C.E., henohu mwahita dehi yaaka 650 kufuma hashimwiniyi Enoki nsañu yawuprofwetu. Haniyi mpinji, Nowa wadiña wavwalika dehi, wavweli anyana nawa watuñili watu nawanyanindi. Añelu atama avwalili nyijimba yawuntu, akamini nawambanda alubanji nawa avweli aNefwili. Hela chochu, kutama kwawantu kwatoheli nimadombu aswejeli hamaseki. (Kutach. 6:1-5, 9, 11) Hela chakwila kutama kwaswejeli, “Nowa wendeli naNzambi” nawa wadiña ‘mukwakushimwina kuloña’ wahamuka. (Tañenu 2 Petulu 2:4, 5.) Anetu nawa twatela kwikala ahamuka munanu mafuku akukuminina.
AMWEKESHELI CHIKUHWELELU NIKUHAMUKA
5. Indi Mosi wamwekesheli ñahi chikuhwelelu nikuhamuka?
5 Mosi wamwekesheli chikuhwelelu nikuhamuka. (Heb. 11:24-27) Mu 1513-1473 B.C.E., Nzambi wamwinkeli mudimu wakulombola aIsarela kufuma muEjipitu nakuyitwala mwisaña. Mosi watoñojokeli nindi hakutwesha kuzata iwu mudimuku, ilaña wetejeli. (Kwid. 6:12) Yena nimana kwindi Aroni, ayileña kudi Fwaro wawukatu wamuEjipitu nakumuleja chakadi woma nsañu Yayipupu Ikumi yakatemeshayi Yehova nakusawula ankishi amuEjipitu nikupulwisha antu Jindi. (Kwid., tupe. 7-12) Mosi wamwekesheli chikuhwelelu nikuhamuka muloña Nzambi wamukwashileña, neyi chatukwashañayi.—Kuhit. 33:27.
6. Neyi hiyakutusompesha kudi akwanshimbi, chumanyi chikatukwasha kuhana wunsahu nakuhamuka?
6 Twatela kwikala ahamuka neyi chadiñayi Mosi, muloña Yesu wahosheli nindi: “Akayitwala nikumesu awanguvulu, nikumesu awanyanta, kukoola nsañu yamami, kulonda chakayilili wunsahu niwena niaJentili. Ilaña chakayihanawu kudi antu, bayi mwakaakama nenu tukuhoshadi? Hela nenu tukuhosha mazwinyuku? Muloña akayinka mazu akuhosha yoyena mpinji oyu. Muloña hiyenu mwakahoshaku, spiritu yaTata yenu diyi [yakahosha] mudenu.” (Mat. 10:18-20) Neyi anakutusompesha kudi akwanshimbi, spiritu yaYehova yikatukwasha kuhana wunsahu nakalemesha nichikuhwelelu nikuhamuka.—Tañenu Luka 12:11, 12.
7. Muloñadi Yoshuwa chekaliliyi wahamuka nikumona kuwaha?
7 Nswana yaMosi, Yoshuwa, wadiñi nachikuhwelelu chakola nikuhamuka muloña watañileña Nshimbi jaNzambi mpinji yejima. Mu 1473 B.C.E., aIsarela adiloñesheli kwiñila Mwituña daChikaninu. Nzambi wamulejeli nindi: ‘Chiña wikali wahamuka nawa wakola nankashi.’ Neyi Yoshuwa walondeleli Nshimbi, wadi kukooleka munjila jindi nikumona kuwaha. Amulejeli nawu: “Bayi wakaakama akwenuku; muloña Yehova Nzambi yeyi wudi naneyi mwejima muwukuya.” (Yosh. 1:7-9) Awa mazu atela amukolesheli Yoshuwa nankashi! Nzambi niyena wadiña nindi, muloña njita jamaneni jashindiluwu Mwituña Dachikaninu ajimanishili muyaaka yitanu nachimu hohu, kushika mu 1467 B.C.E.
AMBANDA AHAMUKA EMIKILI MUSHINDU
8. Chumanyi cheliliyi Rahaba chinakumwekesha nawu wadiña nachikuhwelelu nikuhamuka?
8 Hadi yaaka yayivulu, ambanda amavulu anamwekeshi muchima wakuhamuka hakumuzatila Yehova. Chakutalilahu, Rahaba chivumbi wamuYeriku wamukuhweleleli Nzambi, hatiyili woma wakusweka akakwendesha ituña ayedi atemesheluwu kudi Yoshuwaku nawa wadimbili antu jamwanta wawuna musumba. Rahaba niantaña jindi ayipulwishili chelili aIsarela apupi musumba waYeriku. Rahaba walekeli wunyakalwalu, watachikili kudifukula kudi Yehova nawa wekalili nkakulula yaMesiya. (Yosh. 2:1-6; 6:22, 23; Mat. 1:1, 5) Eñañi, Nzambi wamukiswilili hama hakwikala nachikuhwelelu nikuhamuka.
9. Indi Debora, Baraka niYahela amwekesheli ñahi kuhamuka?
9 Chafwiliyi Yoshuwa kwakwihi na 1450 B.C.E., ansompeshi diwu ahakwileña muIsarela. Yabini Mwanta wakuKenani wadiña wayikabisha dehi aIsarela hadi yaaka 20 hampinji yamulejeluwu kaprofwetu wamumbanda Debora kudi Nzambi nindi yamuleji Nsompeshi Baraka kuya nakwasa njita. Baraka wapompesheli amayala 10,000 Hampidi yaTabori nawa wadiloñesheli kwasa njita naSisera, mukulumpi wamashidika aYabini, wayili muchinekineki chaKishoni nawamashidika indi nimakalu anjita 900. Chelili aIsarela eñili muchinekineki, Nzambi waleteli dibaji nakukojeja iluña dakwasila njita kwikala namalowa nawa makalu awaKenani atakili. Antu jaBaraka ashindili, ‘ninjita yaSisera yejima yatapikili hohu kumpoku yakabali zo-o.’ Hakwinza Sisera wayili nakuswama mwitenti daYahela, ilaña Yahela wamujahili iku wudi mutulu. Kwesekeja namazu awuprofwetu waDebora alejeliyi Baraka, mumbanda Yahela diyi ‘watiyakenenumu mpuhu.’ Chineli Debora, Baraka, niYahela adiña ahamuka, aIsarela ashakamini ‘mukuwunda nzo-o nyaka makumi awana.’ (Ansomp. 4:1-9, 14-22; 5:20, 21, 31) Amayala niambanda amavulu amwekeshaña chikuhwelelu nikuhamuka kwamuchidiwu.
MAZU ITWAHOSHAÑA ATUKWASHAÑA KWIKALA AHAMUKA
10. Muloñadi chitukuhoshela netu mazu itwahoshaña anateli kukwasha akwetu kwikala ahamuka?
10 Yuma yitwahoshaña yinateli kukwasha akwetu akwakudifukula aYehova kwikala ahamuka. Munkulakaji yamwaka wa 11 B.C.E., Mwanta Davidi walejeli mwanindi Solomoni nindi: ‘Wakadikwatishaña nikukola kulonda wakakoñumu; bayi wutiya womaku, bayi wakamaku; muloña Yehova Nzambi, Nzambi yami, wudi naneyi, hakakukañeshaku; hakakushiyaku nichakamana mudimu wejima wakukalakela itala daYehova.’ (1 Kushi. 28:20) Solomoni wamwekesheli kuhamuka nawa watuñili tembeli yayiwahi yaYehova muYerusalema.
11. Indi mazu akuhamuka ahosheliyi kankaña wamuIsarela amukwashili ñahi Nayamani?
11 Munkulakaji yamwaka wa 10 B.C.E., mazu akuhamuka ahosheliyi kankaña wakaIsarela akwashili mukwambumba wumu. Yendu yapalañenenumu yamukwatili nawa wekalili nduñu yaNayamani mukwambumba mukulumpi wamashidika akuSiriya. Chatiyiliyi yihayamisha yakoñeliyi Yehova mudi Elisha, iwu kankaña walejeli ñoda Nayamani nindi neyi nfumwindi yaya kuIsarela, kaprofwetu kaNzambi wukumuuka. Nayamani wayili mwituña daIsarela, amuukili muchihayamisha nawa wekalili mukwakudifukula waYehova. (2 Anya. 5:1-3, 10-17) Neyi wudi kansi wamukeña Nzambi neyi chamukeñeliyi ona kankaña, Nzambi nateli kukwinka ñovu yakushimwina antañishi, akwenu atudizi niantu amakwawu chakadi woma.
12. Indi mazu ahosheliyi Mwanta Hezekiya akwashili ñahi antu jindi?
12 Kuhosha mazu amawahi kunateli kukwasha muntu kwikala wahamuka neyi kukala kumwekana. Chenjiluwu Asiriya nakulukuka Yerusalema munkulakaji yamwaka wa 8 B.C.E., Mwanta Hezekiya walejeli antu jindi nindi: ‘Mwakahamukaña nawa mwakakolaña chacheni, bayi mwakatiya woma, hela kuhayama mwanta wakuAshuri naluntu lwejima lwadiyi naluku. Muloña wudi nanetu nabadiki wudi nayena. Kudi yena kudi chikasa chawuntu, kudetu kudi Yehova Nzambi yetu wakutukwashaku, wakutwasila njita jetu.’ Indi antu atiyili ñahi? Antu atachikili ‘kushindamena hamazu amwanta Hezekiya.’ (2 Kushi. 32:7, 8) Neyi tuhosha mazu amawahi tukwikala namuchima wakuhamuka niakwetu akwaKristu neyi tuholokela mukukala.
13. Indi Obadiya ñamba yaMwanta Ahabi wamwekesheli ñahi kuhamuka?
13 Mpinji yikwawu twamwekeshaña kuhamuka muyuma yitunabuli kuhosha. Munkulakaji yamwaka wa 10 B.C.E., Obadiya ñamba yaMwanta Ahabi wamwekesheli kuhamuka kuhitila mukusweka atuprofwetu twaYehova “makumi atanu mwiyeñu makumi atanu nawa mwiyeñu” kulonda abuli kuyijaha neyi chahosheliyi Mwanta Wamumbanda watama Yezebeli. (1 Anya. 18:4) Kufwana Obadiya wamutiyileña Nzambi woma, ambuña Yehova ashinshika amavulu makonu amwekeshaña kuhamuka kuhitila mukukiña akwawu akakwitiya nikubula kuleja ayilumbu kwadiwu.
ESITA MWADI WAHAMUKA
14, 15. Indi Mwadi Esita wamwekesheli ñahi chikuhwelelu nikuhamuka nawa chumanyi chafuminumu?
14 Mwadi Esita wamwekesheli chikuhwelelu cheneni nikuhamuka hampinji yakasiliyi Hamani watama kafuta kakuhondesha aYudeya Mwituña dawaPeresi dejima munkulakaji yamwaka wamuchitanu B.C.E. Dihafumini hiyakudila nikujiña nanzala, hadaha alombeleña nanyichima yawu yejima! (Esita 4:1-3) Mwadi Esita waneñeli nankashi. Mana kwindi Modekayi wamutemesheleli chipapilu chanshimbi hetejeluwu nawu ayijahi nawa wamulejeli nindi yayi nakwimana kumesu amwanta nakumulembelela kulonda ayumbuku akwawu aYudeya. Ilaña antu ejima ayileña kudi mwanta chakadi kuyitambika ayijahileña.—Esita 4:4-11.
15 Modekayi wamulejeli Esita nindi: ‘Neyi wukudimwenena kweyi, kupuluka kwakafuma kwacheñi. Wukuchiluka hinyi neyi hampinji yamuchidiwu wunenzi wutambwiluku wanta?’ Esita wamulejeli Modekayi kupompesha aYudeya muShushani nakumushakaminaku nanzala. Wahosheli nindi: “Ninami . . . kulonda niyi kudi mwanta chakumotoka nshimbi, neyi nanoñi, nanoñi dehi kwami.” (Esita 4:12-17) Esita wadiña wahamuka nawa mukanda wukweti ijina dindi wamwekeshaña nawu Nzambi wapulwishili antu jindi. Nikulelu, akwaKristu awayishewa nialunda nawu adihana amwekeshaña kuhamuka hampinji yinaholokeluwu mukweseka, nawa ‘Mukwakutiya kulomba’ wayikwashaña.—Tañenu Masamu 65:2; 118:6.
‘UMIKENU’
16. Yumanyi yakoñeliyi Yesu yatela kwimbujolawu atwansi?
16 Mpinji yimu munkulakaji yamwaka watachi C.E., Yesu wadiña nayaaka 12 amuwanini mutembeli, “nashakami mukachi kawankuluñaña nakutiya nikuyihujola.” Dichi, “ejima adiñi nakumutiya ahayamini kashinshi kindi nimwakuyakulayi.” (Luka 2:41-50) Hela chakwila wadiña kansi, Yesu wamwekesheli chikuhwelelu nikuhamuka hampinji yehwileñayi ankuluñaña hatembeli. Neyi akwanukaña chakutalilahu chaYesu chikuyikwasha atwansi muchipompelu chetu chawakwaKristu kuzatisha njila jejima kulonda ‘atweshi kwakula mafuku ejima antu ejima akuyihula nsañu yakuchiñeja kwachiñejañawu.’—1 Pet. 3:15.
17. Muloñadi Yesu chalejeleliyi atumbanji twindi ‘kuumika,’ nawa muloñadi chitwatela kuumikila?
17 Yesu walejeli antu nindi atela ‘kuumika.’ (Mat. 9:2, 22) Walejeli atumbanji twindi nindi: “Talenu, mpinji yikwinza, eña yinenzi dehi, yakuyipalañeshawu wejima wenu, muntu nakwindi, muntu nakwindi, mukunshiya kanka wami; ilana hinidi kanka wamuku, nidi naTata. Chinahoshi nenu mwenimu, nalondi nami mumoni kuwunda mudami. Mukumona lukadi mumpata yamunu mwishina, ilaña [umikenu], ami nemiki mpata yamunu mwishina mushindu.” (Yow. 16:32, 33) Kufwana atumbanji aYesu akusambila, antu amudinu ituña atuhela, ilaña bayi tuyimbujolaku. Chitwatoñojoka hakuhamuka kwadiña naMwana kaNzambi kukutukwasha ninetu kwikala ahamuka nakubula kudiñija mudinu ituña datama. Yesu washindili dinu ituña, anetu tunateli kushinda.—Yow. 17:16; Yak. 1:27.
‘TIYENU KUWAHA’
18, 19. Wunsahwinyi wamwekesheliyi kapostolu Pawulu wakwikala nachikuhwelelu nikuhamuka?
18 Kapostolu Pawulu womikili kweseka kwakuvulu. Mpinji yimu, neyi abulili kumupulwisha kudi amashidika awaRoma, kachi amutaboleli kudi aYudeya muYerusalema. Nawufuku, “Mwanta Yesu hakwimana kwadiñi Pawulu, hakumwila nindi, Tiyaku kuwaha; muloña chiwunanshimuni wunsahu muYerusalema, dichi wamba kashimuna nikuRoma nawa.” (Yil. 23:11) Pawulu welili mwamulejeluwu.
19 Pawulu wayizuwilili chakadi woma ‘apostolu amukunkulwayi,’ akeñeleña kuluwañesha chipompelu chamuKorinda. (2 Kor. 11:5; 12:11) Kwambukaku nanawa apostolu, Pawulu wateneni yuma yamwekesheli nawu mwalala wadiña kapostolu, yidi neyi kukasewa, mahumpu, kwenda jinjila jawubanji, niyuma yikwawu yafwana, nzala, mpwila nikubula kukaama, nikwakamena nankashi akwawu akakwitiya. (Tañenu 2 Akorinda 11:23-28.) Hakwila yekali nachikuhwelelu nikuhamuka, Nzambi diyi wamwinkeleña ñovu yamuchidiwu.
20, 21. (a) Shimunenu chakutalilahu chinakumwekesha nawu twatela kwikala ahamuka. (b) Mpinjinyi yitwatela kwikala ahamuka, nawa chumanyi chitwatela kukuhwelela?
20 Bayi neyi akwaKristu ejima akamona ikezeñuku. Ilaña, antu ejima atela kwikala ahamuka kulonda omikeña kukala kwamonañawu mpinji yejima. Chakutalilahu: “Kansi wumu weyala muBrazil wadiña hezanvu dawamakombi. Chatachikiliyi kudiza Bayibolu, wahimpili yililu yindi, ilaña antu ejima alekeleña kwiya akwawu amakombi ayijahileña. Walombeli nikuzatisha nsona hakumuleja mukulumpi wawu chaleñeleli yaleki mudimu wakwiya. Iwu mukwenzi amumbiluku chakadi kumwila katama nawa wekalili mukwakushimwina wansañu yaWanta.
21 Twatela kwikala ahamuka hakwila nawu tushimwini nsañu yayiwahi. AkwaKristu atwansi ayaña kushikola atela kwikala nanichi chililu hakwila ahembi kashinshi kawu hashikola. Hakwila muntu yalombi mpinji yakujiña kumudimu kulonda yayi nakupompa yibalu yejima hakupompa kwankambi, chiña yekala wahamuka. Twatela kwikala ahamuka muyuma yejima. Yehova wukutiya ‘kulomba kwetu kwachikuhwelelu’ hela chakwila tunaholokeli mukukala kwamuchidinyi. (Yak. 5:15) Eñañi, nateli kutwinka spiritu yindi yajila kulonda ‘twikali ahamuka nikukola chikupu’!
[Malwihu aKuzatisha haKudiza]
[Mwevulu wudi hefu 11]
Enoki wamwekesheli kuhamuka hakushimwina mwituña datama
[Mwevulu wudi hefu 12]
Yahela wahamukili nawa wadiña wakola
